Jɔn 8
8
Tiiŋ cï Dɔm ke Mony Lei
1Ku lɔ Yecu të nu kuur ë Olip. 2Na wën, aruu piny, ke be bɛ̈n ë Luaŋdïtic, ku bɔ̈ kɔc të nu yen kedhie, go nyuc, wëët keek. 3Na wën, ke kɔc ee löŋ gɔ̈ɔ̈r kekë Parithai ke ke bïï tik të nu yen, tiiŋ cï dɔm ke cï lɔ kekë mony lei, agokï tääu ë ciɛɛlic. 4Ku luelkï an, “Bɛ̈ny ee wëët, tiiŋë acï dɔm ke mony lei, aake yök ke ke nin ëtök. 5#Leb 20:10; Nyöŋ 22:22-24. Ku wo cïï Mothe yɔ̈ɔ̈k ë löŋic an, “Kɔc loi kacït ee kakë aduëërë ke biɔ̈ɔ̈k ë kur: ku na yïn, luel wudï?” 6Aake luel kënë them kek en, ke bï dɛ të gɔɔny kek en. Go Yecu enɔm guöt piny tei, gɛ̈ɛ̈r piny e yecin. 7Na wën, acïk cool e thiëëc kek en, ke jɔ rɔt jɔt, yöök keek an, “Raan cïn piɔ̈u kërac ë weyiic, ë kɔn kuur dɛ̈ny en.” 8Go yenɔm bɛ guöt piny, gɛ̈ɛ̈r piny ë yecin. 9Të cï kek e piŋ, go piɔ̈ɔ̈thken ke jɔ̈ɔ̈ny, gokï lɔ biic ëlemlem, gɔl ë röördït, leer ë kɔc kor: abï Yecu döŋ etök, ku kaac tiiŋë ë ciɛɛlic tëdɛn wën. 10Na wën, acï Yecu rɔt jɔt, ku acïn raan cï tïŋ, ee tik etök, ke jɔ thiëëc an, “Tiiŋë, kɔc akou kɔc wënthɛɛr gɔɔny yïn? Cïn raan cï yïn yiëk yeth gääk?”
11Go lueel an, “Acïn raan, Bɛ̈nydït.” Go Yecu yɔ̈ɔ̈k an, “Ayï yɛn aya, yïn cä bï yiëk yeth gääk: lɔ, du kërac be looi anandu.”
Yecu ee Ɣɛɛr ë Piny nɔm
12 #
Math 5:14; Jɔn 9:5. Go Yecu kɔc yɔ̈ɔ̈k, an, “Yɛn ee ɣɛɛr ë piny nɔm: raan kuany a cök acïï bï cath tëcol, ku bï dɛ ɣɛɛrëpiny de pïïr.”
13 #
Jɔn 5:31. Go Parithai lueel an, “Yïn ee käŋ lueel ë këde yenhdu, këduön luel acie yic.”
14Go Yecu pɔ̈k nɔm keek an, “Na ya cak käŋ lueel në këde yenhde, ke këdï ee yic, yɛn ŋic të ë bä yɛn thïn ayï të la yɛn thïn, ku week, we kuc të ë bä yɛn thïn, ku kuöckï të la yɛn thïn. 15Wek ee löŋ guiir në këde guöp tei, ku yɛn, acïn raan aa yɛn löŋde guiir. 16Ku na ya cak löŋ aa guiir, ke guiëër aa yɛn löŋ guiir ee yic, yɛn cïï rɛ̈ɛ̈r a tök, ee yɛn wokë Wäär raan ë toc ɛn. 17#Nyöŋ 19:15. Ku acï gɔ̈ɔ̈r ë löŋdunic aya an, kë lueel cäätɔɔ kaarou, yen aye yic. 18Yɛn ee cäätɔ ë rɔt atök, ku Wäär raan ë toc ɛn ee cäätɔdï aya.”
19Agokï thiëëc an, “Nu Wuur ënou?”
Go Yecu bɛ̈ɛ̈r an, “Kuc ɛn ayï Wäär: tëë we ŋic ɛn, adï ŋiɛckï Wäär aya.”
