Luk 8

Diëër ee Cath ë Yecu

1Na wën, aacï kakë thök ke jɔ piny caath, ee lɔ ë pɛ̈ɛ̈nydït yiic, ku bɛ̈i yiic, le kɔc aa wɛ̈ɛ̈t ku guïïr keek wëlpiɛth ke ciɛɛŋ de Nhialic: ku cath kɔc kathiëër ku rou në yen, 2#Math 27:55,56; Mak 15:40,41; Luk 23:49. ayï diëër cï tɔ dem në jɔɔk rac cï ke dɔm ayï juäi, yï Meri cɔl Magdalene, tiiŋ cïï jɔɔk rac kadhorou bɛ̈n bei ë yeguöp, 3ku Jowana tiiŋ de Cudha raan ë ka ke dhiën ë Ɣerod döt, ku Thuthana, ku diëër juëc kɔ̈k, diëër wën ë ye kony në wëuken.

Kääŋ de Raan cï lɔ Com

(Math 13:1-9; Mak 4:1-9)

4Na wën, aacï kut dïït ë kɔc guëër, kɔc kɔ̈k aŋootkï ke ke bɔ̈ të nu yen ë baai yic ëbɛ̈n, ke jɔ jam në kääŋ an:

5“Raan ee com ë lɔ domic le kɔ̈thke com: na wën, të cum en, ke kɔ̈k ke ke lööny piny ë kueer këc, go ke dum ë kɔc cök, ku cam diɛt nhial keek. 6Ku lööny kɔ̈k piny de kuur, na wën, aa cïk goŋ, ke ke dap biɔɔr, në ciën tiɔp tiɔɔp ë piny. 7Ku lööny kɔ̈k ë kuɔɔth yiic, na wën, ke kuɔɔth ë ke jɔ cil në keek ëtök, gokï ke nyiɛɛc. 8Ku lööny kɔ̈k ë tiɔɔm piɛthic, agokï cil, ku lokkï, nyin tök abï bɔt bɛ̈ɛ̈i.”

Të cï en ëkakë lueel, ke jɔ cööt an, “Raan de yïth ee yen ke piŋ, ke pïŋ!”

Kë lueel Kääŋ de Raan cï lɔ Com

(Math 13:10-17; Mak 4:10-12)

9Go kɔckɛn ë piööcë thiëëc an, kääŋë ënɔɔnë, tharde akou? 10#Yith 6:9 (LXX). Go lueel an, “Acï gäm week ke we bï jam cï thiaan ŋic, jam de ciɛɛŋ de Nhialic: kɔc kɔ̈k aye ke wɛ̈ɛ̈t ë kɛ̈ŋ, luɔi bï kek aa daai, ku cïkï ë daai apiɛth, ku luɔi bï kek aa piŋ, ku cïkï käŋ ë yök yiic.

Yecu Awer Kääŋ de Raan ee Com

(Math 13:18-23; Mak 4:13-20)

11“Kääŋ thar kï: Kɔ̈th kek aye jam ë Nhialic. 12Ka nu ë kueer këc kek aye kɔc ee jam piŋ, na ëlë ke jɔŋdït rac bɔ̈, bïï ku jɔt jam ë kepiɔ̈ɔ̈th, ke ke cïï bï gam ago ke kony wëi. 13Ku ka nu piny de kuur, ayek kɔc ee jam piŋ, ku dɔmkï në piɔ̈nmit: ku acïnkï mei, agokï gam tëthiinakäŋ, ku bïk röt dak ciëën ëkööl themë ke. 14Ku ka cï lööny ë kuɔɔth yiic ayek kɔc ee jam piŋ, ku jɔkï lɔ, ago ke nyiɛɛc në diɛɛr ee kek diɛɛr ë käŋ ku bäny cï kek bäny ku kamit yek kɔɔr ka ke pïïrë, ku cïkï ee luɔk apiɛth. 15Ku ka nu ë tiɔɔm piɛthic ayek kɔc cï jam piŋ, ku jɔkï muk në piɔ̈n yic ku piɛth, agokï luɔk në rum ee kek kepiɔ̈ɔ̈th rom.

Manyëalath tɔ̈u në Aduök Thar

(Math 4:21-25)

16 # Math 5:15; Luk 11:33. Acïn raan ë manyëalath kooth, ku jɔ kuöm nɔm piny ë töny, ku tɛ̈ɛ̈u ë agen thar aya, aye tääu ë këdäŋ nɔm, ke kɔc bɔ̈ ɣöt ke ke bï mac tïŋ.

17 # Math 10:26; Luk 12:2. Acïn kë cï thiaan, kë cïï bï tïc, ku acïn kë cï moony, kë cïï bï ŋic, ago tïc ë kɔc nïïm.

