Lk 4

Pɑ̈nyi Yëso

(Mt 4.1-11; Mk 1.12-13)

1Yëso ɑ́dwöög kì kömi Nɑm Urdun e pɑ̈ngø yi Wëykwërø. Cem e døøg-ɑ pɑɑ gen, ɑpeejii pɑ̈l yi Wëykwërø, 2kun-ɑ ɑ́pɑ̈nyii ki thɑbø yi Cethɑn, ki cyɑ̈ng pyɑ̈r ɑ́ngwen e ying-ɑ yij pɑ̈l. Keny-ɑ ɑ́thumi cyɑ̈nggɑni, ɑmɑgii yi kɑ̈j.

3Kɑ Yëso köbbi yi Cethɑn kinni, “Keløg yï bɑ Wɑ̈d Jwøk, köbbí tungi kït men o ree løge ópun.”

4 # Jølø 8.3 Alöggi Yëso kinni, “Bɑ ɑgwed kì yethi wɑ̈jji kwërø kinni, ‘Pɑth ki gïncɑm kete ɑ ree bëëd yi dhɑnhø.’ ”

5Codhe, ɑkɑ̈ɑ̈l Yëso yi Cethɑn kɑ gø nyudhe pödhhi kömi piny bënn ki nyɑ keny me thiinh. 6Aköbbi Yëso yi Cethɑn kinni, “Yï ómëggɑ pödhhɑni bënn, ki tegi gen geki dhwɑ̈ɑ̈ng gen. Ge ɑ́rum ki mëggi yɑn, o ge ócuggø muujø yi yɑn, ge mëggɑ’ ngɑn-ɑ dwɑddi yi yɑn. 7Keløg yɑ omɑlø yi yïn, ge ceg-ɑ gwøg gɑ møgí.”

8 # Jølø 6.13 Kɑ Yëso ólöggø kinni, “Bɑ ɑgwed kinni, ‘Mɑllí Wöw Jwøgí, kɑ göggí e kete kete.’ ”

9Codhe, kɑ Yëso kïdhi Yerusɑlem yi Cethɑn, kɑ gø cïbe oledh Kengø. Aköbbe Yëso kinni, “Keløg yï bɑ Wɑ̈d Jwøk, leeng rií piny kì keny. 10#Wör 91.11 Mɑ́ e bɑ ɑgwed kì yij wɑ̈nyi kwërø kinni, ‘Wëywödde óköbbe, o yï kor yi gen.’ 11#Wör 91.12 Bɑ ɑgwed thyew kinni, ‘Yï ókwɑg yi gen kì yethi cinggi gen, o tyelí cöge e pɑ pög yi tuggi kïttì.’ ”

12 # Jølø 6.16 Alöggi Yëso kinni “De bɑ ɑgwed thyew kinni, ‘Wöw, Jwøgí ko pɑ̈nyí ki rɑngø.’ ”

13Keny-ɑ ɑ́rum Cethɑn ki pɑ̈nyi Yëso ki yëëth bënn, ɑkɑle gøn ki wiyø.

Cɑ̈gi Yëso ki Gwøge kì Gɑlelì

(Mt 4.12-17; Mk 1.14-15)

14Kɑ Yëso døøg-ɑ Gɑlelì e pyejj-ɑ yi Wëykwërø. Kɑ møg-ɑ kømmi kì ree tɑɑy-ɑ yethi myërrɑni bënn. 15Kɑ ócɑ̈gø pwönyø kì yethi sinɑgøgg kì myërrɑni, kɑ pøjji yi dhɑnhø bëne.

Bɑnyi Yëso kì Nɑdhɑreth

(Mt 13.53-58; Mk 6.1-6)

16Kɑ Yëso kedh-ɑ Nɑdhɑreth kun-ɑ ɑ́pïïdhe. Kɑ kedh-ɑ sinɑgøg kì cyɑ̈ɑ̈ng Sɑbɑth, ni kenyi kedhe ceth, kɑ dhwödh-ɑ mɑl be rɑng. 17Kɑ mëggi wɑ̈nyi Icɑyɑ̀ jɑltöng, ɑyiebe wɑ̈nyø, kɑ yod-ɑ keny-ɑ ógwedø kinni,

18 # Icɑ 61.1-2 (LXX) “Jwøng-ɑ Ácwɑ̈ɑ̈j, Wëye ɑ́cïbe riɑ,

mɑ́ yɑ ɑ́kwɑny yi en, o yɑ köbb-ɑ Wöndøj tyëng-ɑ ɑbuur.

