Марк 2
2
ЯТӀОНЭРЭШЪХЬ
ЗыӀэпкъ-лъэпкъ узым зэкӀиубытэгъэ лӀы горэ Исус зэригъэхъужьыгъэр
(Маттэ 9:1-8; Лука 5:17-26)
1Мэфэ заулэ тешӀагъэу Исус къалэу Капернаум къызегъэзэжьым, иунэ къызэрэкӀожьыгъэр цӀыфмэ зэхахыгъ. 2ЦӀыфхэу къэзэрэугъоигъэхэр зэрэбагъэм пае, унэ пчъэӀупэми хэуцуапӀэ имыӀэжь хъугъэ, Исуси Тхьэм игущыӀэхэр аригъэӀухэу ыублагъ. 3Джащыгъум цӀыф куп къэкӀуагъ; ахэмэ ащыщ нэбгыриплӀым зыӀэпкъ-лъэпкъ узым зэкӀиубытэгъэ лӀы горэ къыздахьыгъ. 4ЦӀыфхэр зэрэбагъэм къыхэкӀыкӀэ, сымаджэр Исус рахьылӀэн алъэкӀыгъэп. Унашъхьэм дахьыий, Исус зыдэщыӀэ лъэныкъомкӀэ унашъхьэм щыщ тырахи, сымаджэр пӀуаблэм телъэу ратӀупщэхыгъ. 5Исус ахэмэ яшӀошъхъуныгъэ зелъэгъум, зыӀэпкъ-лъэпкъ узым зэкӀиубытэгъэ лӀым риӀуагъ:
– СикӀал, уипсэкӀодшӀагъэхэр къыпфэгъугъэх.
6Тэурат егъэджэкӀо пащэхэу ащ дэжьым щысыгъэхэм ащыщхэм агукӀэ аӀуагъ:
7– Сыд пае мы лӀыр моущтэу гущыӀэра? Ащ Тхьэр егъэпцӀыба? Тхьэм нэмыкӀэу, хэта псэкӀодшӀагъэхэр зыгъэгъун зылъэкӀырэр?
8Ардэдэм Исус ыгукӀэ ахэмэ агухэм арылъыр ешӀэти, ариӀуагъ:
– Сыд пае ащ фэдэхэр шъо шъугухэмкӀэ шъуӀора? 9Тара нахь псынкӀагъор, зыӀэпкъ-лъэпкъ узым зэкӀиубытэгъэ лӀым «УипсэкӀодшӀагъэхэр къыпфэгъугъэх» епӀоныр ара, хьауми «Тэджи, уипӀуаблэ къашти, къэкӀухь» епӀоныр ара? 10Ау шъушӀэным пае, ЦӀыф Лъэпкъым ы Къо#2:10 ЦӀыф Лъэпкъым ы Къо – еплъ Маттэ 8:20. псэкӀодшӀагъэхэр ыгъэгъунхэу дунаим тетыгъо зэрэщыриӀэр, – Исус зыӀэпкъ-лъэпкъ узым зэкӀиубытэгъэ лӀым риӀуагъ:
11– Сэ осэӀо, къэтэджи, уипӀуаблэ къашти, шъуадэжь кӀожь!
12Ардэдэм лӀыр къэтэджи, ипӀуаблэ ышти, цӀыф пстэуми алъэгъоу унэм икӀыжьыгъ. Ар пстэуми инэу агъэшӀагъозэ, Тхьэм щытхъу фашӀэу аӀуагъ:
– Мыщ фэдэ Ӏоф тэ ныбжьи тлъэгъугъэп.
Исус игъогу рыкӀонэу Лэуй къызэреджагъэр
(Маттэ 9:9-13; Лука 5:27-32)
13Исус джыри Галилей псыхъурэе Ӏушъом Ӏухьажьыгъ. ЦӀыф купышхо ыдэжь къэкӀуагъ, Исуси Тхьэм игущыӀэхэр аригъашӀэхэу ыублагъ. 14ЕтӀанэ нахь чыжьэу кӀозэ, хьакъулахь ахъщэр зыщыхахырэ унэм Ӏусэу, Алфей ыкъо Лэуй ылъэгъугъ.
– Сауж къырыкӀу, – риӀуагъ Исус. Лэуй къэтэджи, Исус ыуж ихьагъ.
15ЕтӀанэ Исус Лэуй иунэ щышхэ зэхъум, хьакъулахь ахъщэр хэзыххэрэмрэ псэкӀод зышӀэхэрэмрэ бэ хъухэу, Исусрэ игъогу рыкӀохэрэмрэ адашхэщтыгъэх; сыда пӀомэ, Исус ыуж ихьагъэхэр бэ хъущтыгъэх. 16Тэурат егъэджэкӀо пащэхэу фарисейхэм#2:16 фарисейхэр – еплъ Маттэ 3:7. ащыщхэм хьакъулахь ахъщэр хэзыххэрэмрэ псэкӀод зышӀэхэрэмрэ Исус адашхэу залъэгъум, Исус игъогу рыкӀохэрэм араӀуагъ:
– Хьакъулахь ахъщэр хэзыххэрэмрэ псэкӀодышӀэхэмрэ сыда ар зыкӀадашхэрэр, зыкӀадешъорэр?
