Mak 6
6
Yecu Acï Rɛɛc ë Nadhareth
(Math 13:53-58; Luk 4:16-30)
1Na wën, ke jël ëtɛ̈ɛ̈n, le paanden, ku kuany cök ë kɔckɛn ë piööcë. 2Ku të cï kööl ë Thabath bɛ̈n, ke jɔ wëët ɣön ë Nhialic: go kɔc juëc, të cï kek e piŋ, gokï gäi, ku luelkï an, “Raanë ë yök kake tënou?” Ku an, “Pɛlënɔm cï yiɛ̈n en ee pɛlënɔm cït ŋö? Ku luɔi dïït cït ee kënë, luɔi ee looi ë yeciin ë bɔ̈ tënou? 3Kënë cie atën ë tiim, wën ë Meri, ku ye mänhë Jakop, ku Jothe, ku Judath, ku Thimon, ku nyïïrëkɔcken cïkï tɔ̈u në wook eetënë?” Gokï piɔ̈ɔ̈th diu në yen.
4 #
Jɔn 4:44. Go Yecu ke yɔ̈ɔ̈k an, “Tiët acïn të cïï e bï riëëu, ee paanden etök, ku kɔcken yiic, ku dhiënde.”
5Ku acïn luɔi ril duëër looi ëtɛ̈ɛ̈n ee yecin thany ë kɔc tök gup kɔc liaakäŋ tei, tɔ ke dem. 6Go gäi në reecdɛn reec kek gäm. Go bɛ̈i kuany yiic ke wëët kɔc.
Yecu Atooc Kɔcpiööcë Kathiëër ku Rou
(Math 10:5-15; Luk 9:1-6)
7Go kɔckɛn ë piööcë kathiëër ku rou cɔɔl, ku jɔ keek tooc renë ku renë, ku gëm keek riɛl bï kek jɔɔk rac cieŋ, 8ku yöök keek an, “Ë cïn ka ke kueeric mɔ̈kkï, ee thiëëc etök, ë cïn kuïn, ë cïn athep, ku cïn wëu ë kiithic, 9yak war cieŋ ë wecök, ku duökï aluluut kaarou ee cieŋ.” 10Ku yöök keek an, “Baai ëbɛ̈n baai cïï ë week nyuööc thïn, ke we rɛ̈ɛ̈r ëtɛ̈ɛ̈n agut të bä wek jäl. 11#Luɔi 13:51. #Luk 10:4-11. Ku na de kɔc reec week nyuööc, ku reeckï këdun piŋ, të jäl wek ëtɛ̈ɛ̈n, ke we jɔ abuui nu ë wecök teŋ, abï aa cäätɔ de ater ke keek. Wek yɔ̈ɔ̈k ë yic an, “Këtuc bïï Thɔdom yök ayï Gomoora ëkööl ë guiëërëlöŋ acïï bï kït kekë këtuc bïï pänydïïtë yök!”
12Gokï lɔ biic, lek wël guiir an, bï kɔc kepiɔ̈ɔ̈th puk. 13#Jak 5:14. Ku jɔkï jɔɔk rac juëc cieec ë kɔc gup, ku tɔckï kɔc juëc në miök, kɔc de gup juäi, ago ke tɔ dem.
Thon de Jɔn Baptith
(Math 14:1-12; Luk 9:7-9)
14 #
Math 16:14; Mak 8:28; Luk 9:19. Na wën, ke melik Ɣerod piŋ këde, rinke acïk tïc, go lueel an, “Jɔn Baptith acï rɔt jɔt ë kɔc cï thou yiic, yen a tɔ̈uwë riɛldït ë yeguöp, riɛl ë käŋ looi.”
15Ku lueel kɔc kɔ̈k an, “Ee Elija.”
Ku në kɔ̈k an, “Ee tiët, ku acït raan töŋ ë tït yiic.”
16Ku Ɣerod, të cï en e piŋ ke lueel an, “Jɔn guöp, yen acï rɔt jɔt! Raan wään cä kiɛp nɔm wei!” 17#Luk 3:19,20. Ɣerod guöp acï kɔc tooc lek Jɔn dɔm, go mac ë alooc yic në baŋ de Ɣerodiath, tiiŋ de Pilip mänhë: luɔi cï en e thiaak. 18Acï Jɔn lɛ̈k Ɣerod an, “Akënë päl yïn luɔi duëër yïn tiiŋ de mɛnhkui nööm.”