20Aa luel wëlke të ye käŋ juaar thïn, të wëët en kɔc ë Luaŋdïtic: ku acïn raan cï yen dɔm, në luɔi ŋootë ë köölde ke kën bɛ̈n.
Wek cïï Duëër lɔ të La Yɛn
21Go Yecu keek bɛ yɔ̈ɔ̈k an, “Yɛn jël ë jäldï, ku we bï a kɔɔr, ku we bï thou ë kërɛɛcdunic: të la yɛn thïn, ke wek cïï duëër bɛ̈n.”
22Go Judai lueel an, “Bï rɔt nɔ̈k, nɔn lueel en en an, të la yɛn thïn, ke wek cï duëër bɛ̈n?”
23Go lɛ̈k keek an, “Wek ë bɔ̈ piny, ku yɛn ë bɔ̈ nhial: wek ee ka ke pinyë nɔm, yɛn cie kë de pinyë nɔm. 24Yen aa lɛ̈k ɛn e week, an, we bï thou në karɛckun yiic: ku të kɛ̈n wek a gam, ‘nɔn aa Yɛn En,’ ke we bï thou ë karɛckun yiic.”
25Gokï thiëëc an, “Ee yïn ŋa?”
Go Yecu ke yɔ̈ɔ̈k an, “Ee raan wään aa cool ë lɛ̈k ɛn e week ëcaŋɣɔn. 26Yɛn de kajuëc bä lueel ë këdun ayï lööŋ juëc bä guiir: ku raan ë toc ɛn ee yic, ku ka cä piŋ tëde yen, kakë aya ke lɛ̈k kɔc ke piny nɔm.”
27Aake kuc nɔn cï e lɛ̈k keek në këde Wun. 28Go Yecu ke yɔ̈ɔ̈k an, “Të cä wek Wën ë Raan tääu nhial, yen abä wek e ŋic nɔn aa Yɛn En, ku nɔn cïn en kë cä looi në këde yenhdï, ku wëët cïï Wäär a wɛ̈ɛ̈t, yen aa luɛɛl ɛn kakë. 29Ku raan ë toc ɛn, yen arëër wok ëtök, Wäär akën a nyääŋ piny atök, luɔi aa yɛn cool ë loi kamit në yepiɔ̈u.”
30Na wën, cï en ee kakë lueel, go kɔc juëc këde jɔ gam.
Yic abï We Kony Wëi
31Go Yecu Judai wën cï ye gam yɔ̈ɔ̈k an, “Të täu wek ë jamdï yic, ka wek ee kɔckiën ë piööcë në yic, 32ku we bï yic ŋic, ku yic abï we lony.”
33 #
Math 3:9; Luk 3:8. Gokï bɛ̈ɛ̈r an, “Wok ee kɔ̈th ke Abraɣam, ku wo kën kɔn aa lïïm ke raan däŋ ëcaŋɣɔn: eeŋö lueel yïn en an, ‘We bï lony?’”
34Go Yecu bɛ̈ɛ̈r an, “Wek yɔ̈ɔ̈k ëyic an, ‘Raan ëbɛ̈n raan ë kërac looi, yen aye lïm ë kërac. 35Ku lïm acie rëër ɣööt athɛɛr: ku Wëndït yen aye rëër athɛɛr. 36Ku të lonyë Wëndït week, ke we bï aa kɔc cï lony. 37Wek ŋiɛc nɔn aa wek kɔ̈th ke Abraɣam, ku wek kɔɔr luɔi näk wek ɛn, luɔi cïn en të bï jamdï rëër ë weyiic. 38Yɛn ee käŋ lueel ka cä piŋ tëde Wäär: ku week aya, wek ee käŋ looi ka cäk piŋ tëde wuöördun.”
39Gokï bɛ̈ɛ̈r, yöökkï an, “Abraɣam yen aye wääda.”
Go Yecu ke yɔ̈ɔ̈k an, “Të ya wek mïth ke Abraɣam adï yak luɔi de Abraɣam looi. 40Ku ënɔɔnë, wek kɔɔr luɔi näk wek ɛn, raan cï week lɛ̈k yic, kë cä piŋ tëde Nhialic: kënë akënë Abraɣam looi! 41Wek ee luɔi ë wuöördun looi.”
