Mak 7
7
Wëët de Kɔc Thɛɛr
(Math 15:1-9)
1Na wën, ke Parithai guëër të nu yen, kekë kɔc kɔ̈k kɔc ë löŋ gɔ̈ɔ̈r, kɔc ë bɔ̈ Jeruthalem. 2Ku acïk kɔc kɔ̈k ë kɔckɛn ë piööcë tïŋ ke ke ye kuïn cam ë ke rac cin, yen aye cin kënë piny.
3Ku Parithai, kekë Judai ëbɛ̈n, acïkï ye cam, të ŋoot kek ë ke kën kecin piny arëët, amukkï ciɛɛŋ thɛɛr ë röördït: 4ku të ye kek bɛ̈n ë thuukic, të ŋoot kek ë ke kën waak, ke ke cie cam: ku kajuëc kɔ̈k anukï, ka cïk dɔm, ku yek ke döt apiɛth, cït man ë wɛ̈k de abïïny, ku wɛ̈k de töny, ku abïïny ke malɔ̈ɔ̈ŋ, ku biök.
5Na wën, ke Parithai ku kɔc ee löŋ gɔ̈ɔ̈r ke thiëckï an, “Na kɔckuön ë piööcë, eeŋö reec kek cieŋ thɛɛr ë röördït, ku yek kuïn cam ke ke kën kecin piny?”
6 #
Yith 29:13 (LXX). Go ke yɔ̈ɔ̈k an, “Ee yic en kë wään lueel tiët Yithaya në këdun, wek kɔc de yäc aguk, cït man cï ë gɔ̈ɔ̈r an,
‘Kɔckë ayek a riëëu ë kethook,
Ku ameckï piɔ̈ɔ̈th në yɛn.
7Lam ee kek a lam ee ɣɔ̈ric tei,
Ku wëëtdɛn ee kek
wëët ee lööŋ ke kɔc tei!’
8“We ye löŋ de Nhialic pɔ̈l, ku yak ciɛɛŋ thɛɛr ë kɔc döt aril, kë cït wɛ̈k de töny, ku abïny, ku kajuëc kɔ̈k cït ee kake ayak ke looi.”
9Go ke yɔ̈ɔ̈k an, “Thieithieei, rɛɛc aa wek löŋ ke Nhialic rɛɛc, luɔi bä wek ciɛɛŋduön thɛɛr aa döt! 10#Bɛ̈n 20:12; Nyöŋ 5:16; Bɛ̈n 21:17; Leb 20:9. Acï Mothe luel an, Ye wuur riëëu kekë moor, ku an, Raan ee wun lɛ̈k kërac ayï man, ke näkkï abï thou.’ 11Ku week ayak lueel an, Të yöökë raan wun ayï man an, Kë duɛ̈ɛ̈r gäm yïn, ke bï yï muk, ‘Acï aa Korban’ (yen aye, kë cï gäm Nhialic), 12ke we cïï raan be pɔ̈l ë luɔi lui en wun këdäŋ, ayï man. 13Aguɔkï jam ë Nhialic tɔ cïn naamde në ciɛɛŋduön thɛɛr: ku yak kajuëc cït ëkake looi ayadäŋ.”
Kak ee Raan tɔ Nhiany
(Math 15:10-20)
14Go kut ë kɔc ëbɛ̈n cɔɔl të nu yen, ku jɔ ke yɔ̈ɔ̈k an, “Piɛŋkï këdï week wedhie, ku mɔ̈kkï wepiɔ̈ɔ̈th: 15acïn kën ee lɔ ë raan guöp, kë wën nu biic, kë duëër raan tɔ rac: ee ka bɔ̈ bei ë raanic thïn, kek aye kak ee raan tɔ rac.” 16Raan de yïth ee yen ke piŋ, ke piŋ!
