Маттэ 27
27
ЯТӀОКӀЫРЭ БЛЫНЭРЭШЪХЬ
Ӏэшъхьэтет Пилат ыпашъхьэ Исус зэрэращагъэр
(Марк 15:1-5; Лука 23:1-5; Иуан 18:28-38)
1Нэф къызэшъым, дин пэщэшхо пстэумрэ цӀыфмэ янахьыжъхэмрэ зэдеусэхи, Исус укӀ тыралъхьанэу аухэсыгъ. 2Исус Ӏэхъу тыралъхьи, Ӏуащи, Ӏэшъхьэтет Понтый Пилат#27:2 Пилат – рим цӀыфхэм ащыщэу, Понтый Пилат, Исус къызэхъу нэужым 26-36 илъэсхэм къакӀоцӀ, хэкухэу Иудей, Самарие, Идумей яӀэшъхьэтетыгъ. ӀэкӀалъхьагъ.
Иудэ зэрэлӀагъэр
(Апостол. 1:18-19)
3Иудэу Исус ахэмэ язгъэубытыгъэм Исус укӀ зэрэтыралъхьагъэр зелъэгъум, кӀэгъожьи, ратыгъэ тыжьын ахъщэ щэкӀыр дин пэщэшхохэмрэ нахьыжъхэмрэ афихьыжьи, 4ариӀуагъ:
– ЛӀы хыер зэрэшъозгъэубытыгъэмкӀэ псэкӀод сшӀагъэ.
– Ащ тэ тиӀоф хэлъэп, о уиӀоф нахь, – къыраӀуагъ ахэмэ.
5Джащыгъум Иудэ а тыжьын ахъщэхэр Тхьэм иунэшхо кӀоцӀым щыритэкъухи, чӀэкӀыжьыгъ. ЕтӀанэ кӀуи, зитхьалэжьыгъ.
6Дин пэщэшхохэм тыжьын ахъщэхэр аштэжьхи, къаӀуагъ:
– Мыхэр Тхьэм пае ахъщэр зыдэлъ пхъуантэм хабзэкӀэ даплъхьэ хъущтэп, сыда пӀомэ, ар лъыуасэшъ ары.
7Ащыгъум зэупчӀыжьхи, хымэхэр чӀалъхьажьынхэу къошынышӀэм ихьасэ а ахъщэмкӀэ къащэфынэу аухэсыгъ. 8Аущтэу непэ нэс а хьасэм «Лъыосэ ХьасэкӀэ» еджэх. 9Джащыгъум пегъымбар Иеремие мы гущыӀэхэу къыӀуагъэхэр#27:9-10 пегъымбар Иеремие мы гущыӀэхэу къыӀуагъэхэр – еплъ Пегъымбар Зэчрей тхылъэу ытхыгъэм 11:12-13; Пегъымбар Иеремие тхылъэу ытхыгъэм 32:6-10. къэшъыпкъэжьыгъэх: «Шъхьэуасэу израиль цӀыфхэм ежь пае агъэнэфэгъэ тыжьын ахъщэ щэкӀыр ашти, 10ахэмкӀэ къошынышӀым ихьасэ къащэфыгъ, Зиусхьаным унашъо къызэрэсфишӀыгъэм тетэу».
Ӏэшъхьэтет Пилат Исус зэреупчӀыгъэр
(Марк 15:2-5; Лука 23:3-5; Иуан 18:33-38)
11Джащыгъум Ӏэшъхьэтет Пилат ыпашъхьэ Исус иуцуагъ.
– О джуртмэ уряпачъыхьа? – къеупчӀыгъ Ӏэшъхьэтетыр Исус.
– Ары, къызэрэпӀорэм фэд#27:11 – Ары, къызэрэпӀорэм фэд, – е – О пшъхьэкӀэ къэоӀо., – къыӀожьыгъ Исус.
12Ау дин пэщэшхохэмрэ нахьыжъхэмрэ Исус загъэмысэм, Исус зи къыӀуагъэп. 13Джащыгъум Пилат Исус къыриӀуагъ:
– Къыптыралъхьэрэр зыфэдизыр зэхэпхырэба?
14Ау Исус зы гущыӀи къыӀожьыгъэп. Зи къызэримыӀожьыгъэр Ӏэшъхьэтет Пилат лъэшэу ыгъэшӀэгъуагъ.
