Jɔn 11

Thon de Ladharo

1 # Luk 10:38,39. Aa de raan ë de guöp juäi, cɔl Ladharo, raan e Bethani, baai ë yï Meri kekë nyankënë Martha. 2#Jɔn 12:3. Yen aye Meri wään tɔc Bɛ̈nydït në miök tum, ku coth cök ë nhïm ke yenɔm, yen aa töökë mänhë Ladharo. 3Go nyïïrakɛcken raan tooc le ku lueel an, “Bɛ̈nydït, raanduön nhiaar ade guöp juäi.”

4Na wën, acï Yecu ye piŋ, ke luel an, “Juänë acie këde thuɔɔu, ee lɛc bïï Nhialic lɛc nɔm, ago wën ë Nhialic dhuëëŋ yök në yen.”

5Ku Yecu aa nhiaar Martha, ayï nyankënë, ayï Ladharo. 6Të cï en e guɔ piŋ nɔn töökë ye, ke jɔ rëër ë akööl kaarou të wään nu yen thïn. 7Na wën, ke jɔ kɔckɛn ë piööcë yɔ̈ɔ̈k an, “Beku lɔ Juda.”

8Go yɔ̈ɔ̈k ë kɔcpiööcë an, “Rabi, Judai aake kɔɔr yïn wään thiɔ̈kë an, bïk yïn biɔ̈ɔ̈k ë kur, ku bɛyë lɔ ëtɛ̈ɛ̈n?”

9Go Yecu bɛ̈ɛ̈r an, “Thɛɛr ke akɔ̈l cïkï ye thiëër ku rou? Të ciɛthë raan aköl, ka cïï duëër kɔ̈th, ë luɔi tïŋ en ɣɛɛr ë pinyë nɔm. 10Ku të ciɛthë raan wakɔ̈u, ka kɔ̈th, ë luɔi cïn en ɣɛɛrëpiny cath ke ye.” 11Ë kakë lueel: na wën, ke lëk keek an, “Ladharo mɛ̈thëda ë nin, ku yɛn lɔ, la pɔ̈ɔ̈c.”

12Go kɔckɛn ë piööcë lueel an, “Bɛ̈nydït, na ye nïn, ka bï waar.”

13Ku Yecu aa jam e këde thonde: ku luelkï keek an, jiɛɛm në lɔ̈ŋ de nïn. 14Go Yecu lɛ̈k kek abïk piŋ ëgɔk an, “Ladharo acï thou. 15Ku yɛn mit piɔ̈u në baŋdun nɔn ë liɛɛu yɛn ëtɛ̈ɛ̈n, luɔi bä wek gam, apiɛth tei, lokku të nu yen.”

16Go Thoma, raan cɔl Didima, go lɛ̈k kɔc ë piööcë keek ëtök an, “Lokku ayadäŋ, buk lɔ thou në yen ëtök!”

Yecu yen aye Jönërɔt ku Pïïr

17Na wën, acï Yecu bɛ̈n, ke yök acï guɔ tääu ë raŋic ka cï nïn aa ŋuan. 18Ku Bethani athiɔ̈k kekë Jeruthalem, cït meel kaarou, 19ku Judai juëc aake cï bɛ̈n tëde Martha ku Meri, bïk ke bɛ̈n luk piɔ̈ɔ̈th në këde mänhëden.

20Na wën, acï Martha e piŋ nɔn bï Yecu, ke dap lɔ biic, le loor: ku rɛ̈ɛ̈r Meri ɣööt. 21Go Martha Yecu yɔ̈ɔ̈k an, “Bɛ̈nydït, tëë yï nu eenë, ke mɛnhkäi adï kën thou! 22Ku acakaa ënɔɔnë, aŋiɛc an, të de yen kë bä lip tëde Nhialic, ka bïï Nhialic gäm yïn.”

23Go Yecu yɔ̈ɔ̈k an, “Mɛnhkui abï rɔt bɛ jɔt.”

24Go Martha pɔ̈k nɔm en an, “Aŋiɛc nɔn bï en rɔt bɛ jɔt ë jön jɔtë kɔc röt ëkööl rial wadäŋ.”

25Go Yecu lueel an, “Yɛn ee jönërɔt, kekë pïïr: raan gam ɛn, na ciɛk thou, ka bï pïïr: 26ku raan ëbɛ̈n raan pïïr ku gam ɛn, ka cïï bï thou athɛɛr. Cï kënë gam?”

27Go lɛ̈k en an, “Ɣɛɛ, Bɛ̈nydït, yïn cä gam nɔn ee yïn Kërtho, wën ë Nhialic, raan ë bɔ̈ piny nɔm.”

Yecu Adhiau

28Të cï en ee kakë lueel, ke jɔ jäl le Meri nyankënë cɔɔl, ke kuc jäŋ, go yɔ̈ɔ̈k an, “Bɛ̈ny ee wëët ë bɛ̈n, ka cɔl yïn.” 29Na wën, acï ye piŋ, ke dap rɔt jɔt, le të nu yen. 30(Ku Yecu akën guɔ ɣëët bei, aŋoot të wën rɛ̈m en kekë Martha). 31Go Judai wën nu ɣööt ëtök në yen, kɔc wën luk en piɔ̈u, të cï kek Meri tïŋ, nɔn cï en rɔt dɔɔr ku le biic, agokï biɔɔth cök, ayek lueel an, le ë raŋ nɔm le dhiaau ëtɛ̈ɛ̈n.

