Марк 4
4
ЯПЛӀЭНЭРЭШЪХЬ
Чылапхъэр зыпхъырэм ехьылӀэгъэ гъэсэпэтхыдэр
(Маттэ 13:1-9; Лука 8:4-8)
1Исус джыри псыхъурэе Ӏушъом дэжь цӀыфхэм Тхьэм игущыӀэхэр щаригъашӀэхэу ыублагъ. ЦӀыфхэу Исус дэжь къыщызэрэугъоигъэхэр зэрэбагъэм пае, ар псым тет къуашъо горэм итӀысхьагъ. ЗэкӀэ цӀыфхэр псыӀушъом Ӏутыгъэх. 2ГъэсэпэтхыдэхэмкӀэ цӀыфхэм бэ аригъашӀэщтыгъэр, мыщ фэдэу ариӀозэ:
3– ШъукъэдаӀу. ЛӀы горэм чылапхъэ ыпхъынэу дэкӀыгъ. 4Чылапхъэр ыпхъызэ, ащ щыщ тӀэкӀу гъогум тетэкъуагъ. Бзыухэр къэбыбхи, ар ашыпыгъ. 5Зы тӀэкӀуи етӀэ макӀэ зыхэлъ чӀыгу мыжъуалъэм тетэкъуагъ. ЧӀыгур куугъэпти, шӀэх дэдэу къыхэкӀыгъ, 6ау тыгъэр къызыдэкӀуаем, пыгъукӀыгъ, лъэпсэ куу зэримыӀагъэм пае гъугъэ. 7НэмыкӀ тӀэкӀуи панэхэм ахэтэкъуагъ. Панэхэр къэкӀыхи, чылапхъэу къыхэкӀыгъэхэр атхьалэхи, зи къапагъэкӀагъэп. 8ЕтӀани зы тӀэкӀу чӀыгу дэгъум хэтэкъуагъ. Ахэр къыхэкӀыхи, къыдэкӀуаехи, шъхьэлъагъэх. Зы шъхьэ налъэм коцыцэ щэкӀ къытыгъ, адрэм тӀокӀищ, адрэми коцыцишъэ къикӀыгъ.
9ЕтӀанэ Исус къыпигъэхъожьыгъ:
– РыдэӀонэу тхьакӀумэ зиӀэм зэхерэх.
Исус цӀыфхэм гъэсэпэтхыдэхэр къызкӀафиӀуатэщтыгъэр
(Маттэ 13:10-17; Лука 8:9-10)
10ЦӀыфхэр зэбгырыкӀыжьхи, Исус изакъоу къызэнэжьым, игъогу рыкӀорэ нэбгырэ пшӀыкӀутӀумрэ игъусэхэмрэ гъэсэпэтхыдэхэм яхьылӀагъэу къеупчӀыгъэх.
11– Тхьэм и Тетыгъошхо ишъэфхэр шъушӀэнхэу Тхьэм фитыныгъэ къышъуитыгъ, – ариӀуагъ Исус, – ау нэмыкӀ цӀыфхэм гъэсэпэтхыдэхэмкӀэ Ӏоф пстэури алъэӀэсы. 12Аущтэу#4:12 Аущтэу… – еплъ Пегъымбар Ешайа тхылъэу ытхыгъэм 6:9-10. «ахэр анэхэмкӀэ еплъыхэ пэтми, зи алъэгъущтэп, атхьакӀумэхэмкӀэ даӀохэ пэтми, зи къагурыӀощтэп. Армырмэ, Тхьэм дэжь къагъэзэжьыщтыгъ, ащи япсэкӀодхэр афигъэгъущтыгъэх».
Чылапхъэр зыпхъырэм ехьылӀэгъэ гъэсэпэтхыдэм къикӀырэр
(Маттэ 13:18-23; Лука 8:11-15)
13Ащ ыуж Исус ахэмэ ариӀуагъ:
– Мы гъэсэпэтхыдэр къыжъугурымыӀоу, адрэ гъэсэпэтхыдэ пстэури сыдэущтэу къыжъугурыӀощта? 14Зыпхъырэм Тхьэм игущыӀэхэр епхъы.
15ЦӀыфхэм ащыщэу зы купыр гъогум тепхъэгъэ чылапхъэм фэд. Тхьэм игущыӀэхэр зэрэзэхаххэу, шэйтаныр къэкӀошъ, гущыӀэхэу агухэм арылъ хъугъэхэр рехыжьы.
16– Адрэ цӀыф купыр чӀыгу мыжъуалъэм тепхъэгъэ чылапхъэм фэд. Тхьэм игущыӀэхэр зэрэзэхаххэу, а гущыӀэхэр гушӀуагъокӀэ аштэх. 17Ау ахэмэ агухэмкӀэ лъапсэ зэрямыӀэм пае, шӀошъхъуныгъэм игъогу бэрэ тетыжьхэрэп. Тхьэм игущыӀэхэм апаекӀэ, е гузэжъогъу зэрэхафэхэу, е цӀыфхэм ахэмэ къин зэрарагъэщэчэу, шӀошъхъуныгъэм игъогу текӀыжьых. 18ЕтӀанэ зы цӀыф купыр панэхэм ахэпхъэгъэ чылапхъэм фэд. Ахэмэ Тхьэм игущыӀэхэр зэхахых, 19ау мы дунаим игугъухэри, баиныгъэм игъэпцӀэныгъи, нэмыкӀ Ӏоф мыхъо-мышӀэхэм акӀэхъопсынхэри агухэм ехьэхэшъ, Тхьэм игущыӀэхэу агухэм арылъхэр атхьалэхэшъ, а цӀыфхэми шӀугъэ къапыкӀырэп. 20ЕтӀани нэмыкӀ цӀыф купыр чӀыгу дэгъум хэпхъэгъэ чылапхъэм фэд. Ахэмэ Тхьэм игущыӀэхэр зэхахыхэшъ, а гущыӀэхэр аштэх, ахэми шӀугъэ къапэкӀы, е фэдэ щэкӀ, е фэдэ тӀокӀищ, е фэдишъэ.