Исус укӀ зэрэтыралъхьагъэр
(Марк 15:6-15; Лука 23:13-25; Иуан 18:39–19:16)
15ӀутӀыжъ зыцӀэ мэфэкӀ мэфэшхор къэсымэ, цӀыфхэр зыкӀэлъэӀурэ хьапсчӀэс горэ къафитӀупщыжьыныр Ӏэшъхьэтет Пилат ихэбзагъ. 16А мафэхэм Бар-Аббэ ыцӀэу, хьапсчӀэс цӀэрыӀо горэ яӀагъ. 17Арыти, ахэр къызызэӀокӀэхэм, Пилат яупчӀыгъ:
– Хэта къышъуфэстӀупщыжьынэу шъузфаер? Бар-Абба хьауми ХристоскӀэ заджэхэрэ Исус ара?
18Пилат аущтэу зыкӀяупчӀыгъэр шъугъоным къыхэкӀэу ахэмэ Исус къызэрэӀэкӀалъхьагъэр ешӀэти ары.
19Пилат унэшъошӀ тӀысыпӀэм тесызэ, ишъуз лӀыкӀохэр къыфигъакӀохи, къыраригъэӀуагъ:
– Мы лӀэу шъыпкъагъэ зиӀэм мыхъун горэ епшӀэкъон, сыда пӀомэ, нычэпэ пкӀыхьэпӀэ Ӏае слъэгъуи, мы лӀым пае къин сщэчыгъэ.
20Ау Пилат Бар-Аббэ къырагъэтӀупщыжьынэуи, Исус рагъэгъэкӀодынэуи дин пэщэшхохэмрэ нахьыжъхэмрэ цӀыф купышхохэм араӀуагъ.
21– ТӀумэ язэу хэта къышъуфэстӀупщыжьынэу шъузыфаер? – ыӀуи, Ӏэшъхьэтет Пилат джыри зэ цӀыфмэ ариӀуагъ.
– Бар-Абб ары, – къаӀуагъ ахэмэ.
22– Адэ, ХристоскӀэ заджэхэрэ Исус сыд есшӀэщт? – ариӀуагъ Пилат.
– Къащым теӀулӀ! – къаӀуагъ зэкӀэмэ.
23– Сыда ащ бзэджагъэу ышӀагъэр? – яупчӀыгъ Пилат. Ау ахэр нахь инэу къэзэрэгъэкууагъэх:
– Къащым теӀулӀ!
24Пилат зи хишӀыхьан ымылъэкӀэу, цӀыфхэр нахь къызэрэбырсырыхэрэр зелъэгъум, псы къышти, цӀыфхэм апашъхьэ ыӀэхэр щитхьакӀыжьхи, къыӀуагъ:
– Мы лӀэу шъыпкъагъэ зиӀэм ылъ сэ къыстефэрэп. Ар шъо шъупшъэ илъ!
25– Ащ ылъ тэри тибынхэми къыттерэф! – къаӀуагъ зэкӀэ цӀыфхэм.
26Джащыгъум Пилат Бар-Аббэ афитӀупщыжьыгъ. ЕтӀанэ дзэлӀхэр Исус къамыщкӀэ ригъаохи, къащым тыраӀулӀэнэу аӀэкӀилъхьагъ.
ДзэлӀхэр Исус зэрэкӀэнэкӀагъэхэр
(Марк 15:16-20; Иуан 19:2-3)
27Джащыгъум Ӏэшъхьэтет Пилат идзэлӀхэм Исус преторие#27:27 преторие – Ӏэшъхьэтет Пилат иунэшхо ары. зыцӀэ унэшхом ыкӀоцӀ чӀащагъ, адрэ къэнэгъэ дзэлӀ купышхори Исус бгъу пстэумкӀэ къыкӀэлъырытхэу щызэхаугъоягъэх. 28ЕтӀанэ дзэлӀхэм Исус ищыгъынхэр къыщахыхи, плъыжь чӀапцӀэу шъошэ кӀыхьэ щалъагъ. 29Панэм хэшӀыкӀыгъэ пачъыхьэ тандж фабли, ышъхьэ тыралъхьагъ, ыӀэ джабгъуи бэщ ӀэкӀалъхьагъ. Ащ нэужым лъэгонджэмышъхьэкӀэ ыпашъхьэ къитӀысхьэхи, «Опсэу, джуртмэ япачъыхь!» раӀозэ, кӀэнэкӀагъэх. 30Теужъунтхагъэх, бэщымкӀэ ышъхьэ еуагъэх. 31ЗыкӀэнакӀэхэ ужым, шъошэ кӀыхьэр щахыжьи, ежь ищыгъынхэр щалъэжьыгъ. ЕтӀанэ къащым тыраӀулӀэнэу преторием ращыжьыгъ.
