Cäk 37
37
Jothep kekë Mïthëkɔcken
1Ago Jakop lɔ̈ɔ̈k ŋoot ke rɛ̈ɛ̈r piny ë Kanaan, të ɣɔn rëërë wun thïn. 2Ku kënë alɛɛŋ ë baai de Jakop.
Na ɣɔn, aacï run ke Jothep aa thiëër ku dhorou, ke ye lɔ tïït ë thök kekë mïth ke wun. Wɛ̈ɛ̈t ke Bila kekë Dhilpa, diäär lïïm ke wun. Ago Jothep karɛc ye mïthëkɔcken looi roor lɔ guiëër wun.
3Ku Jakop aa nhiaar Jothep awär mïthke kedhie, në luɔi ë dhiëëth ë Jakop en ke cï dhiɔp. Ago luöi lupɔ bɛ̈ɛ̈r de guöp kïït#37:3: lupɔ bɛ̈ɛ̈r; nɔn de guöp kïït. läk aläl. 4Na ɣɔn, aa tïŋ ë mïthëkɔcken en luɔi nhiɛɛr ë wuönden Jothep awär keek, ke ke man Jothep guöp. Ku cïkï ee bɛ lëëŋ në yen.
5Na ɣɔn ë kööl tök, ke Jothep ë nyuöth ë nïnic wakɔ̈u. Na wën, aguïïr nyuöth mïthëkɔcken, ke jɔkï maan guöp awär wään tueŋ. 6Alëk keek an, “Piɛŋkï nyuöthdiën ë nyuöth ɛn kï: 7Yɛn aa nyuöth ke wo dut agamɔ domic. Na wën, ke nɔmdiën ë duööt ë ciëp ë thar piny. Go nïïm ë duötkï keek bɛ̈n ku geeukï piny. Ku gutkï kenïïm piny në yenɔm.”
8Ago mïthëkɔcken en luɔp an, “Ye tak, bä ya bɛ̈nyda ku cieŋ wo?” Agokï jɔ maan guöp arëët, në këde nyuöthde ku në këde kë lueel ë nyuöth në biäkden.
9Go Jothep bɛ nyuöth ku lëk keek an, “Yɛn ë bɛ nyuöth ë nyuöth däŋ: ke akɔ̈l ke pɛɛi, ku kuɛl kathiëër ku tök ë ke gut kenïïm piny në yanɔm.”
10Ku be nyuöth guiëër wun ayadäŋ. Go wun en rɛ̈lic, ku lëk en an, “Ee nyuöth ëŋö ee kënë? Ayï yɛn wokë moor buk wonïïm guöt piny në yïnɔm ayadäŋ?” 11#Luɔi 7:9. Go mïthëkɔcken en jɔ til arëët, ku muk wuönden jam në yepiɔ̈u.
Jothep Aɣɛɛcë ku Leerë Rip
12Na ɣɔn ë kööl tök, mïthëkɔcken ë Jothep aake cï thökken lɔ tiit në Cekem këc. 13Go Jakop lɛ̈k Jothep an, “Bä da, ë yï tuɔɔc Cekem të tiit ë mïthëkɔckun thök.”
Go Jothep puk nɔm en an, “Apiɛth, acïn kë gäu ɛn.”
14Ago wun lɛ̈k en an, “Lɔ tïŋ mïthëkɔckun na piɔlkï gup, ayï thök, ku lɔ bä ciëën, bä bɛ̈n lɛ̈k ɛn.” Go wun en jɔ tuɔɔc Cekem ke nu në wak ë Ɣebronic.
Go Jothep ɣet Cekem. 15Go raan tök en yök ke cï yëëm rooric, go luɔp an, “Eeŋö kɔɔr eenë?”
16Go puk nɔm an, “Yɛn kɔɔr mïthëkɔckuɔn tit thök eenë. Duɛ̈ɛ̈rë ke nyuöth ɛn të nu kek thïn?”
17Go raan lɛ̈k en an, “Aya tak acïk jäl, acä piŋ ke luelkï an, ‘Jëlku lokku Dothan.’ ” Go Jothep mïthëkɔcken biɔɔth cök. Go ke lɔ yök Dothan.
