Lk 11

Pwönyi Kwɑ̈jjø yi Yëso

(Mt 6.9-13; 7.7-11)

1Tyelø ɑ́kyel Yëso ɑ́bëëd e ókwɑ̈jjø kì keny megø. Keny-ɑ ɑ́rume, ɑpyëjii yi jɑl ɑ́kyel kì kelli jøbɑnge kinni, “Wuö, pwönyí wøn ki kwɑ̈jjø ni Jøn kɑ ɑ́pwönye jøbɑnge.”

2Aköbbi gen yi Yëso kinni, “Kenyi kwɑ̈jji wun, nyi kööb wun kinni,

‘Yïn ɑ Wïyi wøn,

wiy nyingí kwërø wør;

wiy Pödhí bëe.

3Nyi mëggí wøn gïncɑm men-ɑ dwɑddi yi wøn kì yethi cyɑ̈ng bënn.

4Dwöög lɑɑwí piny kipe orøøg wøn,

mɑ́ wøn kì ri wøn, ngɑn-ɑ nyi göggi wøn ki gïnrɑj nyii wiyø yi wøn.

Kɑ wø ko wëggí pɑ̈nyø ki kwøb mø teeg.’ ”

5Codhe, ɑköbbi gen yi Yëso kinni, “Keløg dhɑnhø ɑ́kyel kì kelli wun kedh-ɑ yï mɑ̈dhe kì dïwɑ̈r kɑ gø köbbe kinni, ‘Mɑ̈dh, wïdhí yɑn ki ópùn ɑ́dɑ̈g. 6Dɑ mɑ̈dhɑ mɑ ɑ́bï be këëmi yɑn, de yïɑ bong gïncɑm me mëggɑ en.’ 7Kɑ mɑ̈dhí ólöggø kì yiny-ɑ ød kinni, ‘Yɑ ko jud yi yïn! Dhø ød ɑ́rum ki dijø, o wø buud kɑ nyigɑ. Yɑ pɑ cuggi dhwödhi mɑl kɑ yï thödhɑ ki gïïpiny.’ 8Yɑ köbb-ɑ wun, keløg yï pɑ thödhi yi en kipe kɑ̀ bëëd yï bɑ mɑ̈dhe, yï thödhe’ thödhø kipe kɑ̀ dyëëj ki kwɑ̈jjø, e wïjí pɑ lɑ̈ɑ̈y.

9“Kɑ ɑ́rum bëëde kinøw, yɑ köbb-ɑ wun kinni, kwɑ̈jji wun, wu óthödhi. Yɑ̈ɑ̈b wun, wu óyïddi. Cwöddi wun, dhø ød óyïëbbi wun. 10Mɑ́ ngɑn-ɑ ókwɑ̈jji, óthödhi, o ngɑn-ɑ óyɑ̈bø óyïddi, o ngɑn-ɑ ócwöddi, dhø ød óyïëbbii. 11Á men ɑ nyɑre cwöddi ki rëjø kì yïe, kɑ gø mëgge thwöl ɑ́ kej rëjø? 12Wɑlɑ̀ keløg e ócwöddø ki tøng gyenø, gø mëgge’ iidh? 13Cɑgg ɑ́ kɑ̀ bëëd wun wu rijjø, wu ngɑ̈ny thödhi nyigi wun ki gïgdøj. Muuny-ɑ ómuuj yi Wïyi wun ɑ ying mɑl, óbëëd ɑ dï; keny-ɑ óöre Wëykwërø kömi tyëng-ɑ kwɑjjii!”

Yëso geki Bɑɑldhebul

(Mt 12.21-30; Mk 3.20-27)

14Tyelø ɑ́kyel, Yëso ɑ́bëëd e ryem-ɑ wëyrijjø me mïïlø. Keny-ɑ ɑ́bëën wëyɑni wɑ̈g, kɑ jɑl-ɑ́ ree ɑ́di wëyɑni okööbø cyee, mɑ́ e ɑ́bëëd e pɑ nyi kööbø. Kɑ ji ceg-ɑ ngɑ̈ngø. 15#Mt 9.34; 10.25 De kwï gen ɑ́kööb kinni, “Yëso göög-ɑ tegi Bɑɑldhebul, jɑngi wëyrijjø, gøn ɑ cyëëde wëyrijjø wɑ̈g kì ri ji.”