Исус къащым зэрэтыраӀулӀагъэр
(Марк 15:21-32; Лука 23:26-43; Иуан 19:17-27)
32Къалэм къыдэкӀхэзэ, Симон ыцӀэу, къалэу Кириние#27:32 къалэу Кириние – Ливие хэгъэгоу Африкэм итемыр лъэныкъом итым икъэлэшхуагъ. щыщ лӀы горэм ӀукӀагъэх. Исус икъащ ыхьынэу ар рагъэзыгъ. 33Исус къызащэм, Голгофэ зыфаӀорэ чӀыпӀэм нэсыгъэх (Голгофэм къикӀырэр «Шъхьэпкъ ЧӀыпӀэр» ары). 34Ащ зынэсхэм, сэнэпсрэ зэзыпс дыджырэ зэхэшӀыхьагъэу ешъонэу Исус ратыгъ; зыхэхъумпӀэм, ешъоным фэежьыгъэп. 35ЕтӀанэ Исус къащым тыраӀулӀагъ. Пхъэдз радзэзэ, Исус ищыгъынхэр зэфагощыгъэх. 36ЕтӀанэ ащ дэжьым тӀысыгъэхэу, Исус аухъумэщтыгъ. 37Исус къащым зыкӀытыраӀулӀагъэр пхъэмбгъу горэм тетхагъэу, ежь ышъхьагъкӀэ къащым тыраӀулӀагъ: «Мыр Исус, джуртхэм я Пачъыхь». 38А чӀыпӀэм хъункӀэкӀуитӀу, зыр иджабгъукӀэ адрэр исэмэгубгъукӀэ, Исус игъусэхэу къащхэм атыраӀулӀагъэх. 39БлэкӀырэ цӀыфхэр Исус ехъоныщтыгъэх, ашъхьэхэр агъэсысхэу, 40моущтэу аӀозэ:
– О Тхьэм иунэшхо зэхэзыкъутэу, мэфищкӀэ зэтезгъэуцожьыщтыр, умыкӀодэу зыкъэгъэнэжь! О Тхьэм ури Къомэ, къащым къехыжь!
41Ащ фэдэу дин пэщэшхохэми, Тэурат егъэджэкӀо пащэхэми, нахьыжъхэми Исус кӀэнакӀэхэу къаӀуагъ:
42– НэмыкӀ цӀыфхэр мыкӀодхэу къыгъэнэжьыгъэх, ау ежь зыкъыгъэнэжьышъурэп. Ежь Израиль ипачъыхьэмэ, къащым къерэхыжьи, ежьыркӀэ шӀошъхъуныгъэ тиӀэ хъущт. 43Ежь Тхьэм щэгугъы. Джы Тхьэр ежь къыфаемэ, мыкӀодэу къерэгъэнэжь. Сыда пӀомэ, «Сэ Тхьэм сыри Къу» ыӀощтыгъэ. 44Исус игъусэхэу къащхэм тыраӀулӀэгъэ хъункӀакӀохэри ащ къехъоныщтыгъэх.
Исус зэрэлӀагъэр
(Марк 15:33-41; Лука 23:44-49; Иуан 19:28-30)
45Щэджагъом#27:45 щэджагъом – зытырахыгъэ алыджыбзэм зэритыр «яхэнэрэ сыхьат» Ащ къикӀырэр щэджагъор ары. щегъэжьагъэу сыхьатыр щым#27:45 сыхьатыр щым – зытырахыгъэ алыджыбзэм зэритыр «ябгъонэрэ сыхьат». Ащ къикӀырэр щэджэгъоужым сыхьатыр щыр ары. нэс а хэгъэгум тыдэкӀи шӀункӀ къыщыхъугъ. 46Сыхьатыр щым Исус мэкъэшхокӀэ джагъэ:
– Или, Или! Лама сабахтани?#27:46 Или, Или! Лама сабахтани – яплъ Орэд ЛъапӀэхэм 21:2. (Ащ къикӀырэр: – О си Тхь! Си Тхь! Сыд пае О сыкъэубгынагъ?)
47А чӀыпӀэм щытхэм ащыщхэм ар зызэхахым, аӀуагъ:
– Пегъымбар Иляс еджэ.
48Ащ лъыпытэу ахэмэ ащыщэу зыгорэ Ӏулъади, кӀышъо зэраӀотырэр къыштагъ. Сэнэпс шӀоӀугъэр хиз ышӀи, бэщ горэм пилъхьи, Исус кӀигъэшъунэу фищэигъ.
49– Зэ, пегъымбар Иляс къакӀоу, мыкӀодэу къыгъэнэжьмэ, тежъугъэплъ, – къаӀуагъ адрэхэм.
50Ау Исус джыри зэ мэкъэшхокӀэ джи, ыпсэ ытыгъ.