Щэлъэ чӀэгъым чӀэт остыгъэр
21Ащ ыуж Исус ариӀуагъ:
– Зыгорэм остыгъэр къыхьэу, щэлъэ чӀэгъым е пӀэкӀор чӀэгъым чӀегъэуцуа? Остыгъэр тетыпӀэ лъагэм тырегъэуцо нахь. 22Сыда пӀомэ, сыд щыщми гъэбылъыгъэр къэлъэгъожьыщт, сыд щыщми чӀэухъумагъэри къэнэфэжьыщт. 23РыдэӀонэу тхьакӀумэ зиӀэм зэхерэх.
24Исус етӀанэ ариӀуагъ:
– Зэхэшъухырэм тэрэзэу гу лъышъут. Шъо шапхъэу зэрэшъушырэм фэдэ шапхъэкӀэ Тхьэм шъо къышъуфишыжьыщт, нахьыбэуи къышъуфыхигъэхъощт. 25Тхьэм зиӀэм нахьыбэ къыритыщт, ау зимыӀэм иӀэ тӀэкӀури Ӏихыжьыщт Тхьэм.
Чылапхъэу къэкӀырэм ехьылӀэгъэ гъэсэпэтхыдэр
26Исус мыри къыӀуагъ:
– Тхьэм и Тетыгъошхо зыфэдэр мары. ЛӀы горэм чылапхъэр чӀыгум хепхъэ. 27Чэщым мэчъые, мафэми къэтэджы, чылапхъэр къэкӀы, къыдэкӀуае, ау ар зэрэхъурэр ащ ышӀэрэп. 28ЧӀыгум ежь-ежьырэу къыхэкӀы, ыпэ рапшӀэу пкъыр къыхэкӀы, етӀанэ ар мэшъхьалъэ, етӀанэ мэтӀыргъо. 29Шъхьэналъэхэр зытӀыргъохэкӀэ, хыныгъор къэсыгъэшъ, ахыжьы.
Андэгурацэм ехьылӀэгъэ гъэсэпэтхыдэр
(Маттэ 13:31-32; Лука 13:18-19)
30– Тхьэм и Тетыгъошхо сыдым фэдгъэдэн? – къыӀуагъ Исус. – Хьауми сыд гъэсэпэтхыдэкӀэ ар зыфэдэр къэтӀон? 31Ар зыфэдэр андэгурацэр#4:31 андэгурацэр – горчицэ зыфаӀорэм ыцэ ары, ахэр жъгъэй дэдэх. ары. ЧӀыгум хэфэфэ, дунаим тет цэ пстэуми анахь цӀыкӀу. 32Ау чӀыгум зыхафэкӀэ, къэкӀышъ, зы илъэс зыныбжь къэкӀыгъэ пстэуми анахь ин мэхъу. Ижьауи къолэбзыухэр чӀэсынхэ алъэкӀынэу къутэмэ инхэри къыгокӀэх.
33Ащ фэдэ гъэсэпэтхыдабэхэмкӀэ цӀыфхэм зэхашӀыкӀын зэралъэкӀыщтым тетэу, Исус Тхьэм игущыӀэхэр ариӀощтыгъ. 34Гъэсэпэтхыдэ хэмытэу цӀыфхэм адэгущыӀэщтыгъэп. Ау игъогу рыкӀохэрэр язакъоу къызынэжьхэкӀэ, пстэури зэхаригъэшӀыкӀыщтыгъ.
Исус жьыбгъэ щынэгъошхор зэригъэуцугъэр
(Маттэ 8:23-27; Лука 8:22-25)
35А мэфэ дэдэм, пчъыхьэм, Исус игъогу рыкӀохэрэм ариӀуагъ:
– НекӀо, псыхъураем иадрабгъу тызэпырыжъугъэкӀ.
36Игъогу рыкӀохэрэр цӀыф купышхом къыхэкӀыхи, Исус къуашъоу зэрысым къыдитӀысхьэхи, ежьагъэх. НэмыкӀ къуашъохэри игъусагъэх. 37Жьыбгъэ щынэгъошхо къэхъуи, къуашъом псыорхэр къиохэу, псыр изы хъоу фежьагъ. 38Исус ышъхьэ шъхьантэм телъэу, къошъо кӀоцӀым ыкӀэкӀэ щычъыещтыгъ. Игъусэхэм къагъэущи, раӀуагъ:
– Дин гъэсакӀу, тызэрэкӀодырэм уигъэгумэкӀырэба?
39Исус къэтэджи, жьыбгъэшхом егыий, псым риӀуагъ:
– Самбыр! Щыгъэт! Жьыбгъэр уцужьи, кӀым-сым дэдэ къэхъугъ. 40ЕтӀанэ игъогу рыкӀохэрэм ариӀуагъ:
– Сыд пае ащ фэдизэу шъущтэрэ? ШӀошъхъуныгъэ джыри шъуимыӀэу ара?
41– Хэта мыр, жьыбгъэшхори псыри зыгъэдаӀорэр? – зэраӀожьыгъ ахэмэ щтагъэхэу.
Currently Selected:
Марк 4: AdgNT14
Highlight
Share
Copy
Want to have your highlights saved across all your devices? Sign up or sign in
© Институт перевода Библии, 1991, 1992, 2014. Стокгольм
