Марк 1

АПЭРЭШЪХЬ

Тхьэм игущыӀэхэр умэхъэкӀо Иуан зэригъэӀущтыгъэхэр

(Маттэ 3:1-12; Лука 3:1-9, 15-17; Иуан 1:19-28)

1Тхьэм ы Къо Исус Христос ехьылӀэгъэ къэбарышӀур мары къызэриублэрэр.

2Тхьэм мыщ фэдэу къызэриӀорэр пегъымбархэм ятхылъхэм арыт:

«Мары о уапэ сэ силӀыкӀо къэсэгъакӀо;

ащ уигъогу къыпфигъэпсыщт.

3Ащ иджэ макъ ары#1:3 Ащ иджэмакъ ары – еплъ Пегъымбар Ешайа тхылъэу ытхыгъэм 40:3. шъоф нэкӀым къыщыӀурэр, моущтэу ыӀозэ:

Зиусхьаным игъогу фэжъугъэпси,

игъогу лъагъохэр зэшъхьэ-зашъо фэшъушӀых».

4Тхьэм къызэриӀуагъэм тетэу, умэхъэкӀо#1:4 умэхъакӀо – еплъ Маттэ 3:1. Иуан шъоф нэкӀым къыщылъагъуи#1:4 Иуан шъоф нэкӀым къыщылъагъуи – умэхъэкӀо Иуан иӀоф зиублагъэр Исус къызэхъу нэужым 27-рэ илъэсым пэблагъэу ары. Еплъ Лука 3:1-3., цӀыфхэм Тхьэм игущыӀэхэр аригъэӀухэзэ, моущтэу къыӀощтыгъ:

– ШъуипсэкӀодхэм шъуафыкӀэгъожьи, зысэжъугъэумэхъ, Тхьэм ахэр къышъуфигъэгъунхэм пае.

5Иудей хэкум#1:5 Иудей хэкур – еплъ Маттэ 2:1. зэкӀэ ис цӀыфхэри, Ерусалим дэс цӀыф пстэури Иуан дэжь кӀощтыгъэх. ПсэкӀодэу ашӀагъэхэр Тхьэм ыпашъхьэ ралъхьэхэти, Иордан псыхъом Иуан зыщырагъэумэхъыщтыгъ. 6Иуан мэхъшэцым хэшӀыкӀыгъэу щыгъын щыгъыгъ, ыбги шъо бгырыпх илъыгъ, мацӀи шъоф шъоуи ышхыщтыгъ. 7Тхьэм игущыӀэхэр цӀыфхэм аригъэӀухэзэ къыӀощтыгъ:

– Сэщ нахьи нахь лъэкӀышхо иӀэу зыгорэ саужкӀэ къэкӀощт. Зезгъэзыхэу ащ ицокъэлъэпсхэр фэстӀэтэнхэуи сифэшъуашэп. 8Сэ псымкӀэ шъусыумэхъыгъ, ау ащ Тхьэм ы Псэ ЛъапӀэкӀэ шъуиумэхъыщт.

Иуан Исус зэриумэхъыгъэр

(Маттэ 3:13-17; Лука 3:21-22)

9А мафэхэм Галилей хэкум#1:9 Галилей хэкур – еплъ Маттэ 2:22. щыщ къалэу Назарет#1:9 къалэу Назарет – еплъ Маттэ 2:23. Исус къыдэкӀи, Иордан псыхъом Иуан зыщыригъэумэхъыгъ. 10Исус псым къыхэкӀыжь пэтэу, уашъор зэгокӀи, Тхьэм ы Псэ ЛъапӀэ тхьаркъом фэдэу ежь къызэрэфехырэр ылъэгъугъ. 11Уашъоми макъэ къиӀукӀыгъ:

– Сэ шӀу слъэгъурэ с Къо кӀасэу сыгу зэӀурэр оры.#1:11 Сэ шӀу слъэгъурэ с Къо кӀасэу сыгу зэӀурэр оры – яплъ Орэд ЛъапӀэхэм 2:7; Пегъымбар Мусэ апэрэ тхылъэу ытхыгъэм (УблапӀэм) 22:2; Пегъымбар Ешайа тхылъэу ытхыгъэм 42:1.

Исус псэкӀод ригъэшӀэным шэйтаныр ыуж зэритыгъэр

(Маттэ 4:1-11; Лука 4:1-13)

12Ащ лъыпытэу Тхьэм ы Псэ ЛъапӀэ Исус шъоф нэкӀым ыщагъ. 13Шэйтаныр Исус псэкӀод ригъэшӀэным ыуж итэу, Исус мэфэ тӀокӀитӀурэ шъоф нэкӀым итыгъ. ХьэкӀэ-къуакӀэхэм ахэтыгъ. МэлэӀичхэри фэӀофтабгэщтыгъэх.

