Jɔn 3

Yecu ku Nikodemo

1Raan anu raan ë Parithai, cɔl Nikodemo, ee bɛ̈ny ë Judai. 2Ë bɛ̈n tëde Yecu wakɔ̈u, bï ku lueel an, “Rabi, yïn ŋicku nɔn ee yïn raan ee wëët raan ë bɔ̈ tëde Nhialic: acïn raan duëër göök loiyë looi, të cïï Nhialic cath ke yen.”

3Go Yecu puk nɔm an, “Yïn yɔ̈ɔ̈k ëyic an, të kënë raan bɛ dhiëëth, ka cïï ciɛɛŋ de Nhialic duëër tïŋ.”

4Go Nikodemo thiëëc an, “Duëërë raan bɛ dhiëëth adï, të cï en dït? Duëër bɛ lɔ ë man yäc, ku beyë dhiëëth!”

5Go Yecu puk nɔm an, “Yïn yɔ̈ɔ̈k ëyic an, të kënë raan dhiëëth në pïïu kekë wëi, ka cïï duëër lɔ ë ciɛɛŋ de Nhialicic. 6Kë cï dhiëëth në guöp ee guöp, ku ke cï dhiëëth ë Wëi ee wëi. 7Du gäi nɔn cän e lɛ̈k yïn an, we bï dhil bɛ dhiëëth. 8Yom ee pɔ̈t tëde piɔ̈nde, ku yïn ee awööude piŋ, ku kuc të bï yen thïn, ayï të le yen thïn: raan ëbɛ̈n raan cï dhiëëth ë Wëi yen acït en.”

9Go Nikodemo bɛ̈ɛ̈r, thiëëc an, “Duëër kakë bɛ̈n adï?”

10Go Yecu puk nɔm, lueel an, “Ye raan ë Yithriɛl wɛ̈ɛ̈t, ku kuc kakë?” 11Yïn yɔ̈ɔ̈k ëyic an, “Wok ee kë ŋicku lueel ku yok cäätɔɔ në ka cuk tïŋ, ku wek cïï këda ee gam. 12Të cän week lɛ̈k ka ke piny nɔm, ku cäkï gam, ku na lɛ̈k week ka ke paannhial, bäk gam wäkdï? 13Acïn raan cï lɔ paannhial, ee raan cï bɛ̈n piny paannhial etök, yen aye Wën ë Raan Wën nu paannhial.#3:13: Jam abï ŋoot ke kuany cöök 21 yic.

14Acït man cï Mothe kërac jat nhial ë jɔ̈ɔ̈ric, yen acït jön bï Wën ë Raan dhil jat nhial aya: 15ke raan gam ɛn cïï bï määr, raan ëbɛ̈n, ku bï dɛ pïïr athɛɛr.

16Nhialic ë piny nɔm nhiaar aläl, arëk abï miɔɔc ë Wëndɛn cï dhiëëth etök, ke raan gam en cïï bï määr, raan ëbɛ̈n, ku bï dɛ pïïr athɛɛr. 17Nhialic aacïï Wënde tuuc ë piny nɔm, bï kɔc ke piny nɔm yiëk yiëth gääk, ee luɔi bï kɔc ke piny nɔm kony wëi, en ë tuuc en en.

18Raan gam en acïn gääk nu ë yeyeth: ku raan reec gäm, ë guɔ yiëk yeth gääk ënɔɔnë, luɔi reec en gäm në rin ke Wën ë Nhialic, wën cï dhiëëth etök. 19Gääk cï tääu ë kɔc yiëth kï, ɣɛɛrëpiny ëbɛ̈n ë piny nɔm, go kɔc cuɔlëpiny nhiaar awär ɣɛɛrëpiny, ë luɔi rɛɛcë luɔiden. 20Raan ëbɛ̈n raan ë kërac looi, ee ɣɛɛrëpiny maan, ku ye rɛɛc bɛ̈n tëɣer, ke luɔide cïï bï aa jɔ̈ɔ̈ny. 21Ku raan ee yic looi ee bɛ̈n tëɣer, ke luɔide bï aa tïc, nɔn cï e looi në Nhialic.

Yecu ku Jɔn

22Na wën, acï kakë wan, ke Yecu bɔ̈ piny de Juda kekë kɔckɛn ë piööcë, go rëër ke keek ëtɛ̈ɛ̈n, ku ye kɔc baptith. 23Ku Jɔn ayadäŋ aaye kɔc baptith ë Ayinon thiääk ke Thalim, luɔi nu pïïu juëc ëtɛ̈ɛ̈n: ago kɔc bɛ̈n, bï ke bɛ̈n baptith. 24#Math 14:3; Mak 6:17; Luk 3:19,20. Jɔn aa ŋoot ke kënë guɔ cuat ë aloocic.

25Na wën, ke kɔcpiööcë Jɔn ke ke teer në Judai në këde waak. 26Agokï bɛ̈n tëde Jɔn, bïk ku luelkï an, “Rabi, raan ë rɛ̈ɛ̈r wek ëtök ë Jordan nɔm lɔŋtui, raan cï yïn këde lueel, tïŋ, ee kɔc baptith, go kɔc aa lɔ tëde yen kedhie!”

27Go Jɔn bɛ̈ɛ̈r, lueel an, “Acïn kë duëërë raan yök, të kënë ye gäm en nhial. 28#Jɔn 1:20. Week gup wek e cäätɔɔ në kë cä lueel, an, ‘Yɛn cie Kërtho, ku yɛn aa kɔnë tuööc ë yenɔm tueŋ.’ 29Raan thiak nyan lueelë thiëëkë, yen aye monythiëk: ku mɛ̈thë monythiëk, raan kääc ëtɛ̈ɛ̈n ku piŋ jamde, ee piɔ̈u miɛt aläl ë röl ë monythiëk: miɛt miɛt ɛn piɔ̈u kï, acï guɔ aa yic. 30Yen abï rɔt dhil aa ŋuak, ku yɛn bï dhil aa lɔ ciëën.”

Raan ë Bɔ̈ Paannhial

31Raan bɔ̈ paannhial yen anu ë kɔc nïïm kedhie. Raan bɔ̈ ë piny nɔm, yen aye këde piny, ku ye ka ke piny lueel: raan bɔ̈ paannhial anu ë kɔc nïïm kedhie. 32Go ya cäätɔ në ka cï tïŋ ku në ka cï piŋ, go këde aa lueel, ku acïn raan ë këde gam. 33Raan ë këde gam, acï gɔ̈ɔ̈r ë katimde an, Nhialic yen aye yic. 34Raan ë tuuc ë Nhialic ee wël ke Nhialic lueel: ku acïï ë Nhialic miɔɔc ë Wëi në thëm them en keek. 35#Math 11:27; Luk 10:22. Wääda anhiaar wënde, ago käŋ tääu ë yecin kedhie. 36Raan gam Wënde ee cath ke pïïr athɛɛr, ku raan reec Wënde gam, acïï pïïr bï tïŋ, agönh ë Nhialic ee rëër ë yeyeth.

Currently Selected:

Jɔn 3: dip-JPB

Highlight

Copy