Маттэ 20
20
ЯТӀОКӀЭНЭРЭШЪХЬ
СэнэшъхьэшӀхэм яхьылӀэгъэ гъэсэпэтхыдэр
1– Тхьэу уашъом щыӀэм и Тетыгъошхо зыфэдэр мары. Сэнэшъхьэ хатэ зиӀэ горэ пчэдыжьым жьэу лэжьакӀохэр сэнэшъхьэ хатэм щигъэлэжьэнхэм пае ахэмэ алъыхъунэу дэкӀыгъ. 2ЛэжьакӀохэр къызегъотхэм, адэгущыӀи, мафэм динар зырыз аритынэу зэгурыӀохи, Ӏоф ашӀэнэу исэнэшъхьэ хатэ ыгъэкӀуагъэх.
3– Пчэдыжьым сыхьатыр бгъум#20:3 пчэдыжьым сыхьатыр бгъум дэжь – зытырахыгъэ алыджыбзэм зэритыр «ящэнэрэ сыхьат». Ащ къикӀырэр пчэдыжьым сыхьатыр бгъур ары. сэнэшъхьэ хатэр зыер дэкӀи, ахэмэ анэмыкӀхэу Ӏоф зимыӀэ лӀыхэр бэдзэрым дэжь Ӏутхэу ылъэгъугъэх. 4Ахэмэ моущтэу ариӀуагъ: «Шъори сисэнэшъхьэ хатэ шъукӀу, къышъутефэрэр шъостын». Ахэри кӀуагъэх.
5– Щэджагъом дэжьи#20:5 щэджагъом дэжь – зытырахыгъэ алыджыбзэм зэритыр «яхэнэрэ сыхьат». Ащ къикӀырэр щэджагъор ары., сыхьатыр щым дэжьи#20:5 сыхьатыр щым дэжь – зытырахыгъэ алыджыбзэм зэритыр «ябгъонэрэ сыхьат». Ащ къикӀырэр щэджэгъоужым сыхьатыр щыр ары., сэнэшъхьэ хатэр зыер джыри дэкӀи, ыпэрэм фэдэуи ышӀыгъ. 6ЫкӀэм ыкӀэжьым сыхьатыр тфым дэжьи#20:6 сыхьатыр тфым дэжь – зытырахыгъэ алыджыбзэм зэритыр «япшӀыкӀузэнэрэ сыхьат». Ащ къикӀырэр щэджэгъоужым сыхьатыр тфыр ары. дэкӀи, нэмыкӀхэри щытхэу зегъотхэм, ариӀуагъ: «Мэфэ реным зи шъумышӀэу, мыщ дэжьым сыда шъузкӀыщытыр?»
7– Адрэмэ къыраӀожьыгъ: «Ӏоф тэзгъэшӀэн дгъотыгъэп».
– Аущтэу къызаӀом, сэнэшъхьэ хатэр зыем ариӀожьыгъ: «Шъори шъукӀуи, сисэнэшъхьэ хатэ шъущылажь. Къышъутефэрэр къышъостын».
8– Пчыхьэ къызэхъум, сэнэшъхьэ хатэр зыем лэжьакӀохэм япащэ риӀуагъ: «ЛэжьакӀохэм къяджи, ауж къэкӀуагъэхэмкӀэ къэубли, апэрэхэм анэсэу мэфапкӀэр ят».
9– Сыхьатыр тфым Ӏофыр зыублагъэхэр къызэкӀохэм, лэжьакӀомэ япащэ динар зырыз аритыгъ. 10ЕтӀанэ Ӏофыр апэу зыублагъэхэр къызэкӀохэм, нахьыбэ аритынэу гугъагъэх, ау ахэми динар зырыз аритыгъ. 11Ахъщэр заштэм, сэнэшъхьэ хатэр зыем етхьаусхылӀагъэх. 12«Тэ мэфэ реным фэбэ Ӏаем тыхэтэу, къин тщэчызэ Ӏоф тшӀагъэ пэтми, мы лӀыхэу ауж къэкӀуагъэхэу, зы сыхьат нахь Ӏоф зымышӀагъэмэ тафэбгъэдагъ».
13– Ау сэнэшъхьэ хатэр зыем ахэмэ ащыщэу зыгорэм риӀуагъ: «Синыбджэгъу. Мыхъун зи къыуасшӀэрэп. Зы динарба тызэрэзэгурыӀуагъэр? 14УимэфапкӀэ шти, кӀожь. Мы лӀэу ауж къэкӀуагъэми о остыгъэм фэдиз естынэу сыфай. 15Сэ сызыфаер сиахъщэ есшӀэн сыфитба? Хьауми о ошъугъуа, сэ сыгу шӀугъэ зэрилъым пае?»
16– Джаущтэу ауж итхэр апэ хъущтых, апэ итхэри ауж къинэщтых; сыда пӀомэ, къеблэгъагъэр бэ, ау хэхыгъэхэр макӀэх, – къыпигъэхъожьыгъ Исус етӀанэ.
Ежь зэраукӀыщтри лӀагъэхэм къызэрахэтэджыкӀыжьыщтри ящэнэрэу Исус къызэриӀуагъэр
(Марк 10:32-34; Лука 18:31-34)
17ЕтӀанэ Исус ЕрусалимкӀэ дэкӀуаеу, гъогум зытетым, игъогу рыкӀорэ нэбгырэ пшӀыкӀутӀур лъэныкъокӀэ Ӏуищыхи, ариӀуагъ:
18– Мары тэ джы ЕрусалимкӀэ тыдэкӀуае. Ащ ЦӀыф Лъэпкъым ы Къо дин пэщэшхохэмрэ Тэурат егъэджэкӀо пащэхэмрэ щаӀэкӀэхьащт. Ахэмэ ежь укӀ къытыралъхьащт, 19къыкӀэнэкӀэнхэуи, къамыщкӀэ къеонхэуи, къащым тыраӀулӀэнэуи хымэ лъэпкъхэм#20:19 хымэ лъэпкъхэр – рим цӀыфхэу тетыгъо зиӀэхэр ары аӀэкӀалъхьащт; ящэнэрэ мафэми ежь лӀагъэхэм къахэтэджыкӀыжьыщт.