Yɑ ɑ́ör yi en, o yɑ köbb-ɑ tyëng-ɑ ɑmɑgg kinni, ge ɑ́gøny,

o cörr köbbɑ kinni, ge ócuggø nënnø.

o yɑ kønyɑ tyëng-ɑ nyingi gen guud,

19o yɑ kwøbɑ kinni ɑ́wɑ̈nhi,

eni bøli keny-ɑ óyiel Wë jie.”

20Yëso keny-ɑ ɑ́rume rɑng, ɑbɑne wɑ̈nyø, kɑ gø dögge jɑl-ɑ göögø kì sinɑgøg, ɑpëgge piny kì bøli teedø. Kɑ dhɑnhø bëne nyinge tööd-ɑ ri Yëso. 21Codhe ɑcɑ̈ge köbbi gen kinni, “Møg-ɑ ɑ́lïngi yi wun ɑnɑn, ɑ́pɑ̈dhi kɑ̈jji gen dicyɑ̈ngtïn!”

22Kɑ Yëso lenhi yi dhɑnhø bëne. Ge ɑ́ngɑ̈ng yi lögg-ɑ døj møg-ɑ kɑ̈ɑ̈l dhøge, kɑ ge okööbø kinni, “Nyel cøn, pɑth ki wɑ̈d Yosep?”

23Aköbbi gen yi Yëso kinni, “Ngɑ̈nyi yi yɑn, wu dwɑdd-ɑ köbbi yɑn gɑ́j-ɑ nyi kømmi kinni, ‘Akïm, yiel rií,’ wu dwɑdd-ɑ kwøb kinni, ‘Wø ɑ́lïng ki gïg-ɑ ɑ́gøggi yi yïn kì Kɑpernɑum! Gwøg gïgɑni kì pɑɑ wun keny!’ ” 24#Jn 4.44 Kɑ Yëso okööbø kinni, “Yɑ köbb-ɑ wun kidyër, jɑltöng pɑ nyi yïëy kì pɑn-ɑ ɑ́nywøølii.

25 # 1 Rɑ̈nhì 17.1 “De yɑ köbb-ɑ wun kidyër kinni, ɑ́dɑ thwömm mø gïïr kì Isrɑil kì bøli keny-ɑ ɑ́nud Eliyɑ̀. Kødh nuti mɑ̈gø kì Isrɑil ki runn ɑ́dɑ̈g kí dwɑ̈tt ɑ́bïkyel, o kɑ̈j ɑ́bëëd e teeg kì yij pödhø bëne. 26#1 Rɑ̈nhì 17.8-16 De Eliyɑ̀ nuti ör yï thwöm ɑ́kyel kì kelli thwömmi Isrɑil. De ɑ́ör-ɑ yï thwöm me bëëdø kì Dhɑrepɑth kì myërri Sïdön. 27#2 Rɑ̈nhì 5.1-14 O ɑ́dɑ ji mø gïïr kì bøli keny-ɑ ɑ́nud Elicɑ̀ jɑltöng, mø ri gen di wɑɑny kì Isrɑil. De bong dhɑnhø ɑ́kyel mɑ ɑ́yiel yi Elicɑ̀ kì kelli gen, den-ɑ́ Nɑɑmɑn, jɑl-ɑ ɑ́bï e kɑ̈ɑ̈l-ɑ Suriyɑ̀, ɑ ɑ́yiel kete.”

28Keny-ɑ ɑ́lïngi møgɑni yi teedø bëne kì sinɑgøg, kɑ ge ceg ki mɑgø yi liny. 29Kɑ ge dhwödh-ɑ mɑl, kɑ Yëso ywɑɑj gen wɑ̈g kì kɑɑl, kɑ gø kïdhi gen wïj tøg kïn-ɑ köme ógeer kɑɑlɑni. Ge ɑ́dwɑdd-ɑ leengii piny kì wïj tøg kït. 30De Yëso ree ɑ́bodhe kɑ kɑ̈l-ɑ kelli gen, kɑ ókedhø kì wɑ̈ye.

