Bɛ̈n 23

Yic ku Kïït de Kɔc

1 # Bɛ̈n 20:16; Leb 19:11,12; Nyöŋ 5:20. “Du tör ee caath, ku du raan de guöp awäc ee kuɔny në gɛm gɛm yïn löŋ lueth. 2Du ee mat wekë kɔc juëc të cïï kek wööc, ku të gɛm kek löŋ lueth mɛ̈ɛ̈r kek yic. 3#Leb 19:15. Duökï ee kuum ke we kuëëny kɔciic të kuööm wek raan kuany nyin.

4 # Nyöŋ 22:1-4. “Të cïn weŋ ë raan dɛ wek ater yök acï yiëëm, ku nɔn ee yen muulde, ke dɔm ku yiɛ̈nkï yen. 5Ku na cï muulde wïïk ke de kɔ̈u käŋ, ke du winythok, kuɔnyë jatkï muul nhial.

6 # Leb 19:15; Nyöŋ 16:19. “Du yic de raan kuany nyin jiɛi në gööny nɔm. 7Du raan ciëk thok ë lueth, ku du raan cïn guöp awäc näk. Raan ëbɛ̈n, raan ee kërɛɛc cït ee kënë looi acä bï puɔ̈l. 8Du yïthok ee tɔ kum, kumthok ee raan tɔ bai yic, ku mɛ̈ɛ̈r yic de kɔc cïn guöp awäc.

9 # Bɛ̈n 22:21; Leb 19:33,34; Nyöŋ 24:17,18; 27:19. “Du raan lei kuc luööi. Täu de raan lei aŋiɛckï, në luɔi ɣɔn cä wek kɔn aa kɔc lei paan ë Rip.

Ruöön ye Run Dhorou ku Kööl ye Akööl Dhorou

10 # Leb 25:1-7. “Yak duumkun com në runiic kadhetem, ku määtkï ka cï luɔkiic. 11Ku në ruöön ye run dhorou, ke we tɔ duum lɔ̈ŋ. Ku duökï aröl cï luɔk thïn tem. Abï kɔc kuanynyïïn keek cam. Ku ka cï döŋ piny abï läi roor ke lɔ̈ɔ̈k nyuööth. Yak duumkuön ke enap looi ayadäŋ, ayï duum ke olip.

12 # Bɛ̈n 20:9-11; 31:15; 34:21; 35:2; Leb 23:3; Nyöŋ 5:13,14. “Yak luui në akööliic kadhetem, ku duökï ee luui në kööl ye akööl dhorou, ke ɣɔ̈kkun ku mulkun ku lïïmkun, ayï kɔc lɛɛn luui week ke ke bï lɔ̈ŋ.

13“Piŋ kë lɛ̈k yïn ëbɛ̈n, Yɛn Bɛ̈nydït. Du yiëth kɔ̈k ee lam, ayï rinken du ke ee lueel.

Dhuëŋ Dït Kadiäk

(Bɛ̈n 34:18-26; Nyöŋ 16:1-17)

14“Yak dhuëŋ dït looi kadiäk në ruöönic dhuɛ̈ɛ̈ŋ wek Ɛn. 15#Bɛ̈n 12:14-20; Leb 23:6-8; Kuɛ̈n 28:17-25. Ku yak Dhuëëŋ de kuïn cïnic luɔu looi cït man cän e thɔ̈n week. Yak Dhuëëŋ de Kuïn Cïnic Luɔu looi cït man cän e thɔ̈n week në pɛɛi de Abib, pɛɛi wään jäl wek Rip. Yak kuïn cï pam cïnic luɔu cam në nïn ke dhuëëŋiic kadhorou. Ku raan ëbɛ̈n ë weyiic ë lam Ɛn në miɔ̈c.

16 # Leb 23:15-21; Kuɛ̈n 28:26-31; Leb 23:39-43. “Yak dhuëëŋ de tëm looi, në baŋ de ka cï kɔn luɔk të cä wek tëm de ka cï luɔk gɔl ë duumkun yiic.

