Ehanita Lefahat 4

Itawojie Petro iko Yoane Ihosiere Lokikoi Yudei

1Ninyia hekianai bo Petro iko Yoane jio aati, ofuonni nyia omuk ehumak#4:1 ehumak : igioroni omuk egierita jio, ehumak elettaha. iko ajafit oseŋer erririak Haji Emojit enne ittokon buo Sadusei jihosi. 2Iloŋojitai nyia isi nyio ittiyenie nyia bo Petro iko Yoane aati jio ibuhu Yesu toye. Tania, itahutak jio ibuhuni adi ayaak toye. 3Ania, ette isi inefuna Petro iko Yoane, ette ifitana ibabus many jio ebotie holoŋ nyio, ara nyia akekai. 4Ati iruhi nyia aati arriai hunyia itaniŋuni 'to ekiana ania, ette isi iluluajuno many afanyarik aati ihuo alif miyet (5,000).

5Jio ebotie holoŋ, ottubanie nyia elettaha Yudei iko lahou Yudei, buo ettiyanak ifahita, Yerusalem. 6Owoni nyia buo fe diya bo Annas ehumani elle ittokon iko Kaifas, buo Yoane iko Alesandro, buo fe aati hullomuk hutta haŋ ehumani elle ittokon. 7Ninyia itawojihini isi lefahat hulo ihosiere hosi, ette isi ifiyo isi jiojio, “Ihaniete itai ariŋ ania ta anani ilohittok kuyya ta afure ŋai?”

8Attati Petro, ta awanan ono Loholio Olibo ikonyi, itarraŋ isi jio, “Itai elettaha waati iko lahou waati, 9elle ifiyete itai hohoi ahana ta ariŋ onno oyyu 'to, enne ehan hohoi jio oloŋura olo, buo fe itaŋidari inyi aŋai. 10Tania, oŋida itai iko aati Israele 'daŋ imijana jio, owotia luŋa latulo olo ollo oŋida ihosiere hatai 'daŋ ta aduaran ono afure Yesu Kristo olo Nasaret, linyia isihonia itai likruce, buo Hollum ette itubuhuna inyi toye. 11#Afureta 118:22Yesu ollo ojio Abuk Hollum jio:

‘Amoruo ninyia ibasana itai, itai laduhok,

inyiak tibuo inyi igalihina hunnomuk 'daŋ ta ayiji.’

12Italuahuni adi aati ta aduaran honyi hama, nyio, ta fau 'daŋ obeŋ obo atulo ihuo inyi, elle ifahu Hollum italahuniere hohoi.”

13Illillihai nyia isi bebe ta agolon taji Petro iko ono Yoane ninyia igonyuni isi jio arai isi awaati asai, hullo obeŋi omijani awaraga. Attati isi heruna jio arai nyia Petro iko Yoane aladahari Yesu. 14Ati owotia nyia atulo linyia itaŋidari iger Petro iko Yoane. Ania, ittallihorik isi ikiana obo ariŋ. 15Ania, ette isi iramana lefahat hulia hefuahi allet totua haji okikoi, buo isi ette ikiana ta ahuattek hosi hama 16jiojio, “Ehan adi aati hulo aŋai? Nyio, omijani nyia aati Yerusalem 'daŋ eduarit enne ittok ninyia ihani isi, ati ettallik irisa inyi. 17Ati heramana isi hèlaha ikianai inyiak ta afure Yesu jio obo atulo nyio, ŋadi eram ana inyiak isarrahina bebe jio aati.”

18Ania, ette isi iloŋuna lefahat hulia attua haji lokikoi, ette ihum iramana isi hotobiaŋahi inyiahi ikiana, kuyya ittiyenio ta afure Yesu. 19Ati itarraŋi nyia bo Petro iko Yoane isi jiojio, “Oŋototo itai eram ania ta ahuattek hatai, anani onno obis 'to to hosiere Hollum; itaniŋiere jihatai kuyya itaniŋiere jio Hollum? 20Nyio, ettallik hohoi iduahiniere erre hunyia egonyu hohoi buo fe etayiru.” 21Buo ninyia ihumi aati lokikoi itabaŋ lefahat hulia, ette isi ihohina isi. Ogol nyia bebe jihosi ittigemiere lefahat hulia, nyio, itahabuye nyia aati 'daŋ Hollum te eram ninyia iduoŋ 'to. 22Allaŋi nyia aŋasi latulo linyia itaŋidari te eduarit ania, aŋasi atomuana aŋuan.

