Luk 15
15
Thök cï Määr
(Math 18:12-14)
1 #
Luk 5:29,30. Na ɣɔn, ke kɔc ë athölbö tɔ kut kekë kɔc ë kërac looi ke ke jɔ röt cuöt të nu yen bïk bɛ̈n piŋ. 2Na wën, ke Parithai kekë kɔc ee löŋ gɔ̈ɔ̈r ke ke jɔ ŋun ë këyäc, luelkï an, “Raanë ee kɔc ee kërac looi dɔm tɔ ke ye kɔcke, ku ye cam ke keek ëtök!” 3Go keek lɛ̈k kääŋë an,
4“Ee raanou ë weyiic, raan de thök kabɔt, na mär tök ë keyiic, ke cïï thiërdhoŋuan ku dhoŋuan bï nyääŋ roor, ku jɔ kë cï määrë lɔ kɔɔr, aɣet të bï e yök? 5Na ëlë, të cï en e yök, ke jɔ tääu ë yeyeth, ke cï piɔ̈u miɛt. 6Ku na cï ɣet bei, ke jɔ määthke cɔɔl ku kɔc rɛ̈ɛ̈r ë yen ëtök, ku lëk keek an, ‘Jakï piɔ̈ɔ̈th miɛt në yɛn ëtök, yɛn ë thɔ̈ɔ̈kdiën wën cï määr yök!’ 7Wek yɔ̈ɔ̈k an, miɛtëpiɔ̈u abï dït paannhial aya në biäk de raan tök raan ee kërac looi, ku be yepiɔ̈u puk, awär miɛt mitë kɔc piɔ̈ɔ̈th në biäk de kɔc kathiërdhoŋuan ku dhoŋuan kɔc cïn puŋdepiɔ̈u kɔɔrkï.
Rial cï Määr
8“Ku ye tiiŋou, tiiŋ de atek kathiëër, ku na mɛ̈ɛ̈r ateŋ tök, ke cïï manyëalath bï kooth ku jɔ ɣöt napic, ago cök ë kɔɔr en en aɣët të bï en e yök? 9Na ëlë, të cï en e yök, ke jɔ määthke cɔɔl kekë kɔc rɛ̈ɛ̈r në yen ëtök, ku lueel an, ‘Jakï piɔ̈ɔ̈th miɛt në yɛn ëtök, yɛn ë rial wën cä mɔ̈ɔ̈r yök!’ 10Wek yɔ̈ɔ̈k an, “Yen abï ciët miɛt ee kɔc piɔ̈ɔ̈th miɛt ë tuuc ke Nhialic nïïm në biäk de raan tök raan ee kërac looi, ku be yepiɔ̈u puk.”
Wën cï Määr
11Go lueel an, “Ade raan nu raan de wɛ̈ɛ̈tke kaarou. 12Na wën, ke mɛnh koor jɔ wun yɔ̈ɔ̈k an, ‘Wäär, gämë yɛn biäk bï lɔ̈ɔ̈k aa biäkdï ë wëuku yiic.’ Go keek tɛ̈k wëuke. 13Na leer akööl likë, ke mɛnh koor jɔ wëuke kut kedhie, ku jɔ jäl keny paan mec, go wëuke lɔ thiäi wei ëtɛ̈ɛ̈n në thuëëc thuëëc en ë käŋ. 14Na wën, aacï wëuke thöl kedhie, ke cɔŋdït jɔ tuöl ee pinyë, go kake jɔ dak. 15Go lɔ ku mɛt rɔt ë raan lɔ̈ɔ̈m raan töŋ de ee pinyë, go tɔ lɔ ë duumke yiic le kudhuur aa tiit. 16Ku aa de piɔ̈u arëët luɔi bï en e yäc aa thiɔ̈ɔ̈ŋ në thel ee kudhuur cam, ku acïn raan ee ye miɔɔc. 17Na wën, aacï nɔm jɔ bɛ̈n, ke jɔ lueel an, ‘Kɔc ee luui ë wëu tëde wäär yek dï, kɔc ee kuɛth ë kuïn ku yek kɔ̈k both, ku yɛn, yɛn thou we cɔk! 18Yɛn bï rɔt jɔt, la tëde wäär, la ku luɛɛl an, “Wäär, yɛn ë kërac luöi Nhialic, ku luöi yïn kërac aya. 19Yɛn cïï be röŋ në luɔi bï a cɔl wëndu: tɔ ya cït raan töŋ ee luui ë wëu tëde yïn.”’ 20Go rɔt jɔt, bï tëde wun.
Na wën, ke tïŋ wun ke ŋoot ke mec, go piɔ̈u kok ke ye, ku jɔ kat, le ku kuɛk yeth, ku ciim. 21Go wënde lueel an, ‘Wäär, yɛn ë kërac luöi Nhialic, ku luöi yïn kërac aya, ku yɛn cïï be röŋ në luɔi bï a cɔl wëndu.’ 22Go wun lïïmke yɔ̈ɔ̈k an, ‘Bɛ̈ɛ̈ikï lupɔ piɛth aläldïïtë, ku tääukï ë yekɔ̈u, ku bɛ̈ɛ̈ikï guelɔ këde yenciin, ku war ka ke yencök. 23Ku jakï miɔɔr a lɔ jöt bɛ̈ɛ̈i bei miɔɔr cuai, ku näkkï, buk cuet, ku jɔku piɔ̈ɔ̈th miɛt! 24Wëndiënë aa cï thou, ku ë bɛ pïïr ënɔɔnë, aa cï määr, ku acï jɔ yök.’ Gokï piɔ̈ɔ̈th jɔ miɛt.
25Ku nu wën tueŋ domic. Na wën, aacï bɛ̈n, acï thiɔ̈k ke baai, ke piŋ diɛt cɔŋë ke lɔ̈ɔ̈r. 26Go mɛnh tök cɔɔl ë mïth ee luui yiic, ku jɔ kakë luɔp thar an, ‘Ee käŋö?’ 27Go lueel an, ‘Wänmuuth acï bɛ̈n, ku wuur ë miɔɔr a lɔ jöt nɔ̈k miɔɔr cuai, nɔn cï en e bɛ yök ke piɔl guöp.’ 28Go gɔ̈th, ku reec lɔ ɣöt, go wun bɛ̈n bei, bï ku lɛ̈ŋ. 29Go bɛ̈ɛ̈r, yöök wun, an, ‘Tïŋ, yïn cä luööi ë run juëckë cït man ë lïm, ku acïn këduön cä kɔn wööc anandï, ku acïn amɛthɔ̈k cï gäm ɛn ëcaŋɣɔn, bän piɔ̈u miɛt wokë määthkï. 30Ku ënɔn cï wënduönë bɛ̈në, wën cï wëuku thiäi wei kekë akɔɔrröör, ke jɔ näk miɔɔr a lɔ jöt, miɔɔr cuai.’ 31Go lueel an, ‘Wëndï, yïn rɛ̈ɛ̈r we yɛn ë aköölnyïïn, ku kakï kedhie ee kaku. 32Ee këpiɛth yen dɔl dɔl wok ku mitku piɔ̈ɔ̈th: wänmuuthë aacï thou, ku jɔ bɛ pïïr, aacï määr, ku beyë yök.”’
Currently Selected:
Luk 15: dip-JPB
Highlight
Share
Copy
Want to have your highlights saved across all your devices? Sign up or sign in
The Bible in Jieeng de Padang © The Bible Society in South Sudan, 2011.