“Yak Dhuëëŋ de Kɛ̈ɛ̈t looi, të ye käŋ määt yiic, kakuön cï luɔk ë duumiic në thök ë ruöön. 17Röör kedhie abïk aa bɛ̈n në Bɛ̈nydït Nhialic nɔm bïk En bɛ̈n lam raandiäk në ruöönic ëbɛ̈n në ee dhuëŋkë yiic kadiäk.

18“Të gëm yïn Ɛn miɔ̈c de yic riɛm, ke du mat kekë kë mäth. Ku kɔl de kë ë nɛ̈kë Yɛn në ee dhuëŋkë yiic ë cïï tɛ̈uwë miäk.

19 # Nyöŋ 26:2; Bɛ̈n 34:26; Nyöŋ 14:21. “Yak kë tueŋ de ka cï kɔn luɔk domdun bɛ̈ɛ̈i ɣön ë Bɛ̈nydït Nhialicdun.

Duökï amɛthɔ̈k ee thaal në ciɛk ke man yiic.”

Thön ku Lëk

20“Tunynhial abä tuɔɔc në wenïïm tueŋ, gël week në cäthdunic abä wek ɣet të cä kiëët në këdun. 21Döt ee cökë ë gɔk, ku ye kë cï lueel piŋ. Du keek reec, ee Yɛn ë toc en. Ku acï we bï päl reec rɛɛc wek jamde, në baŋ nu rinkï ë yeyic. 22Na lak gam thok, ku luɔikï këriëëc thɔ̈n week ëbɛ̈n, Yɛn bï gɔ̈m wokë kɔc de ater në week kedhie. 23Tunynhialdï abï cath ë wenïïm tueŋ, ku abï we lɛɛr piny de Amor, ku Ɣit, ku Peridh, ku Kanaan, ku Ɣib, ku Jebuth, ku abäk keek riɔ̈ɔ̈k. 24Duökï wenïïm gut piny në yiëthken nïïm ku duökï ke lam. Ku duökï kuɛɛrkɛn ke läm dɔmiic. Riäkkï yiëthken ku dhuööŋkï kur ke yïïkken. 25Të la wek Ɛn aa lam, Yɛn Bɛ̈nydït Nhialicdun, wek bä thiëi kacaam ku pïïu, ku nyaai jɔɔkkun. 26Acïn tiiŋ bï bɛ wääc pinydun, ku cïn tiiŋ be rol. Ku wek bä aa tɔ ciëŋ aläl ke we pïïr.

27“Kɔc ee week kaaŋ nïïm abä keek aa riääc, ku nuɔɔn kɔc gɔ̈m në week. Ku kɔc de ater në week abä keek aa tɔ kɔt në week. 28Ku yɛn bï abulbuul tuɔɔc në wenïïm tueŋ,#23:28: Yɛn bï...riɔ̈ɔ̈c tuɔɔc; ku nɔn Bä abulbuul tuɔɔc në kɔc ke aterdun yiic. Yɛn bï kɔc ke Ɣib cuɔp wei kueer, ayï kɔc ke Kanaan, ku kɔc ke Ɣit. 29Ku acä ke bï guɔ cuɔp wei në ruöön tökic. Na cuɔp ke wei në ruöön tökic, piny acïn raan duëër tɔ̈u thïn, ku aduëër läi roor ɣap ku nuankï week. 30Abä ke cuɔp wei ë mäth ë mäth, agut të bä wek kɔn juëc ku lɛ̈ukï pinyic. 31Ku pinydun abï rɔt gɔl në Wɛ̈ɛ̈r Thith agut cï Wɛ̈ɛ̈rdïït ɣer. Ku gɔl në wɛ̈ɛ̈r ë Yuparat ale guööt ë jɔ̈ɔ̈ric. Ku wek bä gäm riɛl bä wek kɔc cieŋ ee pinyë cuɔp wei. 32Duökï de män matkï në keek, ayï yiëthken. 33Duökï keek tɔ rɛ̈ɛ̈r pinydun. Të la we ke tɔ rɛ̈ɛ̈r pinydun, abïk week meet në läm de yiëthken, ku tɔkï we lui Ɛn kërac. Të la wek yiëthken lam, abï aa dɛ̈p dïït deepë week.

Currently Selected:

Bɛ̈n 23: dip-JPB

Highlight

Copy