19Go Ɣerodiath Jɔn mɔ̈k ater, akɔɔr luɔi nɛ̈k en en, ku kën lëu ë näk: 20luɔi riɔ̈ɔ̈cë Ɣerod ë Jɔn, aŋic nɔn ee yen raan piɛthpiɔ̈u ku ye raan ɣeric, go ya döt apiɛth. Na wën, aye yen piŋ, aaye kajuëc looi, go këde aa piŋ në piɔ̈nmit.
21Na wën, ke kööl piɛth bïïyë piny: Ɣerod, ëköölë dhiëthë ye, acï bänyke luöi këcamdït, ke bäny ë piny cieŋ, ku bäny ke tɔŋ, ku röördït ke Galili, 22na wën, acï nyan ë Ɣerodiath#6:22: Nyan de Ɣerodiath; këcïgɔ̈ɔ̈r däŋ ade yic Nyandɛn de Ɣerodiath. bɛ̈n ɣöt, bï ku cöŋ, ku köc Ɣerod nyin ayï kɔc rɛ̈ɛ̈r në yen ëtök tën ee cam, go melik duet yɔ̈ɔ̈k an, “Lip ɛn ë kë nu yïpiɔ̈u, ka bä gam yïn!” 23Go gutguut lueel an, “Të de yen kë bä lip, abä gäm yïn, aɣët biäk töŋ de ciɛɛŋdï.”
24Go lɔ biic, le ku thiëëc man an, “Eeŋö bä lip?”
Go lueel an, “Nɔm de Jɔn Baptith.”
25Go dap bɛ̈n ɣöt ënɔnthiinë të nu melik, bïï ku lip an, “Yɛn kɔɔr nɔn bï yïn a gäm nɔm de Jɔn Baptith ë atɛ̈nyic ënɔnthiinë!”
26Go melik piɔ̈u dhiau arëët, ku në baŋ de gutguut wën cï lueel, ku në baŋ de kamaan rɛ̈ɛ̈r në yen ëtök tën ee cam, ka cïn piɔ̈u luɔi bï en jai. 27Go melik alathkër tooc ënɔnthiinë, alathkër ë ye tiit, yöök an, bɛ̈ɛ̈iyë nɔmde. Go alathkër lɔ ku kip Jɔn nɔm wei ë alooc yic, 28na wën, ke bïï nɔmde ë atɛ̈nyic, bïï ku gëm duet, ku jɔ duet gäm man. 29Na wën, aacï kɔckɛn ë piööcë ye piŋ, ke ke jɔ bɛ̈n, ku nömkï guöpde, lek tääu ë raŋic.
Yecu Acɛ̈ɛ̈m Kuutdïït ë Kɔc
(Math 14:13-21; Luk 9:10-17; Jɔn 6:15-21)
30Na wën, ke tuuc ë ke guëër të nu Yecu, ku jɔkï guiëër käŋ kedhie, ka cïk looi ëbɛ̈n, ayï wëët cï kek wëët. 31Go ke yɔ̈ɔ̈k an, “Bäkï ë jɔ̈ɔ̈ric wapäc, bäk yök ë we lɔ̈ŋ tëthiinakäŋ.” Ade kɔc juëc bɔ̈ ku ade kɔc juëc lɔ, arëk acïn tëdɛn ë cäm cïk yök. 32Gokï jäl kapäc ë abël lekï ë jɔ̈ɔ̈ric. 33Na wën, ke ke tïŋ kut ë kɔc ë ke jël, go kɔc juëc ke ŋic, gokï kat ë kecök ë wuöt yiic kedhie, lek tɛ̈ɛ̈n, agokï ke wöör. 34#Kuɛ̈n 27:17; 1 Mel 22:17; 2 Lëk 18:16; Edh 34:5; Math 9:36. Na wën, aacï Yecu bɛ̈n bei ë abëlic, ke tïŋ kut dïït ë kɔc, go piɔ̈u kok ke keek, nɔn tɔ̈u kek cït man ë thök cïn nïïm raan ee ke tiit. Go ke jɔ wɛ̈ɛ̈t ë kajuëc. 35Na wën, aacï akɔ̈l thiɔ̈k ke thëi, ke kɔckɛn ë piööcë ë ke bɔ̈ të nu yen, bïk ku luelkï an, “Piny ee jɔ̈ɔ̈ric, ku akɔ̈l ë guɔ thiɔ̈k ke thëi. 36Tɔ ke jël, lekï dhaar thiɔ̈ke nïïm ku bɛ̈i, lek röt ɣöc këcam.”
