Марк 13

ЯПШӀЫКӀУЩЭНЭРЭШЪХЬ

Тхьэм иунэшхо зэрэзэхакъутэщтыр Исус къызэриӀуагъэр

(Маттэ 24:1-2; Лука 21:5-6)

1Исус Тхьэм иунэшхо къычӀэкӀыжьызэ, игъогу рыкӀохэрэм ащыщэу зыгорэм къыриӀуагъ:

– Еплъ, дин гъэсакӀу! Мыхэр сыдэу мыжъо ин дэдэха! Мыхэр сыдэу унэ гъэшӀэгъонха!

2– Мы унэшхохэр олъэгъуха? – Исус ащ риӀожьыгъ. – МыжъуитӀу къызэтемынэжьэу пстэури къызэхэтэкъощт.

Къиныбэ щэчыным иублапӀ

(Маттэ 24:3-14; Лука 21:7-19)

3Ащ ыуж Исус Тхьэм иунэшхо къыпэчӀынатӀэу Елеон Ӏуашъхьэм тесэу, Петри, Якъуби, Иуани, Индрыси язакъоу къызэнэжьхэм, къеупчӀыгъэх:

4– КъытаӀу, о зыфэпӀогъэ Ӏофхэр сыдигъо къэхъущтых, ахэр зэкӀэ къызэрэхъущтхэм янэшанэри сыд фэда?

5– Зыми шъукъызэримыгъэпцӀэщтым шъуфэсакъ, – ариӀоу ахэмэ ыублагъ Исус. 6– Сэ сцӀэкӀэ зэджэжьхэу, «Сэры Христосыр» аӀоу, цӀыфхэу къэкӀощтхэр бэ хъущтых, цӀыфыбэхэри агъэпцӀэщтых. 7Ау благъэми чыжьэми зэо къэбар зызэхэшъухыкӀэ, шъумыщын. А Ӏофхэр къэхъунхэ фае, ау дунаим икӀэух ащыгъум къэсыгъэгоп. 8Зы лъэпкъыр адрэ лъэпкъым, зы пачъыхьагъури адрэ пачъыхьагъум езэонэу къэтэджыщт. ЧӀыпӀэ-чӀыпӀэхэми чӀыгур инэу ащысысыщт, гъаблэхэри къэхъущтых. А Ӏофхэр къиныбэ щэчыным иублапӀ.

9– Ау шъо шъузыфэсакъыжь. Тхьэмэтэ хасэхэм апашъхьэ шъуаращэщт, синэгогухэми къамыщкӀэ къащышъоощтых. Сэ сигъогу шъузэрэрыкӀорэм пае, Ӏэшъхьэтетхэмрэ пачъыхьэхэмрэ апашъхьэ къэбарышӀум шыхьат шъуфэхъунэу шъукъиуцощт. 10Ау ыпэ рапшӀэу къэбарышӀур лъэпкъ пстэуми арагъэӀун фае. 11ХьыкумэшӀым ыпашъхьэ шъуращэнэу шъузаубыткӀэ, «Сыда тӀощтыр?» шъуӀоу, ыпэ рапшӀэу шъумыгумэкӀ. А сыхьат дэдэм гущыӀэхэу Тхьэм ы Псэ ЛъапӀэ шъугухэм къарилъхьэхэрэр къашъуӀох; сыда пӀомэ, шъорэп къэгущыӀэщтыр, Тхьэм ы Псэ ЛъапӀ ары нахь.

12– ЦӀыфым ежь ыш, тым ежь илъфыгъэ тетыгъо зиӀэхэм арагъэукӀыным пае, арагъэубытыщт. Лъфыгъэхэри ны-тыхэм апэуцущтых, тетыгъо зиӀэхэми арагъэукӀыщтых. 13Шъо сэ сцӀэ зэрэжъугъэлъапӀэрэм пае, цӀыф пстэуми шъуауджэгъущт. Ау кӀэухым нэсыфэ теубытагъэ зиӀэр мыкӀодэу Тхьэм къыгъэнэжьыщт.

Гузэжъогъушхор

(Маттэ 24:15-28; Лука 21:20-24)