16 # Mt 12.38; 16.1; Mk 8.11 Ji møøgø ɑ́dwɑdd-ɑ pɑ̈nyi Yëso, ɑköbbi ge gøn kinni thödhe gïn ki ngïji me kɑ̈ɑ̈l mɑl. 17De mɑ́ rummi gen ɑ́yod yi Yëso, ɑköbbe gïn kinni, “Pödhø men-ɑ pɑ̈ngi ree ɑ́ ɑkudd, kɑ døøg-ɑ be nyɑɑg ki ree kete, pɑ nyi cwööng ki rënyø. 18Keløg ɑ́ kinøw, Cethɑn ke pɑ̈nge ree, jyɑ̈ge pɑ mɑ̈gi ki keny me bɑ̈ɑ̈r. Wu okööbø i yɑ göög-ɑ tegi Bɑɑldhebul, o bɑ en ɑ cyëddɑ wɑ̈g ki wëyrijjø. 19De keløg yɑ göög-ɑ tegi Bɑɑldhebul, o bɑ en ɑ cyëddɑ wɑ̈g ki wëyrijjø, ɑ́ tegø men-ɑ́, ɑ nyi göög yi jii wun, ɑ nyi cyëddi gen wɑ̈g ki wëyrijjø? Jii wun bɑ gen ɑ ócɑy wun. 20De keløg yɑ göög-ɑ tegi Jwøk, ɑ cyëddɑ wɑ̈g ki wëyrijjø, bene kinni Pödhi Jwøk ɑ́wɑ̈nhi yï wun.

21“Keløg nyel me teg, me yïe di tøngg mø gïïr pëgg-ɑ be kori gøle, bong gïjø me nywɑl jɑmme. 22De ke bëën ngɑn me lodii ki tegø, kɑ tyɑm yi en, tøngg-ɑ ɑ́ngɑ̈dhe okwɑnyø kì yïe yi nyel-ɑ teg, kɑ jɑmm-ɑ ɑ́kɑbe pɑ̈nge.

23 # Mk 9.40 “Ngɑn pɑ ying tungɑ bɑ ngɑn mɑ̈n ki yɑn. O ngɑn-ɑ pɑ cunggi kyeel ki yɑn ceg-ɑ kyedh.

Dwöögi Wëyrɑj

(Mt 12.43-45)

24“Kenyi bëën wëy me rɑj wɑ̈g kì ri dhɑnhø, nyi kɑ̈ll-ɑ kɑ̈jj-ɑ thwøwø, e oyɑ̈bø ki keny me ywööme ree. De kenyi jɑde, nyii kööbø kinni, ‘Yɑ døøg-ɑ øn-ɑ ɑ́wiy yi yɑn.’ 25Keny-ɑ ódwööge, kɑ ønɑni yuude e rumø’ yiejø kidøøj, o thøø yi gwirø. 26Wëyrɑj ceg-ɑ døøgø, kɑ ókɑ̈nø ki wëyrijjø ɑ́bïryew mø lodii ki rɑ̈jø. Kɑ ge kedh-ɑ ri ngɑnɑni, kɑ ge obëëdø kì ree. Ngɑnɑni ceg-ɑ yïddø ki göj me lod mi tyeli mɑl.”

Gyëdhh-ɑ Dyër

27E Yëso nudd e kwøb-ɑ møgɑni, ɑtïng ngɑndhɑjø megø cwɑgge kì kelli teedø, kɑ okööbø kinni, “Ngɑn-ɑ ɑ́kɑ̈lli yïn kì yije, ɑ thïnhe ɑ́dhødh yi yïn ree dɑ gyëdh!”

28De Yëso ɑ́yöd e ceg-ɑ kwøb kinni, “Pɑth, tyëng-ɑ ri gen di gyëdh, bɑ ji-ɑ lïngi kwøbbi Jwøk kɑ gï mïdhi gen.”

