Lk 13
13
Wiy Wun Orøg kipe Wu Óthøw
1Kì bøli kenyɑni, ɑ ɑ́köbbi Yëso yi ji møøgø i dɑ ji møg-ɑ ónɑ̈gø yi Pilɑtø kì Gɑlelì ge mɑll-ɑ Jwøk. Remmi tyëngɑni ɑ́rebe ki remmi lɑ̈yy-ɑ ɑ́ngɑ̈lli Jwøk yi gen gɑ gëdhhì. 2Alöggi Yëso kinni, “Wu orumø kinni gïnɑni ɑ́pɑ̈dhi kömi gen kɑ per kɑ̀ bëëd ge lod-ɑ tyëng Gɑlelì bënn ki orøg? 3Pɑth, yɑ köbb-ɑ wun cyee kinni, keløg wu pɑ wïyi ki orøg, kɑ pëthi wun wil yi wun geki bëëdi wun, wu bɑ møg thøw ni gen! 4O ji-ɑ ɑ́thøw gɑ ɑ́bïdɑ̈g keny-ɑ ɑ́pɑ̈dhi ønbɑ̈r kömi gen kì Silwɑm ø? Wu orumø kinni gïnɑni ɑ́pɑ̈dhi kömi gen kɑ per kɑ̀ bëëd ge lod-ɑ tyëng Yerusɑlem ki orøg? 5Pɑth, yɑ köbb-ɑ wun cyee kinni, keløg wu pɑ wïyi ki orøg, kɑ pëthi wun geki bëëdi wun wil yi wun, wu bɑ møg thøw thyew!”
Gɑ́ji Ólɑm-ɑ Pɑ nyi Nywøl
6Awɑɑj gɑ́j møg yi Yëso kinni, “Jɑl megø yïe ɑ́dɑ ólɑm kì yij bɑge. Kɑ kedh-ɑ be yɑ̈bbø ki nywøl kö ólɑmɑni, de bong mɑ ɑ́yode. 7Codhe, kɑ nyel-ɑ göögø kì bɑg köbbi yi jɑlɑni kinni, ‘Yɑ nyi yɑ̈mm-ɑ kö yɑɑnh ki nywøl, o yɑ pɑ nyi yïddi kì kööre ki nywøl. Ágöög ɑnɑn ki runn ɑ́dɑ̈g. Ngøl piny. Á kipe ngø ɑ nyïɑ̈ge bɑg?’ 8De bɑ̈ngɑni ɑ́löggi kinni, ‘Wuö, wiy yɑnhɑni ki run ɑ́kyel men-ɑ ónywøle. Wiy tyele kony yi yɑn o kïdhɑ ki nor. 9Keløg e ónywøl run-ɑ bï, døøj. De keløg e pɑ nywøl, ócuggø ngøl piny yi yïn.’ ”
Yieli Ngɑndhɑjø Me Köme Ree Dool En yi Yëso kì Cyɑ̈ɑ̈ng Sɑbɑth
10Yëso ɑ́bëëd e ópwönyø kì sinɑgøg kì cyɑ̈ɑ̈ng Sɑbɑth. 11Kenyɑni ɑ́dɑ ngɑndhɑjø me ree di wëy me rɑj, me dool köme, o yïe dɑ runn pyɑ̈rø wïdɑ́bïdɑ̈g e köme ree dool en. Nyi cyɑ̈dhi e köme kuul en piny, pɑ cuggi cung e kööre tïng en. 12Keny-ɑ ɑ́lidhii yi Yëso, ɑcwøle gøn, kɑ gø köbbe kinni, “Ngɑn, yï ɑ́pɑ̈d kì ri gïn-ɑ rií.” 13Kɑ Yëso cingge thɑɑnye kömi ngɑnɑni, kɑ köme tyenye kì bøli kenyɑni ceth, kɑ ócungø ree tyeeny en, kɑ ócɑ̈gø lejji Jwøk.
