Маттэ 21

ЯТӀОКӀЫРЭ ЗЫНЭРЭШЪХЬ

Щытхъушхо иӀэу Исус Ерусалим зэрэдэхьагъэр

(Марк 11:1-11; Лука 19:28-38; Иуан 12:12-19)

1Исусрэ игъогу рыкӀохэрэмрэ Ерусалим игъунэгъу хъугъэх. Елеон зыцӀэ Ӏуашъхьэм#21:1 Елеон зыцӀэ Ӏуашъхьэр – Ерусалим игъунэгъубзэу, итыгъэ къокӀыпӀэ лъэныкъомкӀэ Кедрон къуладжэм иадрабгъу ит Ӏус къуаджэу Бет-Фагие зынэсхэм, Исус игъогу рыкӀохэрэм ащыщхэу нэбгыритӀу апэ ыгъэкӀуагъ, 2моущтэу ариӀозэ:

– ШъупэчӀынэтӀэ къуаджэм шъудахь. Шъузэрэдахьэу щыдыбз горэ, ищыд къунан игъусэу, епхыгъэу шъуапэ къифэщт. Ахэр къэшъутӀатэхи, къысфашъущэх. 3Зыгорэм зыгорэ къышъуиӀомэ, «Зиусхьэныр мыхэм афай» ешъуӀуи, занкӀэу къэшъущэнхэу фит шъуишӀыщт.

4Аущтэу зыфэхъугъэр пегъымбарым мы гущыӀэхэу къыӀуагъэхэр#21:4-5 пегъымбарым мы гущыӀэхэу къыӀуагъэхэр – еплъ Пегъымбар Ешайа тхылъэу ытхыгъэм 62:11; Пегъымбар Зэчрей тхылъэу ытхыгъэм 9:9. къэшъыпкъэжьынхэр ары:

5«Къалэу Цион#21:5 къалэу Цион – Ерусалим ары. пхъум фэдэм ешъуӀу: Еплъ, гушъэбагъэ иӀэу, щыдым тесэу, уипачъыхьэ къыпфэкӀо; ар зытесыр щыдыбзым икъунан ары».

6Игъогу рыкӀохэрэр кӀохи, Исус зэрариӀуагъэм тетэу ашӀыгъ. 7Щыдыбзымрэ щыд къунанымрэ къащэхи, ящыгъынхэр атыралъхьагъэх, щыгъынхэми акӀыӀу Исус тетӀысхьагъ. 8ЦӀыф купышхомэ ящыгъынхэр гъогум тыраубгъощтыгъэ, нэмыкӀхэми къутамэхэр чъыгымэ къапаупкӀыхэти, гъогум тыралъхьэщтыгъэх. 9ЦӀыф купышхохэу Исус ыпэ итхэу кӀощтыгъэхэми, ыуж итхэу кӀощтыгъэхэми мэкъэшхокӀэ аӀощтыгъ#21:9 мэкъэшхокӀэ аӀощтыгъ – яплъ Орэд ЛъапӀэхэм 117:25-26.:

– Хьусаннэ,#21:9 Хьусаннэ – щытхъу гущыӀ. Даутэ ы Къо дэжь! Зиусхьаным ыцӀэкӀэ къакӀорэм щытхъушхор ий! Хьусаннэ! Анахь Лъагэм щытхъушхор ий!

10ЕтӀанэ Исус Ерусалим зыдахьэм, зэрэкъалэу къэбырсырыгъ, цӀыфми къаӀощтыгъ:

– Мыр хэта?

11– Ар Исус ары, Галилей хэкум щыщ Назарет къалэм къикӀыгъэ пегъымбарыр ары, – къаӀощтыгъэ цӀыф купышхохэм.

