Jɔn 9
9
Yecu atɔ Raan cï Dhiëëth ke ye Cɔɔr Waar
1Na wën, aa tëëk, ke tïŋ raan ë dhiëth ke ye cɔɔr. 2Go kɔckɛn ë piööcë thiëëc an, “Rabi, eeŋa ë loi kërac, në yï raanë, kekë wun ku man, ënɔɔn ë dhiëthë ye ke ye cɔɔr?”
3Go Yecu bɛ̈ɛ̈r an, “Acie raanë yen ë loi kërac, ku cie wun ayï man: ee tïc bï luɔi ë Nhialic tïc ë yeguöp. 4Yɛn bï luɔi dhil aa looi, luɔi ë raan ë toc ɛn, të ŋootë piny ke ye aköl: wakɔ̈u abɔ̈, të cïn raan duëër luui. 5#Math 5:14; Jɔn 8:12. Të ŋuɔɔt ɛn ke ya nu ë piny nɔm, ke yɛn ee ɣɛɛr ë piny nɔm.”
6Na wën, aacï kakë lueel, ke jɔ piny ŋuööt, go tiɔp nuaai ë luɛɛth, go cɔɔr rɔɔth nyin ë tiɔp, 7ku yöök an, “Lɔ, waakë ë awuöl e Thilowamic (yen aye “Tuc” në thoŋda).” Go lɔ, ku wɛɛk, ku le bɛ̈n ke daai.
8Go kɔc rɛ̈ɛ̈r ë yen ëtök, ayï kɔc wään ee ye tïŋ nɔn ee yen cɔɔr, agokï lueel an, “Cie raan wään ee rëër piny ke lip?”
9Go kɔc kɔ̈k lueel an, “Ee yen.” Ku lueel kɔ̈k an, “Ei, ku acït en.”
Go raan jɔ lueel an, “Ee yɛn.”
10Gokï thiëëc an, “Ë yï liep nyin adï?”
11Go bɛ̈ɛ̈r an, “Raan cɔl Yecu ë tiɔp nuaai, ku rɔɔth a nyin, go lɛ̈k ɛn an, Lɔ waakë ë Thilowamic: guɔ lɔ, ku waak, guɔ piny tïŋ.”
12Gokï thiëëc an, “Nu nou yen ee raanë?”
Go lueel an, “Akuöc.”
Parithai Akɔɔrkï Kueer ë Deem ë Raan
13Gokï bɛ̈ɛ̈i tëde Parithai yen raan wään ee cɔɔr. 14Ku yen aaye kööl ë Thabath kööl wään nuɛɛiyë Yecu tiɔp, ku liep raan nyin. 15Go Parithai bɛ thiëëc në kë cï en piny tïŋ. Go lëk keek an, “Aa tɛ̈ɛ̈u tiɔp ë yanyin, ku ja waak, aguɔ jɔ guɔ daai.”
16Go Parithai kɔ̈k lueel an, “Raanë aacïï bɔ̈ tëde Nhialic, ee kööl ë Thabath rɛɛc döt.”
Ku lueel kɔc kɔ̈k an, “Raan ë kërac looi duëër göök cït ë kakë looi adï?” Go teer rɔt cak ë keyiic.
17Gokï cɔɔr bɛ thiëëc an, “Yïn, luel wudï në këde, në kë cï en yï liep nyin?”
Go lueel an, “Ee tiët.”
18Ku reec Judai gäm në këde, nɔn ee yen cɔɔr, ku be piny tïŋ, agokï wun ku man raan wën cï tɔ daai cɔɔl. 19Ku thiëckï keek an, “Ee wëndun ee kënë, raan wën luɛlkï an, ë dhiëth ke ye cɔɔr? E jɔ daai adï ënɔɔnë?”
