Lk 10
10
Öri Pyɑ̈r Ábïryew Wïdɑ́ryew yi Yëso
1Codhe, kɑ Wë ókɑ̈bbø ki ji pyɑ̈r ɑ́bïryew wïdɑ́ryew, kɑ gï öre gɑ ɑ́ryew, ɑ́ryew. Gï ɑ́öre bøle mɑl yethi myërr-ɑ dwɑdde kedhø. 2#Mt 9.37-38 Kɑ gï köbbe kinni, “Byel ɑ́cyeg ge gïïr ki mendwøng, de jøgwøg møg-ɑ nud kwɑnni gen nøg. Kwɑjju wïi pwödhø, o öne ki jøgwøg mø gïïr møg kɑj byelle. 3#Mt 10.16 Kedh wun ɑnɑn, de lïng wun! Wu ör yi yɑn wu nɑ dyëg møg kedhi kelli óthönhì. 4#Mt 10.7-14; Mk 6.8-11; Lk 9.3-5 Wu ko kɑ̈ddi ki pødhi ngyëny, kɑ wu ko kɑ̈ddi ki beg, wɑlɑ̀ wɑr, kɑ wu ko nyi cungi wu mɑ̈dh-ɑ ji kì kö yöö. 5Nyi kööb wun kì ɑ́dyëddi gøl-ɑ kedhi yi wun kinni, ‘Wiy gøl, bëëde ki mër.’ 6Keløg yij gølɑni dɑ ngeti mër, mɑ̈dhhi mër mø wun óbëëdø kì gølɑni, de keløg ge pɑth ki tyëngmër, mɑ̈dhhi mër mø wun ódwöög yï wun. 7#1 Kör 9.14; 1 Tim 5.18 Bëëd wun kì gøl-ɑ bɑ gøl mër, kɑ wu cyɑ̈ɑ̈m wun, kɑ wu mɑ̈ɑ̈dh wun ki gïg-ɑ ómëggi wun, mɑ́ ngɑn-ɑ göögø nyi ceg kɑ thödhø ki köögi. Wu ko nyi dhwödh kì kɑl, kɑ wu dɑ̈g-ɑ gøl-ɑ kyeelø. 8Keløg wu kedh-ɑ kɑɑl kɑ wu kïdhi kɑl yi tyëng kɑɑlɑni, cɑm wun gïncɑm-ɑ ómëggi wun. 9Yiel wun tyëng-ɑ dëlli gen rɑ̈mø kì kenyɑni, kɑ ge köbbi wun kinni, ‘Pödhi Jwøk cyɑ̈gi ki wun.’ 10#Gwøg 13.51 De keløg wu kedh-ɑ kɑɑl, kɑ wu ocögø wu pɑ cwøøl kɑl yi tyëng kɑɑlɑni, kedhu dïkɑɑlɑni kɑ wu kööb wun kinni, 11‘Cɑgg ɑ́ tør kɑɑl wun men-ɑ ɑ́mɑ̈gi ki tyelli wøn tënggi wø’ wun. De wɑ̈thi wun ko wïl kinni Pödhi Jwøk ɑ́rum ki bëën buti wun!’ 12#Cɑ̈gø 19.24-28; Mt 11.24; 10.15 Yɑ köbb-ɑ wun kinni, kì Cyɑ̈ɑ̈ng Gøny, cɑ́y-ɑ ɑ́cɑɑy Sødømɑ̀ óløg mø lɑ̈w kibøli cɑ́y-ɑ ócɑɑy kɑɑlɑni.
Kɑ̈dd-ɑ Nuti Yïëyø
(Mt 11.20-24)
13 #
Icɑ 23.1-18; Idhki 26.1–28.26; Yöiil 3.4-8; Amos 1.9-10; Dhek 9.2-4 “Yï ɑ́gɑ̈g Korɑdhïn! Yï ɑ́gɑ̈g Betsɑidɑ̀! Mɑ́ keløg gïïngɑ̈ngø møg-ɑ ɑ́gwøg kì yethi wun di gwøg-ɑ Suur kí Sïdön, ge bɑ møg di yewi kɑ̈ge dööng, kɑ ri gen di bug gen ki belø, kɑ ge orugø ki ocwɑ̈llì. 14De kì Cyɑ̈ɑ̈ng Gøny, cɑ́y-ɑ ócɑɑy Suur kí Sïdön óløg mø lɑ̈w kibøli cɑ́y-ɑ ócɑɑy wun. 15#Icɑ 14.13-15 O yïn ø, Kɑpernɑum! Yï ɑ́dwɑdd-ɑ tïngi rií mɑl? Pɑth, yï óleeng-ɑ piny yij ölø!”