Исус щэн-щэфакӀохэр Тхьэм иунэшхо къызэрэчӀифыгъэхэр

(Марк 11:15-19; Лука 19:45-48; Иуан 2:13-22)

12Ащ нэужым Исус Тхьэм иунэшхо чӀахьи, щэн-щэфакӀохэу чӀэтхэр#21:12 щэн-щэфакӀохэу ащ чӀэтхэр – ахэмэ къурмэныпхъэ былымхэр Тхьэм иунэшхо ищагу щащэщтыгъэх. зэкӀэ къычӀифыхэу ыублагъ. Ахъщэ зыхъожьхэрэм#21:12 щэн-щэфакӀохэу ащ чӀэтхэр – ахэмэ къурмэныпхъэ былымхэр Тхьэм иунэшхо ищагу щащэщтыгъэх. яӀанэхэмрэ тхьаркъо зыщэхэрэм япхъэнтӀэкӀухэмрэ зэпыригъэзагъ. 13Исус ахэмэ ариӀуагъ:

– Тхьэм къызэриӀорэр игущыӀэ тхыгъэхэм арыт#21:13 Тхьэм игущыӀэ тхыгъэхэм арыт – еплъ Пегъымбар Ешайа тхылъэу ытхыгъэм 56:7., «Сэ сиунэ тхьэлъэӀупӀэщт», ау шъо «хъункӀэкӀо гъэбылъыпӀэм»#21:13 хъункӀэкӀо гъэбылъыпӀэ – еплъ Пегъымбар Иеремие тхылъэу ытхыгъэм 7:11. фэдэ шъошӀы.

14Исус Тхьэм иунэшхо чӀэтэу, нэшъухэмрэ лъащэхэмрэ ыдэжь къакӀохи, ащ дэжьым ахэр щигъэхъужьыгъ. 15Ау дин пэщэшхохэмрэ Тэурат егъэджэкӀо пащэхэмрэ#21:15 дин пэщэшхохэмрэ Тэурат егъэджэкӀо пащэхэмрэ – еплъ 2:4. Исус ышӀэгъэ Ӏоф гъэшӀэгъонхэр залъэгъум, сабыйхэр Тхьэм иунэшхо чӀэтхэу, «Хьусаннэ Даутэ ы Къо дэжь!» аӀоу, къэзэрэджагъэхэри зызэхахым, амыдэу, 16Исус къыраӀуагъ:

– Ахэмэ къаӀохэрэр зэхэоха?

– Зэхэсэхы, – ариӀожьыгъ Исус, – ау ныбжьи шъуеджагъэба Даутэ мыщ фэдэу Тхьэм зэрэриӀуагъэм#21:16 Тхьэм зэрэриӀуагъэр – яплъ Орэд ЛъапӀэхэм 8:3.: «Сабыйхэмрэ сабый быдзашъохэмрэ аӀупэхэмкӀэ щытхъу къызфябгъэшӀыгъ».

17ЕтӀанэ Исус ахэмэ ахэкӀи, къалэм дэкӀи, къуаджэу Бет-Ание#21:17 къуаджэу Бет-Ание – Ерусалим километрищкӀэ пэчыжьэу итыгъэ къокӀыпӀэ лъэныкъомкӀэ ит. кӀуи, ащ чэщыр щырихыгъ.

Исус ынджыр чъыгым зэребгыгъэр

(Марк 11:12-14, 20-24)

18Нэф къызэшъым, Ерусалим къэкӀожьзэ, Исус къэмэлэкӀагъ. 19Гъогум Ӏутэу ынджыр чъыг зелъэгъум, ащ къыӀухьагъ, ау тхьапэ нэмыкӀ зи пигъотагъэпти, моущтэу чъыгым риӀуагъ:

– ЕгъашӀэм о зи къыппымыкӀэжьынэу охъу! Ар къызэриӀоу, ынджыр чъыгыр гъугъэ. 20Ар залъэгъум, игъогу рыкӀохэрэм агъэшӀагъоу аӀуагъ:

– Сыдэущтэу ынджыр чъыгыр ащ фэдэу псынкӀэу гъугъа?

21– Шъыпкъэр шъосэӀо, – ариӀуагъ Исус ахэмэ, – шъугу щэч къишъумыгъахьэу, шӀошъхъуныгъэ шъуиӀэмэ, ынджыр чъыгым къехъулӀагъэм имызакъоу шъушӀэн шъулъэкӀыщт, мы Ӏуашъхьэми, «ЗыкъэӀэти, хым зыхадз» зешъуӀокӀэ, аущтэу хъущт. 22ШӀошъхъуныгъэ шъуиӀэмэ, сыд щыщкӀи шъуелъэӀумэ, Тхьэм къышъуфишӀэщт.

