Cäk 29
29
Jakop aɣet baai de Laban
1Go Jakop bɛ baaric ke cath, go ɣet piny ë kɔc rɛ̈ɛ̈r të lɔ aköl amiäk. 2Na wën aa bïï, ke tïŋ yith domic, ku tïŋ luuny ke thök ee yiic diäk, ke ke cï tɔ̈c në yith lɔ̈ɔ̈m. Në luɔi ye kek dek në ee yinhë yic ëtɛ̈ɛ̈n. Ku gök dïït ë kuur anu në yith thok. 3Ku të cï luuny ke thök jɔ guëër ëbɛ̈n, ke tïït ayek kuur dïïtë jɔ lɔ̈ɔ̈r bei në yith thok, ku tɔkï thök dëk. Na cï thök dek, ke ke be kuur dak nɔm ë yith thok tëde.
4Ago Jakop tïït luɔp an, “Wäthii, ee të nou ë bä wek thïn?”
Gokï puk nɔm an, “Wok bɔ̈ ë Ɣaran.”
5Ago ke luɔp an, “Ŋiɛckï raan cɔl Laban, wën ë Naɣor?”
Gokï gam an, “Ɣɛɛ, aŋicku.”
6Go keek luɔp an, “Ka Laban apiɔl guöp tei?”
Gokï puk nɔm an, “Apiɔl guöp acïn kërɛɛcdɛn nu. Ku nyan bɔ̈ kekë thökkë, ee Racel nyande.”
7Ago Jakop lɛ̈k keek an, “Piny aŋoot, acie të ye thök guɔ tɔ mat kenïïm kï, takï thök dëk, ku dakkï kenïïm tëde nyuäth, lek nyuäth.”
8Agokï puɔ̈k nɔm en an, “Wok cïï thök bï guɔ tɔ dëk ënɔɔnë, wok bï tïït abï thök ke wut kɔn guëër ë yith nɔm kedhie, ku kɔnë kuur lɔ̈ɔ̈r bei në yith thok. Yen abï wok thökkuɔ jɔ tɔ dëk.”
9Na wën aŋoot Jakop ke jam ke keek, ke Racel ë jɔ guɔ ɣëët ke kuath thök ke wun. Ee yen ë ye tïït. 10Na wën, aa le Jakop Racel tïŋ, nyan ë Laban nɛ̈ɛ̈rë, ku tïŋ thök ke Laban, ke lɔ ë yith nɔm, ke lɔ kuur lɔ̈ɔ̈r bei në yith thok. Ku tɔ thök ke nɛ̈ɛ̈rë dëk. 11Na wën, ke cim Racel thok, ku dhiɛɛu në röl dït. 12Ku lëk Racel an, “Yɛn ee raanden ë yï wuur. Yɛn ee wën ë wac Rebeka.”
Ago Racel kat, le jam guiëër wun. 13Na wën, alɔ Laban thoŋ ë bɛ̈n ë wën ë nyankënë piŋ, ke kɔt le loor nɔm. Na wën, ke lee duutic ku ciim thok, ku bïï baaide. Go Jakop Laban tɛ̈t këriëëc ëbɛ̈n. 14Go Laban lɛ̈k en an, “Ee yic ë gök, yïn ee yuɔɔmdï ë yic, ku ye rïïŋdï!” Go pɛɛi thöl ke rɛ̈ɛ̈r ke keek.
Jakop aluui Laban në këde duetke
15Ago Laban lɛ̈k Jakop an, “Yïn cïï yɛn bï luööi baaŋ të cïn ariöp, në luɔi ee yïn raandï. lɛ̈kë yɛn ariöpduön bän yï riɔp.” 16Ku Laban ade nɔm duet kaarou, nyan dït acɔl Liya, ku nyan thiinë acɔl Racel. 17Liya alɔ nyin durdur#29:17: aläk; nɔn durdur. ë mäth, ka acie daai ëgɔk. Ku Racel alɔ guöp kim piny ke läk aläl.
18Go Jakop Racel nhiaar aläl. Go lɛ̈k nɛ̈ɛ̈rë an, “Yïn bä luööi në run kadhorou në këde Racel, nyanduön thiinë.”