32Na wën, acï Meri bɛ̈n tëde Yecu, ke tuk emiɔl e yecök, lueel an, “Bɛ̈nydït, tëë yï nu eenë, ke mɛnhkäi adï kën thou!”

33Të cï Yecu e tïŋ adhiau, ku tïŋ Judai ke ke dhiau ayadäŋ, kɔc wën bɔ̈ në yen, ke jɔ keŋ ë yepiɔ̈u, ë piɔ̈u jiɛth. 34Go lueel an, “Cäk tɔ̈ɔ̈u tënou?”

Gokï lueel an, “Bɛ̈nydït, bä tïŋ.”

35Go Yecu dhiau. 36Go Judai lueel an, “Wɔikï, nhiëër ë nhiɛɛr en en!”

37Go kɔc kɔ̈k ë keyiic lueel an, “Na raanë raan wään liep cɔɔr nyin, adï kën raanë pɛ̈n thuɔɔu ayadäŋ?”

Ladharo acï Bɛ Pïïr

38Go Yecu bɛ̈n ë raŋ nɔm, aa be keŋ ë yeyic. Raŋë ee kök, ku tɔ̈u kuur ë yenɔm. 39Go Yecu lueel an, “Nyaaikï kuur.”

Go Martha, nyankënë ë raan cï thou, go lueel an, “Bɛ̈nydït, ë nhiany ënɔɔnë, nïn acïk aa ŋuan!”

40Go Yecu yɔ̈ɔ̈k an, “Kɛ̈n lɛ̈k yïn an, të gëm yïn, ke yïn bï dhuëëŋ ë Nhialic tïŋ?” 41Gokï kuur nyaai, të wën cï raan cï thou thiɔ̈k. Go Yecu enyin jat nhial, ku lueel an, “Wäär, thieithieei, nɔn cï yïn këdï piŋ. 42Ku aŋiɛc nɔn ee yïn këdï piŋ ëcaŋɣɔn: ku në biäk de kut ë kɔc kääc ë yalɔ̈ɔ̈m, en aa luɛɛl ɛn en, ke ke bï gam nɔn ë tooc yïn ɛn.” 43Na wën, aacï kakë lueel, ke jɔ cööt ë röl dït an, “Ladharo, bä bei!” 44Go bɛ̈n bei yen raan wën cï thou, ke duööt cin ku cök ë lupɔɔ ke tääu, ku cï deer nyin ë lupɔ. Go Yecu ke yɔ̈ɔ̈k an, “Däkkï, ku pälkï ë cath.”

Kiɛɛr bïï ë Yecu Nɔ̈k

(Math 26:1-5; Mak 14:1,2; Luk 22:1-2)

45Go kɔc juëc ke Judai, kɔc wën bɔ̈ në Meri, të cï kek kë looi tïŋ, agokï gam. 46Ku jël kɔc kɔ̈k ë keek lek të nu Parithai, lek ke lɛ̈k ka looi Yecu. 47Go bänydït ke ka ke Nhialic ku Parithai agokï yai tɔ guëër, ku luelkï, an, “Eeŋö loiku? Raanë ee göök juëc looi! 48Të pɛ̈l wok en aya, ke kɔc abïk këde gam kedhie, ku Romai abïk bɛ̈n, bïk ku nömkï paanda tëde wook, ku riäkkï tëɣericë, ku jɔtkï jurda aya!”

49Go raan tök ë keek, cɔl Kayapath, ee bɛ̈nydïït ë kake Nhialic ee ruunë, go lëk keek an, “Acïn kë ŋiɛckï week! 50Ku cäkï thɔ̈ɔ̈ŋ ë wepiɔ̈ɔ̈th nɔn piɛth en tëde wook, të thouwë raan tök ë nyin ë kɔc yiic, go jurda cuö riääk ëbɛ̈n.” 51Acïï kënë luel ë këde: ku luɔi ee yen bɛ̈nydïït ë kake Nhialic ee ruunë, ke jɔ rɔt tɔ ye tiët, cäär në thon bï Yecu thou ë nyin ë jurëyic, 52ku acie nyin ë jurëyic etök, ee luɔi bïï en mïth ke Nhialic të mat keyiic ëtök ayadäŋ, mïth cï thiäi.

53Agokï löŋ cam kapäc ëköölë guöp an, bïk nɔ̈k. 54Yen aacïï Yecu ee bɛ cath ë kɔc nïïm ë Judai yiic, ajël en ëtɛ̈ɛ̈n, le rɛ̈ɛ̈r të lɔ jɔ̈ɔ̈ric, le pänydïït cɔl Eparaim, le ku rëër ëtɛ̈ɛ̈n kekë kɔckɛn ë piööcë.

55Ku Dhuëëŋ ë Judai cɔl Winythok acï guɔ thiɔ̈k: go kɔc juëc jäl rɛɛr lek Jeruthalem, të ŋootë Winythok wei, lek kegup tɔ piɛth. 56Gokï Yecu kɔɔr, ku thiëckï röt kapäc, të kɛ̈ɛ̈c kek ë Luaŋdïtic an, “Ë wepiɔ̈ɔ̈th wäkdiaa? An, cïï bï bɛ̈n të nu Dhuëëŋ?” 57Ku bänydït ke ka ke Nhialic ku Parithai acïk lɛ̈k kɔc an, na de raan ŋic të nu yen, ke nyuth wook, buk dɔm.

Currently Selected:

Jɔn 11: dip-JPB

Highlight

Copy