18Na wën, ke ke tïŋ Jothep wei. Ku të wën ŋoot en ke kën guɔ ɣëët, ke kiirkï nɔn bï kek en nɔ̈k. 19Agokï lɛ̈k röt kapäc an, “Raan ee cool ke nyuöthë yekï bɔ̈ yë. 20Bä näkku, ku deenyku në yinh tökic në ee yïth cï dëuwë yiic. Ku abuk lueel nɔn cï läi ye nɔ̈k. Ku buk nyuöthde jɔ tïŋ bï bɛ̈n ke eeŋö?”
21Na wën, aa piŋ Ruben ë kënë, ke bɔ̈, bï bɛ̈n luäk bei në kecin, lueel an, “Acuku bï nɔ̈k, 22cuɛtku ë yithic ë jɔ̈ɔ̈ric eenë, ku nyiëëŋku piny ëtɛ̈ɛ̈n, ku duku jak guöp.” Ruben aluel ee jamë në biäk bï yen en luäk bei në kecin. Ku tɔ dɔ̈k enɔm wun. 23Na wën, aa ɣëët Jothep ë mïthëkɔcken lɔ̈m, ke ke yööt lupɔdɛn lɛ̈ɛ̈k ë kïïtë bei në yekɔ̈u.#37:23: lupɔ bɛ̈ɛ̈r; nɔn de guöp kïït. 24Ku nömkï lek cuat ë yithic. Ku yith acï dëu, ka cïnic pïïu.
25Na wën, aŋootkï ke ke cäm, ke ke go kɔc ke Yicmiɛl tïŋ abɔ̈ në thɔ̈rɔ̈lken. Ku thɔ̈rɔ̈lken aake ɣɛ̈ɛ̈c adök, ku wɛ̈ɛ̈l cɔl baam ku mer, aa leerkï keek paan ë Rip. 26Ago Juda lɛ̈k mïthëkɔcken an, “Eeŋö buk jɔ yök të le wok mɛnhkënëda nɔ̈k, ku tɔku riɛmde kuëër wei baaŋ? 27Aŋuɛ̈ɛ̈n ë luɔi ɣöc wok en kɔc ke Yicmiɛl, ku cuku jak guöp. Yen ee mɛnhkënëda, ku ye riɛ̈ɛ̈ŋda.” Ago mïthëkɔcken ye gam thok. 28#Luɔi 7:9. Na wën, atëk kɔc ke Midian ee käŋ lɔ ɣaac,#37:28: mïthëkɔcken; Ɣeberuu keek. ke ke mïït Jothep bei në yithic, ku ɣöckï kɔc ke Yicmiɛl në atek kathiërrou. Agokï Jothep lɛɛr paan ë Rip.
29Na wën, apuk Ruben enɔm, ku yök Jothep ke liu në yithic, ke diu piɔ̈u ku ret lupɔɔke yiic. 30Ku puk enɔm të nu mïthëkɔcken. Le lɛ̈k keek an, “Cɔ̈k a nɔm ë nou, meth aliu ëtɛ̈ɛ̈n?”
31Agokï thɔ̈k nɔ̈k, ku nömkï lupɔ de Jothep, lutkï ë riɛmic. 32Ku yïnkï lupɔ lɛ̈ɛ̈k ë kïït wuönden, ku lek lɛ̈k en an, “Lupɔ yë aa kuanyku. Tïŋ na ye lupɔ de wëndu, ku na cie yen.”
33Ago caath guöp ku lueel an, “Ee yen lupɔ de mɛnhdï guöpde, ade län cï ye dhiɛl yök roor, ku cuet këde. Jothep wëndï acïï läi ë tɛm ë thïïm.” 34Ago Jakop piɔ̈u riääk arëët, ku ret lupɔɔke yiic, ku tɛ̈ɛ̈u lupɔɔ ke cual ë yekɔ̈u. Ku dhiëëu wënde në nïn juëc arëët. 35Ago wɛ̈ɛ̈tke guëër ë yelɔ̈ɔ̈m, ayï duetke, bïk bɛ̈n luk piɔ̈u. Go kɛ̈n gam në luk. Go lueel an, “Yɛn bï mɛnhdï dhiëëu agut të bän lɔ paan ë thuɔɔu.” Ku ŋoot ke dhiëëu Jothep wënde.
36Ago kɔc ke Midian Jothep lɔ ɣaac paan ë Rip, lek ɣɔ̈c Pɔtipar, bɛ̈ny ee melik de Rip tiit.
Currently Selected:
Cäk 37: dip-JPB
Highlight
Share
Copy
Want to have your highlights saved across all your devices? Sign up or sign in
The Bible in Jieeng de Padang © The Bible Society in South Sudan, 2011.
