Jɔn 13
13
Yecu Awak Kɔckɛn ë Piööcë Cök
1Na wën, aŋoot Dhuëëŋ ë Winythok wei, ke ŋic Yecu nɔn cï köölde bɛ̈n, kööl bï en jäl piny le tëde Wun, ku nhiëër nhiɛɛr en kɔckɛn nu ë piny nɔm, yen aa nhiɛɛr en keek athöökë käŋ.
2Na wën, aa cäm kɔc thëën, ku jɔ jɔŋdït rac jam guɔ tääu ë Judath piɔ̈u, Judath Yithkariɔt wën ë Thimon an, bï e nyiɛɛn. 3Ku ŋic Yecu nɔn cï Wun käŋ tääu ë yecin kedhie, ku ŋic nɔn ë bïï yen tëde Nhialic, ku nɔn le yen tëde Nhialic. 4Go rɔt jɔt të ë ciëm en, ku bïï alulutde bei, go lupɔ ee coth muk, duut ë yeyic. 5Na wën, ke luuŋ pïïu ë abïny yic, ku jɔ kɔcpiööcë waak cök, ago ke coth cök në lupɔ wën cï duööt ë yeyic. 6Go bɛ̈n tëde Thimon Petero, go Petero thiëëc an, “Bɛ̈nydït, wak a cök?”
7Go Yecu bɛ̈ɛ̈r an, “Kë luɔɔi akuc ënɔɔnë, abä ŋic tei wadäŋ.”
8Go Petero lueel an, “Yïn cïï abï waak cök anandu!”
Go Yecu bɛ̈ɛ̈r an, “Të cän yïn wak, ka cïn këduön nu ë këdï yic.”
9Go Thimon Petero lueel an, “Bɛ̈nydït, acie a cök kapäc kek wak, wak a cin ayadäŋ ayïk a nɔm!”
10Go Yecu yɔ̈ɔ̈k an, “Raan cä waak, acïn tëdak ë ye, ee wɛ̈k bï e waak cök etök, ku cï guöp ɣɛɛr ëbɛ̈n: ku week, wek ɣer, ku acie week wedhie.” 11Aa ŋic raan bï e nyiɛɛn, en aa lueel en en an, “We cïï ɣer wedhie.”
12 #
Luk 22:27. Na wën, aacï ke waak cök, ke be alulutde nööm, ku nyuuc, go ke thiëëc an, “Ŋiɛckï kë cä luöi week?” 13“Wek ee ya tɔ ye Bɛ̈ny ee wëët, ku Bɛ̈nydït, ee yic en luɛlkï, ee kakï. 14Ku ënɔn cän week waak cök, ku ya Bɛ̈nydït ku bɛ̈ny ee wëët, ku ënɔɔnë, week ayadäŋ we duëër wecök dhil waak wapäc, ye ŋɛk ŋɛk waak cök. 15We cä nyuöth luɔi bäk dɔmic, luɔi bäk aa looi, acït man cän e luöi week. 16#Math 10:24; Luk 6:40; Jɔn 15:20. Wek yɔ̈ɔ̈k ë yic an, lïm acïï bɛ̈nyde ee wöör ë dït, ayï raan cï tooc, acïï raan ë toc en wär. 17Të ŋiɛc wek kakë, thieithieei week të ya wek keek looi!
18 #
Diɛt 41:9. “Yɛn cïï jam ë këdun wedhie: yɛn ŋic kɔc cä lɔc: ku këcïgɔ̈ɔ̈r abï dhil aa yic an, ‘Raan cam kuïn ke yɛn ëtök yen aa luui yɛn ater.’ 19Ku ënɔɔnë wek lɛ̈k käŋ të ŋoot kek ke ke kën tïc, na miäk, të cï kek guɔ tïc, ke we bï gam nɔn ‘Ee Yɛn En.’ 20#Math 10:40; Mak 9:37; Luk 9:48; 10:16. Wek yɔ̈ɔ̈k ëyic an, “Raan gam raan bä tooc, ka gam ɛn, ku raan gam ɛn, ka gam raan ë toc ɛn.”
