Yo 13

1Năr ei minh năr hơdrol kơ Năr Giĕng Năm Brih. Yêsu băt năr Sư wă jăk đơ̆ng ala teh âu tŏk brŏk tơ 'Bă Sư wă jê̆ truh boih. Sư 'mêm tơpă kơ lu bơngai lui kơ Sư, na Sư khŏm ăn akâu Sư lôch tang bơ̆n.

2Yêsu hăm lu bơngai pơhrăm păng Sư sŏng sa hơdai. Yang Satan pơhlŭ Juđa Ikariôt, kon Simôn, na Juđa wă plơ̆ plĕch kơ Yêsu boih. 3Yêsu băt kơ 'Bă Sư ăn kơ Sư gơh pơm tôm tơdrong. Păng Sư băt Sư kơdih jur đơ̆ng 'Bok Kei-Dei păng wă tŏk tơ 'Bok Kei-Dei dơ̆ng. 4Na kơplah noh Yêsu iung plôh ao 'ngoaih Sư păng iŏk kơn chô̆ 'bơ̆t rơhiĕo Sư kơdih. 5Klaih kơ noh Sư tuh đak lăm kơthao na ôp jơ̆ng lu bơngai pơhrăm păng Sư, na sut păng kơn mă đêl Sư chô̆ 'bơ̆t rơhiĕo Sư noh.

6Lăp truh tơ Pêtrôs, Pêtrôs jet Sư thoi âu: “Ơ 'Bok, Ih wă ôp kiơ kơ jơ̆ng inh?”

7Yêsu khan: “Dang ei ih ưh kơ băt Inh wă pơm kơ kiơ, kơnh ih gô băt.”

8Pêtrôs khan: “Inh ưh kơ hơnhŏ Ih ôp jơ̆ng inh na inh ưh kơ layơ ăn Ih ôp jơ̆ng ôh.” Yêsu khan: “Dah Inh ưh kơ ôp jơ̆ng ih, lei ih ưh pă pơm jơ̆ng 'bang Inh boih.”

9Na Pêtrôs khan: “Ơ 'Bok, lei ưh kơ sĭ Ih ôp jơ̆ng inh đĕch ôh, Ih ôp tôm kơ jơ̆ng ti muh măt inh hloi.”

10Yêsu khan: “Bơngai bu hum boih, bơngai 'noh sư rơgoh đĭ boih. Sư ưh pă kăl ôp ti 'nhao muh măt sư dơ̆ng ôh. Sư kăl pôm ôp jơ̆ng sư đĕch. Đĭ-đăng kơ iĕm rơgoh ngăl boih, pă minh 'nu ưh kơ rơgoh.”

11Yêsu băt boih gah bơngai wă plơ̆ plĕch kơ Sư. Kơlih kơ thoi noh Sư khan: “Pă minh 'nu ưh kơ rơgoh.”

12Sư ôp tôm kơ jơ̆ng lu sư boih, na Sư iŏk hrŭk ao 'ngoaih Sư, na wih tơ anih Sư. Lăm anih Sư ei Sư jet lu đe ei: “Iĕm hăm hlôh Inh pơm kiơ kơ iĕm thoi noh hei? 13Iĕm krao Inh 'Bok Thây iĕm păng Yŏng iĕm. Iĕm krao Inh thoi noh bưh mơ̆n yua kơ Inh 'Bok Thây iĕm păng Yŏng iĕm tơpă. 14Inh 'Bok Thây iĕm păng Yŏng iĕm, mă-lei Inh ôp jơ̆ng iĕm dang Inh pơm đĭch iĕm đĕch, mă iĕm athei ôp dih băl jơ̆ng iĕm. 15Inh ôp jơ̆ng iĕm noh, Inh pơm tơ'bôh kơ iĕm hơdrol wă kơ iĕm pơm kiơ̆ dih băl thoi noh. 16Inh khan kơ iĕm tơpăt, đĭch ưh kơ lah tih hloh kơ yŏng sư. Bơngai mă đe wơh, ưh kơ lah tih hloh kơ bơngai wơh sư. 17Na dang ei iĕm băt boih tơdrong 'noh, yua kơ Inh bơtho. Dah iĕm răk tơdrong 'noh lei iĕm gô hiôk chơt tơduă iĕm tơpă.

18“Inh pơma tơdrong noh, ưh kơ pơma tôm kơ lu iĕm ôh, yua kơ Inh băt lê̆ hơdrol boih dôm lu bơngai mă Inh rơih. Na lăm sơ̆p hla bơar 'Bok Kei-Dei khan: ‘Đei minh 'nu bơngai sŏng sa hơdai păng Inh, sư wă plơ̆ plĕch kơ Inh.’ Yua kơ chih lê̆ hơdrol sơ̆ lăm sơ̆p hla bơar 'Bok Kei-Dei, na dang ei bơ̆n gô 'bôh tơpă. 19Inh roi kơ iĕm tơdrong sư âu hơdrol kơ sư wă plơ̆ plĕch kơ Inh, wă kơ iĕm lui kơ Inh Kră Yang tơpă. 20Inh khan kơ iĕm tơpă wă kơ iĕm băt: Bơngai bu sơng iŏk bơngai mă Inh wơh, bơngai 'noh dang sơng iŏk Inh. Bơngai bu sơng iŏk Inh, noh dang sư sơng iŏk 'Bă Inh mă wơh Inh.”

