Lk 12

Kyeri Wëënyø

(Mt 10.26-27)

1 # Mt 16.6; Mk 8.15 Kɑ ji mø kwɑnni gen bɑ ɑ́lïp mø ngenyø ri gen cøng gen, de ge nyøn-ɑ ri gen. Acɑ̈gi Yëso ki kwøb e köbb-ɑ jøbɑnge, kinni, “Wu ko göög wu bɑ wëëny ni Jøpɑresì, wëënyø mi gen nɑ kɑmïrɑ̀. 2#Mk 4.22; Lk 8.17 Gïg-ɑ bɑ ɑkɑnn bënn ónyodh, o gïg-ɑ gonni yi teedø kì pëthi gen bɑ møg-ɑ ónyodh. 3Gïn-ɑ ɑ́kwøb yi yïn kì yij muudhø, ólïngi kì dicɑ̈ng, o gïg-ɑ ɑ́möngi yi yïn kì yiny-ɑ ød, bɑ møg-ɑ ólïngi kì wïj ød.

Ngɑn-ɑ Ceg ki Böggø

(Mt 10.28-31)

4“Yɑ köbb-ɑ wun mɑ̈dhhɑ, wu ko böggi yi ji-ɑ cuggi nɑ̈gi dël, o kì bɑng menɑni bong gïn ledh me cuggi gwøgø yi gen këti. 5Wu ónyudhɑ ngɑn-ɑ cuggi böggø. Böggu Jwøk ngɑn-ɑ yïe di tegø me cugge nɑ̈gi dhɑnhø, o yïe dɑ tegø thyew me cugge leengi dhɑnhø mɑc. Ngee, bene ngɑn-ɑ cuggi böggø yi wun ɑnɑn.

6“Winy ɑ́keej gɑ ɑ́bïj pɑ nyi ngew kɑ gïrïc ɑ́ryew yøw? Ngee, o bong ɑ́kyel kì kelli gen me wïl kì wïj Jwøk. 7De cɑgg ɑ́ yëyyi wɑ̈thi wun, kwɑnni gen ngɑ̈nyi. Wu ko böggi. Per wun teeg kibøli ɑ́kej mø gïïr!”

Yïëyø geki Bɑnyi Mesiy

(Mt 10.32-33; 12.32; 10.19-20)

8“Yɑ köbb-ɑ wun kinni, ji bënn møg-ɑ ócungi kì bøli teedø, kɑ ge okööbø kinni yɑ ɑ́yïëy yi gen; yɑn, yɑ Nyɑɑr Dhɑnhø, yɑ ókööbø kì bøli wëywöddi Jwøk kinni, jiɑni bɑ jiɑ. 9De tyëng-ɑ ócungi kì bøli teedø, kɑ ge okööbø kinni yɑ nuti yïëyø yi gen, Nyɑɑr Dhɑnhø ókööbø kì bøli wëywöddi Jwøk kinni, ge pɑth ki jie.

10 # Mt 12.32; Mk 3.29 “Ngɑn kööbø ki rɑj kì ri Nyɑɑr Dhɑnhø, ócuggø wïyi bɑ̈jje, de ngɑn kööbø ki rɑj kì ri Wëykwërø pɑ cuggi wiyø e pɑ cɑy.

11 # Mt 10.19-20; Mk 13.11; Lk 21.14-15 “Keny-ɑ ókïdhi wun be gøønyø kì sinɑgøgg, kì bøli jɑgg geki tyëng-ɑ yï gen di tegø, pëthi wun ko lïngi kipe gïn-ɑ ókwøb yi wun, wu nyɑg-ɑ ri wun. 12Mɑ́ kì bøli kenyɑni, wu ópwönyi yi Wëykwërø ki gïn-ɑ dwɑddi yi en kinni o kwøb yi wun.”

Gɑ́ji Jɑlkɑ̈r Mɑ Dhëg

13Kɑ Yëso köbbi yi jɑl megø kì kelli teedø kinni, “Jɑlpwönyø, köbbí ómïɑ o jɑmm-ɑ ɑ́wiy yi wïyi wøn keny-ɑ ɑ́thøwe, pɑ̈ngi yi en kì kɑɑm wøn.”