18 # Math 25:29; Luk 19:26. Yak röt tiit në pïŋ aa wek piŋ: raan de nɔm käŋ, abï bɛ miɔɔc, ku raan cïn nɔm käŋ, acakaa kë ye tɔ ye këde abï nööm tëde ye.

Man Yecu kekë Mïthëkɔcken ë Yecu

(Math 12:46-50; Mak 3:31-35)

19Na wën, ke man bɔ̈ tëde yen kekë mïthëkɔcken, ku cïn të bï kek ɣeet të nu yen në baŋ de kut ë kɔc. 20Ku acï lɛ̈k en an, “Moor ka kääc biicë kekë mïthëkɔckun, akɔɔrkï yïn.”

21Go pɔ̈k nɔm keek an, “Kɔckë kɔc ee jam ë Nhialic piŋ, ku loikï kek aye maar ku mïthëkɔckuɔ.

Yecu acï Yom tɔ Kääc

(Math 8:23-27; Mak 4:35-41)

22Na wën, ë kööl tök ë aköölkë yiic, ke lɔ ë abëlic kekë kɔckɛn ë piööcë, ku jɔ keek yɔ̈ɔ̈k an, “Bäk teemku lɔɔk.” Agokï abël lony. 23Na wën, aa ciɛthkï ë abëlic, ke jɔ niin: ku jɔ amaŋ rɔt tuk ë baaric, arëk abï abël duɛ̈ɛ̈r thiäŋ, abïk duɛ̈ɛ̈r dïïr. 24Ku jɔkï bɛ̈n tëde yen, bïk ku päckï an, “Bɛ̈ny, wok thou!”

Go rɔt jɔt, ku nen yom ku athiakthiak de pïïu, agokï kɔ̈ɔ̈c, ku lɔ wɛ̈ɛ̈r dïu. 25Go ke thiëëc an, “Nu gämdun tënou?”

Agokï riɔ̈ɔ̈c, ku gɛ̈ikï, ku jɔkï lueel kapäc an, “Ee raan cït ŋö ee kënë? Raan ee yï yom yɔ̈ɔ̈k ayï pïïu, agokï këde piŋ!”

Yecu acï raan de guöp jɔɔk rac tɔ waar

(Math 8:28-34; Mak 5:1-20)

26Agokï ɣet paan de kɔc ke Gadaren, tuööm nɔm kekë Galili. 27Na wën, aacï bɛ̈n biic ë abëlic, ke räm ke raan töŋ bɔ̈ bei ë pänydïtic, raan de guöp jɔɔk rac ë caŋɣɔn, ku acïn lupɔ ee cieŋ, ku cie rëër ɣööt, ku ye rëër ë rɛ̈ŋ yiic. 28Na wën, aacï Yecu tïŋ, ke jɔ cööt, ku cuɛt rɔt piny ë yenɔm, ku jɔ lueel ë röl dït an, “Eeŋöda në yïn, Yecu, Wën ë Nhialic Awärjäŋ? Yïn läŋ, du ya leŋ wëi!” 29Acï jɔŋ rac kɔn yɔ̈ɔ̈k an, Bä bei ë raan guöp. Aa ye cool ë dɔm en e: go aa rek kuɛɛt ku joth, ku jɔ aa tiit, ku jɔ ka ye ke yen mac aa dhoŋ, ku ye jɔŋ rac thɛl ë jɔ̈ɔ̈ric.

30Go Yecu thiëëc an, “Cɔl yïn ŋa?”

Go lueel an, “Remdït,” në luɔi cï jɔɔk juëc lɔ ë yeguöp. 31Gokï lɔ̈ŋ an, du wo cieec tëthuth a loŋloŋ.

32Ku ade lunydïït ë kudhuur ëtɛ̈ɛ̈n, aake nyuäth ë kuurdït nɔm: gokï lɔ̈ŋ an, bï ke päl lɔ ë ke yiic. Go ke pɔ̈l. 33Go jɔɔk rac bɛ̈n bei ë raan guöp, bïk ku lekï ë kudhuur gup: go luny ëbɛ̈n lɔ piny ë ke riŋ arëët të lɔ luööŋläŋ ë baaric, ku jɔkï mou.