14– Ау «Зэхэзыкъутэрэ ГущыкӀыгъоу»#13:14 «Зэхэзыкъутэрэ ГущыкӀыгъор» – еплъ Маттэ 24:15. пегъымбар Даниел зигугъу ышӀыгъэр зыдэщымытын фэе чӀыпӀэм щытэу зышъулъэгъукӀэ (еджэрэм къыгурэрэӀу), ащыгъум Иудей хэкум ис цӀыфхэр Ӏуашъхьэхэм ярэкӀолӀэжьых. 15Унашъхьэм тетыри къызехыкӀэ, зыгорэ зыдихьынэу унэм ерэмыхьажь. 16Губгъом итыми ищыгъын кӀыӀутелъ зыдихьынэу къерэмыгъэзэжь. 17А мафэхэм бзылъфыгъэ лъэрмыхьхэмрэ сабый быдзашъо зиӀэхэмрэ гъогу мыгъо теуцощтых. 18Мы Ӏофхэр кӀымафэм темыфэнхэу Тхьэм шъуелъэӀу; 19сыда пӀомэ, а мафэхэм гузэжъогъушхо дунаир хэфэщт. Ащ фэдэ гузэжъогъушхо Тхьэм дунаир къызигъэхъугъэм щегъэжьагъэу джырэ нэсыфэ щыӀагъэп ыкӀи щыӀэжьыщтэп. 20Зиусхьаным а мафэхэр нахь макӀэ ымышӀыгъэхэмэ, зы цӀыфи мыкӀодэу къэнэжьыщтыгъэп. Ау ежь къыхихыгъэ цӀыфхэм яхьатыркӀэ Зиусхьаным а мафэхэр нахь макӀэ ышӀыгъ. 21А мафэхэм «Мары, Христос мыщ дэжьым щыӀ» ыӀоу е «Христос модэ щыӀ» ыӀоу, зыгорэм къышъуиӀомэ, шъушӀошъ шъумыгъэхъу. 22Христос нэпцӀхэмрэ пегъымбар нэпцӀхэмрэ къэлъэгъощтых. Ахэмэ нэшэнэ гъэшӀэгъонхэри Ӏофышхо гъэшӀэгъонхэри къагъэлъэгъощтых, амал щыӀэмэ, Тхьэм къыхихыгъэ цӀыфхэр агъэпцӀэнхэм пае. 23Ау шъо шъузфэсакъыжь, а Ӏоф пстэури къэхъуным ыпэкӀэ ахэмэ якъэбар къышъосӀуагъ.

ЦӀыф Лъэпкъым ы Къо дунаим къызэрэкӀожьыщтыр

(Маттэ 24:29-31; Лука 21:25-28)

24– Ау гузэжъогъушхом ыуж а мафэхэм тыгъэр ушӀункӀыжьыщт, мазэри къэнэфыжьыщтэп. 25Жъуагъохэри уашъом къефэхыщтых, уашъом щыӀэ кӀуачӀэхэри хъыещтых. 26Джащыгъум ЦӀыф Лъэпкъым ы Къо ошъуапщэхэм ахэтэу, лъэкӀышхорэ щытхъушхорэ иӀэхэу, къакӀоу цӀыфхэм алъэгъущт. 27Джащыгъум ЦӀыф Лъэпкъым ы Къо мэлэӀичхэр ыгъэкӀощтых, дунэе лъэныкъуиплӀым, зы ошъо чапэм къыщегъэжьагъэу адрэ ошъо чапэм нэс, ежь ицӀыфхэу къыхихыгъэхэр къыхащыхэзэ, ежь къыфаугъоижьынхэу.

Ынджыр чъыгым шъыпкъэу къыдгуригъаӀорэр

(Маттэ 24:32-35; Лука 21:29-33)

28– Ынджыр чъыгым къехъулӀэрэмкӀэ Ӏоф горэ зэжъугъашӀэ: икъутамэхэм псы къахахьэу, ытхьапэхэр къыпыкӀэхэ зыхъукӀэ, гъэмафэр зэрэблагъэр шъошӀэ. 29Ащ фэдэу шъори, мы Ӏофхэр къэхъухэу зышъулъэгъукӀэ, ЦӀыф Лъэпкъым ы Къо гъунэгъоу, къэлапчъэм дэжь зэрэщытыр зэжъугъашӀэ. 30Шъыпкъэр шъосэӀо, мы Ӏофхэр зэкӀэ къэхъунхэм ыпэкӀэ, мы лъэпкъыр кӀодыщтэп. 31Уашъомрэ чӀылъэмрэ кӀодыжьыщтых, ау сэ сигущыӀэхэр кӀодыжьыщтхэп.

А мафэри а сыхьатри къызысыщтыр зыми ышӀэрэп

(Маттэ 24:36-44)

32– Ау а мафэр е а сыхьатыр къызысыщтыр зыми ышӀэрэп. Уашъом щыӀэ мэлэӀичхэми ашӀэрэп, Тхьэм ы Къуи ышӀэрэп. Ты лъэпӀэ закъор ары ныӀэп ар зышӀэрэр. 33Шъузфэсакъыжь! Шъумычъыеу шъусакъ, Тхьэми шъуелъэӀу; сыда пӀомэ, а сыхьатыр къызысыщтыр шъушӀэрэпышъ ары! 34Ар зыфэдэр мары: чыжьэу къыкӀухьанэу лӀы горэ иунэ екӀы. Хэти ежь иӀоф ышӀэнэу иунэӀутхэм иунэ аӀэкӀелъхьэ, къэлапчъэм Ӏут къэрэгъулэми мычъыеу сакъынэу унашъо фешӀы. 35Арышъ, шъори шъумычъыеу шъусакъ; сыда пӀомэ, пчыхьэшъхьапэр арыми, чэщныкъор арыми, атэкъэӀогъур арыми, пчэдыжь нэфшъагъор арыми, унэр зиер къызыкӀожьыщтыр шъушӀэрэпышъ ары! 36Ар шъумышӀахэу къызыкӀожькӀэ, шъучъыеу, шъупэмыплъэу зыкъешъумыгъэгъот. 37Шъо къышъуасӀорэр зэпстэуми ясэӀо: шъумычъыеу шъусакъ!

Currently Selected:

Марк 13: AdgNT14

Highlight

Copy