Yoane 5

Etaŋidario otto Tafar

1Ihalu erre huna, olo nyia Yesu Yerusalem iyomori obo neyom ono Yudei. 2Owon nyia obo atafar Yerusalem iger Kol Kioro#5:2 Owon nyia obo atafar Yerusalem iger Kol Kioro : kuyya, owon nyia obo amaji Yerusalem iger Ibulli Kioro.. Anya nyia atafar ania Bessetta#5:2 Bessetta : igioroni omuk egierita jio, Bettesda. te ekiana Ebrei. Owoni nyia adafatai miyet iger honyi. 3Ififiata nyia eluluŋ haŋuak jio adafatai hunia. Owoni nyia aŋodok, aŋurak iko aati hullo oye aŋacio huattek. [Itilai nyia isi etafuliŋio tafar, 4nyio, ottutta nyia ajilo olo Lamonye to omuk oŋitek jio atafar ania itafuliŋiere aari. Buo ette itaŋida aŋuani ollo oluhi 'to itua atafar ania ahosiere, jio aŋuai onno owon 'to jihonyi.]#5:4 Obeŋ ekori ania jio omuk egierita. 5Buo diya, owon nyia obo latulo linyia oŋuai 'to aŋasi atomuana hunihoi hohotohunik. 6Ninyia igonyu Yesu inyi ififiata diya, omijak nyia inyi jio aluaji aŋasi hunno oŋuari latulo alia ania, ette inyi ifiyo inyi jio, “Iwak iyye itaŋidari iyye?”

7Itarraŋ nyia aŋuani alia inyi jio, “Lettok, obeŋ tulo dini elle itisurok 'to nani itua tafar elle itafuliŋi aari. Nyio, hajo ni alluhi ihuania, buo obo ette icomonio.”

8Buo Yesu ette jiaran jihonyi, “Totte, iduhu ejotit hoi, adahai.” 9Teya teya, otto atulo lia iŋidari, ette iduhuna ejotit honyi, ette itterio adaha.

Iduoŋi nyia erre hunia to oloŋ Sabatto, 10ania, ette elettaha Yudei iramana atulo elle itaŋidari lia jio, “Itihotie Efahita hohoi iyye iwwahatiere ejotit hoi ahana; nyio, ara inyi oloŋ Sabatto.”

11Itarraŋ nyia inyi isi ojio, “Iramak duo latulo eduo itaŋida 'to nani jio ijiara nani eduhu ejotit hoŋ ette leten.”

12Buo isi ette ifiyo inyi ojio, “Ŋai atulo elle iramak 'to iyye ihuo nyia?”

13Ati otimo nyia latulo elle itaŋidari alia ŋai Yesu; nyio, owon nyia eluluŋ waati jio amaji nyia buo fe Yesu leluny addi teya.

14Ihalu eram ania, orumak nyia Yesu inyi itua Haji emojit enne ittokon, ette jiaran jihonyi, “Itayirie, ihuania iŋida iyye, hènyiak iyyauna ŋadi obo ariŋ onno orroho 'to bebe inyiak iduoŋ jihoi.”

15Attati latulo alia leten, ette iramana elettaha Yudei jio, Yesu ŋole adi itaŋida inyi. 16Ania, ittigemierek isi Yesu, te etaŋidario honyi latulo alia to noloŋ Sabatto.

17Itarraŋ nyia Yesu isi ojio, “Odulo Monyoŋ egiama, ijiara buo fe nani adulo egiama.”

18Eram ania atibuo luŋa ninyia awaharik elettaha Yudei ittohori Yesu luŋa luŋa. Nyio, obiaŋara nyia hama ta amesio honyi efahi enne itik 'to aati egiama to noloŋ Sabatto; awahi nyia buo fe isi ittohoro inyi ta ajiaran honyi jio, ara Hollum Monyonyi. Tania, itarriamahi inyi ahuan honyi iko Hollum.

Elohittok ono Lonyi

19Ania, ette Yesu itarraŋ isi ojio, “Hode hode, eramak ni itai, ittallik Lonyi ihanio obo ariŋ ta ahuan honyi, ati ihanio inyi ariŋ enne igonyu inyi Monyonyi ihanio. Nyio, erre 'daŋ hunne ihanio Monye, isi buo fe hunne ihanio Lonyi. 20Obuor ataji Monye Lonyi, ania itahutaniere inyi jihonyi erre 'daŋ hunne ihanio inyi ta ahuan honyi. Olo adi Monye itahutana Lonyi erre hunna agalihini 'to huna, hunno olo Lonyi ihanio. Ifuatta adi itai 'daŋ illilliha. 21Isio adi Lonyi esu jio hia hulla awak inyi, ihuo enne itubuhuniere Monye ayak ette isiarana jihosi esu. 22Obeŋ Monye oŋot eram obo, ati ihanak inyi Lonyi irari a haŋotoni hirre 'daŋ, 23jio oŋida aati 'daŋ abaŋi inyi ihuo anna abaŋarik isi Monye. Lia, ollo obeŋ 'to abaŋ Lonyi, obeŋ buo fe inyi abaŋ Monye, elle ifahu 'to inyi.

