Марк 6

ЯХЭНЭРЭШЪХЬ

Назарет дэс цӀыфхэм Исус зэрамыштагъэр

(Маттэ 13:53-58; Лука 4:16-30)

1Исус игъогу рыкӀохэрэр игъусэхэу, а чӀыпӀэм икӀыжьи, янэ икъалэ кӀожьыгъэ. 2Шэмбэт мафэр къызэсым, синэгогум цӀыфхэм Тхьэм игущыӀэхэр щаригъашӀэу ыублагъ. ЕдэӀущтыгъэ цӀыфыбэхэм агъэшӀагъоу къаӀуагъ:

– Мы лӀым къыӀохэрэр тыдэ къырихыгъэха? Сыдэу акъылышӀу Тхьэм къыритыгъа! Сыдэу Ӏофышхо гъэшӀэгъонха къыӀэкӀэкӀыхэрэр! 3Мерэм ыкъо пхъашӀэр арыба мыр, Якъубэ, Иосый, Иудэ, Симон ашыр? Ышыпхъухэри тэ къытхэсхэба? Аущтэу Исус пае агу мыхъун къырагъэхьагъ.

4– Пегъымбарым лъытэныгъэ фэзымышӀыхэрэр ежь янэ икъалэ дэсхэр, ежь иӀахьылхэр, ежь иунагъо щыщхэр арых ныӀэп, – ариӀуагъ Исус ахэмэ.

5Исус сымэджэ заулэм ыӀэхэр атырилъхьэхэу зэригъэхъужьыгъэхэм нэмыкӀ а чӀыпӀэм Ӏофышхо гъэшӀэгъон зи щишӀагъэп. 6Ахэмэ яшӀошъмыхъуныгъи ыгъэшӀэгъуагъ.

Исус игъогу рыкӀорэ нэбгырэ пшӀыкӀутӀур Тхьэм фэлэжьэнхэу зэрэдигъэкӀыгъэхэр

(Маттэ 10:1, 5-15; Лука 9:1-6)

ЕтӀанэ цӀыфхэм Тхьэм игущыӀэхэр аригъашӀэхэзэ, гъунэгъу къуаджэхэр къыкӀухьэщтыгъ. 7Джащыгъум Исус игъогу рыкӀорэ нэбгырэ пшӀыкӀутӀумэ къяджи, тӀурытӀоу дигъэкӀыхэу ыублагъ. ДжынэпцӀэ Ӏаехэр цӀыфхэм ахафынхэу тетыгъо аритыгъ. 8Мы унашъор афишӀыгъ:

– Гъогум шъузытехьэкӀэ, зы бэщ нэмыкӀ зи зыдэшъумышт. Хьалыгъуи, Ӏалъмэкъи, бгырыпхым илъ ахъщи зыдэшъумыштэх, 9ау цокъэ къызэрыкӀохэр зыщышъулъэх. ДжэнитӀуи зыщышъумылъ.

10– ХьакӀэу унэ горэм шъуихьэмэ, а чӀыпӀэм шъукъекӀыжьыфэ, бысымыр зэблэшъумыхъу, – къыпигъэхъожьыгъ Исус. 11– ЧӀыпӀэ горэм шъущырамыгъэблагъэмэ е къыщышъомыдэӀухэмэ, ащ шъукъикӀыжь, мыхъунэу ашӀагъэмкӀэ шыхьат щыхъуным пае, ахэмэ апашъхьэ шъуицуакъэхэм ателъ сапэр атешъуутхыпкӀыкӀ. Шъыпкъэр шъосэӀо, ахърэт мафэм а къалэм къинэу ыщэчыщтым нахьи, Содомрэ Ӏаморрэрэ къинэу ащэчыщтыр нахь мэкӀэщт.

