Марк 3
3
ЯЩЭНЭРЭШЪХЬ
ЗыӀэ лъэныкъо пыгъукӀыгъэ лӀы горэ Исус зэригъэхъужьыгъэр
(Маттэ 12:9-14; Лука 6:6-11)
1Джыри зэ Исус синэгогум чӀэхьагъ. ЗыӀэ лъэныкъо пыгъукӀыгъэу лӀы горэ ащ чӀэтыгъ. 2Шэмбэт мафэм тефэу Исус а лӀыр ыгъэхъужьыщтмэ, фарисейхэр еплъакӀощтыгъэх, зэрагъэмысэн Ӏоф горэ къагъотыным пае. 3Исус зыӀэ лъэныкъо пыгъукӀыгъэ лӀым риӀуагъ:
– Къэтэджи, утыгум къихь.
4ЕтӀанэ ахэмэ ариӀуагъ:
– Шэмбэт мафэм шӀу пшӀэныр ара, хьауми бзэджагъэ пшӀэныр ара хабзэкӀэ хъущтыр, псэ мыкӀодэу къэбгъэнэжьыныр ара, хьауми бгъэкӀодыныр ара? Ау ахэмэ заушъэфыгъ.
5Ахэмэ яжъалымыгъэ Исус ыгу къеуи, губжыгъэу ахаплъи, лӀым риӀуагъ:
– О пӀэ къэщэй. ЛӀым ыӀэ къыщэигъ, адрэ Ӏэ псауми фэдэ хъужьыгъэ. 6Джащыгъум фарисейхэр синэгогум чӀэкӀыжьхи, ежьхэмрэ пачъыхьэ Ирод дезгъаштэхэрэмрэ#3:6 пачъыхьэ Ирод дезгъаштэхэрэр – еплъ Маттэ 22:16. Исус агъэкӀодынэу зэдырахъухьагъ, зэрагъэкӀодыщт шӀыкӀэмкӀэ зэупчӀыжьхэзэ.
ЦӀыф купышхор Исус зэрэкӀэлъыкӀуагъэр
7Исус игъогу рыкӀохэрэр игъусэхэу а чӀыпӀэм икӀыжьи, Галилей псыхъураем кӀуагъэ. Галилей хэкум щыщ цӀыфыбэхэр Исус ыуж ихьагъэх. 8Исус ышӀэгъэ Ӏоф пстэури зэхахыгъэти, Иудей хэкуми, Ерусалими, Идумей хэкуми, Иордан псыхъом иадрабгъу щыӀэ хэкуми, къалэхэу Тиррэ Сидонрэ#3:8 къалэхэу Тиррэ Сидонрэ – еплъ Маттэ 11:21. алъэныкъоми цӀыфыбэхэр къарыкӀыхи, Исус дэжь къэкӀуагъэх. 9Ащ дэжьым цӀыф купышхор тезэрэмыгъэбэнэным пае, Исус игъогу рыкӀохэрэм къуашъо ежь хьазырэу фаӀыгъынэу ариӀуагъ. 10Сыда пӀомэ, Исус цӀыфыбэхэр ыгъэхъужьыщтыгъэти, уз зиӀэ пстэури нэсынхэу задзыщтыгъ. 11ДжынэпцӀэ Ӏаехэми Исус залъэгъукӀэ, ыпашъхьэ зырадзыхти, куощтыгъэх: «О Тхьэм ури Къу». 12Ау Исус ежь зыщыщыр цӀыфхэм къарамыгъэшӀэнэу джынапцӀэхэм ишъыпкъэу афигъэпытэщтыгъ.
Исус игъогу рыкӀорэ нэбгырэ пшӀыкӀутӀур зэригъэнэфагъэр
(Маттэ 10:1-4; Лука 6:12-16)
13Исус Ӏуашъхьэм дэкӀуаий, ежь зыфаехэм къяджагъ, ахэри ыдэжь къэкӀуагъэх. 14Нэбгырэ пшӀыкӀутӀу ежь игъусэнхэуи, Тхьэм игущыӀэхэр цӀыфхэм арагъэӀунхэм пае, ыгъэкӀонхэуи ыгъэнэфагъ. 15Ащ нэмыкӀэу, сымаджэхэр агъэхъужьынхэуи, джынапцӀэхэр цӀыфхэм ахафынхэуи тетыгъо аритыгъ. 16Исус нэбгырэ пшӀыкӀутӀоу ыгъэнэфагъэр мыхэр арых: Симонэу Исус ятӀонэрэ цӀэу Петрэ зыфиусыгъэр; 17Зебедей ыкъуитӀоу Якъубэрэ Иуанрэ (ахэмэ ятӀонэрэ цӀэу Бне-Регеш афиусыгъ; Бне-Регешым къикӀырэр «Шыблэм ыкъохэр» ары); 18етӀанэ Индрыс, Филипп, Бар-Талмай, Маттэ, Фомэ, Алфей ыкъо Якъуб, Таддей, Симонэу зихэгъэгу ыпсэ емыблэжьэу фэлажьэщтыгъэр#3:18 Симонэу зихэгъэгу ыпсэ емыблэжьэу фэлажьэщтыгъэр – еплъ Маттэ 10:4., 19Иудэ Искариот. А Иудэр ары нэужым Исус тетыгъо зиӀэхэм язгъэубытыгъэр.