19Go Laban gam ku lueel an, “Rɛ̈ɛ̈rë we yɛn, aŋuɛ̈ɛ̈n ë luɔi gäm ɛn e yïn, në gëm bän en gäm raan däŋ.” 20Go Jakop en luööi në run kadhorou në këde Racel. Ku aaye runkë tïŋ ke ke lik cït man ë nïn likakäŋ tei, në luɔi ë nhiɛɛr en Racel.
21Na ɣɔn, ke lëk ë Jakop Laban an, “Jɔ ya gäm tiiŋdï bä bɛ̈n tɔ ye tik. Aköölkiën ke luɔɔi acïk thök.” 22Go Laban kɔc ke wut cɔɔl kedhie, ku looi dhuëëŋ dïït de thiëëk. 23Na ɣɔn thëën, ke Laban ë nöm Liya nyande, ku yïn Jakop. Ago Jakop lɔ ɣöt ke yen, ku tɔ ye tik. 24Ku gëm ë Laban Liya nyande, Dhilpa nyan lïmde, bï yen aa luööi ke ye lïmde. 25Na ɣɔn amiäk, ke yök ë Jakop en nɔn yen Liya. Go Jakop Laban luɔp an, “Eeŋö ë kë cï luöi yɛn në? Yïn aa luööi në këde Racel, cie yen? Ka eeŋö mɛth yïn ɛn?”
26Go Laban puɔ̈k nɔm en an, “Kë cït ee kënë aliu pinyda wook eenë. Nyan thiinë acie gäm moc ke nyan kɛ̈i ë kën kɔn lɔ baaide. 27Kɔn akööl ke thiëëk thöl kadhorou, ku yïn bä bɛ gäm Racel ayadäŋ, ke ariöpduön bï yïn ɛn bɛ luööi në run kɔ̈k kadhorou.”
28Go Jakop gam. Na ɣɔn, aa thök akööl ke thiëëk kadhorou, ke gëm ë Laban en Racel nyande, tɔ ye tiiŋde. 29Ku gëm Laban Racel nyande, Bila nyan lïmde, ke bï yen aa luööi ke ye lïmde. 30Ago Jakop lɔ ɣöt kekë Racel ayadäŋ, ku nhiɛɛr Racel guöp awär Liya. Ku be Laban luööi në run kɔ̈k kadhorou.
Mïth ke Jakop
31Na ɣɔn, alɔ Bɛ̈nydït Liya tïŋ ke cï maan guöp, ke tɔ dhiëth mïth, ku tɔ Racel rol. 32Ago Liya meth yök, ku dhiëëth mɛwä. Go lueel an, “Ee luɔi cï Bɛ̈nydït rëërdiën rɛɛcë tïŋ, ku ë yic ënɔɔnë, monydï abï ya jɔ nhiaar guöp.” Ago meth cäk an Ruben.#29:32: Ruben: Rinke në Ɣeberuu acït “tïŋ, wää” ku “acï nuandï tïŋ.” 33Na ɣɔn, ke Liya be liac, ku dhiëëth mɛwä. Go lueel an, “Acï Bɛ̈nydït tïŋ nɔn cï ya maan guöp, go ya gäm ee mɛnhë ayadäŋ.” Ago cäk an Thimion.#29:33: Thimion: Rinkë në Ɣeberuu acït “piŋ.” 34Ku be liac, ku dhiëëth mɛwä. Go lueel an, “Ënɔɔnë monydï abï rɔt jɔ mät ɛn, në luɔi cän en dhiëth mïthwät kadiäk.” Ago meth cäk an Lebi.#29:34: Lebi: Rinkë në Ɣeberuu acït “duut.” 35Ago bɛ liac ku dhiëëth mɛwä. Go lueel an, “Yɛn bï Bɛ̈nydït jɔ leec në ee kë ciëënë.” Ago meth cäk an Juda.#29:35: Juda: Rinkë në Ɣeberuu acït “piɔ̈ny.” Ku jɔ bɛ̈n kɔ̈ɔ̈c ë dhiëth.
Currently Selected:
Cäk 29: dip-JPB
Highlight
Share
Copy
Want to have your highlights saved across all your devices? Sign up or sign in
The Bible in Jieeng de Padang © The Bible Society in South Sudan, 2011.