Omojoi Eruhok Agolon Tajia jio Hollum

23Ninyia lahohini Petro iko Yoane, ette isi icaharu iluluŋ hosi ono eruhok, ette iramana isi erre 'daŋ hunyia ojiori ehumak hulle ittaha iko lahou jihosi. 24Ninyia itaniŋuni isi erre hunia, ette isi 'daŋ ittubanio arabotie imojori jio Hollum jiojio; “Lamonye, Layyani idou iko nafau, buo ariak hunne ittaha 'to iko erre 'daŋ hunno owoni 'to jihosi 'daŋ! 25Ta agolon ono Loholio Olibo, ikiana nyia iyye jihohoi te etuk Dafide hohonyi hohoi, egiamani hoi ninyia ojiari inyi jio:

‘Nyio nyia ifut ajore jio aati Alufajak;

nyio nyia iwwahuni aati hulia Lamonye,

buo obeŋi oremehini ihan obo ariŋ?

26Ihuyai loobuok hutta fau 'daŋ afere,

buo fe elettaha iwwahai irumoniere Lamonye iko Olonyimoto honyi.’

27 # Mat 27:1-2; Mar 15:1; Luk 23:1, 7-11; Yoa 18:28-29 Ihuo nyia hode, jio abore gala ana, iwwahuni nyia ba Erode iko Pontio Pilato buo Alufajak iko Israele irumoniere Yesu egiamani hoi Ololibo, linyia ipul iyye Olonyimoto. 28Ottubanie nyia isi ihaniere erre 'daŋ hunyia iŋotok iyye, oŋida iduoŋi ta agolon iko ta awahan hoi. 29Ihuania Lamonye, ihuma mijio etabaŋita hosi hohoi. Aŋatak hohoi egiamak hoi ikianari asayyo hoi ta agolon tajia. 30Itahutak aduaran hoi itaŋidariere. Aŋatak ihanie eduariti iko ellillihita ta afure Yesu legiamani hoi Ololibo.”

31Ninyia latuhi isi amojo, ette namaji ninyia omojorik isi ikikiro 'ter 'ter, buo isi 'daŋ ette ifut iko Loholio Olibo, ette itterio ettiyenio asayyo Hollum ta agolon tajia.

Ohori Eruhok Asaŋ hosi Arabotie

32 # Ehanita 2:44-45 Amanyai nyia eluluŋ heruhok ta ataji abotie iko te egigilo abotie. Obeŋ nyia obo jihosi ojio arai omuk asaŋ ahunonyi hama. Ati ohori nyia isi erre hosi 'daŋ arabotie. 33Ta aduaran anna agalik 'to, itamijanani nyia lefahat ebuhuna ono Yesu Lamonye jio aati 'daŋ, buo Hollum buo ette isiarana jihosi 'daŋ ayiji onno obolo bebe. 34Obeŋ nyia obo ariŋ aŋaramahi obo jihosi. Nyio, itinyiaŋari nyia aati hullo owoni 'to iko amatta, amatta hosi, buo fe hullo owoni 'to iko asik itinyiaŋari asik hosi, ette iyaŋuno agurusi hosi hunia, 35ette isiarana jio lefahat. Buo lefahat ette ihiharana agurusi hunia jio aati te ewahiti hosi 'daŋ ababo.

36-37Tania, itinyiaŋak nyia Yosefu, alla ahacie lefahat Barnaba (onno ojio'to jio, “Etagoloni tajia waati”) amana honyi, ette iyaŋuno agurusi hua, ette isiarana jio lefahat. Ara nyia inyi to woyo ba Lefi, buo fe ottu ta fau Saipras.

Currently Selected:

Ehanita Lefahat 4: EA2003

Highlight

Copy