Yoane 18

Enefuna ono Yesu

(Mat 26:47-56; Mar 14:43-50; Luk 22:47-53)

1Ninyia atuhok Yesu amojo, ette inyi illaŋan iko lejifak honyi aŋati tole ono Adiel Kidron. Owon nyia obo aginana jio amaji nyia, ette inyi iko lejifak honyi ijiŋana diya. 2Omijak nyia Yuda, etinyiaŋani Yesu, amaji ania. Nyio, enyiahita arriai adahatio nyia Yesu iko lejifak honyi diya. 3Tania, iturumuno nyia Yuda diya eluluŋ oseŋer Roma iko omuk errirriak hulo Aaji Emojit enne ittokon hinyia ifahuni Ehumak elettaha iko Farisei. Irumuni nyia isi iko erremiti hosi, iko allomohien buo afattariyat. 4Omijak nyia Yesu erre hunno ofuoi 'to iduoŋ jihonyi, ania, ette inyi leten jihosi, ette jiaran, “Ittifiati itai ŋai?”

5Buo isi ette itarraŋ jiojio, “Yesu, olo Nasaret.”

Buo Yesu ette iramana isi jio, “Ani Yesu.”

Diya, owotia nyia Yuda etinyiaŋani Yesu ikosi. 6Ninyia ajio Yesu jihosi jio, “Ani Yesu,” ette isi iŋiŋad oruaŋai, ette ibataru 'ter. 7Buo Yesu ette inyiak ifiyo isi ojio, “Ŋai elle ittifiati itai?”

Itarraŋi isi ojio, “Yesu, olo Nasaret.”

8Buo Yesu ette jiaran jihosi jio, “Eramak duo ni jihatai jio, nani Yesu. Elle ittifiati itai nani, idehina aati hullomuk hulo hétefuahi.” (9Ikenu nyia inyi erre huna, itasiruniere erre hunyia ojio inyi jio: “Monye, habeŋ ni etalitohi lobo jio aati hinyia isiarak iyye jihoŋ.”)

10Owon nyia Simone Petro iko ademi erremit, ette inyi isutuna, ette isaluna eyyok etteŋet ono apit olo ehumani elle ittokon. Anya nyia afure apit alia Malkos. 11#Mat 26:39; Mar 14:36; Luk 22:42Buo Yesu ette iramana Petro jio, “Inyiak ademi hoi itua sohobo! Igigilo iyye jio hèlaha ani efuotu ematit ono ettigemio enne isiarak Monyoŋ jihoŋ?”

Iyarai Yesu Ihosiere Annas

12Attati Oseger Roma iko ajafit hosi buo errirriak Haji emojit enne ittokon inefuna Yesu, ette ifit inyi, 13ette iyaru inyi do jio Annas. Ara nyia Annas ahamoni Kaifas linyia ara 'to a hehumani elle ittokon jio eeŋa nyia. 14#Yoa 11:49-50Kaifas nyia linyia isiŋ 'to elettaha Yudei jio, iyyak luŋa jio atulo abotie iyeri ta aati 'daŋ.

Orisa Petro, Yesu

(Mat 26:69-70; Mar 14:66-68; Luk 22:55-57)

15Ijifaru nyia Simone Petro Yesu, inyi iko obo olo ejifak. Omijak nyia ehumani elle ittokon lejifani alia; ania, ette lejifani alia leten iko Yesu many ihiloŋoni ono ahaŋ ehumani elle ittokon; 16buo Petro owotia illet iger ikat haŋ. Attati lejifani alia inyiak icohuno many ikat haŋ, ette ikiana jio noduoti enne irriria 'to ekat haŋ, ette itajiŋaru Petro attua haŋ. 17Ati ifiyo nyia noduoti errirriani ikat ania Petro jiojio, “Obiaŋara soho iyye obo olo lejifak hulo atulo lia?”

Itarraŋ nyia Petro jiojio, “Obeŋ.”

18Ihacoro nyia; ania, ette egiamak iko errirriak itawulohina ahuk, ette iwotia ehitai buo osujai. Ania, ette Petro leten iwotia ikosi, ette isuja.

Ifiyo Ehumani elle Ittokon Yesu

(Mat 26:59-66; Mar 14:55-64; Luk 22:66-71)

19Ifiyo nyia ehumani elle ittokon Yesu te eram ono lejifak honyi iko ettiyenita honyi. 20Itarraŋ nyia Yesu inyi ojio, “Ekianatio ni sar sar jio aati 'daŋ; buo fe ettiyanatio ihasik emojiti iko Ihaji emojit enne ittokon, amasik hunno ottubatierek Yudei 'daŋ. Habeŋ ni amuaŋa imuaŋa obo ekiana hoŋ. 21Nyioti ifiyo iyye nani? Ifiye aati hunyia itayiruni 'to ekiana hoŋ. Ifiu jihosi erre hunyia itayiruni isi jihoŋ. Omijani isi erre hunyia ekiana ni.”