Yecu Acaar Luɔi bï ë Yen Nyiɛɛn
(Math 26:20-25; Mak 14:17-21; Luk 22:21-23)
21Na wën, acï Yecu kakë lueel, ke jɔ piɔ̈u jiɛth, ku lëk keek an, “Wek yɔ̈ɔ̈k ëyic an: Raan tök ë week abï a nyiɛɛn.”
22Go kɔcpiööcë röt woi, akuckï raan lueel. 23Ku ade raan rɛ̈ɛ̈r tëde cäm ke kɛn rɔt ë Yecu yɔu, ee raan töŋ ë kɔckɛn ë piööcë yiic, raan nhiɛɛr Yecu. 24Ago Thimon Petero raanë nieu ku lueel an, “Luɔpë eeŋa yen jiɛɛm en ë këde?”
25Go raan wën kɛn rɔt ë Yecu yɔu go thiëëc an, “Bɛ̈nydït eeŋa?”
26Go Yecu bɛ̈ɛ̈r an, “Ye kï, raan bän kuïn juɔɔl, ku gäm en.” Na wën, aacï kuïn juɔɔl, ke gëm Judath Yithkariɔt, wën ë Thimon. 27Ku të cï en kuïn nööm, ke Catan lɔ ë yepiɔ̈u. Go Yecu yɔ̈ɔ̈k an, “Na de kë bä looi, ke dap looi!” 28Ku acïn raan në kɔc rɛ̈ɛ̈r tëde cäm raan ŋic kë lueel en ee kënë. 29Ku në luɔi ciɛthë Judath ke athep ë wëu, aye kɔc kɔ̈k lueel an, cï Yecu yiɛ̈n lɛ̈k en an, ɣɔc ka kɔɔrku tëde Dhuëëŋ, ku nɔn bï en kɔc kuanynyïïn yiɛ̈n miɔɔc ë käŋ.
30Na wën, aacï kuïn nööm, ke lɔ biic ënɔnthiinë: ku piny ee wakɔ̈u.
Löŋ cï Piac Mac
31Të cï en guɔ jäl, ke lueel Yecu an, “Wën ë Raan acï gäm dhuëëŋ ënɔɔnë, ku gëmë Nhialic dhuëëŋ në yen. 32Ku të cï Nhialic gäm dhuëëŋ në yen, ke Nhialic abï Wën ë Raan gäm dhuëëŋ ë yenguöp aya, ku abï dap gäm dhuëëŋ ënɔnthiinë. 33#Jɔn 7:34. Week mïththiikë, ë döŋ ke ye tëthiinakäŋ të rɛ̈ɛ̈r ɛn wo week. We bï a kɔɔr: ku acït man cän e lɛ̈k Judai an, ‘Të la yɛn thïn, ke we cïï duëër bɛ̈n, yen alɛ̈k week ënɔɔnë.’ 34#Jɔn 15:12,17; 1 Jɔn 3:23; 2 Jɔn 5. Wek thɔ̈n cöök cï piac lueel an, Nhiaarkï röt, acït man cän week nhiaar, ke we bï röt nhiaar wapäc ayadäŋ. 35Yen abï kɔc e ŋic kedhie nɔn aa wek kɔckiën ë piööcë, të nhiaar wek röt wapäc.”
Yecu Acaar Jiɛi de Petero
(Math 26:31-35; Mak 14:27-31; Luk 22:31-34)
36Go Thimon Petero thiëëc an, “Bɛ̈nydït, ee tënou bï yïn lɔ?”
Go Yecu bɛ̈ɛ̈r an, “Të la yɛn thïn, yïn cïï a duëër kuany cök ënɔɔnë, yïn bï a kuany cök wadäŋ.”
37Go Petero lueel an, “Bɛ̈nydït, eeŋö cän yï duëër kuany cök ënɔɔnë? Yɛn bï wëikï gaam ë biäkdu!”
38Go Yecu bɛ̈ɛ̈r an, “Bä wëiku gaam ë biäkdï? Yïn yɔ̈ɔ̈k ëyic an, thɔn ajïth acïï bï kɔn kiu, të ŋoot yïn ke yï kën a jai raandiäk.”
Currently Selected:
Jɔn 13: dip-JPB
Highlight
Share
Copy
Want to have your highlights saved across all your devices? Sign up or sign in
The Bible in Jieeng de Padang © The Bible Society in South Sudan, 2011.
