Cäk 43
43
Mïthëkɔcken ë Jothep adɔkkï kenïïm Rip në Benjamin ëtök
1Ku cɔk acï thok jɔ tuöc arëët piny ë Kanaan. 2Na ɣɔn aacï agamɔ thök, agamɔ wään le wɛ̈ɛ̈t ke Jakop bɛ̈ɛ̈i Rip. Ke lëk ë Jakop mïthke an, “Dakkï wenïïm Rip, lak bɛkï wo ɣɔ̈c kalik ke agamɔ.”
3Go Juda lɛ̈k wun an, “Bɛ̈ny ë Rip acï wo thɔn arëët wään an, ‘Duökï wenïïm kɔn dɔ̈k të nu yɛn, të kɛ̈n wek mänhëdun thiinë bɛ̈ɛ̈i.’ 4Na cï gam në luɔi bï wëndu cath ke wook, wok duëër lɔ lok ɣööc në kacaam. 5Ku na cie yen, ke wok cï bï lɔ, në luɔi ë cï yen jai an cuku lɔ të nu yen të kën wok mänhëda lɛɛr.”
6Go Jakop lɛ̈k keek an, “Eeŋö ja wek ɛn luöi ë kërɛɛc dïït cït ë kënë? Eeŋö lɛ̈k wek e yen nɔn dɛ wek nïïm mänhëduön däŋ?”
7Agokï puɔ̈k nɔm en an, “Raan alop wook në baaida ëbɛ̈n an, ‘Wuöördun ŋoot ke pïïr? Dɛkï nïïm mänhëduön däŋ? Ka wook ee lop yen apukku nɔm. Duëërku jɔ ŋic adï luɔi bï yen wook yɔ̈ɔ̈k an, Lak bäkï në mänhëdun ëtök?’”
8Go Juda lɛ̈k wun an, “Të tɔ yïn meth cath ke wook, wok duëër jäl ënɔɔnë. Ku cɔk acï wo bï bɛ nɔ̈k në mïthkuɔ. 9Ku meth abä lɔ döt ëgɔk. Na miäk ke luɔpë në yɛn. Ku na la ye kɛ̈n yiɛ̈n yïn, ke ya bï guöp dɛ aciɛɛn anandï. 10Na cie luɔi cï wok gääu, adï cuk cök aa rou ënɔɔnë, ke wo ye lɔ ku lok bɛ̈n.”
11Ago wuönden lɛ̈k keek an, “Na ee täude ka, ke we nöm kapiɛth cï luɔk pinydanë, ku yiɛ̈nkï keek bɛ̈ny ë Rip ke ye miɔ̈cde. Nɔ̈mkï këthiin ë baam, ku nɔ̈mkï kiëc thiinakäŋ, ku lɔ adök, ku mer, ku mïth miit ke tim cɔl pithaaciyo, ku almon. 12Ku nɔ̈mkï wëu kït në wëu wään bäk kɔn lɛɛr wään tueŋ raan rou. Ke we bï wëu lɔ cool, wëu wään cäk lɔ dɔk nïïm në cualiic. Aake dhil röt mat thïn ke kuc ë kɔc keek. 13Ku jatkï mänhëdun, lakï tëde bɛ̈ny de Rip. 14Ku Nhialic Awärjäŋ, abï bɛ̈ny de Rip tɔ kok piɔ̈u ke week. Ku gëm week mänhëdun kekë Benjamin. Na cï gɔ̈ɔ̈r nɔn bï mïthkï määr, ke ke mär!”
15Ago wɛ̈ɛ̈t ke Jakop miɔ̈c nööm, ku nömkï wëu ee yiic rou. Ku jɔtkï Benjamin, ku jëlkï lek Rip. Na wën, ke ke lɔ të nu Jothep. 16Na wën, aa tïŋ Jothep Benjamin acath ke keek, ke lëk lïm nu në kake baaide nïïm an, “Lɛɛrë ee kɔckë baaidï. Ku tem thɔ̈k röl. Abïk lɔ cam në yɛn ë lë të cï akɔ̈l kɔ̈ɔ̈c cil.” 17Ago lïm keek jɔt, leer keek baai de Jothep, cït man awën cï Jothep e lueel.
