Bl 35

Jakôp hơmet hŭt lê̆ lu rup yang đơ̆ng lăm hnam

1Kră Yang 'Bok Kei-Dei khan kơ Jakôp thoi âu: Iung bĕ, weh năm tŏk oei tơ Bethel. Păng pơdơ̆ng tơ noh minh pôm chơnang soi ăn kơ Kră Yang 'Bok Kei-Dei, Kră Yang mă đei tơ'bôh boih kơ ih kơplah ih kơdâu ôn kơ Êsâu 'nhŏng ih.

2Jakôp sư roi hloi kơ kon akăn sư hăm lu bơngai năm hơdai sư thoi âu: Hŭt lê̆ bĕ dôm lu rup man pơm yang đơ̆ng lu dêh tơmoi, na hum 'nhao wă kơ bơ̆n rơgoh 'lơ̆ng păng tơplih bĕ hơbĕn ao iĕm. 3Klaih kơ noh bơ̆n iung, yak năm tơ Bethel, tơ anih noh inh gô pơm minh pôm chơnang soi kơ Kră Yang 'Bok Kei-Dei, Yang mă đei tơl tơwih kơ inh năr inh đei tơdrong hli krưp păng Yang mă đei tơgŭm inh lăm năr inh oei yak rok trong. 4Na lu sư jao đĭ kơ Jakôp lu rup yang dêh tơmoi, mă khan lu le đoh kơ đon; na sư 'bŭ dôm tơmam noh ala tơm 'long kôih, jê̆ pơlei Sichem.

Jakôp pơm chơnang soi tơ Bethel

5Đơ̆ng noh lu sư pơtơm yak, Kră Yang 'Bok Kei-Dei pơm ăn kơ rim pơlei tăp dăr kơ noh đei tơdrong hli krưp, na lu đe huay kơ druh lu đe Jakôp.

6Jakôp hăm lu bơngai mă kiơ̆ sư truh tơ Lus noh pơlei Bethel lăm dêh Kanaan. 7Jakôp pơm tơ noh minh pôm chơnang soi, sư anăn anih âu El Bethela Yua kơ tơ âu Kră Yang 'Bok Kei-Dei tơ'bôh akâu Sư kơ Jakôp 'bơ̆t năr sư kơdâu đơ̆ng 'nhŏng sư Êsâu.

8Kơplah noh Đêbôra, yă rong Rê'bêka, lôch 'bŭ 'bơ̆t tơm 'long kôih tơ pơlei Bethel đe krao anăn Alôm-Bakut.b

9Kơplah lu sư truh đơ̆ng Phadan Aram. Kră Yang 'Bok Kei-Dei tơ'bôh akâu Sư kơ Jakôp dơ̆ng păng ăn tơdrong pŭn hiôk kơ sư. 10Păng khan thoi âu: Anăn ih Jakôp, dơning dơmônh ưh pă krao anăn Jakôp dơ̆ng boih, mă-lei krao anăn Isơrael. Thoi noh na Kră Yang 'Bok Kei-Dei anăn sư Isơrael.

11Kră Yang 'Bok Kei-Dei khan dơ̆ng thoi âu: Inh boih Kră Yang 'Bok Kei-Dei mơsêh mơyang, ih athei pơjing kon hơ'lơ̆p mă rai lơ; jing minh adrĕch adrung kơdrâ̆m păng lơ adrĕch adrung gô đơ̆ng ih, kư̆m đơ̆ng adrĕch adrung ih gô đei lu pơtao. 12Char inh mă đei ăn boih kơ Abraham păng Isăk na Inh gô ăn kơ ih păng lu adrĕch adrung ih.

13Đơ̆ng noh Kră Yang 'Bok Kei-Dei tŏk wih đơ̆ng anih mă sư đei pơma hăm Jakôp.

14Jakôp pơdơ̆ng hloi minh pôm jrăng tơmo tơ anih mă Kră Yang 'Bok Kei-Dei đei pơma dơnuh hăm sư tuh pơyơ̆r sik păng đak rơmă kơpal noh. 15Na Jakôp krao anih mă Kră Yang 'Bok Kei-Dei pơma dơnuh hăm sư noh Bethel.c

Tơpŭ kơ Bênjamin Rachel lôch

16Oei đơ̆ng Bethel năm wă jê̆ Êphrat dang minh 'bar măng kơ trong, na Rachel hơiơch kơ Bênjamin, gah tơdrong sư hơiơch noh sư đei jĭ pơmat dêh. 17Kơplah sư tơpŭ anat thoi noh, yă kơ'mĭn sư khan thoi âu: 'Nĕ kơ hli, yua kơ âu ih đei tơpŭ kon drŏ-nglo dơ̆ng. 18Kơplah Rachel wă kơtĕch jơhngơ̆m, lap săi kơ lai na sư anăn kon sư noh Bên Ônid 'bă sư krao anăn Bênjamin.e

19Đơ̆ng noh Rachel sư lôch, na 'bŭ 'bơ̆t cheng trong brŏk tơ Êphrat. Êphrat wă khan Betlehem. 20Jakôp pơdơ̆ng minh pôm tơmo 'bơ̆t kơ̆l, noh boih bơsat Rachel, tơmo pơdơ̆ng kơ̆l bơsat Rachel oei truh tơ dang ei.

21Đơ̆ng noh Isơrael yak, năm pơm anih oei tơ 'nguaih thôt Êder. 22Kơplah, lu đe Isơrael oei tơ dêh noh, na Rubên đei năm 'bĭch hơdai Bila, akăn kơnhŏng 'bă sư; Isơrael băt tơdrong noh.

Jô̆ mơjĭt-'bar 'nu kon drŏ-nglo Jakôp

23'Nâu Jakôp sư đei mơjĭt-'bar 'nu kon drŏ-nglo:

Kon Lêa:

Rubên, sư kon kơdră Jakôp,

đơ̆ng noh Simêôn, Lêwi, Juđa, Isakar păng Sabulôn.

24Kon Rachel:

Jôsep păng Bênjamin.

25Kon Bila đam Rachel noh

Đan păng Neptali.

26Păng kon Silpa đam Lêa,

noh Gat păng Aser.

Noh boih kon drŏ-nglo Jakôp đei tơpŭ tơ Phadan Aram.

Isăk lôch tơ Mamrê

27Jakôp truh tơ Isăk, 'bă sư, tơ Mamrê jê̆ pơlei Kiriat, wă khan Hêbrôn, anih pơlei mă bre Abraham păng Isăk oei. 28Isăk arih đei minh-hrĕng tơhngam-jĭt sơnăm. 29Sư arih sot, sư arih hrăp boih lăm chăl arih sư, na kơtĕch jơhngơ̆m kiơ̆ yă 'bok. Êsâu păng Jakôp 'bar 'nu kon drŏ-nglo sư 'bŭ 'bă bre sư.

Currently Selected:

Bl 35: bdq

Highlight

Copy

Compare