Зебедей ыкъохэм янэ Исус зыкӀелъэӀугъэ Ӏофыр
(Марк 10:35-45)
20Джащыгъум Зебедей ыкъохэм#20:20 Зебедей ыкъохэр – апостолхэу Якъубэрэ Иуанрэ ары. Еплъ Марк 10:35. янэ, ыкъохэри игъусэхэу, Исус къыбгъодахьи, лъэгонджэмышъхьэкӀэ ыпашъхьэ итӀысхьи, зыгорэкӀэ къелъэӀунэу зыфигъэзагъ.
21– Сыда узыфаер? – къыриӀуагъ Исус бзылъфыгъэм.
– О уитетыгъошхо къызысыкӀэ, мы скъуитӀу зыр уиджабгъукӀэ адрэр уисэмэгубгъукӀэ къэтӀысынхэу фит шӀы, – къыриӀожьыгъ бзылъфыгъэм.
22– Шъо шъузыкӀэлъэӀурэр шъушӀэрэп, – къыӀожьыгъ Исус. – Къиным ишъуалъэ итэу сэ сызэшъощтым шъо шъуешъон шъулъэкӀыщта, хьауми цӀыфхэм Ӏаеу сызэраумэхъыщт шӀыкӀэм фэдэу, зяжъугъэумэхъын шъулъэкӀыщта?
– ТлъэкӀыщт, – къыраӀожьыгъ ахэмэ.
23– Сэ сызэшъощт къиным ишъуалъэ итым шъори шъуешъощт, – ариӀуагъ Исус. – ЦӀыфхэм сэ Ӏаеу сызэраумэхъыщт шӀыкӀэм фэдэу, шъори шъуаумэхъыщт. Ау сэ сиджабгъукӀи сисэмэгубгъукӀи шъукъэтӀысынэу фит шъусшӀын слъэкӀыщтэп. А тӀысыпӀэхэр ся Тэ зыфигъэхьазырыгъэ цӀыфхэм яй.
24Адрэ нэбгырипшӀэу Исус игъогу рыкӀохэрэм ар зызэхахым, зэшитӀумэ афэгубжыгъэх. 25Ау Исус игъогу рыкӀохэрэм къяджагъ.
– Шъо шъошӀэ, – ариӀуагъ Исус, – мы дунаим тет пщыхэр цӀыфхэм апшъэ зэрэдэсхэрэр, тхьэматэхэу цӀыфхэм тетыгъо зэрафыряӀэрэри шъошӀэ. 26Ау шъо шъузэрэзэфыщытын фаер арэп. Шъуащыщэу ин хъу зышӀоигъор Ӏофтабгэ къышъуфэхъун фае. 27Шъуащыщэу апэ итыныр зышӀоигъори пщылӀ къышъуфэхъун фае. 28Ащ фэдэу ЦӀыф Лъэпкъым ы Къо цӀыфхэм яшӀуагъэ ежь зэригъэкӀыжьыныр арэп къызфэкӀуагъэр, ежь ишӀуагъэ цӀыфхэм аригъэкӀыныр, цӀыфыбэхэми апае ыпсэ шъхьэщэфыжьэу ытыныр ары нахь.
Исус лӀы нэшъуитӀур зэригъэхъужьыгъэр
(Марк 10:46-52; Лука 18:35-42)
29Ащ нэуж Исусрэ игъогу рыкӀохэрэмрэ къалэу Ерихон#20:29 къалэу Ерихон – Ерусалим итемыр тыгъэ къокӀыпӀэ лъэныкъомкӀэ, километрэ 24-кӀэ пэчыжьэу, Иордан псыхъом итыгъэ къохьэпӀэ лъэныкъомкӀэ ит. къыдэкӀыжьхэ зэхъум, цӀыф купышхо ауж итхэу кӀощтыгъэх. 30А чӀыпӀэм лӀы нэшъуитӀу гъогу напцэм Ӏусыгъ. Ахэмэ Исус зэрэблэкӀырэр зызэхахым, мэкъэшхокӀэ къаджэхэу къаублагъ:
– Тхьэматэу Даутэ ы Къу, гукӀэгъу къытфэшӀ!
31Ау цӀыф купышхом хэтхэм амыдэу, «Щыжъугъэт!» араӀуагъ, ауми лӀы нэшъуитӀур джыри нахь мэкъэшхокӀэ къэджагъ:
– Тхьэматэу Даутэ ы Къу, гукӀэгъу къытфэшӀ!
32Исус къызэтеуцуи, къяджи, ариӀуагъ:
– Сыда шъуфэсшӀэнэу шъузыфаер?
33– Тхьэматэ, тынэхэр къэгъэплъэжь, – къыраӀожьыгъ ахэмэ.
34Исус ыгу ахэмэ ягъуи, анэхэм атеӀэбагъ. Ардэдэми ахэмэ анэхэр къэплъэжьыгъэх, Исуси ыуж ихьагъэх.
Currently Selected:
Маттэ 20: AdgNT14
Highlight
Share
Copy
Want to have your highlights saved across all your devices? Sign up or sign in
© Институт перевода Библии, 1991, 1992, 2014. Стокгольм