18Na wën, aleerë keek baai de Jothep, ke ke riɔ̈c ku luelkï an, “Kë bïïrë wook eenë, ee këde wëu wään cuk keek yök në cualkuɔ thook në bɛ̈ndan awään tueŋë. Abïk wook lɔ muɔɔk ëtɛ̈ɛ̈n, ku rumkï mulkuɔ. Ku tɔkï wook ee lïïmken.” 19Na wën, aa ɣëëtkï ɣöt thok, ke lëkkï lïm ë baai an, 20“Piŋ bɛ̈ny, wok acï kɔn bɛ̈n ɣööc në kacaam eenë wään tueŋ. 21Na wën, alok nyuc tëdan ë niin wok thïn, ke wo däk cualkuɔ thook. Ago ŋɛk wëuke aa yök nyïïn kedhie në cuaalde thok. Ka acuk ke bɛ̈ɛ̈i ciëën. 22Wok kuc raan ë jɔ wëu tääu ë cual thook. Ku wok ë wëu kɔ̈k bɛ̈ɛ̈i bï wok bɛ̈n ɣööc në kacaam kɔ̈k.”
23Go lïm puɔ̈k nɔm keek an, “Duökï tɔ mum wenïïm, ku duökï riɔ̈c. Nhialicdun, Nhialic de wuöördun Yen adhil ke puɔ̈k nïïm në cualkuniic. Wëukun acä ke nööm.” Na wën, ke lɔ Thimion bɛ̈ɛ̈i të nu kek.
24Ku leerë lïm ke ɣöt. Ku gëm keek pïïu wɛɛk kek kecök. Ku gëm mulken kacamkï. 25Gokï miɔ̈cden guiir tɔkï thiɔ̈k, ke bïk bɛ̈n gäm Jothep të le yen bɛ̈n ë lë të cï akɔ̈l kɔ̈ɔ̈c cil. Acïk piŋ nɔn bï kek lɔ cam në yen ëtök ë lë të cï akɔ̈l kɔ̈ɔ̈c cil. 26Na wën, aa bɔ̈ Jothep, ke yïnkï miɔ̈c ɣööt thïn, ku gutkï kenïïm piny në yenɔm. 27Ago keek luɔp në pial ë kek gup, lueel an, “Wuöördun wään bäk lɛ̈k ɛnë an cï dhiɔp, apiɔl guöp? Ŋoot ke pïïr?”
28Agokï lueel an, “Wääda lïmdu aŋoot ke pïïr, ku apiɔl guöp. Agokï kenïïm guöt piny në yenɔm, ku tukkï kemiöl.”
29Na wën, atïŋ Jothep Benjamin mänhë, ke lop ke, an, “Ka ee yen mänhëduön thiin wään bäk lueel kï? Yïn bï Nhialic thieei mɛnhdï.” 30Ago Jothep dap jäl në kelɔ̈m ëthiäu në luɔi ë cï yen piɔ̈u kok ke mänhë. Go piɔ̈u guɔ thiaany. Go rɔt lɔ kɔ̈ɔ̈r të le yen dhiau thïn. Ago lɔ ɣöndɛn ë nïn thïn, le dhiau ëtɛ̈ɛ̈n. 31Na wën, aacï yenyin waak, ke bɔ̈ bei. Ku jɔ yepiɔ̈u muɔ̈k, lueel an, “Bɛ̈ɛ̈ikï këcam.” 32Ago yiɛ̈n këcamde pei yetök, ku yïnë mïthëkɔcken këden pei. Ku yïnë kɔc ke Rip cäm në keek këcamden pei kapäc ayadäŋ. Në luɔi ë cïï kɔc ke Rip ee cam në kɔc ke Ɣeberuu. Aa ye kɔc ke Rip tïŋ ke ye aciɛɛn. 33Ago mïthëkɔcken ë Jothep nyuc ke ke wël kenïïm Jothep. Nyuckï ke ke cï röt kiëët cït man ë dhiënhdɛn ë dhiëëthë keek, gɔl në wën kɛ̈i ë keyiic ku le kɔ̈ɔ̈c në wën koor. Agokï kenyïïn woi ke ke cï gäi. 34Go kacaam nööm në paam de Jothep nɔm, ku gëmë keek. Ku kë ë gëm Benjamin amat këde ŋɛkic në keyiic raan dhïc. Ku dëkkï në Jothep ëtök, ku jɔkï piɔ̈ɔ̈th miɛt ë röt.
Currently Selected:
Cäk 43: dip-JPB
Highlight
Share
Copy
Want to have your highlights saved across all your devices? Sign up or sign in
The Bible in Jieeng de Padang © The Bible Society in South Sudan, 2011.