16 #
Mt 10.40; Mk 9.37; Lk 9.48; Jn 13.20 Kɑ Yëso jøbɑnge köbbe kinni, “Ngɑn-ɑ ólïngi kwøbbi wun, lïng-ɑ kwøbbɑ. O ngɑn-ɑ lïngi kwøbbɑ, lïng-ɑ kwøbbi ngɑn-ɑ ɑ́ör yɑn.”
Dwöögi Pyɑ̈r Ábïryew Wïdɑ́ryew
17Keny-ɑ ɑ́dwöög jøg-ɑ ɑ́ör gɑ pyɑ̈r ɑ́bïryew wïdɑ́ryew, ge ɑ́dwöög pëthi gen omedø, kɑ ge okööbø kinni, “Wuö, cɑgg ɑ́ wëyrijjø, ge ceg-ɑ lïngø ki kwøbbi wøn, kenyi köbbi gen yi wøn ki nyingí!”
18Aköbbi gen yi Yëso kinni, “Cethɑn ɑ́nenni yi yɑn e ceg-ɑ dëëmø ni loodh mɑl. 19#Wör 91.13 Lïng wun, wu ɑ́thödhɑ ki tegø me nyøn wun thöllì kí ïïdh; tegø me lod tegi ngetimɑ̈ɑ̈nø. O bëëd e bong gïn-ɑ ónywɑl wun. 20Pëthi wun ko med kipe kɑ̀ lïngi kwøbbi wun yi wëyrijjø, de med pëthi wun kiper kɑ ɑ́rum nyingi wun ki gwedø kì mɑl.”
Mïni Pyëw Yëso
(Mt 11.25-27; 13.16-17)
21Amïni pyëw Yëso kì ri tegi Wëykwërø, ɑkööbe kinni, “Yɑ lejj-ɑ yïn, yïn ɑ Wïyɑ; Wïi mɑl kí piny, kipe kɑ ɑ́kɑ̈nní møgɑni tyëng-ɑ wɑ̈thi gen pel, geki tyëng-ɑ rummi gen nud. De ge ɑ́nyudhí ji-ɑ nuti dïdø. Ngee Wïyø, bɑ gïn-ɑ ɑ́dwɑddi yi yïn ceth kidyër.
22 #
Jn 3.35; 10.15 “Wïyɑ, yɑ ɑ́mëgge jɑmmì bënn. Bong ngɑn ngɑ̈nyi kinni Wɑ̈d bɑ men, dɑ́ Wïy kete ɑ ngɑ̈nyii. O bong ngɑn ngɑ̈nyi Wïy, den-ɑ́ Wɑ̈d geki ji-ɑ ɑ́myeg yi Wɑ̈d kɑ gï köbbe møgɑni.”
23Kɑ ree luge jøbɑnge, ɑköbbe gïn kì wɑ̈yi gen kinni, “Ri wun dɑ gyëdh, mɑ́ gïg di nennø yi wun! 24Yɑ köbb-ɑ wun kinni, jøtöng mø gïïr, kí rɑ̈nhì ɑ́dwɑdd-ɑ lidhi gïg-ɑ nenni yi wun ek, de ge ɑ́dhɑ̈li. O ge ɑ́dwɑdd-ɑ lïngi møg-ɑ lïngi yi wun ek, de ge ɑ́dhɑ̈li.”
Gɑ́ji Jɑl Sɑmɑriyɑ̀, Jɑldøj
25 #
Mt 22.35-40; Mk 12.28-34 Kɑ jɑl mɑ jɑlpwönyi Cigg kedh-ɑ be pɑ̈nyi Yëso, ɑkööbe kinni, “Jɑlpwönyø, ɑ́ ngø ɑ dwɑddi kinni o gwøg yi yɑn, o yɑ yïddɑ ki nënn-ɑ ɑtheer?”
26Aløøg møge yi Yëso kinni, “Á ngø ɑ bɑ ɑgwed kì yethi Cigg? Á ngø ɑ ɑ́rɑng yi yïn kì yij wɑ̈nyi Cigg?”
27 #
Kwɑrr 19.18; Jølø 6.5 Kɑ jɑlɑni ólöggø kinni, “Mɑɑr Wöw Jwøgí ki pyëwí bëne, kí wëyí bëne, kí tegí bëne, kí rummí bënn, kɑ ngɑn-ɑ butí mɑɑr ni kɑ̀ mɑɑr rií.”