Исус иӀоф Галилей хэкум зэрэщиублагъэр

(Маттэ 4:12-17; Лука 4:14-15)

14УмэхъэкӀо Иуан хьапсым зычӀадзэ ужым#1:14 Иуан хьапсым зычӀадзэ ужым – еплъ Маттэ 4:12., Исус Галилей хэкум кӀуи, Тхьэм и Тетыгъошхо ехьылӀэгъэ къэбарышӀур щигъэӀоу ыублагъ.

15– Мафэр къэсыгъ, Тхьэм и Тетыгъошхуи#1:15 Тхьэм и Тетыгъошхо – еплъ Маттэ 3:2. къэблэгъагъ. ШъуипсэкӀодшӀагъэхэм шъуафыкӀэгъожьи, къэбарышӀур шъушӀошъ жъугъэхъу, – ыӀощтыгъ.

Исус игъогу рыкӀонхэу пцэжъыешэ нэбгыриплӀым къызэряджагъэр

(Маттэ 4:18-22; Лука 5:1-11)

16Исус Галилей псыхъураем#1:16 Галилей псыхъураер – еплъ Маттэ 4:18. иӀушъо рекӀокӀызэ, Симонрэ ащ ышэу Индрысрэ хъытыур псым хадзэу ылъэгъугъ, сыда пӀомэ, пцэжъыяшэхэти ары. 17Исус ахэмэ ариӀуагъ:

– Сауж шъукъырыкӀу. Пцэжъые къэшъуубытыным ыуж шъузэритыгъэм фэдэу, цӀыфхэр сигъогу къытежъугъэхьанхэм шъузэрэхэтыщтыр шъозгъэшӀэщт.

18Ахэмэ а гущыӀэхэр зэрэзэхахэу, хъытыухэр къагъанэхи, Исус ыуж ихьагъэх.

19Исус ащ тӀэкӀу ӀукӀотыгъэу, Зебедей ыкъохэу Якъубэрэ Иуанрэ къуашъом исхэу, яхъытыухэр агъэхьазырхэу ылъэгъугъ. 20Ащ лъыпытэу Исус ахэми яджагъ. Ятэу Зебедейрэ илэжьакӀохэмрэ къуашъом исхэу къабгынэхи, ахэр Исус ыуж ихьагъэх.

Исус лӀы горэм джынэпцӀэ Ӏаер зэрэхифыгъэр

(Лука 4:31-37)

21ЕтӀанэ къалэу Капернаум#1:21 къалэу Капернаум – Галилей псыхъураем итемыр тыгъэ къохьэпӀэ Ӏушъом Ӏут. дэхьагъэх. Шэмбэт мафэр#1:21 шэмбэт мафэр – еплъ Маттэ 12:1. къызэсым, Исус синэгогум#1:21 синэгогу – еплъ Маттэ 4:23. чӀахьи, цӀыфхэм Тхьэм игущыӀэхэр аригъашӀэхэу ыублагъ. 22ЦӀыфхэм Исус Ӏофхэр зэраригъашӀэщтыгъэ шӀыкӀэр агъэшӀэгъуагъ, сыда пӀомэ, Тэурат егъэджэкӀо пащэхэм#1:22 Тэурат егъэджэкӀо пащэхэр – еплъ Маттэ 2:4. афэмыдэу, тетыгъошхо иӀэу, Тхьэм игъогу цӀыфхэм аригъашӀэщтыгъэти ары. 23ОшӀэ-дэмышӀэу джынэпцӀэ Ӏае зыхэс лӀы горэ синэгогум къыщылъагъуи, къахэкууагъ:

24– Сыд уиӀофэу къытхэлъыр, Назарет щыщ Исус? ТыбгъэкӀодынэу укъэкӀуагъа? О хэтми узыщыщыр сэшӀэ: Тхьэм дэжь къикӀыгъэ ЛъапӀэр оры.

25– Щыгъэт, мы лӀым къыхэкӀыжь! – къыӀуагъ Исус, джынапцӀэм егыеу. 26ДжынэпцӀэ Ӏаем лӀыр къыгъэкӀэзэзи, мэкъэшхокӀэ къэкууи, лӀым хэкӀыжьыгъ.

27ЦӀыфхэм ар залъэгъум, пстэуми лъэшэу агъэшӀагъуи, зэраӀожьыгъ:

– Сыда мыр? ШӀэныгъакӀэхэр цӀыфхэм арегъашӀэх. Тетыгъошхуи иӀэу, джынэпцӀэ Ӏаехэми унашъо афишӀызэ, егъэдаӀох.

28Аущтэу зэкӀэ Галилей хэкум Исус икъэбар псынкӀэу щыӀугъ.