17Исус ар зызэхехым, ариӀуагъ:
– Псаухэр арэп Ӏазэ зищыкӀагъэхэр, сымаджэхэр ары нахь. Шъыпкъагъэ зиӀэ цӀыфхэм сяджэнэу арэп сыкъызфэкӀуагъэр, псэкӀодышӀэхэр япсэкӀодшӀагъэхэм афыкӀэгъожьынхэм пае сяджэнэу ары нахь.
Джурт тхьэматэхэр нэкӀым ехьылӀагъэу Исус къызэреупчӀыгъэхэр
(Маттэ 9:14-17; Лука 5:33-39)
18УмэхъэкӀо Иуан игъогу рыкӀохэрэмрэ фарисейхэмрэ анэкӀыщтыгъ#2:18 анэкӀыщтыгъ – еплъ Маттэ 9:14.. ЦӀыф заулэ къакӀуи, Исус къыраӀуагъ:
– Иуан игъогу рыкӀохэрэмрэ фарисейхэм ягъогу рыкӀохэрэмрэ анэкӀы. О уигъогу рыкӀохэрэм сыда зыкӀамынэкӀырэр?
19– Шъаор ягъусэфэкӀэ, шъаом игъусэхэм анэкӀын алъэкӀына? Хьау, шъаор ягъусэфэкӀэ, анэкӀын алъэкӀыщтэп, – ариӀожьыгъ Исус ахэмэ. 20– Ау шъаор затырахыщт мафэхэр къэкӀощтых. А мафэр къызыкӀокӀэ, анэкӀыщт.
21– ШэкӀыкӀэм щыщ идэжьын щыгъыныжъым зыми фишӀырэп. Аущтэу ышӀымэ, шэкӀыкӀэм щыщ идэжьыным щыгъыныжъыр зэӀитхъынышъ, гъуанэр нахь ин ышӀыщт. 22Джащ фэдэу, зыми сэнэпс шӀыгъакӀэр шъонтыжъхэм аригъахъорэп. Аущтэу ышӀымэ, сэнэпсым шъонтхэр къызэгуитхъынхэшъ, сэнэпсыри къичъыщт, шъонтхэри кӀодыщтых. Ау сэнэпс шӀыгъакӀэр шъонтыкӀэхэм арагъэхъон фае.
Шэмбэт мафэм Исус игъогу рыкӀохэрэм коцышъхьэхэр къызэрэпачыгъэхэр
(Маттэ 12:1-8; Лука 6:1-5)
23Шэмбэт мафэ горэм Исус коц хьасэхэр зэпичыхэзэ кӀощтыгъ. Игъогу рыкӀохэрэр кӀом хэтхэу, коцышъхьэхэр къыпачыхэу аублагъ. 24Фарисейхэм Исус къыраӀуагъ:
– Еплъ, ахэмэ шэмбэт мафэм хабзэкӀэ пшӀэ мыхъущтыр#2:24 пшӀэ мыхъущтыр – пегъымбар Мусэ и Тэурат хабзэ иунашъо тетэу шэмбэт мафэм Ӏоф ашӀэ хъущтыгъэп. Еплъ Пегъымбар Мусэ ятӀонэрэ тхылъэу ытхыгъэм 34:21. сыд пае ашӀэра?
25– Даутэрэ игъусэхэмрэ къин хэтхэу, мэлакӀэ лӀэхэ зэхъум, ащ ышӀагъэм зыкӀи шъуеджагъэба? – ариӀожьыгъ Исус. 26– Абиатар зыцӀэ дин пэщэшхом#2:26 дин пэщэшхор – еплъ Маттэ 2:4. имафэхэм Даутэ Тхьэм иунэ ихьи, цӀыфхэм Тхьэм ыпашъхьэ ралъхьэгъэ хьалыгъур#2:26 цӀыфхэм Тхьэм ыпашъхьэ ралъхьэгъэ хьалыгъур – еплъ Пегъымбар Мусэ ящэнэрэ тхылъэу ытхыгъэм 24:5-9. ышхыгъ. А хьалыгъур дин пащэхэм анэмыкӀ хабзэкӀэ зыгорэм ышхы хъущтыгъэп, ау Даутэ ышхыгъ, игъусэхэми аригъэшхыгъ.
27ЕтӀанэ Исус ариӀуагъ:
– Тхьэм шэмбэт мафэр цӀыфым пае къыгъэхъугъэ нахь, цӀыфыр шэмбэт мафэм пае къыгъэхъугъэп. 28Арышъ, ЦӀыф Лъэпкъым ы Къо шэмбэт мафэм итхьэмат.
Currently Selected:
Марк 2: AdgNT14
Highlight
Share
Copy
Want to have your highlights saved across all your devices? Sign up or sign in
© Институт перевода Библии, 1991, 1992, 2014. Стокгольм