Gokï lueel an, “Wo cie adhiëthlëër, wo de Wääda tök, Nhialic.”
42Go Yecu ke yɔ̈ɔ̈k an, “Tëë ye Nhialic yen ee Wuöördun, adï yak a nhiaar: nɔn ë bä yɛn tëde Nhialic bä eenë, ku yɛn ë cïï bɔ̈ në këde yenhdï, yen aa toc ɛn. 43Eeŋö cä wek jamdï ŋic? Ee luɔi cä wek jamdï lëu në pïŋ. 44Wek ee mïth ke jɔŋdït rac wuöördun, ku kɔ̈ɔ̈r kɔɔrë wuöördun kërac, yen aa yak kɔɔr ayadäŋ. Yen aaye nɛ̈k të ɣɔn ciɛkë käŋ, ku reec ceŋ në yicic, luɔi liiuwë yic tëde yen. Të töör en lueth, ee këde en lueel, nɔn ee yen alueeth, ku ye wun lueth. 45Ku luɔi luɛɛl ɛn yic, yen a cä wek a gam. 46Eeŋa në weyiic raan duëër a jɔ̈ɔ̈ny në baŋ de kërac? Ku na luɛɛl yic, eeŋö cä wek a gam? 47Raan ë Nhialic ee wël ke Nhialic piŋ: yen acä wek ke piŋ, luɔi cä wek ee kɔc ke Nhialic.”
Yecu ku Abraɣam
48Ago Judai bɛ̈ɛ̈r, luelkï an, “Cie yic en luelku an, Yïn ee Thamaritan, ku de ye guöp jɔŋ rac?”
49Go Yecu bɛ̈ɛ̈r an, “Yɛn cïn guöp jɔŋ rac, ku yɛn riëëu Wäär, ku wek reec a riëëu. 50Ku yɛn cïï lɛcdï kɔɔr: raan tök anu raan kɔɔr lɛc bï a leec, ku yen aye löŋ guiir. 51Wek yɔ̈ɔ̈k ë yic an, të dötë raan wëlkï, ka cïï thuɔɔu bï tïŋ anande.”
52Go yɔ̈ɔ̈k ë Judai an, “Ënɔɔnë aŋicku nɔn de yïn guöp jɔŋ rac. Abraɣam ë thou, ayï tït, ku ye lueel an, të dötë raan wëlkï, ka cïï thuɔɔu bï thiëëp anande. 53Wär wääda Abraɣam në dït, raan cï thou? Ayï tït acïk thou: ye rɔt tɔ ye ŋa?”
54Go Yecu bɛ̈ɛ̈r an, “Të lɛɛc ɛn rɔt, ke lɛcdï acïn naamde: ee Wäär yen alec ɛn, raan yak lueel an, ee Nhialicdun, 55ku akɛ̈nkï ŋic: ku aŋiɛc yɛn, ku na luɛɛl en an, akuöc ke yɛn bï ya alueeth cït week: ku aŋiɛc, ku ya jamde döt. 56Kuɛɛrëdun Abraɣam aa mit piɔ̈u në tïŋ duëër en kööldï tïŋ, ago tïŋ, ku jɔ piɔ̈u a yum.”
57Go yɔ̈ɔ̈k ë Judai an, “Runku yïn aŋootkï ë ke kën aa thiërdhïc, ku cï Abraɣam tïŋ?”
58Go Yecu ke yɔ̈ɔ̈k an, “Wek yɔ̈ɔ̈k ëyic an, ɣɔn ŋootë Abraɣam ke liu, ‘Yɛn ë nu.”’
59Gokï kur kuany piny lek biɔ̈ɔ̈k: go Yecu thiaan, na wën, ke jël ë Luaŋdïtic le biic, aa tëk ë keyiic cil, bɛɛric aya.
Currently Selected:
Jɔn 8: dip-JPB
Highlight
Share
Copy
Want to have your highlights saved across all your devices? Sign up or sign in
The Bible in Jieeng de Padang © The Bible Society in South Sudan, 2011.