Джурт тхьэматэхэр Исус итетыгъо къезытыгъэмкӀэ къызэреупчӀыгъэхэр

(Марк 11:27-33; Лука 20:1-8)

23ЕтӀанэ Исус Тхьэм иунэшхо чӀахьи, цӀыфхэм Тхьэм игущыӀэхэр аригъашӀэхэу ыублагъ. Ахэмэ аригъашӀэ зэхъум, дин пэщэшхохэмрэ цӀыфхэм янахьыжъхэмрэ къыбгъодахьэхи, къаӀуагъ:

– Мы Ӏофхэр пшӀэнхэу фитыныгъэр тыда къыздипхыгъэр? Ахэр пшӀэнхэу тетыгъор хэта о къыозытыгъэр?

24– Сэри шъо Ӏоф горэкӀэ сышъоупчӀыщт, – ариӀожьыгъ Исус. – ПэгъокӀ къысэшъутыжьмэ, сэри шъосӀон мы Ӏофхэр сшӀэнхэу фитыныгъэр къыздисхыгъэр. 25Иуан цӀыфхэр ыумэхъынхэу хэта къэзгъэкӀуагъэр? ЦӀыфхэр ара, хьауми Тхьэр ара?

– «Тхьэр ары Иуан къэзгъэкӀуагъэр» тӀомэ, ежь къытиӀожьыщт: «Адэ, сыда Иуан къыӀуагъэхэр шъушӀошъ зыкӀэмыхъугъэр?» – аӀозэ, зэупчӀыжьыгъэх ахэр. 26– Ау «Щыфхэр ары Иуан къэзгъэкӀуагъэхэр» тӀомэ, цӀыфхэм тащыщынэн фае, сыда пӀомэ, цӀыф пстэуми Иуан пегъымбарэу алъытэшъ ары.

27Арыти – «ТшӀэрэп», – къыраӀожьыгъ Исус.

– Ащыгъум сэри шъосӀощтэп мы Ӏофхэр сшӀэнхэу фитыныгъэр къыздисхыгъэр, – ариӀожьыгъ Исус ахэмэ.

КъуитӀумэ яхьылӀэгъэ гъэсэпэтхыдэр

28ЕтӀанэ Исус къыӀуагъ:

– Сыдэущтэу шъо шъухаплъэра? ЛӀы горэм къуитӀу иӀагъ. А лӀыр апэрэм бгъодахьи, риӀуагъ: «СикӀал, кӀуи, непэ сисэнэшъхьэ хатэ щылажь».

29– Ау ащ пэгъокӀ къыритыжьыгъ: «Сыфаеп». Ары шъхьаем, нэужым кӀэгъожьи, кӀуагъэ.

30– ЕтӀанэ тыр адрэ кӀалэми бгъодахьи, а дэдэр риӀуагъ. Ащ къыӀожьыгъ: «СыкӀощт, тхьэматэ», – ау кӀуагъэп.

31– Хэта тӀумэ язэу я Тэ шӀоигъор зыгъэцэкӀагъэр?

– Апэрэр ары, – къыраӀожьыгъ ахэмэ.

– Шъыпкъэр шъосэӀо, – ариӀуагъ Исус, – хьакъулахь ахъщэр хэзыххэрэмрэ бзылъфыгъэ хэтакӀохэмрэ шъо шъуапэ Тхьэм и Тетыгъошхо ыӀэчӀэгъ чӀэхьащтых. 32Сыда пӀомэ, Иуан шъыпкъагъэм игъогу шъутыригъэхьанэу къэкӀуагъ, шъо Иуан цыхьэ фэшъушӀыгъэп, ау хьакъулахь ахъщэр хэзыххэрэмрэ бзылъфыгъэ хэтакӀохэмрэ Иуан ыӀуагъэр ашӀошъ хъугъэ. Шъо ахэмэ ашӀошъ зэрэхъугъэр шъулъэгъугъэ пэтми, шъукӀэгъожьыгъэп, Иуани цыхьэ фэшъушӀыгъэп.

