Jɔn 15

Yecu yen Aye Enap Yic

1“Yɛn aye tim yic tim de enap, ku Wäär yen aye raan tit dom. 2Këër nu ë yayic ëbɛ̈n këër reec luɔk, ka bïïyë bei: ku këër ëbɛ̈n këër ee luɔk, ka looi abï kɔ̈u piath, ke bï luɔk aläl. 3Ku week we cï guɔ piath në jam cä lɛ̈k week. 4Rɛ̈ɛ̈rkï ë yayic, ku yɛn ë weyiic. Acït man cïï këër duëër luɔk etök, të cïï en rɛ̈ɛ̈r ë timic, yen acït week aya, we cïï duëër luɔk, të kɛ̈n wek rëër ë yayic.

5“Yɛn ee tim de enap, wek ee kër: raan rɛ̈ɛ̈r e yayic, ku rɛ̈ɛ̈r ë yeyic, yen aye raan ee luɔk arëët: ku të cïn en ɛn, ka cïn kë duɛ̈ɛ̈rkï looi. 6Raan cie rëër ë yayic, ka cuɛtë wei cït man ë këër, ago riɔu, ago ke kut nïïm, ku cuɛtë ke mɛɛc, agokï nyop. 7Të rɛ̈ɛ̈r wek ë yayic, ku rɛ̈ɛ̈r wëlkï ë weyiic, ka kë nu ë wepiɔ̈ɔ̈th ëbɛ̈n aduɛ̈ɛ̈rkï ke lip, ku abï ke luöi week. 8Luɔk luɔk wek aläl, yen aye Wäär tɔ yök dhuëëŋ, yen abä wek aa kɔckiën ë piööcë. 9Acït man cï Wäär a nhiaar, en acän we nhiaar aya: rɛ̈ɛ̈rkï ë nhiëërdï yic. 10Të dɔ̈t wek lööŋ cä thɔ̈n week, ke we bï rëër ë nhiëërdï yic, cït man cän lööŋ cï wäär a thɔn döt, aguɔ rëër ë nhiëërde yic.

11Kakë acä ke lɛ̈k wek, ke miɛt ë yɛnpiɔ̈u bï rëër ë weyiic, aguɔkï piɔ̈ɔ̈th miɛt abäk piɔ̈ɔ̈th ayum. 12#Jɔn 13:34; 15:17; 1 Jɔn 3:23; 2 Jɔn 5. Kënë ee kë thɔ̈n week an: nhiaarkï röt, cït man cän week nhiaar. 13Acïn raan cath ke nhiëër dïït wär ee kënë an, bï raan wëike gaam në biäk de määthke. 14Wek ee määthkï, të ya wek ka cä thɔ̈n week looi. 15We cä bï bɛ tɔ ye lïïm, lïm akuc kë looi bɛ̈nyde: ku we cä tɔ ye määthkï, luɔi cän we tɔ ŋic këriëëc ëbɛ̈n ka cä piŋ tëde Wäär. 16Acie week ë lɔc ɛn, ee yɛn ë lɔc week, ku tääu week tëdun an, bäk lɔ luɔk, ago mïthkun tɔ̈u: ago na de kë bäk lip tëde wäär në rinkï, ka bï gäm week. 17Löŋ thɔ̈n week kï, an: nhiaarkï röt wapäc.

Män de Piny nɔm

18Të mɛɛnë kɔc ke piny nɔm week, ka ŋiɛckï nɔn cï kek a kɔn maan, ke we ŋoot ke we kënë maan. 19Tëë we ye kɔckɛn ë kɔc ke piny nɔm, ke kɔc ke piny nɔm adï nhiaarkï kɔcken: ku ënɔɔnë, ë luɔi cä wek ee kɔckɛn ë kɔc ke piny nɔm, ku we cä lɔ̈c bei ë piny nɔm, yen amɛɛnë kɔc ke piny nɔm week. 20#Math 10:24; Luk 6:40; Jɔn 13:16. Takkï wenïïm në jam cä lɛ̈k week an: ‘Lïm acï bɛ̈nyde wär ë dït.’ Të cï kek a yɔŋ, ka bïk we yɔŋ ayadäŋ, ku të cï kek jamdï döt, ka bïk jamdun döt ayadäŋ. 21Ku abïk kakë kedhie luöi week në biäk de rinkï, në kuny kuc kek raan ë toc ɛn. 22Tëë ya kën bɛ̈n jam wo keek, adï cïn kërɛɛc nu ë keyiëth: ku ënɔɔnë, acïn të bï keek röt kɔ̈c e kërɛɛcden. 23Raan man ɛn ka man Wäär aya. 24Tëë ya kën käŋ looi e keyiic, ka kënë raan däŋ looi, adï cïn kërac ë keyiëth: ku ënɔɔnë acïk wo tïŋ ku mankï wo gup wokë Wäär waarou. 25#Diɛt 35:19; 69:4. Ku kënë ë tïc, luɔi bï jam aa yic jam cï gɔ̈ɔ̈r ë löŋdenic an, ‘Acïk a maan guöp youyou.’

26Ku Raan ë kɔc riit piɔ̈ɔ̈th, Raan bä tuöc week në Wäär lɔ̈ɔ̈m, yen aye Wëi yic, Wëi ë bɔ̈ bei ë Wäär lɔ̈ɔ̈m, të cï en bɛ̈n, ka bï aa cäätɔdï. 27Ku wek ee cäätɔ ayadäŋ, luɔi nuö wek në yɛn ëtök në göl e gɔlë käŋ.

Currently Selected:

Jɔn 15: dip-JPB

Highlight

Copy