14De ɑ́köbbi yi Yëso kinni, “Jɑl, ɑ́ men ɑ ɑ́kööb i yɑ bɑ jɑgø men pɑ̈ggi kì kɑɑm wun?” 15Codhe, ɑköbbi teedø yi Yëso kinni, “Koru ri wun, kɑ pëthi wun ko wëggu døngø kipe kɑ̈r. Cɑgg dhɑnhø jɑmme ngenyø, pɑ nyi mɑ̈ɑ̈n thøø yi ngenyi jɑmme.”

16Codhe, ɑwɑɑj gɑ́j møg yi Yëso kinni, “Ádɑ jɑlkɑ̈r me yïe di pwödh mø døngø, møg yethi gen ócyeeg yi jɑmmì kidøøj. 17Kɑ orumø kì pyëwe kinni, ‘Yɑ ógöög ɑ dï? Bong keny yije mïdhɑ jɑmmɑ.’ 18Codhe, ɑkööbe kinni, ‘Bene gïn-ɑ ógwøgɑ èn, kɑ̈jj-ɑ mïdhɑ jɑmmɑ ócøørɑ piny, o yɑ gëëdɑ ki møg mø døngø, o yethi gen ómïdhɑ wɑ̈thi jɑmmɑ bënn. 19Codhe, o riɑ köbbɑ kinni, yïí dɑ jɑmmì mø døøj mɑ ɑ́cøng yi yïn, møg mɑ̈gi ki runn mø gïïr ge ocɑmø. Ywöm rií, kɑ yï cyɑ̈ɑ̈m, kɑ yï mɑ̈ɑ̈dh, kɑ yï bëëd pyëwí omedø!’ 20De ɑ́köbbi yi Jwøk kinni, ‘Jɑl-ɑ dhëg! Tïn kì wɑ̈r, wëyí bɑ møg kwɑny kì yïí. Dɑ́ men ɑ ókwɑny jɑmm-ɑ ɑ́cøng yi yïn kiperí?’ ”

21Kɑ Yëso okööbø kinni, “Bene en ɑnɑn, kër-ɑ óbëëd tyëng-ɑ nyi congi jɑmmì kiper gen, o ge pɑth ki tyëngkɑ̈rì kidyër kì yï Jwøk.”

Gɑ̈nnu Jwøk

(Mt 6.25-34)

22Kɑ Yëso jøbɑnge köbbe kinni, “Kì bɑng menɑni, yɑ köbb-ɑ wun kinni pëthi wun ko lïngi kipe gïncɑm men-ɑ mïdhi wun wu onëënø, wɑlɑ̀ kipe ógudh møg-ɑ dwɑddi yi wun kipe dëlli wun. 23Wëy pere teg kibøli gïncɑm, o dël pere teg kibøli ógudh. 24Lidhu winy; ge pɑ nyi pïïdhø ki byel, o bong gïn nyi kɑj yi gen, yï gen bong thebb kí óköddì, de ge ocɑɑmø yi Jwøk! O wun, per wun pɑ teeg kibøli winy! 25Á men kì kelli wun ɑ cuggi medi runne ki olïng pyëwe, cɑgg ɑ́ ki cyɑ̈ng ɑ́kyel yøw?” 26Keløg wu dhɑl-ɑ yi gwøgi nyɑ gïjø me thiinh ni menɑni, gede pëthi wun ɑ lïngi gen kipe gïg-ɑ kyeelø? 27#1 Rɑ̈nhì 10.4-7; 2 Kwøb 9.3-6 Nennu luum okøgg kenyi twïye, eni lum-ɑ pɑ nyi göögø, o pɑ nyi cwɑ̈jø ki ógudh. De yɑ köbb-ɑ wun kinni cɑgg ɑ́ Sølømøn ki kɑ̈r-ɑ ɑ́ying yïe bëne, nuti rugø ki rug me myëër ni ɑ́kyel kì kelli okøggɑni. 28Jwøk rug-ɑ luum pɑ̈l, eni lum-ɑ nud dicyɑ̈ɑ̈ng, kɑ leeng mɑc dhuki! De men-ɑ́ wun, wu óruug-ɑ dï yi Jwøk, mɑ́ per wun teeg kibøli lum? Wu tyëng-ɑ yïëyi wun nøg!

29“Wu ko nyi rïïj wu rømm-ɑ per gïn-ɑ cɑm yi wun, wɑlɑ̀ gïn-ɑ mɑdh yi wun, kɑ wu ko nyi rïïj pëthi wun olïngø. 30Ji bënn kì kömi piny tyer-ɑ yodi gïgɑni bënn, o Wïyi wun ngɑ̈ny wøw kinni gïgɑni bënn odwɑddø yi wun. 31De yɑb wun kwøbbi Pödhi Jwøk, o wu ómëgge jɑmm-ɑ kyeelø bënn møg-ɑ dwɑddi yi wun.