Ji Dwɑdd-ɑ Ngïji

(Mt 12.38-42)

29 # Mt 16.4; Mk 8.12 Keny-ɑ ɑ́kedh teedø ge óngënyø, ɑkööb Yëso kinni, “Rïj men, bɑ rïj me rɑj. Ge dwɑdd-ɑ lïdhø ki gïïngɑ̈ngø ɑ́ ngïji, de bong ngïji men-ɑ ónyudhi gen, den-ɑ́ ngïji Yönɑ̀. 30#Yön 3.4 Ni kɑ ɑ́bëëd Yönɑ̀ ɑ́ ngïji kipe tyëng Ninɑwɑ̀, Nyɑɑr Dhɑnhø óbëëdø ɑ ngïji kipe rïj men. 31#1 Rɑ̈nhì 10.1-10; 2 Kwøb 9.1-12 Kì Cyɑ̈ɑ̈ng Gøny, Rɑ̈ɑ̈dh Cebɑ̀ rɑ̈nh-ɑ dhɑjø, ócungi kì bøli rïj men kɑ gø cɑye, mɑ́ e ɑ́bï e kɑ̈ɑ̈l-ɑ kun lɑ̈wi be lïngi pwönyi Sølømøn kì ri peli wïj. O yɑ köbb-ɑ wun, ngɑn me dwøng kibøli Sølømøn ɑ keny èn. 32#Yön 3.5 Kì Cyɑ̈ɑ̈ng Gøny, tyëng Ninɑwɑ̀ ócungi kì bøli rïj men kɑ gø cɑy gen, mɑ́ keny-ɑ ɑ́cïïj gen yi Yönɑ̀, ge ɑ́yewi kɑ bëëdi gen wil yi gen. O yɑ köbb-ɑ wun, ngɑn me dwøng kibøli Yönɑ̀ ɑ keny èn.

Cɑɑr Dël

(Mt 5.15; 6.22-23)

33 # Mt 5.15; Mk 4.21; Lk 8.16 “Bong dhɑnhø me nyi cwiny lɑ̈mbɑ̈ kɑ gø kɑne, wɑlɑ̀ kɑ gø kume ki ɑ́tɑy, de gø nyi cïbe’ wïj tɑrɑbedhɑ̀, o cɑr lidh yi ji-ɑ bï ød. 34Nyingí bɑ cɑr kipe dëlí. Ke bëëd nyingí ge døøj, dëlí bëne óbëëd e pɑ̈ng yi cɑr. De keny-ɑ óbëëd nyingí pɑ døøj, dëlí bëne óbëëd e pɑ̈ng yi muudhø. 35De gwir wïjí kidøøj, kipe cɑr men-ɑ rií ógöögø ɑ́ muudhø. 36Keløg dëlí bëne pɑ̈ng yi cɑr, o bong keny me looj kì ree, bene keny-ɑ ómëëny ni kenyi meeny yïn yi cɑɑr lɑ̈mbɑ̈.”

Nyodhi Bɑ̈jji Jøpɑresì geki Jøpwönyi Cigg yi Yëso

(Mt 23.1-36; Mk 12.38-40)

37Keny-ɑ ɑ́rum Yëso ki kwøb, ɑryejii yi jɑl mɑ Jɑlpɑresì. Codhe, kɑ Yëso ókedhø, kɑ pëgg-ɑ tɑw. 38De Jɑlpɑresì menɑni ɑ́ngɑ̈ng keny-ɑ ɑ́lidhe Yëso e ócɑ̈gø cɑm, e cingge pɑ lwøg yi en møti. 39Aköbbii yi Wë kinni, “Wu Jøpɑresì, wu nyi lwøg-ɑ kömi óthɑ̈ggì geki löd, de yethi wun pɑ̈ng yi rummi kɑ̈b geki rumm-ɑ rijjø. 40Wu bɑ dhëgg! Jwøk ngɑn-ɑ ɑ́gwøg yiny-ɑ wɑ̈g, pɑth ki en cøn ɑ ɑ́gwøg yiny-ɑ yij thyew. 41Nyi mëggu gïn-ɑ yethi óthɑ̈ggi wun kí löddi wun tyëng-ɑ ɑbuur, codhe cyee, o wu dhïwi wun.