Исус цӀыфыбэхэр зэригъэхъужьыгъэр

(Маттэ 8:14-17; Лука 4:38-41)

29ЕтӀанэ ахэр синэгогум къызэрэчӀэкӀыжьхэу, Якъубэрэ Иуанрэ ягъусэхэу, Симонрэ Индрысрэ яунэ кӀуагъэх. 30Симон ишӀугуащэ плъыр-стыркӀэ сымаджэу пӀэм хэлъыгъ. Ар зэрэсымаджэр занкӀэу Исус къыраӀуагъ. 31Исус ащ дэжь кӀуи, ыӀэ ыубыти, къыгъэтӀысыгъ. ШӀугуащэм плъыр-стырыр хэкӀыжьыгъ, къэтэджыжьи, ахэр къыхьакӀэхэу ыублагъ.

32Пчыхьэм тыгъэр зыкъохьажь ужым, сымаджэхэмрэ джынапцӀэ зыхэсхэмрэ зэкӀэ Исус къыфащагъэх. 33Къалэм дэс пстэури пчъэӀупэм къыщызэӀукӀагъ. 34Ащ дэжьым Исус уз зэмылӀэужыгъуабэ зиӀэ сымэджэ Ӏэджи ыгъэхъужьыгъ, джынэпцӀабэхэри цӀыфхэм ахифыгъ, ау джынапцӀэхэр къэгущыӀэнхэу фит ышӀыгъэхэп, сыда пӀомэ, ахэмэ ар зэрэ Христосыр ашӀэщтыгъэти ары.

Исус Галилей хэкур къыкӀухьэзэ, Тхьэм игущыӀэхэр цӀыфхэм зэраригъэӀущтыгъэр

(Лука 4:42-44)

35Пчэдыжьым жьы дэдэу Исус къэтэджи, къалэм дэкӀи, чӀыпӀэ Ӏудзыгъэ горэм кӀуи, Тхьэм щелъэӀугъ. 36Симонрэ игъусэхэмрэ Исус лъыхъунхэу дэкӀыгъэх. 37Къызагъотыжьым, раӀуагъ:

– ЗэкӀэ цӀыфхэр къыплъэхъух.

38– Гъунэгъу къуаджэхэми къалэхэми тыжъугъакӀу, ахэми Тхьэм игущыӀэхэр цӀыфхэм щязгъэӀунхэм пае, – къариӀожьыгъ Исус, – сыда пӀомэ, джары сэ сыкъызфэкӀуагъэр.

39Аущтэу Галилей хэкур зэкӀэ къыкӀухьэзэ, ясинэгогухэм цӀыфхэм Тхьэм игущыӀэхэр щаригъэӀущтыгъ, джынапцӀэхэри цӀыфхэм ахифыщтыгъ.

Исус шъоджэ уз Ӏае зиӀэ лӀы горэ зэригъэхъужьыгъэр

(Маттэ 8:1-4; Лука 5:12-16)

40Шъоджэ уз Ӏае зиӀэ лӀы горэ Исус дэжь къакӀуи, лъэгонджэмышъхьэкӀэ къэтӀыси, къелъэӀугъ:

– Уфаемэ, сыбгъэхъужьын плъэкӀыщт.

41Исус ыгу егъугъ, ыӀэ ыщэий, тырилъхьи#1:41 тырилъхьи – еплъ Маттэ 8:3., ыӀуагъ:

– Ары, сыфай, псаоу хъужь!

42Ардэдэм шъоджэ узыр а лӀым хэкӀыжьи, къабзэ хъужьыгъэ.

43Ащ лъыпытэу Исус ар ытӀупщыжьыгъ, фигъэпытэу риӀозэ:

44– Фэсакъ, мыр зыми емыӀотэжь, ау дин пащэм дэжь кӀуи, зегъэлъэгъу. Узэрэхъужьыгъэм пае, пегъымбар Мусэ иунашъо тетэу къурмэн шӀы. Ар узэрэхъужьыгъэмкӀэ цӀыфхэм апашъхьэ шыхьат щыхъущт.

45Ау а лӀыр ӀукӀыжьи, къехъулӀэгъэ пстэури ыӀуатэзэ, къэбарыр цӀыфхэм ариӀоу ыублагъ. Арыти, цӀыфхэм къалъэгъоу Исус къалэ горэми дэхьан ымылъэкӀыжь хъугъэ, ау чӀыпӀэ Ӏудзыгъэхэм ащыӀэщтыгъ. Ау щытми, тыдэкӀи къикӀыхэу цӀыфхэр ыдэжь къакӀощтыгъэх.

Currently Selected:

Марк 1: AdgNT14

Highlight

Copy