Kɑ̈r kì Mɑl

(Mt 6.19-21)

32“Cɑgg ɑ́ kɑ̀ bëëd wun, wu bɑ nyɑ ɑkud me thiinh ni men, wu ko böggi, mɑ́ Wïyi wun dwɑdd-ɑ mëggi wun lɑ̈gø. 33Ngeew wun jɑmmi wun wɑ̈g, kɑ tyëng-ɑ ɑbuur thödhi wun. Yɑ̈ɑ̈b wun ki pødhi ngyëny men-ɑ pɑ nyi rënyi, kɑ kɑ̈rri wun kɑɑn wun mɑl, keny-ɑ bong kurrì møg kwɑ̈dø, o bong thoth men cyɑ̈mø ki jɑmmì. 34Mɑ́ pëthi wun óying-ɑ keny-ɑ di jɑmmi wun.

Bɑ̈ng-ɑ nyi Nenni Gwøge

35 # Mt 25.1-13 “Bëëd wun ógudhi wun ying-ɑ ri wun, wu nenn-ɑ gwøøg wun ceth, kɑ wiy lɑ̈mbɑ̈ɑ̈ mø wun bëëd gen ge olyelø, 36#Mk 13.34-36 ni bɑ̈ngg møg yïd wïi gen keny-ɑ ódwööge kì kej nywöm, kipe kinni ocwödde kì dhø kɑl, o kɑl ójwɑn ki yïëbbii ceth. 37Ge óyuud ógudhi gen ying-ɑ ri gen keny-ɑ ódwöög wïi gen. O lidh yi en kinni ge nenn-ɑ bëëne. Yɑ köbb-ɑ wun kidyër kinni, wïi gen ree ólunye ki ógudhi bɑ̈ɑ̈ngø, kɑ bɑ̈ngge köbbe kinni pëggi gen tɑw, kɑ gï kɑ̈lle. 38Bɑ̈nggɑni pëthi gen óløg mø med keny-ɑ óyuud gen ge onëënø yi wïi gen, cɑgg ɑ́ kì dïwɑ̈r, wɑlɑ̀ kì bɑ̈ɑ̈rø. 39#Mt 24.43-44 Nyi pɑru møg kinni, ke di bëëd e bøli keny-ɑ bëën yi kur ngɑ̈nyi yi jɑlkɑl, kur pɑ di wëgge kedhi gøle. 40De bëëd wun wu nenn-ɑ yöö, mɑ́ Nyɑɑr Dhɑnhø óbï-ɑ bøli keny me kwïj yi wun!”

Bɑ̈ng-ɑ Døj kí Bɑ̈ng-ɑ Rɑj

(Mt 24.25-51)

41Kɑ Pïtør okööbø kinni, “Wuö, gɑ́j møg ɑ́gɑ̈jjí wøn wɑlɑ̀ ge ɑ́gɑ̈jjí teedø?”

42Kɑ Wë okööbø kinni, “Á men ɑ bɑ bɑ̈ng-ɑ døj, ɑ cuggi ngɑ̈dhø yi wɑ̈n, kɑ cinge cïbe gïgcɑmmi bɑ̈ngg-ɑ kyeelø, o gï nyi thödhe kì bøli keny-ɑ dwɑddii? 43Keny-ɑ ódwöög wïi bɑ̈ngɑni, kɑ gø yuude gwøge ógwøgø yi en kidøøj. Bɑ̈ngɑni ree dɑ gyëdh. 44Yɑ köbb-ɑ wun kidyër, jɑmme bënn cïbe’ cingi bɑ̈ngɑni. 45De keløg bɑ̈ngɑni di rum kinni, wɑ̈ɑ pɑ jwɑn dwöögø, kɑ ócɑ̈gø pöd ki bɑ̈ngg-ɑ kyeelø, mɑ̈nn ki cwøw bënn, kɑ pëgg-ɑ be cɑm kí mɑdh, kɑ nyi nɑ̈g yi møgø, 46jɑlkɑl ódwöög kì bøli keny me nuti rømmø yi bɑ̈ngɑni; gø ópɑ̈ɑ̈ye piny e ree nuti gwiir en. Kɑ ceg ki ngøllø yi wɑ̈n; ónɑ̈g yi en ni kenyi nɑ̈ɑ̈g tyëngrijjø.

