Luka 1

1Jio Tofilo:

Ihuo imijak iyye, igioroni nyia aati arriai eyabita hirre hunyia ihanie ihiji hohoi. 2Igioroni nyia isi erre hunia ihuo etaniŋu nyia hohoi jio hia, hunyia igonyuni 'to tetteri buo fe ittiyenie isi. 3Oyyu buo fe, elle egiorok ni erre huna 'daŋ ababo jihoi, lettok Tofilo, nyio, attifotio nyia ni isi many tetteri. 4Egiorok ni jihoi oŋida iyye imijak jio erre hunyia ittiyenie jihoi arai ahode.

Iramani Esiuna Yoane Etifuotoni Batisimo

5To oŋitek hunyia arari Erode Ahobu olo Yudea#1:5 Yudea Ikiana inyi ta afau Palastain 'daŋ., owon nyia obo ehumani afure honyi Sakariya, te ehumari ba Abija. Owoni nyia inyi iko Elisabeta, te ehumari ba Arone. 6Olibori nyia isi buo fe amanyai onno obis te efahita huno Lamonye. 7Ati obeŋi nyia isi isiuni hito nyio, iholofi nyia Elisabeta buo fe isi 'daŋ imaruahi.

8To obo oloŋ ihanio nyia Sakariya egiama honyi ono ehumani ihosiere Hollum, ninyia imok oloŋ ono ehuma jio ehumak hutto woyo Abija. 9Teya, ihuo ojiori emanyiti huno ehumak, onyimuni nyia inyi te ehutuŋai#1:9 Ehutuŋai : Inyi ekoi onno onyimunierek atulo ihuo abaha gumar. oŋida ojiŋak itua Haji emojit enne ittokon ono Lamonye itafuruhiniere nottogoŋ ihide ititiek. 10To ninyia osuahiere inyi ottogoŋ omojo nyia eluluŋ waati illet. 11Attati ajilo olo Lamonye ileyehino jihonyi ollo owotia oŋiatai te etitiek onno osuahinierek nottogoŋ. 12Ninyia igonyu Sakariya ajilo lia, ette abaŋi inef inyi bebe ette inyi ikikiro. 13Attati ajilo jiaran jihonyi, “Hèbaŋ Sakariya! Nyio, itaniŋu Hollum amojo hoi. Isihi adi ŋoruoi hoi, Elisabeta, eto 'le jihoi. Ittu adi iyye ifurana inyi Yoane. 14Obolo adi etahabuyo iko namuno jihoi iko jio aati arriai elle isiuni inyi, 15Ara adi inyi elettok to hosiere Lamonye. Obeŋ adi inyi amata afino kuyya obo abalu. Many luŋa hèsiuni inyi ifut adi inyi iko Loholio Olibo. 16Ottu adi inyi inyiahuno aati Israele arriai jio Lamonye, Hollum hosi. 17Adaha adi inyi to osiere Lamonye ta aduaran iko ta agolon ihuo Elija ekianani Hollum. Iloit adi inyi atajia monye jio aduri hosi, buo fe iloit lamiosok iruhori egigilita waati abisak. Ihuhumak adi inyi aati ta attuna Lamonye.”

18Buo Sakariya ette ifiyo ajilo lia jiojio, “Aŋai 'tadi amijak ni jio ara eram ana ahode? Nyio, emaruak ni buo fe ŋoruoi hoŋ imaruak.” 19Itarraŋ nyia ajilo inyi jiojio, “Ani Gabriele. Awotia ni ihosiere Hollum elle ifahu 'to nani iramaniere iyye asayyo ayijok huna. 20Ihuania, ibeŋ iyye iruk eram hoŋ, ottuho adi etuk hoi, ibeŋ adi iyye ikiana many ofuonnierek erre hunia irahan ahode alia attuba asaa hosi.” 21Itilai nyia aati Sakariya, many ilafuhorik jio nyio illiŋia inyi fur itua Haji emojit enne ittokon. 22Ninyia attu inyi allet, ittallik nyia inyi ikiana jihosi; attati isi imijana jio, oleyehino obo ariŋ jihonyi totua Haji emojit enne ittokon. Ittallik nyia inyi ikiana jihosi, ania, ette inyi ihuhuta jihosi ihuhuta ta ahas.

23Ninyia atuho asaa ono egiama honyi to tua Haji emojit enne ittokon, acaharu nyia inyi miji hosi. 24Ihalu omuk oŋitek oyedu nyia ŋoruoi honyi, Elisabeta, ette itoŋo itua haŋ ayafajin miyet. 25Ette Elisabeta jiaran, “Eii! Eluak ani Lamonye, iduha inyi nariri hoŋ tehiji waati addi.”