42 # Kwɑrr 27.30 “Wun ɑ Jøpɑresì, ri wun dɑ cyën! Mɑ́ wu nyi muuj-ɑ ɑ́kyeel pyɑ̈r kì ri nɑnɑɑ̀ kí cumɑ̈r geki jɑmm-ɑ nyi pidh kì yij bɑg bënn. De wu dhɑ̈li göggi tyëng-ɑ kyeelø ki gïndøj, kɑ mɑ̈ɑ̈dø mi Jwøk wøy yi wun. Møgɑni bene gen ɑ di gwøg yi wun, wu kedh wu ogöögø ki jɑmm-ɑ kyeelø.

43“Wu Jøpɑresì, ri wun dɑ cyën! Mɑ́ wu nyi tyer-ɑ bëëdø kì wɑ̈thi kwømm-ɑ døj kì sinɑgøgg, o wu tyer-ɑ mɑ̈dhhø yi teedø, wu owørø ki mendwøng kì dhøggi cugg. 44Ri wun dɑ cyën, mɑ́ wu nɑ rörri ji møg-ɑ wɑ̈thi gen pɑ̈ɑ̈rø ki piny, kɑ ji nyii cyɑ̈dhø kì kömi gen, ge kwïj gɑ rörr.”

45Kɑ Yëso köbbi yi ɑ́kyel kì kelli jøpwönyi Cigg kinni, “Jɑlpwönyø, kɑ̀ kwøøb møgɑni ɑnɑn, yï pɑ ceg wøn ki gwɑddø thyew!”

46Alöggi Yëso kinni, “Wun, wu jøpwönyi Cigg, ri wun dɑ cyën! Wu nyi muuj-ɑ cigg mø peeg, mø pɑ cuggi mïdhø yi ji, de men-ɑ́ wun, ri wun pɑ nyi pɑ̈nyi yi wun ki gwøg kì ri ciggɑni. 47Ri wun dɑ cyën! Kipe wu nyi ger-ɑ kenggi jøtöng møg-ɑ ɑ́ceg ki nɑ̈gø yi kweyyi wun! 48O ɑnɑn wu nyodh-ɑ kinni wu ɑ́yïëy ki gïn-ɑ ɑ́gwøg yi kweyyi wun. Jøtöng nɑ̈g yi kweyyi wun, o wu gëddu gen ki keng! 49Bene gïn-ɑ pere kööb yi men-ɑ cwøl ɑ́ Peli wïj Jwøk kinni, ‘Ge óödɑ ki jøtöng geki tyëngwödd. Kwï gen ónɑ̈g yi gen, o møg-ɑ kyeelø ógöggi yi gen ki gïnrɑj.’ 50Kì bɑng menɑni, wun, wu tyëng-ɑ nud ɑnɑn, wu bɑ møg-ɑ ócɑy kipe thøwi jøtöng møg-ɑ ɑ́nɑ̈g kër-ɑ ɑ́cɑ̈gi piny, 51#Cɑ̈gø 4.8; 2 Kwøb 24.20-21 cɑg kì ri nɑ̈gi Abel gïti ri nɑ̈gi Dhekɑriyɑ̀, jɑl-ɑ ɑ́nɑ̈g kì kɑɑm këli lɑm geki kej kwër. Ngee, yɑ köbb-ɑ wun, wu tyëng-ɑ nud kì bøli keny ɑnɑn, kinni wu bɑ møg-ɑ ócɑy ceth kipe gen bënn.

52“Ri wun dɑ cyën, wun ɑ jøpwönyi Cigg! Muptɑɑ̀ men-ɑ nyi yieeb dhø kej dïdø ɑ́kwɑny yi wun. Wun kiri wun, wu nuti kedhi yije, o tyëng-ɑ kyeelø ɑ́mɑ̈ɑ̈n yi wun kedhi yije!”

53Keny-ɑ ɑ́bëën Yëso e ókedhø kì kenyɑni, kɑ ceg ki dhingø ki pyëj yi jøpwönyi Cigg geki Jøpɑresì. Kɑ dhøge yɑb yi gen ki kwøb mø gïïr, 54ge lebb-ɑ gøn, mɑ di kööbe ki kwøb mø per gen di mɑgii.

Currently Selected:

Lk 11: shkDCB

Highlight

Copy