37Go bɛ̈ɛ̈r, yöök keek an, “Miackï keek ë këcamkï.”
Gokï thiëëc an, “Buk kuïn cï pam lɔ ɣɔɔc ë jinii kathiëër, ku gëmku kek bïk cam?”
38Go ke thiëëc an, “Cathkï në kuïïn cï pam kadiaa? Lak tiëŋkï.”
Na wën, aa cïk e ŋic, ke jɔkï lueel an, “Ayek dhïc, ku rec kaarou.”
39Go keek yɔ̈ɔ̈k an, “Takï ke nyuc piny kedhie remë pei ku remë pei, ë wɛl tɔ̈c nïïm. 40Gokï nyuc ë ke deyiic aber, ee dɛ aber de bɔt, ku de aber de thiërdhïc. 41Na wën, ke kuany kuïïn cï pam wën kadhïc ku rec kaarou, go tënhial lieec, ku leec Nhialic, go kuïïn cï pam wääk yiic: ku yïn ke kɔcpiööcë bïk ke lɔ tääu ë kɔc nïïm, ku jɔ rec kaarou tɛ̈k keek kedhie. 42Gokï cam kedhie, abïk kuɛth. 43Gokï kuïn athueithuei wën cï döŋ kuany, ayï dhuɔth de rec cï döŋ, abïk diööny thiɔ̈ɔ̈ŋ kathiëër ku rou. 44Ku kɔc wën cam kuïïn cï pam ayek aguum kadhïny de röör.
Yecu Acath në Pïïu Nïïm
(Math 14:22-33; Luk 6:15-21)
45Na wën, ke jɔ kɔckɛn ë piööcë dhil tɔ lɔ abëlic ënɔnthiinë an, bïk kɔn lɔ lɔɔk lek Bethaida, të löök en kut ë kɔc tɔ jël yenguöp. 46Na wën, aacï kɔc tɔ̈ɔ̈ŋ, ke jël le ë kuurdït nɔm le lɔ̈ŋ. 47Na wën, aacï piny guɔ cuɔl, ke abël tɔ̈u ë wɛ̈ɛ̈ric cil, ku tɔ̈u Yecu biic etök. 48Go keek tïŋ, acïk duɛ̈ɛ̈r län ë gɛ̈ɛ̈r, luɔi bï yom ë kenïïm tueŋ. Na wën, të kɔɔrë piny nɔn ŋeep en rɔt, ke bɔ̈ tëde keek, ke cath ë pïïu nïïm, bï ku an, bɛɛric: 49na wën, aa tïŋkï ke cath ë pïïu nïïm, ke tɔkï ye aciëk, agokï kïïu: 50acïk tïŋ kedhie, agokï nïïm mum.
Go dap jam ke keek, yöök keek an, “Mɔ̈kkï röt: ee yɛn, duökï riɔ̈c!” 51Go lɔ ë abëlic të nu kek, go yom kɔ̈ɔ̈c: gokï gäi arëët ë gäi cïn nɔm gäide, 52këde kuïïn cï pam akënkï guɔ yökic, acïk nïïm riɛl.
Yecu atɔ Raan de Guöp Juäi Waar ë Genetharet
(Math 14:34-36)
53Na wën, aa cïk ɣet lɔɔk, ke ke bɔ̈ piny de Genetharet, ku jɔkï abël mac ë wɛ̈ɛ̈r yɔu. 54Na wën, aa cïk bɛ̈n bei ë abëlic, ke jɔ kɔc ŋic ënɔnthiinë, 55gokï kat lek piny biäkë wiin ëbɛ̈n, ku jɔkï kɔc tök ɣääc ë ageenken yiic, bïk ke bɛ̈n lɛɛr të cï kek e piɛŋ thïn. 56Ku bɛ̈i ee yen ë ke lɔ thïn ëbɛ̈n, nɔn ee kek wuöt, ku nɔn ee kek pɛ̈ɛ̈nydït, ku nɔn ee kek bɛ̈i nu rɛɛr, ke jɔkï kɔc tök aa tääu piny ë thuk yiic, gokï lɔ̈ŋ luɔi bï kek lupɔde jak, acakaa lupɔ thok tei: go kɔc kedhie kɔc wën cï ë jak gokï waar.
Currently Selected:
Mak 6: dip-JPB
Highlight
Share
Copy
Want to have your highlights saved across all your devices? Sign up or sign in
The Bible in Jieeng de Padang © The Bible Society in South Sudan, 2011.