47“Bɑ̈ng-ɑ ngɑ̈nyi gïn-ɑ dwɑddi yi wɑ̈n, de gø pɑ gwøge, ceg kɑ pwödø ki pwöni dwøng! 48De bɑ̈ng-ɑ kwïj gïn-ɑ dwɑddi yi wɑ̈n, kɑ ogöögø ki gïn-ɑ pere nyi cɑɑy dhɑnhø, ópwöd kɑ pwödø me nøg. Ngɑn-ɑ ɑ́thödhi ki mø ngenyø, yïe ócwøøl-ɑ mø ngenyø. O ngɑn-ɑ cinge cïbi ki mø pëddi ngenyø, yïe dwɑdd-ɑ mø pëddi ngenyø.

Yëso Ákɑ̈ɑ̈l-ɑ Dɑ̈ngø

(Mt 10.34-36)

49“Yɑ ɑ́bï-ɑ be lëngi kömi piny ki mɑc, o ce di bëëd e rum cɑ̈gø lyelø! 50#Mk 10.38 Yïɑ dɑ jwɑ̈ɑ̈gø men-ɑ ójwɑ̈ɑ̈g yɑn ki orɑng, pyëwɑ pɑ wïyi ki olïng gïti keny-ɑ órume. 51Wu orumø kinni yɑ ɑ́kɑ̈ɑ̈l-ɑ mër kömi piny? Pɑth, yɑ köbb-ɑ wun, kinni yɑ ɑ́bï-ɑ be dɑ̈ɑ̈ngii. 52Cɑg ɑnɑn gïti dhuki megø, gøl-ɑ yije di ji ɑ́bïj ceg-ɑ dɑ̈ngø, ɑ́dɑ̈g ómɑ̈ni ki ɑ́ryew, kɑ ɑ́ryew ómɑ̈nø ki ɑ́dɑ̈g. 53#Miikɑ̀ 7.6 Ri gen ópɑ̈ngi yi gen kinni, dhɑnhø ódɑ̈ɑ̈ng ki wɑ̈de kɑ wɑ̈d ódɑ̈ngø ki wïye; ngɑndhɑjø ódɑ̈ɑ̈ng ki nyɑre, kɑ nyɑndhɑjø ódɑ̈ngø ki meye; meyi jɑlø ódɑ̈ɑ̈ng ki kwɑre cï wɑ̈de, kɑ cï jɑlø ódɑ̈ngø ki wønge meyi jɑlgøle.”

Yodi Ngïjji Piny

(Mt 16.2-3)

54Codhe, ɑköbbi teedø yi Yëso kinni, “Kenyi lidhu pøøl ge obëënø kì wɑɑng cyɑ̈ng böörø, wu nyii kööbø kinni, ‘Kødh bɑ men mɑ̈gi,’ kɑ kødh nyii mɑ̈gø. 55O kenyi lidhu yømø e kɑ̈ɑ̈l-ɑ wɑɑng wurlwɑl, kɑ wu nyii kööbø kinni, ‘Piny óbëëd e lëëdh dicyɑ̈ngtïn.’ Kɑ piny nyi løg-ɑ me lëëdh. 56Wu bɑ wëëny! Ngïjji piny geki mɑl ngɑ̈nyi yi wun. De wude ɑ pɑ yod wun gïg-ɑ göögø ɑnɑn?

Tyëgu Kwøb Wuki Ngɑn-ɑ Gøøny Yïn

(Mt 5.25-26)

57“Wude ɑ pɑ yod wun gïn-ɑ bɑ dyër. 58Keløg yï peej-ɑ burø yi ngɑn gøøny yïn, pɑ̈nyí rií ki kwɑjjii, o kwøbbɑni wiy wu nuti wɑ̈dhi burø. De keløg rií pɑ pɑ̈nyi yi yïn, yï kïdh-ɑ bøli jɑgø yi ngɑn-ɑ gøøny yïn, o jɑgø yï ómëgge bölidh, kɑ yï leeng ød mɑg yi bölidh. 59Yɑ köbb-ɑ yïn, yï pɑ wɑ̈nhi wɑ̈g kì kenyɑni gïti keny-ɑ ócool kwör-ɑ kömí.”

Currently Selected:

Lk 12: shkDCB

Highlight

Copy