Yoane 13

Illillayo Yesu Eejek huno Ejifak Honyi

1Jio oloŋ enne ijifaniere Neyom ono Allaŋan, omijak nyia Yesu jio attuba nyia asaa anna alari inyi ta fau tene jio Monyonyi. Odulo nyia ataji honyi ibuaran aati honyi hutta fau. Obuor nyia ataji honyi isi luŋa many isidi.

2Oŋiyo nyia Yesu iko lejifak honyi aŋiria otto 'tari. Tania, isihak nyia Sittan egigilo itinyiaŋaniere Yesu itua taji Yuda, lonyi Simone Iskariote.#13:2 isihak nyia Sittan…tinyiaŋaniere Yesu : kuyya ifut nyia luŋa ijo Sittan jio olo Yuda, lonyi Simone Iskariot itinyiaŋara Yesu. 3Omijak nyia Yesu jio isiarak nyia Hollum jihonyi egoliti 'daŋ. Omijak nyia buo fe inyi jio, attu nyia inyi jio Hollum, buo fe enyiak adi icaharu jihonyi. 4Ania, ette Yesu idioto to maji ŋiria, ette ihouna aboŋo honyi otto hide, ette iluronia abiskir ihuluk honyi; 5ette ijuhonia aari ikalaya, ette illilla eejek huno lejifak honyi, ette ifufus isi ta abiskir ninyia ilurok inyi lihuluk honyi. 6Ninyia attu inyi jio Simone Petro, ette Simone Petro ifiyo inyi jiojio, “Lamonye, iwak iyye luŋa illilla eejek hoŋ?”

7Itarraŋ nyia Yesu ojio, “Hètimo iyye ariŋ enne ehanio ni ana, ati ihalu, imijak adi iyye inyi.”

8Buo Petro ette jiaran jihonyi jio, “'Tuŋ! Ittallik iyye illilla eejek hoŋ!”

Itarraŋ nyia Yesu ojio, “Alla abeŋ ni ellilla eejek hoi, ibeŋ adi iyye inyiak irahan a hejifani hoŋ.”

9Buo Simone Petro ette itarraŋ ojio, “Lamonye, hèllilla ati eejek hoŋ hama; illilla buo fe nahas iko ahou hoŋ!”

10Buo Yesu ette jiaran jihonyi jio, “Obeŋ atulo elle hetek 'to ihuyoro inyiak illilla nahuan honyi 'daŋ, arari fe eejek honyi hama.#13:10 Obeŋi omuk egierita owoni iko, arari fe eejek honyi hama Iliboroto itai 'daŋ, arari abotie hama, ollo obeŋ 'to olibo.” (11Amijak nyia Yesu atulo linyia olo 'to itinyiaŋara inyi, inyi ninyia ojiari inyi jio, “Iliboroto itai 'daŋ, arari fe atulo abotie hama.”)

12 # Luk 22:27 Ninyia atuhok Yesu ellillayo eejek hosi, ette inyi iyyafana aboŋo honyi ninyia idelehi inyi ihide onnobo, ette icaharu jio amaji honyi otto maji ŋiria, ette ifiyo isi ojio, “Imijana itai ariŋ enne hetek ni ania ihan jihatai? 13Iloŋoti itai nani Hettiyanani buo fe Lamonye. Ittenuna itai nyio, ara ni ihuo nyia. 14Hetek ni alla ara 'to a Hettiyanani buo fe a Lamonye hatai, illillayo eejek hatai. Tania, oŋida buo fe itai 'daŋ ababo illillayete eejek hullomuk. 15Esiarak ni jihatai etamijani; oŋida ihaniete ihuo enne ihaniere ni jihatai. 16#Mat 10:24; Luk 6:40; Yoa 15:20Hode hode, eramak ni itai jio, obeŋ egiamani agalik elettok, buo fe elefahata obeŋ agalik lia, elle ifahu 'to inyi. 17Ihuania, imijana itai erre hunia, obolo adi amuno jihatai elle ihaniete itai isi!

18 # Afureta 41:9 “Abeŋ ni ekiana tetai 'daŋ; amijak ni hia hulla anyimu ni. Ati oŋida luŋa itasiruni egierita hutto Buk Hollum hunno ojiori 'to jio, ‘Ayitonio nani atulo elle eŋiyo 'to ikoŋ arabotie.’ 19Eramak ni itai erre huna ihuania, hobeŋi isi iduoŋi, oŋida ifuanna iruk jio, ‘Nani inyi’ elle eduoŋi isi. 20#Mat 10:40; Mar 9:37; Luk 9:48; 10:16Hode hode, eramak ni itai jio, lia, elle ifuotu 'to obo jio hia hulle efahu ni, ifuotu buo fe inyi nani. Buo fe lia, elle ifuotu 'to nani, ifuotu buo fe inyi lia, linyia ifahu'to nani.”

