KUZOYA 16

Hagari na Ishmaeli

1Sarai, mka Abramu, nderemvaieghe Abramu wana. Ela orekoghe na mwai m'bonyi kazi Mmisri orewangwagha Hagari. 2Sarai ukamzera Abramu, “E hoku BWANA unifungie nisakeva wana lee, ndakwakaiagha na mwai wa kazi, kewada nadima kupata wana kwake.” Nao Abramu ukarumiria malagho gha Sarai. 3Niko aho nyuma ya Abramu kukaia miaka ikumi andenyi ya isanga ja Kanaani, Sarai oremmbwadieghe mwai wake wa kazi Hagari, ukamneka mumi wake Abramu ukaie muka mzumba wake. 4Abramu ukangia kwa Hagari, nao ukapata kifu; na Hagari iji wawona angu wapata kifu, ukamzighana bibi wake Sarai kwa lumenyo. 5Nao Sarai ukamzera Abramu, “Ni oho kumoni kwashekeria ngamenywa. Nerekunekieghe mwai wapo wa kazi laghenyi kwako, nao wendawona wapata kifu, wakanimenya. BWANA moni ndetanye aghadi ya ini na oho.” 6Abramu ukamzera Sarai, “Mwai wako wa kazi oko aisi yako; m'bonye seji kukunde kumoni.” Niko Sarai ukamkoronga Hagari hata ukakimbia na kughenda chia rake.

7Nao malaika wa BWANA ukamkua kireti mbai na mbai ya ndoria ya machi, chia eghenda Shuri. 8Ukamzera, “Welee Hagari mwai wa kazi wa Sarai, kwafuma hao na ni hao kughendagha?” Hagari ukamzera, “Naawuyamkimbia bibi wapo Sarai.” 9Malaika wa BWANA ukamzera, “Wuya kwa bibi wako, kukusere kumoni imbiri kwake.” 10Malaika wa BWANA ukachuria kughora, “Nichachichuria kivalwa chako nandighi hata chileme kutalika. 11Ola koko na kifu, na oho kuchava mwana wa womi, na irina jake kuchammbanga Ishmaeli, angu BWANA wasikira kililo chako. 12Nao uchakaia sa punda wa isakenyi aghadi ya wandu, ndechaasikirana na wandu, na wandu nawo ndewichaasikirana nao; nao uchakutanya na waruna wose.” 13Nao Hagari ukakukotia moni, “Ni loli nammbona Mlungu sena ngakaiagha moyo odima kujighora iji ilagho?” Nao ukammbanga BWANA uo oreghorieghe nao, “Mlungu Uhu Uwonagha.” 14Kwa huwu iyo ndoria iko ghadi na ghadi ya Kadeshi na Baredi yadawangwa Beer-lahai-roi.#16.14 Beer-lahai-roi: kutambua kwaro ni “Kiriwa cha Uo-Uko-Moyo sena Uniwonagha.”

15Hagari ukamvaia Abramu mwana wa womi, na Abramu ukammbanga irina jake Ishmaeli.#Wagal. 4.22 16Abramu orekoghe mundu wa miaka mirongo wunyanya na irandadu iji Hagari oremvaeghe Ishmaeli.

Currently Selected:

KUZOYA 16: TAITA

Highlight

Copy