24“Eramak ni itai hode jio, lia, elle itaniŋio 'to ekiana hoŋ buo fe iruk jio lia, linyia ifahu 'to nani, orumak adi inyi nesu onno osio 'to 'tulaŋ. Obeŋi adi oŋoti eram honyi, ati allaŋu inyi jio naye, ette leten jio nesu. 25Hode hode, eramak ni itai, ottu adi nasaa, alum inyi luŋa, enne itaniŋiere adi ayaak etuk ono Lonyi Hollum. Ibuhuni adi hia, hulle itayiruni 'to etuk honyi. 26Ihuo enne iyaŋuniere Monye esu, iyaŋuno adi buo fe Lonyi nesu. 27Ihanak buo fe inyi Lonyi a haŋotoni hiram ta arahan honyi, Lonyi Tulo. 28Hèllillihati te eram ania. Ottu adi asaa enne itaniŋunierek ayaak 'daŋ etuk ono Lonyi Tulo, 29#Dan 12:2ette idetuno addi te elumio hosi. Ibuhuni adi hinyia ihanie 'to erre ayijok, ette isu. Ibuhuni adi buo fe hia, hinyia ihanie 'to erre arrohojak, buo ette iŋotonia jihosi epalita.

Asuuti Yesu

30“Ettallik ni ihanio obo ariŋ te elohittok ottonoŋ. Aŋocio ni eram ihuo iramak Hollum nani. Obis aŋacio hiram hoŋ nyio, abeŋ ni awak ihanio ariŋ anna awak ni, ati ehanio ni ariŋ anna awak lia, linyia ifahu 'to nani.

31“Alla ara ni asuut hoŋ hama, ojiori adi jio obeŋ eram hoŋ ara ahode. 32Ati owon lobo ollo ottu 'to irahan asuut hoŋ; amijak buo fe ni jio ara ekiana honyi toni hode. 33#Yoa 1:19-27; 3:27-30Ifahina nyia itai eyak sayyo jio Yoane, buo inyi ette ikiana eram anna ara 'to ahode toni. 34Obiaŋara jio oŋida atulo luŋa ara asuut hoŋ, ati ekenu ni eram ania jio, oŋida bati italuahuni itai. 35Ara nyia Yoane ihuo allomo onno owulo 'to buo fe afaŋ 'tel 'tel. Iwahata nyia itai ifuotuna kai do afaŋan ottononyi ta namuno. 36Ati agalihini erre hunne ehanio ni, erre hunyia ihanio Yoane. Erre hunia hunyia isiarak Monyoŋ jihoŋ ihaniere; isi hunia erre hunna arai 'to asuuti hoŋ buo fe itahutani jio Monye ifahu nani. 37#Mat 3:17; Mar 1:11; Luk 3:22Ara buo fe Monye, elle ifahu 'to nani, asuut hoŋ. Hèbiaŋata itai itaniŋuna etuk honyi kuyya igonyuna omom honyi. 38Ibiaŋata itai igottiette ekiana honyi itajia hatai nyio, ibiaŋata iruhoto jio lia, elle ifahu inyi. 39Ihianati itai Abuk Hollum te egigilo hatai jio, inyurana adi itai nesu onno osio 'to 'tulaŋ tenyi. Ikiana tibuo ahuan Abuk Hollum ania, toni! 40Ati, ihara itai afuanna jihoŋ inyuraniere nesu.

41“Abeŋ ni attifia olohuo jio aati. 42Ati amijak ni jio, obeŋi atajia hatai obuori Hollum. 43Attu ni ta agolon Monyoŋ; ati ihara itai ifuotuna nani. Buo alla attu obo dini ta ahou honyi, ifuotuna adi itai inyi. 44Imunoti itai efuotutta etahabuta jio aati buo ibiaŋata iwahata ifuotuna etahabuta jio Hollum abotie hama. Aŋai attadi iruhoto itai nani? 45Ati hègigiloti jio, nani adi etisiak itai jio Monyoŋ. Mose luŋa, elle iyihina itai jihonyi, inyi adi itisiak itai. 46Elle iruhoto nyia itai luŋa Mose, iruhoto duo buo fe itai nani; nyio, Mose nyia igiorok eram hoŋ. 47Ati elle ibiaŋata itai iruhoto egierita honyi, aŋai 'tadi iruhoto itai ekenita hoŋ?”

Currently Selected:

Yoane 5: EA2003

Highlight

Copy