20Go wun bɛ̈ɛ̈r ayï man, luelkï an, “Mɛnhë aŋicku nɔn ee yen wënda, ku ŋicku nɔn ë dhiëëthë yen ke ye cɔɔr. 21Ku kë tɔ ye daai ënɔɔnë akucku, ayï raan ë liep yenyin, akucku, ee raan dït, jakï thiëëc, abï këde lueel yen ëtök!” 22Kakë aake lueel wun kekë man, në riɔ̈ɔ̈c riɔ̈ɔ̈c kek ë Judai: Judai aake cï kethook mat an, të de yen raan gam en an, ee Kërtho, ka bï ciɛɛc biic ɣön ë Nhialic. 23Yen aa lueel wun ayï man an, “Ee raan dït, thiëckï!”
24Gokï raan wën ee cɔɔr bɛ cɔɔl raanrou, ku yöökkï an, “Leec Nhialic, raanë aŋicku nɔn ee yen raan ë kërac looi.”
25Go bɛ̈ɛ̈r an, “Nɔn ee yen raan ee kërac looi, ku nɔn cïï en ee yen, aa ja kuc: ee cöök tök yen aŋiɛc an, wään yɛn aaye cɔɔr, ënɔɔnë yɛn daai.”
26Gokï bɛ thiëëc an, “Ë loi yïn adï? Ë liep yïnyin adï?”
27Go pɔ̈k nɔm keek an, “Acä kɔn lɛ̈k week wën, ku kɛ̈nkï piŋ: eeŋö kaarkï, kë bäk bɛ piŋ? Kaarkï luɔi bä wek aa kɔckɛn ë piööcë ayadäŋ?”
28Agokï lat, ku luelkï an, “Yïn ee raandɛn ëpiööcë, ku wok ee kɔcpiööcë Mothe. 29Aŋicku nɔn cï Nhialic jam kekë Mothe, ku na ye raanë, akucku tëdɛn ë bï yen thïn!”
30Go raan bɛ̈ɛ̈r, lueel an, “Man ee kë ye kɔc tɔ gäi, kuny kuöc wek të ë bï yen thïn, ku yen aa liep a nyin. 31Aŋicku nɔn cïï Nhialic këde kɔc ee kërac looi ye piŋ: ku të riëëuwë raan Nhialic, ku ye këde piɔ̈nde looi, këde aye Nhialic piŋ.
32Të ɣɔn ciɛkë piny akënë kɔn piŋ nɔn de yen raan cï raan liep nyin raan cï dhiëth ke ye cɔɔr. 33Raanë, tëë cie raan ë bɔ̈ tëde Nhialic, adï cïn kë ye lëu!”
34Gokï bɛ̈ɛ̈r yöökkï an, “Yïn aa dhiëth ë këracic liŋliŋ, ku bä wook wɛ̈ɛ̈t?” Agokï ciɛɛc biic.
Cɔɔr de Wëi
35Ago Yecu piŋ nɔn cï kek e ciɛɛc biic, go yök, ku thiëëc an, “Gam Wën ë Raan?”
36Go bɛ̈ɛ̈r, thiëëc an, “Ye ŋa, Bɛ̈nydït, kë bän e gam?”
37Go Yecu lueel an, “Acï tïŋ guöp, ku ye kï, ee raan jam kekë yïnë.”
38Go lueel an, “Acä gam, Bɛ̈nydït.” Go lam.
39Go Yecu lueel an, “Ee guiëërëlöŋ yen aa bïï yɛn ë piny nɔm, ke kɔc cie daai ë ke bï bɛ̈n daai, ku bï kɔc daai bïk cɔɔr.”
40Të cï Parithai kakë piŋ, Parithai nu ë yelɔ̈ɔ̈m, ke jɔkï thiëëc an, “Ayï wook, yok cöör?”
41Go Yecu ke yɔ̈ɔ̈k an, “Tëë we ye cöör, adï cïn awäny cath ke week: ku ënɔɔnë ayak lueel an, Wok daai, yen aye täu tɔ̈uwë awänydun.”
Currently Selected:
Jɔn 9: dip-JPB
Highlight
Share
Copy
Want to have your highlights saved across all your devices? Sign up or sign in
The Bible in Jieeng de Padang © The Bible Society in South Sudan, 2011.