51Джащыгъум Тхьэм иунэшхо ипэӀухъо ыпшъэкӀэ къыщегъэжьагъэу ыхэ нэсыфэ тӀоу къызэготхъыгъ. ЧӀыгури къэсысыгъ, мыжъохэри зэгоутыгъэх. 52Къэунэхэри зэӀукӀыхи, Тхьэм ицӀыф лъапӀэхэу лӀагъэхэм ащыщхэу бэ къэтэджыжьыгъ. 53Ахэр къэунэхэм къачӀэкӀыжьыгъэх, Исус лӀагъэмэ къызахэтэджыкӀыжь ужыми, къэлэ лъапӀэу Ерусалим дахьэхи, бэмэ зыкъарагъэлъэгъугъ.
54Дзэ пащэми ащ игъусэхэу Исус зыухъумэщтыгъэхэми чӀыгур къызэрэсысырэри зэкӀэ хъугъэ-шӀагъэри залъэгъум, лъэшэу щтагъэхэу аӀуагъ:
– Шъыпкъэ дэдэу мыр Тхьэм ы Къуагъ.
55ЧыжьэкӀэ къаплъэхэу, бзылъфыгъэ Ӏаджи ащ дэжьым щытыгъ. Ахэр Исус ӀэпыӀэгъу фэхъухэзэ, игъусэхэу Галилей къикӀыгъагъэх. 56Мыхэр ахэмэ ахэтыгъэх: къуаджэу Магдалэ#27:56 къуаджэу Магдалэ – Галилей псыхъураем итыгъэ къохьэпӀэ лъэныкъомкӀэ ит. щыщ Мерэми, Зебедей ыкъохэм яни, нэмыкӀ Мерэми. Ар Якъубэрэ Иосыйрэ янагъ.
Исус ихьадэ къэунэм зэрэчӀалъхьажьыгъэр
(Марк 15:42-47; Лука 23:50-56; Иуан 19:38-42)
57Пчыхьэ къызэхъум, Юсыф ыцӀэу, къуаджэу Ариматей щыщэу, лӀы бай горэ къэкӀуагъ. Ари Исус игъогу рыкӀохэрэм ащыщыгъ. 58Ар Пилат дэжь кӀуи, Исус ихьадэ кӀэлъэӀугъ. Джащыгъум хьадэр Юсыф ратыжьынэу Пилат унашъо ышӀыгъ. 59Юсыф хьадэр къышти, чэфын къабзэ рищэкӀи, 60къэунакӀэу ежь пае Ӏошъхьэ цакӀэм харигъэупкӀыгъэм чӀилъхьажьыгъ. ЕтӀанэ Юсыф къэунэ чӀэхьапӀэм мыжъошхо ӀуигъэукӀораий, ӀукӀыжьыгъ. 61Къуаджэу Магдалэ щыщ Мерэмрэ адрэ Мерэмрэ ащ дэжьым щыӀагъэх, къэунэм пэӀусхэу.
Къэунэм икъэрэгъулэхэр
62ЯтӀонэрэ мафэу бэрэскэшхом къыкӀэлъыкӀорэ мафэм дин пэщэшхохэмрэ фарисейхэмрэ зэрэугъоихи, Ӏэшъхьэтет Пилат дэжь кӀуагъэх.
63– Тхьэматэ, а пцӀыусым псаузэ, «Мэфищ нэужым лӀагъэхэм сыкъахэтэджыкӀыжьыщт» зэриӀогъагъэр тыгу къэкӀыжьыгъ, – къаӀуагъ ахэмэ. 64– Арышъ, ящэнэрэ мафэм нэсыфэ къэунэм фэсакъыхэзэ, къэрэгъулэхэм аухъумэнэу унашъо шӀы. Армырмэ, игъогу рыкӀохэрэр къэкӀонхэшъ, ихьадэ атыгъунышъ, цӀыфмэ араӀощт: «ЛӀагъэхэм къахэтэджыкӀыжьыгъ». А аужырэ пцӀыр апэрэ пцӀым нахьи нахь дэй хъущт.
65– Къэрэгъулэхэр шъосэтых, шъукӀуи, шъо зэрэшъулъэкӀэу къэунэр къэжъугъэгъун, – ариӀуагъ Пилат.
66Ахэр кӀохи, къэунэм къэрэгъулэхэр Ӏуагъэуцуагъэх, мыжъоми мыхъур тырадзагъ.
Currently Selected:
Маттэ 27: AdgNT14
Highlight
Share
Copy
Want to have your highlights saved across all your devices? Sign up or sign in
© Институт перевода Библии, 1991, 1992, 2014. Стокгольм