34Na wën, aacï kɔc ee tïït kë cï looi tïŋ, ke ke jɔ kat, lek lɛ̈k kɔc ë pänydïït ayï rɛɛr. 35Go kɔc lɔ biic lek ke cï looi tïŋ, gokï bɛ̈n të nu Yecu, ku yökkï raan wën cï jɔɔk rac jäl ë yeguöp, arɛ̈ɛ̈r ë Yecu cök, ke ceŋ lupɔ, acï nɔm piath, agokï riɔ̈ɔ̈c. 36Go kɔc wën cï e tïŋ, gokï keek guiëër luɔi cï raan tɔ dem raan wën cïï jɔɔk rac dɔm. 37Na wën, ke kut ë kɔc ëbɛ̈n kɔc ke piny de Gadaren, piny thiääk kekë tɛ̈ɛ̈n, ke jɔkï lɔ̈ŋ an, bï jäl pinyden, acï riɔ̈ɔ̈c dït ke dɔm: go lɔ ë abëlic, ku jɔ enɔm puk. 38Go raan wën cï jɔɔk rac jäl ë yeguöp go lɔ̈ŋ an, “Tɔ ya lɔ wo week.”

Go Yecu tɔ jël an: 39“Dhuönyë yïnɔm paandu, ku jɔ kɔc guiëër kadït cïï Nhialic luöi yïn.”

Go jäl, ku jɔ lɔ le guiëër kɔc ë pänydïït ëbɛ̈n kadït cïï Yecu luöi yen.

Nyan de Jairo ku Tiiŋ Wään Jak Lupɔ de Yecu

(Math 9:18-26; Mak 5:21-43)

40Na wën, aacï Yecu enɔm dhuny, ke jɔ loor ë kɔc, aa tiit kɔc kedhie. 41Na wën, ke raan bɔ̈ raan cɔl Jairo, ku ye bɛ̈ny ë ɣön ë Nhialic: ku jɔ rɔt cuat piny ë Yecu cök, ago lɔ̈ŋ an, bï bɛ̈n ɣönde, 42ade nɔm nyan tök tei, runke acïtkï thiëër ku rou, ku adhɔt piny ke kɔɔr thuɔɔu. Go lɔ, ku jɔ giŋ ë kut ë kɔc.

43Ku tik anu, tiiŋ ë cool ë kuëër ë riɛm ë run kathiëër ku rou, ku acï wëuke thöl kedhie riɔp en akïm, ku acïn akïm töŋ cï e lëu. 44Na wën, ke bɔ̈ ë yekɔ̈u ciëën, bï ku jɛk lupɔde thok: go riɛm a ŋëu ënɔnthiinë. 45Go Yecu lueel an, “Eeŋa ë jak ɛn?”

Go kɔc jai kedhie, go Petero ku kɔc cath në yen lueel an:

“Bɛ̈ny, yïn giŋ kuut ë kɔc ku thanykï yïn, ku bä jɔ lueel an, Eeŋa ë jak ɛn?”

46Go Yecu lueel an, “Ade raan töŋ cï a jak: aŋiɛc nɔn cï ë riɛl bɛ̈n bei ë yeguöp.” 47Na wën, aacï tik e tïŋ nɔn cïï en duëër mɔɔny, ke jɔ bɛ̈n ke lɛthë, bï ku cuɛt rɔt piny ë yenɔm, go lɛ̈k en ë kɔc nïïm kedhie yen kë jiɛk en en, ku dem cï en dem ënɔnthiinë. 48Go yɔ̈ɔ̈k an, “Nyandï, rit rɔt: gämdu acï yï tɔ dem, acïn kërac.”

49Të ŋoot en ke jam, ke raan bɔ̈ paan ë bɛ̈ny ë ɣön ë Nhialic, bï ku yöök an, “Nyandu ë thou, du Bɛ̈ny ee wëët be jut.”

50Go Yecu piŋ, ku jɔ bɛ̈ɛ̈r an, “Du riɔ̈c: gam tei, acï guöp pial.”

51Na wën, aacï bɛ̈n ɣöt, ke cïn raan pɛ̈l lɔ ɣöt, ee Petero, ku Jakop, ku Jɔn, ku wun duet ku man, keek kapäc. 52Kɔc aake dhiau kedhie, dhiëëukï meth, ku jɔ lueel an, “Duökï dhiau, akën thou, anin tei!”

53Gokï dɔl guöp, aŋickï nɔn cï en thou. 54Go ke ciɛɛc biic kedhie, ku jɔ duet dɔm cin, ku cööt an, “Nyanthiinë, jɔ pääc.” 55Go wëike kenïïm bɛ puk, ku jɔt rɔt ënɔnthiinë: go ke yɔ̈ɔ̈k an, bïk miɔɔc ë këcam. 56Go yï wun gäi kekë man: ku jɔ ke lom thook, ke ke cïï kë cï tïc bï lɛ̈k raan däŋ.

Currently Selected:

Luk 8: dip-JPB

Highlight

Copy