Iramani Esiuna Yesu

26Jio ayafa etilleji onno oyedurori Elisabeta, ifak nyia Hollum ajilo Gabriele ibore gala Nasaret atta fau Galilea. 27#Mat 1:18Iyaru nyia inyi asayyo jio obo oduoti, afure honyi Maria, onno hobeŋ ottironio iko obo alle. Ocoroni nyia inyi jio obo atulo to woyo ba Hobu Dafide afure honyi Yosefu. 28Ottu nyia ajilo jihonyi ette ifony inyi ojio, “Ogolo Maria! Owen Lamonye iko iyye buo fe omuno iyye bebe!”

29Ati ihawwa nyia Maria te ekiana ono ajilo, ette ifiyo ahuan honyi jio, nanyio hirre huna. 30Buo ajilo ette jiaran jihonyi, “Maria, hèbaŋ; nyio, omuno Hollum iyye bebe. 31#Mat 1:21Inef adi iyye ohe, itte ittuna isiuna eto 'le. Ittu adi iyye ifurana inyi Yesu. 32Ara adi inyi elettok, iloŋoi, adi inyi Lonyi Hollum elle Illomohi 'to 'daŋ. Isio adi Hollum Lamonye jihonyi elohobu hohonyi honyi Dafide. 33Tania, ottu adi inyi ilohobu ihaŋ Yakobo 'tulaŋ; obeŋ adi nolobie honyi owon iko esidi.”

34Buo Maria ette iramana ajilo lia jiojio, “Habeŋ ni attironio iko obo alle, ofuonni 'tadi erre hunia aŋai?”

35Itarraŋ nyia ajilo inyi jiojio, “Ottu adi Loholio Olibo jihoye, ottu adi aduaran Hollum imuluhana iyye. Tania, iloŋoi adi leto ololibo alia, Lonyi Hollum. 36Iko ogigilu Elisabeta, atta haŋ hatai, ojiori nyia iholofi. Ati ihuania awon iko ohe ono ayafajin ille, duadi bu imaruak inyi bebe. 37Nyio, obeŋ obo ariŋ anna agalik 'to Hollum.” 38Buo Maria ette jiaran, “Ani egiamani ono Lamonye. Ijiara hétehaniehe jihoŋ ihuo ijio iyye.” Buo ajilo lia ette idiaharu inyi.

Aleten Maria Imijuno Elisabeta

39To oŋitek hua odioto nyia Maria ette iruharu jio obo abore gala onno owon itua doŋiok hutta fau Yudea. 40Ette leten ihaŋ Sakariya ette ifony Elisabeta. 41Ninyia itaniŋu Elisabeta efuanya Maria, ette leto otto hohe honyi iddidiaŋa. Buo Loholio Olibo ette ifut jihonyi. 42Attati inyi ikiana woŋ woŋ jiojio, “Tehiji ŋoruo 'daŋ, obolo namuno jihoi iko jio leto elle ittu iyye isiuna! 43Nanyio iduoŋ eram ana jihoŋ ihua ana jio, oŋida honye Lamonye hoŋ ottu imijaru nani? 44Oduo etaniŋu ni efuanya hoi, ette leto otto hohe hoŋ, iddidiaŋa ta namuno. 45Hatawana namuno jihoi enne iruk 'to jio, ofuonni adi erre hunyia ocorok Lamonye jihoi irahan ahode!”

Itahabuyo Maria Hollum

46Attati Maria jiaran,

“Itahabuyo ataji hoŋ Lamonye.

47Itamuno Hollum oloyiri hoŋ, nyio, inyi etalahani hoŋ,

48nyio igonyu inyi afiahaji hoŋ egiamani honyi!

Tania, iloŋoi adi aati 'daŋ ani ahamunoni.

49Nyio, ihan Hollum alla agalik 'to 'daŋ erre hunno obolori 'to bebe jihoŋ

olibo afure honyi.

50Owon amehino honyi jio aati hulla abaŋi 'to inyi,

iko jio amisik huno lonyirok lonyiok hosi.

51Itahutak inyi agolon honyi ta aani,

ette ikikur etadarak iko egigilita hosi 'daŋ.

52Itafiaha inyi elohobu hobuok hulle ittaha 'to

buo ette ikaf afiahajak ahide.

