Matteyo 15

Ettiyenita Huno Hohonyiok

(Mar 7:1-13)

1Attati omuk hulo Farisei iko ettiyanak ifahita ifuanna to Yerusalem jio Yesu, ette ifiyo inyi jio, 2“Nyio omesie lejifak hoi ettiyenita hohonyiok hohoi? Nyio oŋiyei isi hobeŋi ihumi ifinia!” 3Itarraŋ nyia Yesu isi jiojio, “Nyio ati imesiete itai efahita huno Hollum buo ijifatiete ettiyenita hatai? 4#Ajiŋuna 20:12; Edasita 5:16; Ajiŋuna 21:17; Ehumak 20:9Nyio, iramak nyia Hollum jio, ‘Abaŋa monyohoi iko honyohoi,’ buo ‘Atulo elle ittarrohojio 'to afure monyonyi kuyya ono honyonyi, ijiara luŋa ottohori inyi.’ 5Ati ittiyeniete itai jio alla awon obo atulo iko obo ariŋ onno oremik inyi iluahiere monyonyi kuyya honyonyi, buo ojio jio, ‘Ara ana ahono Hollum,’ 6oremik inyi ibiaŋan ibaŋi monyonyi.#15:6 monyonyi igioroni omuk egierita jio: monyonyi kuyya honyonyi. Tania, itapuahata itai efahita huno Hollum, ittata ijifatio ettiyenita hatai. 7Itai etihanak huattek hulo! Ottenu nyiadi Isaya to ninyia ikianari inyi eram Hollum tetai jio,

8 # Isaya 29:13 (LXX) ‘Ojio Hollum, itahabuye aati hulo ani te etuhe hosi buo atajia hosi luŋa alamaji jihoŋ.

9Itahabuye isi nani obojiai,

nyio, ittiyenie isi efahita waati ihuo anna arai isi efahita hoŋ.’ ”

Erre Hunne Itiboti 'to Atulo

(Mar 7:14-23)

10Attati Yesu iloŋuna eluluŋ waati, ette jiaran jihosi, “Itayiriete buo fe omijana jio, 11obiaŋara ariŋ onno ojiŋak 'to ihutuk tulo itibot inyi, ati, ariŋ onno ojiŋu 'to totua hutuk inyi itibot atulo.” 12Attati lejifak honyi ifuanna, ette jiaran jihonyi, “Imijak soho iyye jio itiloŋoj ekiana hoi ania Farisei?”

13Itarraŋ nyia inyi jiojio, “Orutori adi ayyani 'daŋ hunno obeŋ Monyoŋ ettedou idulak. 14#Luk 6:39Hèlafuhoti tesi! Arai isi aŋodok hullo orihotie 'to aŋodok. Alla arihotio oloŋodo obo oloŋodo, okuaharai adi isi 'daŋ itua iwure.”

15Buo Petro ette jiaran jihonyi, “Itahutak hohoi ikiana etarriamai ania anyio.”

16Buo Yesu ette jiaran jihosi, “Hèbiaŋata buo fe itai imijana ihuo hullomuk? 17Ibiaŋata itai imijana jio erre 'daŋ hunno ojiŋari 'to itua hutuk, ofuoi isi itua hohe ette ijiŋuna allet? 18#Mat 12:34Ati erre hunno ojiŋuni 'to to hutuk, obotuni isi many to taji. Isi hunia erre hunne itiboti 'to atulo. 19Nyio, totua taji tulo ofuonni egigilita hunno orrohoji 'to ihuo huna; attohoro tulo, aroto, erre somon, ahoho, agesemi, iko etarrohojio fureta waati. 20Isi erre hunia hunne itiboti 'to atulo, buo obiaŋara alla abeŋ atulo ihum ifinia iŋiyere ihuo ijiatta itai.”

