Bl 45

Jôsep roi ăn kơ lu 'nhŏng oh sư băt kơ sư. Păng athei năm sơng iŏk 'bă sư jur oei tơ sư

1Dang ei Jôsep pă kĕ ĕnh boih na sư pơma ôr thoi âu: Puh lê̆ lu bơngai Êyiptơ lĕch tơ 'nguaih, kơplah Jôsep roi tơbăt sư kơdih kơ lu 'nhŏng oh sư, na ưh kơ đei bu nai oei tơ noh. 2Jôsep nhơ̆m, ô kon pơlei Êyiptơ kơtơ̆ng păng hnam dơnŏ Pharaôn kư̆m kơtơ̆ng ang.

3Jôsep khan kơ lu 'nhŏng oh sư thoi âu: Inh boih Jôsep. 'Bă inh oei arih ưh? Mă-lei 'bơ̆t anăp sư lu 'nhŏng oh sư kơdih rŭng răng ưh kơ đei bu gơh pơma.

4Jôsep khan dơ̆ng; ơ lu 'nhŏng oh năm mă jê̆ tơ inh. Na lu sư năm jê̆ tơ sư. Sư khan inh Jôsep, oh mă lu iĕm tĕch inh kơ đe chông ba inh tơ dêh Êyiptơ sơ̆. 5Dang ei iĕm lê̆ pă tơchĕng, kư̆m lê̆ pă hmach khan tĕch inh tơ dêh char âu; noh wă kơ wei-lăng tơdrong arih lu iĕm, Kră Yang 'Bok Kei-Dei đei wơh inh năm tơ âu adrol kơ lu iĕm. 6Dang ei 'bar sơnăm boih lăm dêh char đei pơngot rơwĕt păng kư̆m oei pă pơđăm sơnăm dơ̆ng ưh kơ đei gơh choh pơtăm yă kiơ, ưh kơ đei kĕch, yuă kiơ.

7Kră Yang 'Bok Kei-Dei wơh inh năm tơ âu adrol, wă kơ lu iĕm oei đei ioi adrĕch kơpal teh âu, wă gơnang kơ minh tơdrong pơklaih tih wă oei bơwei tơdrong arih ăn kơ 'nhŏng oh. 8Ưh, kơ trŏ lu 'nhŏng oh wơh inh năm tơ âu, noh đơ̆ng Kră Yang 'Bok Kei-Dei; Sư ăn kơ inh pơm yŏng tơgŭm Pharaôn, wei-lăng đĭ hnam dơnŏ sư păng pơgơ̆r jơ̆p đĭ kơ dêh char Êyiptơ.

9Lu đe 'nhŏng oh jah brŏk tơ 'bă mă tĕnh bĕ; păng khan kơ sư thoi âu: Jôsep kon 'bă, đei khan thoi âu: Kră Yang 'Bok Kei-Dei jao inh pơm yŏng pơgơ̆r dêh Êyiptơ. 'Bă athei jur oei tơ inh; 'nĕ kơ hiơ̆. 10'Bă, lu kon, sâu, lu bơbe triu, rơmo, mŭk măk 'bă gô oei tơ tơring Gôsen kư̆m jê̆ tơ âu. 11Tơ noh inh gô wei-lăng 'bă, yua kơ oei pơđăm sơnăm pơngot rơwĕt hli kơnh 'bă, hnam dơnŏ 'bă păng đĭ-đăng mŭk tơmam gô hiong hiach.

12'Nâu lu đe 'nhŏng păng Bênjamin oh inh, đei 'bôh păng măt păng kơtơ̆ng đơ̆ng nơ̆r inh pơma dơnuh păng 'nhŏng oh. 13Thoi ei, ră roi bĕ dôm tơdrong ư-ang 'lơ̆ng inh lăm dêh Êyiptơ păng dôm tơdrong 'nhŏng oh 'bôh păng kơtơ̆ng păng jah mă tĕnh tĕnh chông ba 'bă năm tơ âu. 14Jôsep kuăr chŭm Bênjamin oh sư pôm mĕ 'bă na nhơ̆m, oh sư Bênjamin kư̆m kuăr sư na nhơ̆m. 15Jôsep kư̆m chŭm lu 'nhŏng sư na nhơ̆m. Đơ̆ng noh lu sư pơma dơnuh hăm Jôsep.

16Kơtơ̆ng truh, tơ hnam Pharaôn khan; 'nhŏng oh Jôsep truh boih, Pharaôn păng đĭ-đăng bơngai pơgơ̆r kơtơ̆ng kư̆m hiôk. 17Pharaôn đei khan kơ Jôsep thoi âu: Athei pơkă kơ lu 'nhŏng oh ih, chơ hơtŏk tơmam tơ rŏng aseh, na wih brŏk tơ dêh Kanaan. 18Chông 'bă păng đĭ hnam dơnŏ sư jur oei păng inh. Inh gô asong kơ lu sư tơmam kiơ mă gĭt hloh tơ char Êyiptơ âu păng lu sư gô choh jang đei teh 'lơ̆ng mơ̆r.

19Na inh kư̆m đei wă pơkă kơ ih dơ̆ng khan kơ lu sư thoi âu: Athei chĕp ba gre đơ̆ng dêh Êyiptơ wă chơ lu hơ'lơ̆p păng akăn lu sư păng kư̆m chơ ba 'bă jur oei tơ âu. 20'Nĕ kơeng 'mêm achăng lê̆ tơmam, yua kơ dôm tơmam kiơ mă gĭt păng 'lơ̆ng lăm dêh Êyiptơ âu gô ăn kơ lu sư.

21Lu kon drŏ-nglo 'bok Isơrael pơm kiơ̆ thoi noh Jôsep chu nơ̆r Pharaôn ăn gre păng tơmam sa rok trong kơ đe 'nhŏng oh sư. 22Sư kư̆m ăn ao tai kơ rim 'nu wă hrŭk tơplih, gah Bênjamin, sư ăn pêng-hrĕng hlak jên hu păng pơđăm blah ao tai. 23Sư kư̆m gơih thim kơ 'bă sư mơjĭt tŏ aseh chơ lu tơmam gĭt dêh đơ̆ng char Êyiptơ, mơjĭt tŏ aseh yŏng chơ 'ba, 'bĕng păng tơmam sa wă 'măn lê̆ kơ 'bă sư lăm năr jur ei kơnh. 24Thoi noh, Jôsep ăn kơ đe 'nhŏng oh sư yak brŏk. Pơkă dơ̆ng kơ lu sư: Apinh lu iĕm 'nĕ kơ tơhil băl rok trong.

Jakôp hơmet wă jur tơ dêh Êyiptơ

25Lu 'nhŏng oh sư brŏk đơ̆ng dêh Êyiptơ păng truh tơ dêh Kanaan, anih Jakôp, 'bă sư. 26Roi tơdrong noh thoi âu: Jôsep sư oei arih dang ei sư oei pơm yŏng pơgơ̆r đĭ dêh Êyiptơ. Mă-lei jơhngơ̆m Jakôp oei ưh kơ ngeh, yua kơ sư ưh kơ lui kơ nơ̆r đe noh roi. 27'Nhŏng oh sư ră roi đei tôm nơ̆r mă đơ̆ng Jôsep pơma; Jakôp 'bôh gre đơ̆ng Jôsep wă sơng iŏk sư, lei na jơhngơ̆m sư 'blŏk, 28Na khan thoi âu: Huay băt boih; Jôsep kon tơdăm inh oei arih; inh gô jur năm ngôi tơ sư adrol kơ inh lôch.

Currently Selected:

Bl 45: bdq

Highlight

Copy

Compare