17Na wën, aacï jäl ë kut ë kɔc yiic le ɣöt, ke kɔckɛn ë piööcë ke thiëckï në kääŋë. 18Go ke yɔ̈ɔ̈k an, “Ŋuɔɔtkï ke we kuc käŋ ayadäŋ? Kɛ̈nkï kënë yökic, an, Acïn kë ye lɔ ë raan guöp, kë wën nu biic, kë duëër raan tɔ rac: 19luɔi kën en lɔ ë yepiɔ̈u, alɔ ë yeyäc tei, go bɛ lɔ biic ë yomic?” (Kë ë lueel en en, ee kë ë tɔ yen këcam piɛth ëbɛ̈n.)
20Go lueel an, “Kë bɔ̈ bei ë raanic, yen aye raan tɔ rac. 21Ë raanic thïn, ë raan piɔ̈u thïn, yen aye täŋ rac bɛ̈n bei, kɔɔr ë diëër lei, dhööm, näŋ nɛ̈kë raan akur, 22kuël, wui de kalei, luɔi de kërac, ruëëny, kɔ̈ɔ̈r ë kërac, tiɛɛl, lɛ̈ɛ̈t rac, luɔi ee raan rɔt tɔ dït, cïn cïnë raan nɔm: 23Karɛckë kedhie ayek bɛ̈n bei ë raanic thïn, agokï raan tɔ rac.”
Gäm de Tik
(Math 15:21-28)
24Na wën, ke jɔt rɔt ëtɛ̈ɛ̈n, jël le piny de Tayer ku Thidon. Go lɔ ɣöt, ku acïn piɔ̈u luɔi bï raan e ŋic, ku acïï duëër thiaan. 25Ade tiiŋ de nyandɛn thiin cïï jɔŋ rac dɔm: na wën, aacï këde piŋ, ke jɔ guɔ bɛ̈n ënɔnthiinë, bï ku cuɛt rɔt piny ë yecök. 26Ku tiiŋë ee Girikii, aa dhiëth piny de Ponicia ë Thiriya. Go lɔ̈ŋ luɔi bï en jɔŋ rac cieec bei ë nyande guöp. 27Go yɔ̈ɔ̈k an, “Ë mïth ë ke ye kɔn kuɛth, acï piɛth të nöömë raan kuïn ë mïth, dëny jɔ̈k.”
28Go bɛ̈ɛ̈r lueel an, “Ee yic Bɛ̈nydït, ku jɔ̈k nu ë paam thar ayek cam tei në athueithuei ë both mïth!”
29Go yɔ̈ɔ̈k an, “Në baŋ de jamë, jɔ lɔ, jɔŋ rac ë jäl ë nyandu guöp!”
30Na wën, aacï lɔ ɣönde, ke yök nyande atɔ̈u piny në agen nɔm, ke cïï jɔŋ rac jäl ë yeguöp.
Yecu Atɔ Raan Miŋ Waar
31Na wën, ke be jäl piny de Tayer, ku jɔ Thidon reetic, bïï Baar ë Galili, tëëk piny de Dekapoli. 32Gokï raan bɛ̈ɛ̈i të nu yen, raan miŋ, ku cie jam apiɛth, gokï lɔ̈ŋ an, bï ecin thany ë yeguöp. 33Go bɛ̈ɛ̈i bei ë kut ë kɔc yiic yetök, ku tɛ̈ɛ̈u ecin ë yeguöp, go ŋuut, ku jiɛk liep. 34Na wën, ke liec paannhial, ku wëi arëët, ku yöök an, “Epatha,” an, “Liep rɔt!”
35Go yïth liep ënɔnthiinë, ku lony ke wën ë liep guut, go jɔ jam ë ka piŋ yiic. 36Go ke lom thook an, Ë cïn raan däŋ lɛ̈kkï yen, ku lum lom en kethook arëët, yen aye kek jam lɔ thäi piny arëët. 37Acïk gäi ë gäi cïï themë thok, ku luelkï an, “Acï këriëëc tiiŋic ëbɛ̈n, acakaa mïŋ aye ke tɔ piŋ, ku tɔ kɔc cïn thook jam!”
Currently Selected:
Mak 7: dip-JPB
Highlight
Share
Copy
Want to have your highlights saved across all your devices? Sign up or sign in
The Bible in Jieeng de Padang © The Bible Society in South Sudan, 2011.
