Bɛ̈n 24
24
Mäny de Löŋ
1Na wën, ke lëk ë Bɛ̈nydït Mothe an, “Bäkï nhial ë kuur nɔm të nu Yɛn thïn, yïn wekë Aron, ku Nadap, ku Abiɣu, ku röördït ke Yithriɛl kathiërdhorou. Ku të kɛ̈n wek guɔ ɣëët tëthiɔ̈k, ke we gut wenïïm piny, ku lamkï Yɛn. 2Ku ee yïn abï ɣëët ë yalɔ̈ɔ̈m yïtök, ë cïn raan däŋ ɣëët ë yalɔ̈ɔ̈m ke yïn. Ku ë ke cïï bɔ̈ nhial ë kuur nɔm në yïn.”
3Na wën, ke Mothe ë lɔ kɔc guiëër jam kedhie, jam cï Bɛ̈nydït lueel ëbɛ̈n ayï lööŋke. Go kɔc puk nɔm kedhie an, “Këriëëc cï Bɛ̈nydït lueel ëbɛ̈n abuk looi.” 4Go Mothe ka cï Bɛ̈nydït lueel gäär piny kedhie. Na ɣɔn amiäk aduduur, ke ke yïk yïk në kuur thar, ku ciëp kur thäär piny kathiëër ku rou mɛ̈c kenïïm dhiëën ke Yithriɛl kathiëër ku rou. 5Ku tooc wɛ̈ɛ̈t dhuök ke Yithriɛl, agokï Bɛ̈nydït lɔ gäm miɔ̈c ye nyop ëbɛ̈n, ku gëmkï ɣɔ̈k ayadäŋ ke ye miɔ̈c de mät. 6Go Mothe biäk de riɛm de läi cï nɔ̈kë nööm, ku tɛ̈ɛ̈u abïïny yiic, ku piɛɛk biäk cï döŋ ë yïk kɔ̈u. 7Ku nööm awerek de löŋ cï mac, awerek cïï lööŋ ke Bɛ̈nydït gäär thïn, ku kuën kɔc në röl dït. Gokï puk nɔm an “Bɛ̈nydït abuk piŋ thok, ku loiku këriëëc cï lueel ëbɛ̈n.”
8 #
Math 26:28; Mak 14:24; Luk 22:20; 1 Kor 11:25; Ɣeb 10:29;
Ɣeb 9:19,20. Na wën, ke Mothe ë nöm riɛm nu në abïïny yiic, ku wïïth ë kɔc gup. Ku lueel an, “Kënë ee riɛm de löŋ cï Bɛ̈nydït mac ke week cït man ë lööŋke kedhie.”
9Na wën, ke Mothe ë lɔ në kuur nɔm kekë Aron, ku Nadap, ku Abiɣu, ku röördït ke Yithriɛl kathiërdhorou. 10Gokï Nhialic de Yithriɛl tïŋ. Yecök piny ade kë cït kuur cï yiu në kuur lɛ̈k de thapiro, ku alɔ ŋirŋir ke ye kän aräu cït tënhial. 11Ku Nhialic acïn kërɛɛc ë cï luöi bäny ke Yithriɛl. Aake cï Nhialic tïŋ, gokï jɔ cam ku dëkkï.
Mothe në Kuur ë Thinai Nɔm
12Na wën, ke lëk ë Bɛ̈nydït Mothe an, “Bä nhial në kuur nɔm të nu Yɛn thïn. Ku të cïn bɛ̈n nhial, yïn bä bɛ̈n gäm pɛɛm ke kur kaarou, paam cän lööŋkï gäär ë kekɔ̈ɔ̈th kedhie, lööŋ bï kɔc aa nyuööth.” 13Ago Mothe rɔt jɔt kekë Jocua, raan ee ye kuɔny, ku jäl Mothe#24:13: Mothe ë jäl; gäär thɛɛr tök acïk jäl. ke lɔ nhial në kuur ë Nhialic nɔm. 14Ku lëk ë Mothe röördït ke Yithriɛl an, “Tiɛtkï wook eenë abuk lɔ bɛ̈n ciëën. Aron kekë Ɣur kek kï rɛ̈ɛ̈r në weekë, na de raan de nɔm jam kɔɔr luɛɛl, ke lɔ tëde keek.”
15Na wën, aacï Mothe lɔ nhial ë kuur nɔm, ke luät ë kum kuur piny. 16Ago dhuëëŋ de Bɛ̈nydït nyuc ë kuur ë Thinai nɔm. Ku ëtɛ̈ɛ̈n, luät ë kuur bɛ̈n kuöm piny në nïniic kadhetem. Na kööl ë ye akööl dhorou, ke Bɛ̈nydït ë cɔl Mothe në luätic. 17#Nyöŋ 9:9. Ku kɔc ke Yithriɛl aake woi dhuëëŋ ë Bɛ̈nydït cït man ë many dïït dɛ̈p, many thöl käŋ ë kuur nɔm nhial. 18#Nyöŋ 9:9. Ago Mothe baaric nhial në kuur nɔm ke cath ë luätic. Ku le rëër ëtɛ̈ɛ̈n në wɛ̈ɛ̈riic kathiërŋuan ku cooliic kathiërŋuan.
Currently Selected:
Bɛ̈n 24: dip-JPB
Highlight
Share
Copy
Want to have your highlights saved across all your devices? Sign up or sign in
The Bible in Jieeng de Padang © The Bible Society in South Sudan, 2011.