Исусрэ джынапцӀэхэм япащэу БаӀал-Зэбулрэ
(Маттэ 12:22-32; Лука 11:14-23; 12:10)
20ЕтӀанэ Исус унэм кӀожьыгъэ. Ежьыррэ игъогу рыкӀохэрэмрэ шхэгъу имыфэхэзэ цӀыф купышхо джыри къэзэрэугъоигъ. 21Исус иунэкъощхэм ежь къызэригъэзэжьыгъэр зызэхахым, «Ащ зишӀэжьырэп» аӀуи, къащэжьынэу лъыкӀуагъэх.
22Тэурат егъэджэкӀо пащэхэу Ерусалим къикӀыгъэхэм Исус ехьылӀагъэу аӀощтыгъ:
– БаӀал-Зэбулэу#3:22 БаӀал-Зэбул – еплъ Маттэ 10:25. ащ хэс, БаӀал-Зэбулэу джынапцӀэхэм япащэ илъэкӀ ары джынапцӀэхэр цӀыфхэм зэрахифырэр.
23Арыти, Исус ахэмэ къяджи, гъэсэпэтхыдэхэмкӀэ ариӀуагъ:
– Шэйтаным сыдэущтэу шэйтаныр цӀыф горэм хифын ылъэкӀына? 24Зы пачъыхьагъум лъэныкъуитӀоу зигощымэ, щыӀэжьын ылъэкӀыщтэп. 25Ащ фэдэу зы унэри лъэныкъуитӀоу зигощымэ, щыӀэжьын ылъэкӀыщтэп. 26Шэйтанри къэтэджэу, ежь ышъхьэ пэуцужьэу, лъэныкъуитӀоу зигощымэ, ари щыӀэжьын ылъэкӀыщтэп, икӀодыжьыгъо къэсыгъэ нахь. 27Зыми кӀуачӀэ зиӀэ лӀы горэм иунэ ихьэу, ихьапщыпхэр къырихын ылъэкӀыщтэп, ыпэ рапшӀэу а лӀэу кӀуачӀэ зиӀэр зэкӀоцӀимыпхэмэ. Ау а лӀыр зэкӀоцӀипхэмэ, иунэ къыхъункӀэн ылъэкӀыщт. 28Шъыпкъэр шъосэӀо, цӀыфхэм сыд фэдизэу Тхьэр агъэпцӀыми, япсэкӀод пстэури къафэгъущтых. 29Ау хэтми Тхьэм ы Псэ ЛъапӀэ зыгъэпцӀырэм егъашӀэми фэгъущтэп, мыкӀодыжьын псэкӀодкӀэ мысэ мэхъу нахь.
30Исус ар зыкӀиӀуагъэр «ДжынэпцӀэ Ӏае хэс» ахэмэ ежь ехьылӀагъэу аӀуагъэти ары.
Исус янэрэ ышхэмрэ
(Маттэ 12:46-50; Лука 8:19-21)
31Джащыгъум Исус янэрэ ышхэмрэ къэкӀуагъэх. Щагум дэтхэу, Исус къеджэнэу зыгорэ агъэкӀуагъ. 32ЦӀыф купышхоу Исус къетӀысэкӀыгъэхэм къыраӀуагъ:
– О уяни, пшыхэри, пшыпхъухэри щагум дэтхэу къыпкӀэупчӀэх.
33– Хэта сяни сшыхэри? – ариӀожьыгъ Исус ахэмэ.
34ЕтӀанэ къетӀысэкӀыгъэхэм ахаплъи, къыӀуагъ:
– Мыхэр ары сэ сянэри сшыхэри. 35Хэти Тхьэр зыфаер зыгъэцакӀэрэр ары сэ сшыри, сшыпхъури, сянэри.
Currently Selected:
Марк 3: AdgNT14
Highlight
Share
Copy
Want to have your highlights saved across all your devices? Sign up or sign in
© Институт перевода Библии, 1991, 1992, 2014. Стокгольм