Eruk ono Obo Aŋotte

(Mar 7:24-30)

21Odioto nyia Yesu teya, ette leten ifau etteger borejin gala Taya iko Sidon. 22Attati obo aŋotte ono Kana ninyia amanya 'to jio aŋati ania ittuna jihonyi, ette jiaran, “Lettok, Lonyi Dafide, omehinie jihoŋ! Owon ŋarri hoŋ iko aminiaŋati arroho jihonyi bebe.”

23Ati obeŋ nyia Yesu itarraŋak jihonyi obo ekiana. Attati lejifak honyi ifuanna jihonyi, ette ittana inyi jiojio, “Ifuhai aŋotte ania addi, nyio, ijifatio inyi hohoi buo iwuwoŋita.” 24Attati Yesu itarraŋ isi ojio, “Ifahuni ani jio akioro hunno olitohini 'to, isi aati Israele hama.”

25Tonyia, origoŋo nyia aŋotte ania ihosiere honyi, ette jiaran, “Lettok, eluak ani!”

26Buo Yesu ette itarraŋ ojio, “Obeŋ oyyu iruoŋoniere aŋiyo duri jio aŋohe.”

27Buo aŋotte ania ette itarraŋ inyi ojio; “Lettok, ara ahode, ati, ihuhuroi aŋohe ara duadi bu aŋiyo onno oddoddou 'to to 'teremeja lamonye hosi.” 28Ania, ette Yesu jiaran jihonyi, “Haniye! Obolo eruk hoi bebe. Hétehaniehe jihoi ihuo iwak iyye” Teya teya, ette ŋarri aŋotte ania, ŋidari.

Itaŋida Yesu Aati Arriai

29Teya, odioto nyia Yesu ette leten totto hutuk tafar Galilea, ette idahina ihide doŋe; ette iwoniara, 30ette eluluŋi waati arriai ifuanna jihonyi, hulle iyaŋunie aŋurak, aŋodok, elurok huattek, attuhok iko aŋuak hullomuk arriai, ette ihanana isi iger hejek Yesu; buo inyi ette itaŋida isi. 31Illillihai nyia aati ninyia igonyuni isi attuhok ikianai, adiotoi elurok, abisani aŋurak, buo fe aŋodok omijie, ette isi itahabuyo Hollum olo Israele.

Inyiak Yesu Itaŋiyo obo Eluluŋ Waati enne Ittok

(Mar 8:1-10)

32Iloŋu nyia Yesu lejifak honyi, ette jiaran jihosi, “Omehino ataji hoŋ aati hulo, nyio, atuhi isi oŋitek hunihoi obeŋ obo ariŋ onno oŋiyei isi. Abeŋ ni awak itatturonia isi hullo oniamai, hèlaha ofuoi imohita ihiji ikoi alla acaharai miji.”

33Ifiyei nyia lejifak inyi jiojio, “Erumak adi aŋiyo ajia, ihidiofo dini, onno oremik 'to itanya eluluŋ waati onno obolo 'to ana?”

34Attati Yesu ifiyo isi jio, “Owoni emunio baya jihatai?”

Buo isi itarraŋi, “Emunio hattarik buo omuk aham kai hullo odihara.”

35Ania, ette Yesu iramana eluluŋ waati ijiara owoniari ta fau. 36Attati inyi iduhuna emunio hattarik huna iko aham, ette isio ahumo jio Hollum, ette ibibeny isi. Attati isiarana jio lejifak honyi, buo lejifak ette ihiharana jio eluluŋ waati. 37Oŋiyei nyia isi 'daŋ many ifuaŋarik. Attati lejifak ihuhuruna ofitot itua afeehien hattarik 'daŋ lur lur. 38Arai nyia aliawa hinyia oŋiyei 'to alif aŋuan (4,000), elle ebeŋ ehianak aŋoruo iko iŋiayai.

39Attati Yesu itatturonia eluluŋ waati, ette idahina itua togol, ette leten ifau Magadan.

Currently Selected:

Matteyo 15: EA2003

Highlight

Copy