22Ninyia atuhok Yesu ekiana ania ihuania, ette obo olo errirriak innaŋ inyi, ette jiaran, “Nyio irinyak iyye ekiana ihuo nyia jio ehumani elle ittokon!”

23Itarraŋ nyia Yesu ojio, “Elle ekenu ni omuk erre hunne ipali, iramak isi ihosiere waati 'daŋ. Buo alla abis ekiana hoŋ, nyioti innaŋ iyye nani?”

24Ania, ette Annas ifahina Yesu, alla harasa ifita jio, ehumani elle ittokon alla anya Kaifas.

Inyiak Petro Irisa Yesu

(Mat 26:71-75; Mar 14:69-72; Luk 22:58-62)

25Ninyia harasa Simone Petro iwotia diya buo osuja eema, ette aati hullomuk jiaran jihonyi jio, “Obiaŋara soho iyye obo olo lejifak hulo atulo lia?”

Ati orisa nyia Petro jiojio, “Obeŋ.” 26Attati obo egiamani olo ehumani elle ittokon, atta haŋ ba atulo linyia isalu Petro eyyok honyi jiaran, “Abeŋ duo soho ni egonyok iyye iko Yesu iginana?”

27Inyiak fe Petro irisa jiojio, “Obeŋ.” Teya teya, ette ahohoro ilok.

Iyarai Yesu Ihosiere Pilato

(Mat 27:1-2, 11-14; Mar 15:1-5; Luk 23:1-5)

28Nyia motie berien, iyarai nyia Yesu addi ta haŋ Kaifas many ihaŋ enne ittokon ono mondir gala Roma. Obeŋi nyia elettaha Yudei hulia ojiŋari attua haŋ, nyio, ŋadi itihan isi a hebuatak ihuo ojiori ehumita hosi. Ihani nyia isi ihuo nyia oŋida bati isi oremehini iŋiyo aŋiyo ono neyom ono allaŋan. 29Ania, attati Pilato leten jihosi illet, ette ifiyo isi jiojio, “Anyio hiram enne itisiahiniette itai atulo olo?”

30Itarraŋi nyia isi inyi jiojio, “Ettallik duo hohoi iyaŋuno inyi dini, alla abeŋ duo inyi ihan obo epali.” 31Attati Pilato jiaran jihosi jio, “Iyatti ati inyi, ifuatta oŋototo eram honyi ta ahuattek hatai, ihuo ojiori efahita hatai.”

Buo isi ette itarraŋi jiojio, “Obeŋi gala Roma aŋatani hohoi iŋotoniere naye jio obo atulo.” (32#Yoa 3:14; 12:32Iduoŋi erre hunia ihuo nyia, itasiruniere ekenita Yesu hunyia ikiana inyi ninyia itahutaniere inyi ekoi anna alari inyi iyeri.)

33Attati Pilato icaharu attua haŋ, ette iloŋuna Yesu, ette ifiyo inyi jiojio, “Iyye hobu Yudei?”

34Buo Yesu ette itarraŋ jiojio, “Ottu eram enne ifiyo iyye ania to hou hoi, kuyya omuk aati omuaŋani eram hoŋ jihoi?”

35Itarraŋ nyia Pilato ojio, “Igigilo iyye jio nani olo Yudei? Aati hatai iko ehumak elettaha nyia iyaŋunie iyye jihoŋ. Anyio epali enne ihan iyye?”

36Itarraŋ nyia Yesu ojio, “Obeŋ olobie hoŋ ara ahono afau ana. Alla ara duo inyi ahono afau ana, ŋaduo lejifak hoŋ arriomonie itihiere oŋida obeŋi isiarani ani ihas lettaha Yudei. Ati obeŋ olobie hoŋ ara ahono afau ana!”

37Buo Pilato ette ifiyo inyi jiojio, “Ira ati iyye ahobu?”

Itarraŋ Yesu ojio, “Iyye ijio ara ni ahobu. Attu ni ifau dini buo fe isiuni nani, te eram abotie: attu ni ikianari nelahode. Lia, alla ara 'to a holo nelahode, itayirio inyi ekiana hoŋ.”

38Buo Pilato ette ifiyo inyi ojio, “Nanyio onno ojiori nelahode?”

Aŋotonia Ye jio Yesu

(Mat 27:15-31; Mar 15:6-20; Luk 23:13-25)

Attati Pilato inyiak ijiŋara allet jio aati Yudei, ette jiaran jihosi jio, “Abeŋ ni arumak obo epali jihonyi. 39Ati ojiori emanyiti hatai jio, oŋida ani ahohi atulo babus abotie te neyom ono allaŋan. Iwahata itai oŋida ani ahohi jihatai Hobu Yudei?” 40Itarraŋ nyia isi inyi te ewuwoŋita jiojio, “Obiaŋara inyi! Ohohi jihohoi Barabas!” (Ara nyia Barabas olohoho elle ittok.)

Currently Selected:

Yoane 18: EA2003

Highlight

Copy