Jɑl Me Ree Di Wëy Me Rɑj

(Mk 1.21-28)

31Kɑ Yëso kedh-ɑ Kɑpernɑum, kɑ ji pwönye kì cyɑ̈ɑ̈ng Sɑbɑth. 32#Mt 7.28-29 Ji ɑ́ngɑ̈ng yi pwönye, mɑ́ kwøbbe nënni ge teg. 33Ádɑ jɑl me ree di wëy me rɑj kì sinɑgøg, kɑ jɑlɑni óryeerø ki cwɑg mø døngø kinni, 34“Yëso jɑl Nɑdhɑreth! Yïde ki wøn? Yï ɑ́bï-ɑ be rënyi wøn? Ngɑ̈nyi yi yɑn kinni yïn ɑ́ men, yï bɑ ngeti kwërø, men-ɑ ɑ́ör yi Jwøk.”

35Aköbbi wëyɑni yi Yëso kinni, “Kud, kɑ yï bïí wɑ̈g kì ree!” Kɑ jɑlɑni leeng piny yi wëyɑni kì bøli ji bënn. Codhe, kɑ jɑlɑni wiye e bong gïnrɑj mɑ ɑ́gögge gøn.

36Kɑ ji ongɑ̈ngø de ge pyëny-ɑ ri gen kinni, “Á kwøbbi ngø ɑ bëëdø’ ni? Acire wëyrijjø kinni bï gen wɑ̈g, kɑ dhøge lïngi yi gen!” 37Kɑ per Yëso wɑ̈dh-ɑ yethi myërrɑni bënn.

Yieli Ji Mø Gïïr yi Yëso

(Mt 8.14-17; Mk 1.29-34)

38Kɑ Yëso odhwödhø kì sinɑgøg, kɑ kedh-ɑ gøl Sɑymøn. Øri Sɑymøn, meyi cyëge, ɑ́bëëd ree dɑ lëdhi dël, kɑ Yëso kwɑjji yi gen kinni kønye gøn. 39Akedhe buti ngɑnɑni, kɑ lëdhi dël menɑni cïïre wɑ̈g kì ree. Kɑ dële ókwöjø, ɑdhwödhe mɑl kì bøli kenyɑni ceth, kɑ kedh-ɑ be kɑ̈lli gen.

40Keny-ɑ ɑ́kedhi cɑ̈ng piny, kɑ tyëng-ɑ buud muuj Yëso yi wɑddi gen. Kɑ gï yiele ki rɑ̈ɑ̈m dëlli gen bënn, e nyi cïb-ɑ cingge kömi ngɑn-ɑ buud. 41Wëyrijjø ɑ́bï wɑ̈g ge okïïwø kinni, “Yï bɑ Wɑ̈d Jwøk.”

De Yëso wëyɑni ɑ́kyëdde kɑ gï mɑ̈ɑ̈ne kwøb, kipe kɑ ɑ́yod ge gøn kinni Yëso bene Mesiy.

Pwönyi Yëso kì Yethi Sinɑgøgg

(Mk 1.35-39)

42Kɑ Yëso odhwödhø kì mwøl kì ri tɑ̈ri piny ceth, kɑ kedh-ɑ kun bëëde kì wɑ̈ye, de ɑ́yɑb yi ji, kɑ yod yi gen, kɑ gø mɑ̈ɑ̈n gen kedhø. 43De ge ɑ́köbbi yi Yëso kinni, “Di dwɑddø kinni o yɑ pwönyɑ kwøbbi Jwøk kì yethi kɑ̈dd-ɑ kyeelø thyew, bene gïn-ɑ́ pere ɑ́ör yɑn.”

44Codhe, ɑwïïne e ópwönyø kì yethi sinɑgøgg kì myërri Yeud bënn.

Currently Selected:

Lk 4: shkDCB

Highlight

Copy