12Аущтэу а нэбгырэ пшӀыкӀутӀур гъогум техьи, «ШъуипсэкӀодшӀагъэхэм шъуафыкӀэгъожь» араӀозэ цӀыфхэм, къэбарышӀур агъэӀоу аублагъ. 13ДжынэпцӀабэхэр цӀыфмэ ахафыщтыгъэх, сымэджабэхэр дагъэ ащафэзэ, агъэхъужьыщтыгъэх.

УмэхъэкӀо Иуан ышъхьэ зэрэпаупкӀыгъэр

(Маттэ 14:1-12; Лука 9:7-9)

14Исус цӀэрыӀо хъугъэти, икъэбар пачъыхьэу Ирод#6:14 пачъыхьэ Ирод – еплъ Маттэ 14:1. нэсыгъ. Зыгорэхэм аӀощтыгъ:

– Мыр умэхъэкӀо Иуан ары. Ар лӀагъэхэм къахэтэджыкӀыжьыгъ, джары ащ фэдэ лъэкӀ зыхэлъ Ӏофышхохэр зыкӀыӀэкӀэкӀыхэрэр.

15– Ар пегъымбар Иляс#6:15 пегъымбар Иляс – еплъ Маттэ 16:14. ары, – аӀощтыгъ нэмыкӀ цӀыфхэм.

– Ар пегъымбар гор, пэсэрэ пегъымбархэм афэдэу, – аӀощтыгъ етӀани нэмыкӀхэми.

16Ау Ирод ахэмэ ягущыӀэхэр зызэхехым, ыӀуагъ:

– Иуанэу зышъхьэ пязгъэупкӀыгъэр лӀагъэхэм къахэтэджыкӀыжьыгъ.

17Ирод ар зыкӀиӀуагъэр мыры: ежь ышэу Филипп зыцӀэр псауми, Ирод а Филипп ишъузэу Иродиадэ къыщэжьыгъ. 18Ар къызэрищэжьыгъэм пае, Иуан Ирод риӀощтыгъ: «О пшы ишъуз къэпщэжьыныр хабзэкӀэ хъущтэп». 19Ащ пае Иродиадэ Иуан гужъ фыриӀэ хъугъэ. Иродиадэ ихьатыркӀэ Ирод идзэлӀхэм Иуан аригъэубыти, хьапсым чӀаригъэдзагъ. Иродиадэ Иуан аригъэукӀыным фэягъ, ау къыдэхъущтыгъэп. 20Сыда пӀомэ, Иуан шъыпкъагъэ зиӀэ зэрэцӀыф лъапӀэр Ирод ышӀэщтыгъэти, щыщынэщтыгъ, ыухъумэщтыгъ. Иуан къыӀохэрэм зядэӀукӀэ, инэу гумэкӀыщтыгъ, ау игуапэу едэӀущтыгъ.

21Мафэ горэм Иродиадэ Ӏофэу зылъыхъущтыгъэр къыфызэпыфагъ. Ирод къызыхъугъэ мафэр ыгъэлъэпӀэнэу икъулыкъушӀэхэм, идзэ ипэщэшхохэм, Галилей хэкум итхьэматэхэм ешхэ-ешъошхо афишӀыгъ. 22Джащыгъум Иродиадэ ыпхъу унэм къихьи, къафэшъуагъ. Иродрэ ихьакӀэхэмрэ агу рихьыгъ.

– УзыфаемкӀэ къысэлъэӀуи, укъызэрысэлъэӀурэр къыпфэсшӀэщт, – риӀуагъ пачъыхьэм пшъашъэм. 23ТхьарыӀуи фишӀыгъ:

– Сыд щыщми узыфаер остын, сипачъыхьагъу ыныкъо нэсми.

24Пшъашъэр унэм икӀыжьи, янэ еупчӀыжьыгъ:

– СыдкӀэ селъэӀущта?

– УмэхъэкӀо Иуан ышъхьэ кӀэлъэӀу, – къыриӀожьыгъ янэ.

25Пшъашъэр псынкӀэу унэм къилъэдэжьи, пачъыхьэм къыриӀуагъ:

– Джыдэдэм умэхъэкӀо Иуан ышъхьэ лэгъэшхом илъэу къысэт.

