Luka 17

Eyyau

(Mat 18:6-7, 21-22; Mar 9:42)

1Attati Yesu jiaran jio lejifak honyi “Ofuonni adi luŋa erre hunne isusuhini 'to aati iyyauniere, ati orroho adi bebe jio lia elle iyaŋuno 'to isi. 2Osiru duo ifitani noonye hiriai imurut honyi, ette ibironia inyi itua hari enne ittokon ŋadi inyi isusuhi obo tehiji oŋiayai hulo iyyauniere. 3#Mat 18:15Ihumata irriria ahuattek hatai!

“Elle ipal illahoi, iriŋa inyi, buo elle irue inyi, obusak inyi. 4Buo elle ihanio inyi onno orroho jihoi enyiahita hattarik to noloŋ abotie buo odulo ajiaran jihoi, ‘Hibe awotto, hibe awotto!’ enyiahita hattarik, obusak luŋa inyi.”

Neruk

5Attati lefahat jiaran jio Lamonye, “Ofonik eruk hohoi.” 6Itarraŋ nyia Lamonye ojio, “Alla abolo duo eruk hatai ihuo aŋerio cahai iremehina duo itai jiaran jio akamurei ana ‘Orutu ahuan hoi addi, idulanie itua hari enne ittokon!’ buo inyi duo ette niŋio.

Egiama ono Egiamani

7“Kuyya alla awon obo alatai iko egiamani ollo oromo imana, kuyya iyyahatio akioro; alla acohuno inyi to mana, iramak adi iyye inyi ijiara obotik iŋiria? 8Obeŋ! Ijio adi iyye jihonyi, ‘Ihuhumak aŋiria hoŋ otto 'tari, iyyafak aboŋo egemi oŋida isiaraniere ani aŋiria buo ni aŋiyo buo fe amata; ati ihalu iremik adi iyye iŋiyo aŋiria hoi.’ 9Isiarak soho inyi ahumo jio legiamani alia ta aniŋio honyi efaha? 10Ara buo fe ihuo nyia jihatai, elle ituhonia itai egiama 'daŋ enne iramani jihatai, ijiatta jio, ‘Era hohoi ahegiamak asai, ehanio hohoi ijiai egiama enne isiori jihohoi.’ ”

Itaŋida Yesu Aliawa 'Tomon

11To ninyia alari Yesu Yerusalem, ohisaru nyia inyi te ekori ette hiji Samaria iko Galilea. 12Ninyia hojiŋak inyi jio obo amiji, oruaŋanie aliawa 'tomon ikonyi hunyia owoni 'to iko aŋuai belelio. Owotiai nyia isi alamarai, 13ette illilloŋo woŋ woŋ jiojio, “Yesu! Lettok! Omehinie jihohoi!”

14Igonyu nyia Yesu isi ette jiaran, “Ifuatta, itahutana ahuattek hatai jio ehumak.”

Ninyia hadahai isi ihiji ikoi, ette italibo isi. 15Ninyia igonyu obo olosi jio aŋida inyi, ette inyi icohuno buo itahabuyo Hollum woŋ woŋ, 16ette irruaŋana ahuan honyi ifau ihosiere hejek Yesu ette isio inyi ahumo. Ara nyia inyi a Samaritanani. 17Attati Yesu ifiyo inyi ojio, “Irata duo bu itai hulle italibori 'tomon, tahiai ati hula hottoŋuan? 18Nyio ti ololufa olo hama ollo ocohuno 'to itahabuyere Hollum?” 19Attati Yesu jiaran jihonyi, “Totte ilo, itaŋida eruk hoi iyye.”

Attuna ono Olobie

(Mat 24:23-28, 37-41)

20Ifiye nyia omuk hulo Farisei Yesu baya adi ottu Olobie ono Hollum. Itarraŋ nyia inyi jiojio, “Obeŋ Olobie ono Hollum ottu iko etamijanita hunno oleyei 'to. 21Obeŋ adi obo atulo ojio, ‘Imijiete, ana dini!’ kuyya ‘Nyia fe nyia!’; nyio, awon Olobie ono Hollum ihiji hatai.#17:21 Ihiji hatai : Ojiori omuk egierita “Iduoŋ adi olobie ono Hollum ihiji hatai turunyaŋ”.”

22Attati inyi jiaran jio lejifak honyi, “Ofuonni adi oŋitek hunne iwahatti adi itai igonyuniere noloŋ abotie jio noŋitek Lonyi Tulo, ati ibiaŋata adi itai igonyuna inyi. 23Owoni adi hia hullo ojiori adi jihatai jio, ‘Imijiete diya!’ kuyya, ‘Imijiete dini!’ Ati hèfuatta ijifatio isi. 24Ihuo enne imiadahari ahilai, ette itafaŋ aŋacio 'daŋ huno edou, ara adi buo fe Lonyi Tulo ihuo nyia iholoŋ honyi. 25Ati orumak adi inyi do ettigemita arriai buo fe aati hula ahana adi ihari inyi. 26Ihuo ninyia arari inyi jio noŋitek huno Noa, ara adi buo fe inyi ihuo nyia jio noŋitek huno Lonyi Tulo. 27Odulori nyia aati aŋiyo, iko amata buo fe aliawa ayamanie iko aŋoruo many jio noloŋ ninyia ojiŋaniere Noa itogol, attati ebuli hari ittohoro isi 'daŋ. 28Ara adi ihuo ninyia to noŋitek huno Lot. Odulori nyia aati aŋiyo, amata, enyiaŋa, etinyiaŋa, edula, iko aduho. 29To noloŋ ninyia alari Lot addi to bore gala Sodom, ette eema iko efuoto amunek onno owulo ahima,#17:29 efuoto amunek onno owulo ahima : inyi obo ariŋ enne iloŋoi te Iŋilis ‘Sulphur’ buo ara amunek. isauno tedou ette ituk isi 'daŋ. 30Ara adi ihuo nyia to oloŋ enne italeyehinierek Lonyi Tulo.

31 # Mat 24:17-18; Mar 13:15-16 “To oloŋ ania, hèlaha atulo ollo owon 'to ihide haji ollu ifau, iduhuniere asaŋ honyi addi totua haji. Ihuo nyia buo fe hèlaha atulo ollo owon 'to imana ocohuno haŋ. 32Ogiluna to ŋoruoi Lot! 33#Mat 10:39; 16:25; Mar 8:35; Luk 9:24; Yoa 12:25Lia, alla awak 'to italuahuna esu honyi italitohi adi inyi; ati lia, elle italitohi 'to esu honyi, italuahuno adi inyi. 34Eramak ni itai, jio arue ania, ojotoi adi aati arrihai iŋeref abotie. Iyarai adi abotie addi buo idiaharai obotie. 35Irieyei adi aŋoruo arrihai imaji abotie; iyarai adi abotie addi buo idiaharai ebotie. [ 36Owoni adi aliawa arrihai itua mana; iyarai adi abotie addi, buo idiaharai obotie.]”#17:36 Obeŋ ekori ana jio omuk egierita.

37Attati lejifak ifiyo inyi jiojio, “Lamonye, jio anani maji?”

Buo inyi ette itarraŋ jio, “Ottubanie adi ataruha jio amaji anna awanari obo ariŋ onno oye 'to.”

Currently Selected:

Luka 17: EA2003

Highlight

Copy