Ekiluna Yesu Afuatan Itinyiaŋara Inyi

(Mat 26:20-25; Mar 14:17-21; Luk 22:21-23)

21Ninyia ikenu Yesu erre huna, ette ataji honyi mijan bebe, ette inyi ipulonia jiojio, “Hode hode, eramak ni itai jio, olo adi obo alatai itinyiaŋara nani.”

22Attati lejifak honyi imijanio ahuattek hosi, buo illillihai jio ŋai tehiji hosi elle ekiana Yesu. 23Itoŋo nyia obo olo lejifak iger Yesu. Obuor nyia ataji Yesu inyi. 24Ania, ette Simone Petro ifalio lejifani alia, ette jiaran jihonyi, “Ifia inyi, ikiana inyi ŋai.” 25Attati lejifani alia ihutonia ros jio Yesu, ette ifiyo inyi jiojio, “Lamonye, ŋai inyi?”

26Itarraŋ nyia Yesu ojio, “Edutu adi ni emune to jasi, ette ni isiarana jihonyi. Inyi lia atulo elle ekiana ni.” Ania, ette inyi iduhuna emune, ette idutuna, ette isiarana jio Yuda lonyi Simone Iskariot. 27Teya teya, ninyia ifuotu Yuda emune ania, ette Sittan ijiŋana jihonyi; buo Yesu ette jiaran jihonyi jiojio, “Ihanie luŋa kokuak ariŋ enne ilo iyye ihanio!” 28Obeŋ nyia obo jio hinyia oŋiye 'to omijak, nyio ikiana Yesu eram ania jihonyi. 29Ati ta arahan Yuda ahatoŋoni Senuk gurusi, igigiloi nyia omuk jio kuyya iramio adi Yesu inyi inyiaŋuniere erre hunne efuari isi iyomori kuyya isiaraniere omuk arobiyaa jio alociaŋak.

30Attati Yuda ifuotuna emune ania, ette leten, teya teya, addi. Ara nyia attari.

Efahi Aŋejuk

31Ninyia alo Yuda, ette Yesu jiaran, “Ihuania, italeyehini akuatan ono Lonyi Tulo. Tenyi, italeyehini akuatan ono Hollum. 32Buo elle italeyehini akuatan ono Hollum tenyi, italeyehi adi buo fe Hollum akuatan ono Lonyi Tulo. Kokuak, ihan adi inyi ihuo nyia. 33#Yoa 7:34Aduri hoŋ, abeŋ adi ni awon ikatai fur. Ittifiati adi itai nani, ati eramak ni jihatai ihuania erre hunyia eramak ni jio elettaha Yudei jio, ‘Ittallihoto adi itai ifuatan jio amaji anna alari ni.’ 34#Yoa 15:12, 17; 1Yoa 3:23; 2Yoa 5Ihuania, esio ni jihatai efahi aŋejuk: ijiara abuaran taji owon ihiji hatai. Ihuo onno obuarari ataji hoŋ itai, ijiara luŋa abuaran taji hatawana ihiji hatai. 35Alla awon abuaran taji ihiji hatai, tania, omijani adi aati 'daŋ jio irata itai a hejifak hoŋ.”

Ikiluna Yesu Arisa Petro Inyi

(Mat 26:31-35; Mar 14:27-31; Luk 22:31-34)

36Attati Simone Petro ifiyo Yesu jiojio, “Lamonye, ilo iyye ajia?”

Itarraŋ Yesu ojio, “Ittallik iyye ijifaru ani ihuania jio amaji anna alari ni; ati ihalu, ijifuno adi iyye ani.”

37Buo Petro ette ifiyo inyi jiojio, “Lamonye, nyio ati abeŋ ni aremik ijifaru iyye ihuania? Ifut luŋa jihoŋ iyeri te eram hoi!”

38Itarraŋ nyia Yesu ojio, “Iremik iyye luŋa hode iye te eram hoŋ? Hode hode, eramak ni iyye, irisa adi iyye nani enyiahita hunihoi hobeŋ ahohoro illok.”

Currently Selected:

Yoane 13: EA2003

Highlight

Copy