28 #
Kwɑrr 18.5
Aköbbii yi Yëso kinni, “Löggí bɑ dyër. Gwøg møgɑni o yï yïddí ki nënn-ɑ ɑtheer.”
29De jɑlpwönyi Cigg ɑ́dwɑdd-ɑ yodi tegi per pyëjj-ɑ ɑ́pyëje, ɑpyëje Yëso kinni, “Ngɑn-ɑ butɑ ɑ́ men?”
30Alöggi Yëso kinni, “Dɑ jɑl megø mɑ ɑ́dhwödh kì Yerusɑlem e wel-ɑ Yerikö, kɑ rødh yi kurrì. Kɑ ógudhe kɑggi yi gen, kɑ gø pwöd gen, kɑ gø wiy gen e dhɑ̈rø. 31Kɑ jɑl mɑ ókwërø obëënø e kɑ̈ll-ɑ yuuɑni. Keny-ɑ ɑ́lidhe gøn, kɑ gø kyëje kedh e opödhø. 32Kì bɑnge, ɑbëën jɑl mɑ Kwɑɑr Leebì. Keny-ɑ ɑ́wɑ̈dhe kenyɑni, gø ɑ́lidhe, kɑ gø kyëje, kedh e opödhø. 33#2 Kwøb 28.15 Codhe, kɑ jɑl Sɑmɑriyɑ̀ obëënø, e kɑ̈ll-ɑ yuuɑni. Keny-ɑ ɑ́lidhe jɑl-ɑ ɑ́pwöd, kɑ yije óywöngø kipere. 34Kɑ kedh-ɑ yïe, kɑ kedde kunye ki møgi oløg kí møw, kɑ gï kode. Atïnge gøn kömi ɑdere. Kɑ gø kïdhe gøl wëll, kun tuure gøn. 35Keny-ɑ ɑ́ru wøw dhuki, kɑ jɑl Sɑmɑriyɑ̀ omuujø ki ngyëny ɑ́tegg ɑ́ryew, gï mëgge’ jɑl-ɑ yïe di gøl wëll, kɑ gø köbbe kinni, ‘Tuur jɑɑl. Keløg e dɑ ngyëny møg-ɑ ódwɑddi yi yïn keny-ɑ óthumi møg, ge ócullɑ yïn keny-ɑ ódwöögɑ.’ ”
36Codhe, ɑkööb Yëso kinni, “Yï orumø kinni bɑ men kì kelli jøgɑni gɑ ɑ́dɑ̈g ɑ ɑ́göög ni ngɑn ying buti jɑl-ɑ ɑ́pwöd yi kurrì?”
37Kɑ jɑlpwönyi Cigg ólöggø kinni, “Jɑl-ɑ́ pyëwe ɑ́lɑ̈ɑ̈m ki en.”
Aköbbii yi Yëso kinni, “Adɑ́ kedh ceth, kɑ yï göög kinøw.”
Këëmi Mɑrthɑ̀ geki Meerì yi Yëso
38 #
Jn 11.1
Yëso geki jøbɑnge ɑ́bëëd ge ceg-ɑ wel, ɑtöngi gen pɑc megø. Kɑ ge cwøøl kɑl yi ngɑndhɑjø me cwøl ɑ́ Mɑrthɑ̀. 39Mɑrthɑ̀ yïe ɑ́dɑ nyimen me cwøl ɑ́ Meerì. Meerì ɑ́pëggi buti Yëso e lïng-ɑ pwönye. 40De Mɑrthɑ̀ ɑ́bëëd e ceg-ɑ gwøg ki gïg-ɑ dwɑddi gwøgø. Kɑ kedh-ɑ ød, ɑkööbe kinni, “Pɑ nenni yi yïn Wuö, nyimïɑ yɑ ɑ́wïye gwøg bëne? Köbbí bëe o yɑ køny yi en.”
41De møge ɑ́løøg yi Wë kinni, “Mɑrthɑ̀, Mɑrthɑ̀! Pyëwí lïngø kɑ per jɑmmì mø gïïr. 42Bɑ gïjø ɑ́kyel kete ɑ pere teg. Meerì ɑ́kwɑny-ɑ gïn-ɑ lɑ̈w, o pɑ cuggi kwɑnyø kì yïe.”
Currently Selected:
Lk 10: shkDCB
Highlight
Share
Copy
Want to have your highlights saved across all your devices? Sign up or sign in
Shilluk DC Bible © Bible Society in South Sudan, 2011.