53Isio inyi esamiti jio alociaŋak,

buo ette ifuhara asamak ta ahas asai.

54Ogottiere inyi buo fe obeŋ itapuak erre hunyia ikiana inyi jio hohonyiok hohoi,

buo ette italuak egiamani honyi Israele.

55Ogottiere inyi amehino honyi jio Abramo iko jio lonyirok honyi 'daŋ 'tulaŋ!”

56Itoŋok nyia Maria ayafajin ihuo hunihoi iko Elisabeta attati icaharu miji hosi.

Esiuna Ono Yoane Etifuotoni Batisimo

57Ninyia attubai oŋitek huno ayeduri Elisabeta, ohonya nyia nohe honyi, ette inyi isiuna leto 'le. 58Attati aati hutta haŋ hosi iko hutto onyihari itaniŋuna jio, itahutak Lamonye amehino honyi jio Elisabeta, ette isi 'daŋ muno ikonyi. 59Ninyia atuk olodole lia esabit abotie, ofuonni nyia onyihari iko aati hutta haŋ, ette ittubanio arabotie ikosi ibosiere leto. Awahi nyia isi ifurana inyi Sakariya, afure monyonyi. 60Ati iramak nyia Elisabeta isi jio, “Obeŋ! Afure honyi luŋa Yoane.” 61Buo isi ette jiaran jihonyi, “Obeŋ obo atta haŋ hatai anya ihuo nyia.” 62Attati isi ihuhuta jio Sakariya ta ahas ifiyere anani fure anna awak inyi ifurani jio leto alia. 63Ette Sakariya imojuna obo ariŋ enne igioronierek, ette igioronia jio, “Afure, honyi Yoane.” Tania, illillihai nyia isi 'daŋ bebe. 64Teya teya, inyiak Sakariya ikiana ette itterio etahabuyo Hollum. 65Inef nyia abaŋi aati onyihari hosi 'daŋ, buo asayyo huno erre huna ette isarrahina atua doŋiok 'daŋ hutta fau Yudea. 66Igigiloi nyia aati 'daŋ hunyia itaniŋuni 'to asayyo huna te eram hosi, ette buo fe ifiyo jiojio, “Ottu 'tadi leto alia irahan anyio?” Nyio, owon nyia aduaran ono Lamonye jihonyi.

Ikiana Sakariya Eram Hollum

67Ifut nyia Loholio Olibo jio Sakariya Monye Yoane, ette inyi ikiana asayyo Hollum jiojio:

68“Hétahabuyete Lamonye, Hollum olo Israele!

Lattu inyi italuahiere aati honyi buo fe italahuniere isi.

69Isiarak inyi hohoi Etalahani ollo ogol 'to bebe

ollo odetuno 'to to woyo Dafide egiamani honyi.

70Ihuo ikiana nyia inyi berien te etuhe hekianak honyi aliborok jio,

71etaluahu adi inyi hohoi to miorok hohoi

iko ta has waati hullo oliwarik 'to hohoi.

72Ojio nyia amehino adi inyi jio hohonyiok hohoi

buo fe agottiere ecorit honyi onno odua 'to.

73Te ettuŋo ninyia ocorok Hollum jio hohonyi hohoi Abramo

74jio, etaluahu adi inyi hohoi ta has miorok,

buo fe oŋida hohoi ebeŋ ebaŋ elle egiama hohoi jihonyi.

75Oŋida bati hohoi elibo buo fe ebis to hosiere honyi many isidi manya hohoi.

76“Buo iyye lonyi hoŋ, iloŋoi adi iyye ekianani Hollum elle Illomohi 'to 'daŋ.

Idaha adi iyye to nosiere Lamonye ihuhumaniere ekoi jihonyi.

77Iramak adi buo fe iyye aati honyi jio italahuni adi isi

ta ahohina ono eyyata hosi.

78Nyio, ta amehino iko ta abijon taji Hollum jihohoi,

iyaŋuno adi inyi jihohoi etalahuna onno ottu 'to tedou faa ihuo ataŋatio motie;

79isiaraniere afaŋan jio hia hullo owoni 'to idumele iko ibali ono naye;

buo fe itahutaniere hohoi ekoi ono namanya enne iyaŋuno 'to nelik tajia.”

80Ninyia abolo leto alia, ette buo fe nahuan iko Oloholio honyi 'daŋ igolon. Amanya nyia inyi itua hidiofo many jio noloŋ ninyia oleyere inyi ihiji waati Israele.

Currently Selected:

Luka 1: EA2003

Highlight

Copy