14 #
Kedhø 20.9-10; Jølø 5.13-14 Kɑ jɑngi sinɑgøg mɑg yi liny kipe kɑ ɑ́yïëëd Yëso kì cyɑ̈ɑ̈ng Sɑbɑth. Aköbbe ji kinni, “Dɑ cyɑ̈ng ɑ́bïkyel møg-ɑ yethi gen nyi göög yi ji, nyi bï wun be yielø ki rɑ̈ɑ̈m dëlli wun kì yethi cyɑ̈nggɑni, de wu ko nyi bï be yielø ki rɑ̈ɑ̈m dëllì kì cyɑ̈ɑ̈ng Sɑbɑth.”
15Alöggi Wë kinni, “Wu bɑ wëëny! Dhögi wun pɑ nyi gøny yi wun kɑ ge køøl wun be mɑ̈dhø ki pï, cɑgg ɑ́ kì cyɑ̈ɑ̈ng Sɑbɑth? 16Ngɑndhɑjø men-ɑ ɑ́yiel yi yɑn ki köme, bɑ nyɑɑr Abrɑhɑm, ɑ́bëëd ɑ́ ɑmɑg yi Cethɑn ki runn pyɑ̈rø wïdɑ́bïdɑ̈g. Pɑ cuggi pɑ̈dø kì yethi töjjɑni cɑgg ɑ́ kì cyɑ̈ɑ̈ng Sɑbɑth!” 17Keny-ɑ ɑ́kwøbe møgɑni kɑ tyëng-ɑ ɑ́cɑyyii wɑ̈thi gen ólɑ̈ɑ̈yø, de teen-ɑ ɑ́ying kenyɑni bëne pyëwe ɑ́mïni yi gïgdøj møg-ɑ ɑ́gwøg yi Yëso bënn.
Gɑ́ji Köödhi Kɑrdɑl
(Mt 13.31-32; Mk 4.30-32)
18Codhe, ɑkööb Yëso kinni, “Pödhi Jwøk nɑ ngø? Pɑ̈ɑ̈r yi yɑn kɑ ngø? 19Nɑ nyɑ wɑɑng köödhi kɑrdɑl men pidh yi dhɑnhø kì yij bɑge. Kɑ köönhɑni otwïyø, kɑ ogöögø ki yɑdh, kɑ winy ogëdø ki uddi gen kì bɑ̈dde.”
Gɑ́ji Kɑmïrɑ̀
(Mt 13.33)
20Kɑ Yëso okööbø këti kinni, “Pödhi Jwøk ópɑ̈ɑ̈r yi yɑn kɑ ngø? 21Pɑ̈r kɑ kɑmïrɑ̀ men kwɑny yi ngɑndhɑjø, kɑ gø nyööme ɑwɑj mɑ rummì ɑ́dɑ̈g, kɑ okwödø bëne yi kɑmïrɑni.”
Dhøng-ɑ Dhing
(Mt 7.13-14, 21-23)
22Yëso ɑ́kedh e kɑ̈ll-ɑ köthi myërr e ópwönyø, e kedh-ɑ Yerusɑlem. 23Kɑ Yëso köbbi yi jɑl megø kinni, “Wuö, bɑ ji mø nøg ɑ óyiel keti gen?”