26Пачъыхьэм ар зызэхехым, ыгу лъэшэу къеуагъ, ары шъхьакӀэ хьакӀэхэм апашъхьэ пшъашъэм тхьарыӀоу фишӀыгъэм пае игущыӀэ епцӀыжьыным фэягъэп. 27Арыти, ардэдэм дзэлӀ горэм Иуан ышъхьэ къыхьынэу унашъо фишӀи, ыгъэкӀуагъ. 28Ар кӀуи, Иуан ышъхьэ хьапсым щыпиупкӀи, лэгъэшхом илъэу къыхьи, пшъашъэм къыритыгъ. Пшъашъэм янэ ритыжьыгъ. 29Иуан игъогу рыкӀохэрэм хъугъэ-шӀагъэр зызэхахым, къакӀохи, Иуан ихьадэ хьапсым чӀахыжьи, къэунэм чӀалъхьажьыгъ.

Исус нэбгырэ минитф зэригъэшхагъэр

(Маттэ 14:13-21; Лука 9:10-17; Иуан 6:1-4)

30Апостолхэр#6:30 апостолхэр – еплъ Маттэ 10:2. Исус дэжь къыщызэрэугъоихи, Ӏофэу ашӀэгъэ пстэумрэ цӀыфхэм арагъэшӀэгъэ пстэумрэ раӀотэжьыгъ. 31КъэкӀо-накӀохэр зэрэбагъэм пае, Исусрэ игъогу рыкӀохэрэмрэ шхэгъуи ифэжьыщтыгъэхэпти, Исус ахэмэ ариӀуагъ:

– ЧӀыпӀэ Ӏудзыгъэ горэм тизакъоу тыкӀонышъ, зыжъугъэпсэфыщт.

32Арыти, къуашъом исхэу Ӏудзыгъэ чӀыпӀэ горэм язакъоу ежьагъэх. 33ЦӀыфхэм ахэр къуашъом исхэу, ӀукӀыхэу алъэгъугъ, бэми къашӀэжьыгъэх. ЦӀыфхэр къэлэ пстэуми лъэсэу къадэчъыхи, Исусрэ игъогу рыкӀохэрэмрэ къуашъомкӀэ зыдакӀощтыгъэ чӀыпӀэм нэмысхэзэ ахэр нэсхи, къэзэрэугъоигъэх. 34Исус къуашъом къикӀи, цӀыф купышхор зелъэгъум, ахэр мэлахъо зимыӀэ мэл Ӏэхъогъум фэдэхэу щытыгъэхэти, ыгу ягъуи, Ӏофыбэхэр агуригъаӀоу ыублагъ.

35Мафэр зыхэкӀуатэм, игъогу рыкӀохэрэр Исус къыбгъодахьэхи, къаӀуагъ:

– Мы чӀыпӀэр нэкӀы, мафэри хэкӀотэгъах. 36Чылэ-къоджэ гъунэгъухэм кӀонхэшъ, гъомлапхъэ къызфащэфыжьыным пае, цӀыфхэр тӀупщыжьых; сыда пӀомэ, ашхын яӀэп.

37– Шъо ахэр жъугъашхэх, – ариӀуагъ Исус.

– ТыкӀонышъ, динар#6:37 динар – еплъ Маттэ 18:24. шъитӀум ауасэ хьалыгъу къэтщэфына, мы цӀыфхэм ядгъэшхынэу? – къыраӀожьыгъ адрэхэм.

38– Хьалыгъу тхьапша шъуиӀэр? – ариӀуагъ Исус. – ШъукӀуи, къызэжъугъашӀ. КъызэрагъашӀи, къаӀуагъ:

– Хьалыгъуитфырэ пцэжъыитӀурэ тиӀ.