СэнэшъхьэшӀ бзаджэхэм яхьылӀэгъэ гъэсэпэтхыдэр

(Марк 12:1-12; Лука 20:9-19)

33– НэмыкӀ гъэсэпэтхыдэми шъукъедэӀу. Унэ зые горэм сэнэшъхьэ хатэ ыгъэтӀысхьагъ. Мыжъо чэукӀэ къышӀыхьи, сэнэшъхьэ фызалъэ хишӀыхьи, унэ плъэпӀэ лъаги дишӀыхьагъ. ЕтӀанэ сэнэшъхьэшӀ горэхэм хатэр аӀэкӀилъхьи, хымэ хэгъэгу горэм кӀуагъэ. 34ЕтӀанэ сэнэшъхьэ пычыжьыгъор къызэсым, исэнэшъхьэ Ӏахь къаӀахынэу сэнэшъхьэшӀхэм адэжь унэӀутхэр ыгъэкӀуагъ.

35– Ау сэнэшъхьэшӀхэм унэӀутхэр къаубытхи, зым къеуагъэх, адрэр къаукӀыгъ, ящэнэрэри мыжъохэмкӀэ къеохэзэ, къаукӀыгъ. 36Сэнэшъхьэ хатэр зыем джыри зэ унэӀутхэр ыгъэкӀуагъ, апэу ыгъэкӀуагъэхэм анахьи нахьыбэжьэу. СэнэшъхьэшӀхэм ахэми а дэдэр къарашӀагъ. 37ЫкӀэм ыкӀэжьым сэнэшъхьэ хатэр зыем, «Сэ скъо лъытэныгъэ къыфашӀын» ыӀуи, ыкъо ахэмэ адэжь ыгъэкӀуагъ.

38– Ау сэнэшъхьэшӀхэм сэнэшъхьэ хатэр зыем ыкъо залъэгъум, зэраӀожьыгъ: «Мыры сэнэшъхьэ хатэр къызыфэнэжьыщтыр. Ар тэжъугъэукӀи, сэнэшъхьэ хатэр къытфэнэжьыщт». 39Аущтэу ари къаубыти, сэнэшъхьэ хатэм къыдадзи, къаукӀыгъ.

40– Арышъ, сэнэшъхьэ хатэр зиер къызыкӀожькӀэ, а сэнэшъхьэшӀмэ сыд аришӀэщтыр? – къыпигъэхъожьыгъ Исус.

41Зэхэзыхыгъэхэм Исус моущтэу къыраӀуагъ:

– Сэнэшъхьэ хатэр зыем а бзэджашӀэхэр Ӏаеу ыгъэкӀодынхэшъ, нэмыкӀ сэнэшъхьэшӀхэу сэнэшъхьэ пычыжьыгъор къызыскӀэ, исэнэшъхьэ Ӏахь къезытыжьыщтхэм хатэр аӀэкӀилъхьащт.

Унэ зышӀыхэрэм зэрамыпэсэу чӀадзыжьыгъэ мыжъор

42ЕтӀанэ Исус ариӀуагъ:

– Тхьэм игущыӀэ тхыгъэхэм#21:42 Тхьэм игущыӀэ тхыгъэхэр – яплъ Орэд ЛъапӀэхэм 117:22-23. моущтэу зэрарытым шъуеджагъэба: «Унэ зышӀыхэрэм зэрамыпэсэу чӀадзыжьыгъэ мыжъор унэр зыӀыгъырэ лъэпсэ дэдэ хъугъэ. Мыр Зиусхьаным иӀэшӀэгъэ Ӏоф, ари тэ гъэшӀэгъонэу къытфэлъагъо»?

43– Арышъ, шъосэӀо, – къыпигъэхъожьыгъ Исус. – Тхьэм и Тетыгъошхо ыӀэчӀэгъ шъучӀэхьаным ифитыныгъэ шъо шъутырихынышъ, и Тетыгъошхо фэшъуашэу шӀугъэ зыгъэцакӀэрэ нэмыкӀ лъэпкъ горэм ритыщт. 44Мы мыжъом тефэрэр зэпкъыриутыщт, ау зытефэрэр мыжъом ыщытӀэщт.

45Мы гъэсэпэтхыдэхэр дин пэщэшхохэмрэ фарисейхэмрэ зызэхахым, ежьхэм яхьылӀагъэу Исус ахэр къызэриӀотагъэр къагурыӀуагъэти, 46ар къаубытынэу пылъыгъэх, ау цӀыф купышхохэм ащыщынэщтыгъэх, сыда пӀомэ, ахэмэ Исус пегъымбаркӀэ алъытэщтыгъэти ары.

Currently Selected:

Маттэ 21: AdgNT14

Highlight

Copy