Alöggi Yëso kinni, 24“Pɑ̈nyu ri wun ki kɑ̈li dhøng-ɑ dhing, mɑ́ ji mø gïïr ri gen ópɑ̈nyi yi gen ki kɑ̈li kenyɑni, de ge koo cuggi. 25Keny-ɑ ódhwödh ngɑn-ɑ yïe di kɑl, kɑ kɑl cyëge, kɑ wu ócungø kì dhø kɑl kì wɑ̈g, wu ócwöddø kinni, ‘Wuö, yïëbbí wøn kɑl!’ Ólöggi kinni, ‘Wu kwïj yi yɑn, wu kɑ̈ɑ̈l-ɑ keny.’ 26Wu ókööbø kinni, ‘Wø ɑ́cyɑ̈ɑ̈m kɑ wø omɑ̈dhø kì kej ɑ́kyel ki yïn, kɑ yï ópwönyø kì pɑɑ wøn.’ 27#Wör 6.8 Wu óyöd wu oköbbø yi en kinni, ‘Wu kwïj yi yɑn, o keny-ɑ kɑ̈ɑ̈l yi wun kwïjɑ thyew. Kedh wun kì butɑ, wu tyëng-ɑ gøggi rɑj!’ 28#Mt 22.13; 25.30 Wu óywöngi kɑ lweddi wun kɑ̈ɑ̈j wun yi ledhi dhø keny-ɑ ónenni wun Abrɑhɑm, kí Isɑɑk, kí Yɑgob, geki jøtöng bënn kì Pödhi Jwøk, de wun kì ri wun, wu óleeng wɑ̈g. #Mt 8.11-12 29Ji óbï ge kɑ̈ɑ̈l-ɑ wɑɑng cyɑ̈ɑ̈ng mwøl, møøgø óbï ge kɑ̈ɑ̈l-ɑ wɑɑng cyɑ̈ɑ̈ng böörø, møøgø óbï ge kɑ̈ɑ̈l-ɑ wɑɑng wuudø, o møøgø kɑ̈ɑ̈l-ɑ wɑɑng wurlwɑl kɑ ge pëgg-ɑ piny kì tɑw kì Pödhi Jwøk. 30#Mt 19.30; 20.16; Mk 10.31 Dɑ ji møøgø mø ying cyɑ̈n ɑnɑn, ge ókedhi mɑl, o dɑ møøgø mø ying mɑl, ge ódwøøg cyɑ̈n.”
Mɑɑr-ɑ Mɑɑr Yerusɑlem yi Yëso
(Mt 23.37-39)
31Kì bøli kenyɑni, ɑ ɑ́bëën kwï Jøpɑresì yï Yëso kɑ ge okööbø kinni, “Kedh kì keny! Ërödøs dwɑdd-ɑ nɑ̈gi yïn!”
32Aköbbi gen yi Yëso kinni, “Kedh wun, köbbu ógwøngɑni kinni, ‘Dicyɑ̈ɑ̈ng kí dhuki, yɑ cyëëd-ɑ wëyrijjø wɑ̈g kì ri ji, o yɑ oyïëdø ki ji-ɑ dëlli gen rɑ̈mø. O gwøgɑ ótyëg yi yɑn kì ri dɑ̈ɑ̈g cyɑ̈ng.’ 33Cɑgg ɑ́ kinøw ceth, yɑ di dwɑddø o yɑ cyɑ̈dhɑ ki yuuɑ dicyɑ̈ɑ̈ng, kí dhuki kí cyɑ̈ng-ɑ kyeelø. Pɑth ki dyër kinni jɑltöng ócuggø nɑ̈gø kì keny megø e pɑth ki Yerusɑlem.
34“Yerusɑlem, Yerusɑlem! Yï nyi nɑ̈g-ɑ jøtöng, kɑ ji-ɑ ɑ́ör yïí nɑ̈ɑ̈g ge bɑ̈llí bɑ̈llø ki tuggi kïttì. Riɑ ɑ́pɑ̈nyɑ tyel mø gïïr ki congi jií, ni gyenø kenyi cønge nyige thɑ́ obërre, de møgɑni nuti dwɑddø yi wun! 35#Wör 118.26; Jer 22.5 Kengí ówiy piny. Yɑ köbb-ɑ wun kinni, yɑ pɑ lidh yi wun gïti bøli keny-ɑ ókööb wun kinni, ‘Ngɑn-ɑ bï ki nyingi Wë, bɑ ɑgyëdh.’ ”
Currently Selected:
Lk 13: shkDCB
Highlight
Share
Copy
Want to have your highlights saved across all your devices? Sign up or sign in
Shilluk DC Bible © Bible Society in South Sudan, 2011.