Yêsu roi hơdrol kơ Juđa wă plơ̆ plĕch kơ Sư

21Đơ̆ng rŏng kơ Yêsu roi tơdrong 'noh Sư sơ'ngon tơpă na Sư pơma hơdah hloi gah tơdrong 'noh. Sư khan: “Inh khan kơ iĕm tơpăt, đei minh 'nu lăm lu iĕm wă plơ̆ plĕch kơ Inh.”

22Lu bơngai pơhrăm Sư chă hue lăng dih băl. Lu sư sơleng kơ đon ưh kơ băt bu wă plơ̆ plĕch kơ Sư. 23Minh 'nu bơngai pơhrăm păng Sư mă Sư 'mêm kơeng tơpă, sư oei jê̆ Yêsu.

24Na Pêtrôs jet bơngai ei khan: “Yêsu khan ei bu wă plơ̆ plĕch kơ Sư?”

25Na bơngai ei rĭ jê̆ Yêsu na pơma jet Yêsu: “Ơ 'Bok, bu wă plơ̆ plĕch kơ Ih ei?”

26Yêsu khan: “Dang ei Inh iŏk 'bĕng mi djrŭ lăm đak 'nhĕm na ăn, bơngai bu iŏk, bơngai ei boih plơ̆ plĕch kơ Inh.” Na Yêsu iŏk 'bĕng mi djrŭ lăm đak 'nhĕm ăn kơ Juđa kon Simôn Ikariôt iŏk.

27Lăp Juđa iŏk 'bĕng mi ei yang Satan mơ̆t lăm jơhngơ̆m sư hloi. Na Yêsu khan kơ Juđa: “Ih jah năm wăi, na ih jah pơm tơdrong ih wă pơm.”

28Lu bơngai pơhrăm păng Yêsu oei sŏng sa hơdai hăm Sư tơ ei ưh kơ hlôh Yêsu khan kơ Juđa tơdrong kiơ. 29Yua kơ Juđa wei-lăng kơdŭng jên lu sư, na lu mơ'nah ngêh kơ Yêsu khan kơ sư năm răt tơmam sa, hiă wă sa lăm năr giĕng ei thâu, dah mơnat ăn kơ bơngai dơnuh kơlĕ. 30Juđa iŏk 'bĕng mi ei na lĕch hloi tơ 'ngoaih. Kơplah ei măng mu yua kơ 'năr mơ̆t boih.

Tơdrong pơkă 'nao

31Đơ̆ng rŏng kơ Juđa lĕch na Yêsu khan: “Inh băt kơ dang ei đe gô ư-ang Inh Kon Bơngai. Hăm đe gô ư-ang kơ 'Bă Inh 'Bok Kei-Dei ăn Inh lôch tang kon bơngai. 32Kơlih kơ đe ư-ang kơ 'Bok Kei-Dei ăn Inh lôch tang kon bơngai, na 'Bok Kei-Dei wă ăn kơ đe ư-ang Inh Kon Bơngai. Sư wă ăn kơ đe ư-ang Inh dang ei boih.

33“Ơ tơpôl lu dăm, Inh oei hơdai hăm iĕm ưh pă đunh boih. Iĕm gô chă Inh; kư̆m thoi Inh khan kơ lu bơngai Juđê ki, lu iĕm ưh kơ gơh truh tơ anih Inh ôh. 34Na dang ei Inh wă pơkă ăn kơ iĕm tơdrong 'nao âu: Inh wă kơ iĕm băt 'mêm mơnat dih băl. Iĕm athei băt 'mêm mơnat dih băl kư̆m thoi Inh 'mêm mơnat kơ iĕm. 35Dah iĕm đei đon 'mêm mơnat dih băl, lei đĭ-đăng bơngai băt kơ iĕm lui kơ Inh.”

Yêsu roi hơdrol gah tơdrong Pêtrôs gô sơngah kơ Sư

36Na Pêtrôs jet Sư: “Ơ 'Bok, Ih wă năm tơ yơ?” Yêsu khan: “Mă Inh năm tơ yơ, dang ei ih ưh kơ gơh kiơ̆ Inh ôh; gô ning-mônh ih gơh kiơ̆.”

37Pêtrôs jet Sư: “Kơlih kơ kiơ inh ưh kơ gơh kiơ̆ Ih dang ei? Inh chu lôch kiơ̆ Ih.”

38Yêsu khan: “Ih khan wă chu lôch kiơ̆ Inh hă? Inh khan kơ Ih tơpă, hơdrol kơ iĕr ŏ pơgê dơning, ih gô sơngah kơ Inh pêng 'măng, ih khan ih ưh kơ băt kơ Inh.”

Yêsu trong tŏk tơ 'Bok Kei-Dei

Currently Selected:

Yo 13: bdq

Highlight

Copy