Bl 50

Jôsep păng kon pơlei Êyiptơ nhơ̆m hmoi kơ Jakôp

1Jôsep kŭp kơ̆l 'bơ̆t muh măt 'bă sư, chŭm 'bă sư păng hmoi. 2Đơ̆ng noh, Jôsep athei lu thây pơm pơgang tơgŭm jang kơ sư; yua pơgang 'bâu phu pik kơ atâu 'bă sư; lu 'bok pơgang tơhum akâu Isơrael. 3Puăn-jĭt năr đe tơhum pơgang, yua kơ dôm năr noh mă tơhum pơgang tôm boih; kon pơlei pơla Êyiptơ nhơ̆m hmoi kơ Jakôp lăm tơpơh-jĭt năr.

4Đang kơ pơdong boih, Jôsep khan kơ lu 'bok tih wei Pharaôn thoi âu: Apinh iĕm mơnat kơ inh roi bĕ kơ Pharaôn kơtơ̆ng thoi âu: 5'Bă inh pơkă kơ inh thoi âu: 'Nâu 'bă wă jê̆ lôch, kon athei 'bŭ 'bă tơ bơsat mă đei răt lê̆ boih lăm char Kanaan. Thoi noh dang ei inh athei tŏk tơ noh 'bŭ 'bă inh na inh gô jur dơ̆ng tơ âu.

6Pharaôn drơ̆ng thoi âu: Năm tŏk tơ noh 'bŭ 'bă ih bĕ, thoi nơ̆r 'bă ih pơkă noh.

Pơdong atâu Jakôp tơ Kanaan

7Jôsep chơ ba atâu 'bă sư tŏk 'bŭ; tơ Kanaan; lu kuan tih Pharaôn, lu kră lăm hnam pơtao, lu kră pơlei dêh Êyiptơ, 8Đĭ-đăng lu hnam dơnŏ Jôsep đĭ lu 'nhŏng oh păng dôm lu bơngai lăm hnam dơnŏ 'bă sư kư̆m tŏk năm hơdai sư; lăm Gôsen oei lu hơ'lơ̆p păng lu triu, rơmo lu sư đĕch. 9Kŭm đei linh aseh păng gre aseh kư̆m năm hơdai; 'nâu boih mă minh tơpôl lơ tơpă năm 'bŭ.

10Kơplah truh tơ anih juă 'ba Atat, pah to đak Krong Jôrđăn, na lu sư akŭm hmoi sơ'ngon tih dêh tơ noh. Tơ noh Jôsep pơdong 'bă sư lăm tơpơh năr. 11Kon pơlei Kanaan, wă khan kon pơlei tơring ei, 'bôh đe nhơ̆m hmoi tơ anih juă 'ba Atat, na lu sư khan: Noh jơ̆ minh tơpôl pơdong tih lu bơngai Êyiptơ. Yua kơ noh na anih âu krao anăn Abel Misraima gah to đak Krong Jôrđăn.

12Thoi noh lu kon drŏ-nglo Jakôp pơm kiơ̆ thoi nơ̆r 'bă lu sư hơpơi. 13Chơ ba atâu 'bă lu sư wih brŏk tơ Kanaan 'bŭ lăm hơgơp tơmo tơ bri Makbêla jê̆ Mamrê mă đêl Abraham răt hloi hăm mir chŭn Êphrôn, đơ̆ng bơngai Hêtit, wă pơm bơsat. 14'Bŭ 'bă sư đang boih, Jôsep hăm đĭ-đăng lu 'nhŏng oh păng lu kon pơlei mă đêl kiơ̆ 'bŭ wih jur brŏk tơ dêh Êyiptơ.

Jôsep tơbăt kơ lu 'nhŏng oh sư băt kơ jơhngơ̆m đon sư

15Lu 'nhŏng oh Jôsep 'bôh 'bă sư lôch boih, na pơma tơduă lu sư khan: Băt Jôsep gô hil plơ̆ kơ lu bơ̆n păng wă pơm 'mong đơ̆ng lu bơ̆n pơm kơnê̆ kơ sư sơ̆. 16Lu 'nhŏng oh sư wơh bơngai năm pơma dơnuh hăm Jôsep thoi âu: Adrol kơ wă lôch, 'bă ih đei hơpơi thoi âu: 17Năm pơma bĕ hăm Jôsep thoi âu: Ơ Jôsep apinh ih mơnat ăn kơ tơdrong yoch glăi đêl lu 'nhŏng pơm yoch glăi păng ih, lu sư đei pơm yoch păng ih boih ră; mă-lei 'bă apinh ih 'nĕ pă jô̆ yo kơ đĭch đam Kră Yang 'Bok Kei-Dei 'bă. Kơtơ̆ng dôm nơ̆r noh Jôsep nhơ̆m.

18Kơdih kâu lu 'nhŏng oh sư năm drap bon tơ teh 'bơ̆t anăp Jôsep păng khan: Lu 'nhŏng oh 'nâu jing đĭch đam oh boih.

19Jôsep tơl lu sư thoi âu: Ơ lu 'nhŏng oh 'nĕ kơ hli kơ minh tơdrong kiơ, yua kơ inh ưh kơ gơh tơplih măt Kră Yang 'Bok Kei-Dei ôh! 20Đĭ lu 'nhŏng wă pơrăm inh ră, mă-lei Kră Yang 'Bok Kei-Dei pơm kơ inh đei yua, wă kơ dŏng pơklaih lơ bơngai, thoi noh dôm tơdrong mă đei truh dang ei păng oei wă wei rong tơdrong arih lơlang lơlap kon pơlei. 21Thoi ei, 'nĕ kơ hli, inh gô 'me rong lu iĕm păng lu kon akăn iĕm. Đơ̆ng noh Jôsep pơlung lu 'nhŏng oh sư pơma iŏk nơ̆r rơngơp hăm lu 'nhŏng oh sư.

Jôsep kră boih păng lôch

22Jôsep hăm đĭ hnam dơnŏ 'bă sư oei tơ dêh Êyiptơ; sư oei arih đei minh-hrĕng mơjĭt sơnăm. 23Sư arih đei 'bôh kon sâu Êphraim truh tơ pêng jơhnơr păng kư̆m pôk kơ'mĭn tơ blu pôih kon Maki, wă khan kon drŏ-nglo Manase hai.

24Đơ̆ng noh Jôsep khan kơ lu 'nhŏng sư thoi âu: Inh gô lôch mă-lei đei Kră Yang 'Bok Kei-Dei sư wei rong iĕm tơpă. Gô chông ba lu iĕm wih brŏk tơ dêh char mă Kră Yang 'Bok Kei-Dei đei pơkă hăm Abraham, Isăk păng 'bă bơ̆n Jakôp. 25Jôsep athei lu kon drŏ-nglo Isơrael pơkă na sư khan thoi âu: Inh khan kơ iĕm sĭt tơpă. Kră Yang 'Bok Kei-Dei gô đei năm ngôi apong tơ lu iĕm ơ 'nhŏng oh, apinh lu 'nhŏng oh 'blŏk kôch anhăk ba kơting inh tơ dêh âu hŏ.

26Đơ̆ng noh, Jôsep lôch, sư arih đei minh-hrĕng mơjĭt sơnăm. Lu đe kư̆m tơhum pik đak pơgang 'bâu phu tơ atâu Jôsep păng pôn tah lăm bong tơ dêh Êyiptơ.

Currently Selected:

Bl 50: bdq

Highlight

Copy

Compare