Jɔn 14
14
Yecu ee Kueer lɔ Paannhial
1Go Yecu lɛ̈k keek an, “Duökï wepiɔ̈ɔ̈th tɔ jeth, we ye Nhialic gam, gamkï yɛn ayadäŋ. 2Paan ë Wäär ade yic ɣööt juëc: tëë ke liu, adï cä lɛ̈k week. Yɛn lɔ la tëdun guik. 3Ku të la yɛn, la tëdun guik, ke yɛn bï a nɔm bɛ lɔ puk, bä we bɛ̈n loor, ago të nuö yɛn, ke we bï nu ëtɛ̈ɛ̈n aya. 4Ku të la yɛn thïn aŋiɛckï, ayï kueer aŋiɛckï.”
5Go Thimon lueel an, “Bɛ̈nydït, wo kuc të le yïn thïn, ku duëërku kueer ŋic adï?”
6Go Yecu lueel an, “Yɛn aye kueer, ku yɛn aye yic, ku yɛn aye pïïr: acïn raan bɔ̈ tëde Wääda, të kën en tëëk tëde yɛn. 7Tëë we e ya ŋic, adï cäk Wääda ŋic aya: ku ënɔɔnë aŋiɛckï, ku acäk tïŋ.”
8Go Pilip lueel an, “Bɛ̈nydït, nyuöthë wook Wääda, ku acïn däŋ buk bɛ kɔɔr.”
9Go Yecu yɔ̈ɔ̈k an, “Cä rëër wo week ë caŋɣɔn, ku ŋuɔɔtë ke yï kuc ɛn, Pilip? Raan cï a tïŋ, ka cï Wääda tïŋ aya, ku eeŋö lueel yïn en an, ‘Nyuöthë wook Wääda?’ 10Kɛ̈në ya gam nɔn nuö yɛn ë wääda yic, ku nɔn nu Wääda ë yayic? Wël lɛ̈k week, acä ke ye lueel ë këde yenhdï, ee Wääda raan rɛ̈ɛ̈r ë yayic yen aye luɔi looi. 11Gamkï yɛn nɔn nuö yɛn ë Wääda yic, ku nɔn nu Wääda ëya yic: na dhɛl week, ke we gam ɛn në biäk de luɔiyë guöp. 12Wek yɔ̈ɔ̈k ëyic an: Raan gam ɛn, ke ka luɔɔi abï keek aa looi ayadäŋ, acakaa luɔi wär ee kakë abï keek aa looi, luɔi la yɛn tëde Wääda. 13Ku të de yen kë bäk lip në rinkï, ka bä looi, ke Wääda bï dhuëëŋ yök në Wënde. 14Na de kë liɛpkï në rinkï, ka bä looi.
Thön de Wëidït
15Të nhiaar wek ɛn, ke we döt lööŋ thɔ̈n week. 16Ku yɛn bï Wääda lip, ka bï we gäm Raan däŋ Raan ee kɔc riit piɔ̈ɔ̈th, bï aa rëër ke week athɛɛr, 17yen aye Wëi yic: Raan cï duëërë dɔm ë kɔc ke piny nɔm, luɔi kën kek e tïŋ, ku cïkï ŋic aya: ku ŋiɛckï week, ee rëër ke week, ku abï nu ë weyiic.
18“We cä bï nyääŋ piny ke we ye abɛɛr: yɛn bï lɔ bɛ̈n tëde week. 19Ë döŋ ke ye tëthiinakäŋ, ke kɔc ke piny nɔm ke ke cïï a bï bɛ tïŋ: ku wek ee ya tïŋ: pïïr piëër ɛn, yen abä wek pïïr aya. 20Ëköölë abäk ŋic nɔn nuö yɛn ë wääric, ku nɔn nuö wek ë yayic, ku nuö ë weyiic.
21“Raan gam lööŋ cï ke thɔ̈n ɛn, ku muk keek, yen aye raan nhiaar ɛn: ku raan nhiaar ɛn abïï Wäär nhiaar, ku abä nhiaar aya, aguɔ rɔt nyuöth en.”
22Go thiëëc ë Judath (acie Yithkariɔt) an, “Bɛ̈nydït, ee kaŋö kë bï yïn rɔt nyuöth wook, ku cïï rɔt bï nyuöth kɔc ke piny nɔm?”
23Go Yecu bɛ̈ɛ̈r, yöök an, “Të nhiɛɛrë raan ɛn, ka bï wëlkï muk: go Wäär nhiaar, agoku bɛ̈n të nu yen, rëërku në yen ëtök. 24Raan cïï a nhiaar, ka cïï wëlkï ee döt: ku jam piɛŋkï acie këdï, ee jam ë Wäär raan ë toc ɛn.
25Kakë acä ke lɛ̈k week, të ŋuɔɔt ɛn ke ya rɛ̈ɛ̈r wo week. 26Ku Raan ee kɔc muk piɔ̈ɔ̈th, yen aye Wëidït ɣer, Wëi bïï Wäär tooc në rinkï, yen abï we wɛ̈ɛ̈t ë këriëëc ëbɛ̈n, ago we tɔ tak wenïïm ë ka cä lɛ̈k week kedhie.
27“Mät en anyäŋ week, mändï en agäm week: miɔ̈c miaac ɛn week, acïï cït man ë miɔ̈c ee kɔc ke piny nɔm we miɔɔc. Duökï wepiɔ̈ɔ̈th tɔ jeth, ku duökï wepiɔ̈ɔ̈th tɔ riɔ̈c. 28Acäk piŋ nɔn cän e lɛ̈k week an, ‘Yɛn jël, ku yɛn bï lɔ bɛ̈n tëde week.’ Tëë we nhiaar ɛn, adï cäk piɔ̈ɔ̈th miɛt, nɔn cän e lueel an, ‘Yɛn lɔ tëde Wäär.’ Wäär awär ɛn e dït. 29Ku ënɔɔnë, acä kɔn lɛ̈k week të ŋoot en ke kën guɔ tïc, na miäk, të tïc en, ke we bï gam. 30Ëlë, yɛn cïï bï bɛ jam wo week arëët: bɛ̈ny ceŋ pinyë nɔm abɔ̈, ku acïn këdɛn nu tëde yɛn, 31ku luɔi bï kɔc ke piny nɔm e ŋic nɔn nhiaar ɛn wäär, ku acït man cï Wäär a thɔn, en aluɔɔi.
“Jatkï röt, jëlku eenë.
Currently Selected:
Jɔn 14: dip-JPB
Highlight
Share
Copy
Want to have your highlights saved across all your devices? Sign up or sign in
The Bible in Jieeng de Padang © The Bible Society in South Sudan, 2011.
