Yoane 15

Yesu, Ayyani Fino Ahode Hode

1“Nani ayyani fino ahode hode, buo Monyoŋ ara a hedulani honyi. 2Igiguanya inyi addi atanata huttonoŋ 'daŋ hunno obeŋi 'to oŋiji; buo ihum isisou atanata 'daŋ hunno oŋijani 'to eŋija jio, oŋida tibuo isi ihumi iŋijana. 3Italibori nyia itai te ekenita hunyia eramak ni itai. 4Oduloro inoso ikoŋ, adulo adi buo fe ni enoso ikatai. Ittallik atanai iŋijana inyi hama, alla abeŋ inyi inoso iyyani fino. Ihuo nyia buo fe, ittallihoto adi itai iŋijana eŋija elle ibiaŋata itai inosoti jihoŋ.

5“Nani ayyani fino, buo itai atanata. Lia, ollo odulo 'to enoso jihoŋ buo fe ni adulo enoso jihonyi, oŋijak adi inyi eŋija arriai. Ittallihoto itai ihan obo ariŋ, alla abeŋ ni. 6Lia, ollo obeŋ 'to odulo enoso jihoŋ, iruoŋori adi inyi addi ihuo atanai, ette iyohojoro. Aharanyuni adi atanata hunia, ette iruoŋonia ihima, ette eema ituk isi. 7Elle irasati itai jihoŋ buo fe igottiette ekenita hoŋ, tania omojoti erre 'daŋ hunne iwahata itai, buo isiarani adi jihatai. 8Itahutana akuatan ono Monyoŋ ta aŋijana hatai eŋija arriai. Tania, irata adi itai ahejifak hoŋ. 9Obuor ataji hoŋ itai ihuo onno obuarari ataji Monye nani. Oduloro enoso ikoŋ oŋida abuaran taji hoŋ odulo ikatai. 10Elle iniŋiete itai efahita hoŋ, odulo adi ataji hoŋ abuaran itai, ihuo anna aniŋiere ni efahita Monyoŋ buo fe ataji honyi odulo abuaran nani.

11“Eramak ni itai erre huna jio, oŋida bati amuno hoŋ owon jihatai, buo fe oŋida bati namuno hatai ottuba. 12#Yoa 13:34; 15:17; 1Yoa 3:23; 2Yoa 5Esiarak ni itai Efahi ana: Ijiara abuaran taji hatawana ihiji hatai ihuo onno obuarari ataji hoŋ itai. 13Alla aye obo atulo te eram orriahat honyi, abuaran taji ania anna agalik 'to 'daŋ. 14Irata itai amottiarak hoŋ elle ihaniete itai erre hunne eramak ni itai. 15Abeŋ ni enyiak iloŋo itai egiamak hoŋ, nyio, obeŋi egiamak omijani erre hunne ihanio elettok hosi. Ati eloŋo ni itai orriahat hoŋ, nyio, eramak ni itai erre 'daŋ hunyia etaniŋu ni jio Monyoŋ. 16Ibiaŋata nyia itai inyimuna nani. Nani nyia anyimu itai buo fe egelu itai jio, oŋida itai ifuatta iŋijana eŋija arriai; eŋija hunno osioi 'to 'tulaŋ. Tania, isiarak adi Monyoŋ jihatai erre 'daŋ hunne imojoti itai jihonyi ta afure hoŋ. 17Ehum ni iramana itai ariŋ ana: ijiara abuaran taji hatawana ihiji hatai.

Aliwa atta Fau

18“Alla aliwarik aati itai, omijana jio oliwarik nyia isi ani tetteri. 19Elle irata duo itai a hulo afau ana, obuori duo atajia waati afau ana itai. Ati anyimuni ni itai jio aati afau ana. Tania, ibiaŋata itai inyiahata irahan a hulosi, inyi onno oliwarik isi itai. 20#Mat 10:24; Luk 6:40; Yoa 13:16Ogiluna erre hunyia eramak ni itai jio, ‘Obeŋi egiamak agalihini elettok hosi.’ Elle ittigemie isi nani, ittigemie adi buo fe isi itai. Alla agottierek isi ettiyenita hoŋ, ogottierek adi buo fe isi hunatai. 21Ati ta arahan hatai a huloŋ, ihanie adi isi erre hunia 'daŋ jihatai; nyio, otimoi isi lia linyia ifahu 'to ani. 22Hara nyia abeŋ ni attu ette ikiana jihosi, obeŋi duo isi owoni iko epali ono eyyata. Ati ihuania, obeŋ obo ekoi jihosi iliari eyyata hosi. 23Lia, ollo oliwari 'to nani, oliwari buo fe inyi Monyoŋ. 24Hara nyia abeŋ ni ehan ihiji hosi egemita hunno obeŋ obo atulo oremik ihan, obeŋi duo isi owoni iko epali ono eyyata. Ati ihuania, igonyuni isi erre hunne ehan ni, ette iliwari nani 'daŋ iko Monyoŋ. 25#Afureta 35:19; 69:4Ati iduoŋi erre hunia ihuo nyia, itasiruniere ekenita hunyia igioroni ifahita hosi jio, ‘Oliwarik isi ani obo ijiai.’

26“Alo adi ni ifahuna jihatai aluahani ollo ottu 'to jio Monye. Inyi Oloholio elle italeyehi 'to elahode ono Hollum. Ottu adi inyi ikiana eram hoŋ. 27Ikianati adi buo fe itai eram hoŋ, nyio, iwanata nyia itai ikoŋ many tetteri.

Currently Selected:

Yoane 15: EA2003

Highlight

Copy