39ЕтӀанэ Исус цӀыф пстэури куп-купэу уц къашхъом хагъэтӀысхьанхэу игъогу рыкӀохэрэм унашъо афишӀыгъ. 40ЦӀыфхэр шъэрышъэу, шъэныкъо-шъэныкъоу тӀысыгъэх. 41ЕтӀанэ Исус хьалыгъуитфымрэ пцэжъыитӀумрэ къыштэхи, уашъом дэплъыий, Тхьэм щытхъу фишӀыгъ. ЕтӀанэ хьалыгъухэр зэгуичыхи, цӀыфмэ апашъхьэ ралъхьанхэу игъогу рыкӀохэрэм аритыгъ. ПцэжъыитӀури зэкӀэми афигощыгъ. 42ЦӀыф пстэури шхагъэ, загъэшхэкӀыгъ. 43Ащ нэужым къялыжьыгъэ хьалыгъу такъырхэмрэ пцэжъыехэмрэ мэтэ пшӀыкӀутӀумэ арызэу аугъоижьыгъэх. 44Шхагъэхэр лӀы минитф хъущтыгъэх.

Исус псы кӀыӀум тетэу зэрэкӀуагъэр

(Маттэ 14:22-33; Иуан 6:16-21)

45Исус цӀыф купышхор етӀупщыжьыфэ, игъогу рыкӀохэрэр ежь ыпэ псыхъураем иадрабгъу ит къалэу Бет-Сайдэ зэпырыкӀынхэу къуашъом ригъэтӀысхьагъэх. 46Исус цӀыфхэр зетӀупщыжьыхэ ужым, Тхьэм елъэӀунэу Ӏуашъхьэм дэкӀоягъ.

47Пчыхьэ къызэхъуми, къуашъор псыхъурэе гузэгум нэсыгъагъ, Исуси изакъоу чӀыгум къытенагъ.

48Къуашъом исхэм жьыбгъэр къапеоти, къинкӀэ къошъо бэщхэмкӀэ афэу Исус ылъэгъугъ. АтэкъэӀогъум дэжь къуашъом исхэм алъэныкъокӀэ псы кӀыӀум тетэу, Исус къэкӀуагъ. Ахэмэ аблэкӀ пэтыгъ. 49Исус псы кӀыӀум тетэу къакӀоу залъэгъум, хьадэджадэу ашӀошӀи, къэкууагъэх, 50сыда пӀомэ, зэпстэуми ар алъэгъуи, лъэшэу щтагъэхэти ары. Ардэдэм Исус къадэгущыӀагъ:

– Шъугу шъумыгъэкӀоды, Сэры ар, шъумыщын.

51ЕтӀанэ ахэмэ къуашъом адитӀысхьагъ, жьыбгъэри уцужьыгъэ. Лъэш дэдэу агъэшӀэгъуагъ, 52сыда пӀомэ, Ӏофышхо гъэшӀэгъонэу Исус хьалыгъухэмкӀэ ышӀагъэр къагурыӀуагъэп, агухэр зэфэшӀыгъагъэти.

Исус Геннисарет хэкум сымаджэхэр зэрэщигъэхъужьыгъэр

(Маттэ 14:34-36)

53Псыхъураем зызэпырэкӀыхэм, Геннисарет хэкум нэсхи, гъурзэр щырадзыхыгъ. 54Къуашъом къызэрикӀхэу, цӀыфхэм Исус къашӀэжьыгъ. 55ЦӀыфхэм а хэкур зэрэщытэу къачъыхьэу, сымаджэхэр пӀуаблэхэм акӀоцӀылъхэу Исус зыдэщыӀэу зыфаӀорэ чӀыпӀэм къахьэу къаублагъ. 56Къуаджэми, къалэми, чылэми Исус тыдэ кӀуагъэми сымаджэхэр а чӀыпӀэхэм ягузэгупӀэхэм ащагъэгъолъыхэти, ищыгъын цыпэ нигъэсынхэ къодыеу къелъэӀущтыгъэх, Исус ищыгъын цыпэ нэсыгъэ пстэури хъужьыгъэх.

Currently Selected:

Марк 6: AdgNT14

Highlight

Copy