Марк 8

ЯЕНЭРЭШЪХЬ

Исус нэбгырэ миниплӀ зэригъэшхагъэр

(Маттэ 15:32-39)

1А мафэхэм джыри зэ цӀыф купышхо къэзэрэугъоигъ Ахэмэ ашхын зи яӀагъэпти, Исус игъогу рыкӀохэрэм къяджи, ариӀуагъ:

2– ЦӀыфхэм сыгу ягъу, сыда пӀомэ, мэфищ хъугъэу сигъусэх, ашхыни яӀэп. 3МэлакӀэ лӀэхэу цӀыфхэр стӀупщыжьхэмэ, гъогум щызэхэфэщтых, сыда пӀомэ, чыжьэу къикӀыгъэхэри ахэмэ ахэтых.

4– Мы шъоф нэкӀым ахэмэ афикъун хьалыгъу зыгорэм тыдэ къырихын ылъэкӀына? – аӀуи, игъогу рыкӀохэрэм Исус къыраӀожьыгъ.

5– Хьалыгъу тхьапша шъуиӀэр? – яупчӀыгъ Исус

– Хьалыгъуибл тиӀ, – къаӀожьыгъ ахэмэ.

6Джащыгъум Исус цӀыф купышхор чӀыгум етӀысэхынэу унашъо ышӀыгъ. Хьалыгъуиблыр къышти, Тхьэм щытхъу фишӀыгъ. ЕтӀанэ хьалыгъухэр зэгуичыхи, цӀыф купышхом ыпашъхьэ ралъхьанхэу игъогу рыкӀохэрэм аритыгъ. Ахэми аущтэу ашӀыгъ. 7Пцэжъые цӀыкӀу заули яӀагъ. Ахэмэ апаий Исус Тхьэм щытхъу фишӀи, ахэри цӀыфмэ апашъхьэ ралъхьанхэу игъогу рыкӀохэрэм ариӀуагъ. 8ЦӀыфхэр шхагъэх, загъэшхэкӀыгъ. Ащ нэужым хьалыгъу такъырхэу къялыжьыгъэхэр мэтиблымэ арызэу аугъоижьыгъэх. 9Шхагъэхэр нэбгырэ миниплӀ фэдиз хъущтыгъэх. ЕтӀанэ Исус цӀыфхэр ытӀупщыжьыгъэх. 10ЕтӀанэ игъогу рыкӀохэрэр игъусэхэу къуашъом итӀысхьи, къуаджэу Далманутэ иӀэгъо-благъо кӀуагъэ.

Нэшэнэ гъэшӀэгъон уашъом къафыригъэхынэу фарисейхэр Исус къызэрелъэӀугъэхэр

(Маттэ 16:1-4; Лука 11:29-32)

11Фарисейхэр Исус дэжь къакӀохи, гущыӀэкӀэ къеныкъокъухэу къаублагъ. Ежь агъэунэфыным пае, нэшэнэ гъэшӀэгъон горэ уашъом къафыригъэхынэу фэягъэх. 12Исус лъэшэу хэщэтыкӀи, къыӀуагъ:

– Джырэ цӀыфхэр нэшэнэ гъэшӀэгъоным сыд пае кӀэупчӀэхэра? Шъыпкъэр шъосэӀо, Тхьэм джырэ цӀыфхэм нэшэнэ гъэшӀэгъон зи къаритыщтэп.

13ЕтӀанэ Исус ахэр къыгъанэхи, къуашъом итӀысхьи, псыхъураем иадрабгъу зэпырыкӀыжьынэу ежьагъ.

Фарисейхэмрэ саддукейхэмрэ ятэджэпс

(Маттэ 16:5-12)

14Исус игъогу рыкӀохэрэм икъун хьалыгъу къыздахьынэу ащыгъупшэгъагъ. Къуашъом илъэу, зы хьалыгъу закъо нэмыкӀ яӀагъэп. 15Исус ахэмэ афигъэпытэу ариӀуагъ:

– Шъуфэсакъ, фарисейхэм ятэджэпсырэ пачъыхьэ Ирод итэджэпсырэ защышъуухъум.

16– Хьалыгъу тиӀэпышъ ары ащ зыкӀиӀорэр, – зэраӀозэ, игъогу рыкӀохэрэр а Ӏофым тегущыӀагъэх.

17Исус ахэмэ аӀорэм гу лъити, ариӀуагъ:

– Хьалыгъу зэрэшъуимыӀэм сыд пае шъутегущыӀэрэ? Джыри зи зэхэшъумышӀыкӀэу, къыжъугурымыӀоу ара? Ащ фэдизэу шъугуркъа? 18Нэ шъуиӀэ пэтми, шъумылъэгъоу ара? ТхьакӀумэ шъуиӀэ пэтми, зэхэшъумыхэу ара? 19Шъугу къэкӀыжьырэба, хьалыгъуитфыр цӀыф минитфым зафызэгосэчым, хьалыгъу такъырхэр матэхэм арызэу шъуугъоижьыгъэхэр зыфэдизыгъэхэр?

– Мэтэ пшӀыкӀутӀу, – къыраӀожьыгъ ахэмэ.

20– Хьалыгъуиблыри цӀыф миниплӀым зафызэгосэчым, хьалыгъу такъыхэр арызэу мэтэ тхьапша шъуугъоижьыгъэр?

– Мэтибл, – къыраӀожьыгъ ахэмэ.

21– Джыри зи къыжъугурымыӀоу ара? – ариӀуагъ Исус ахэмэ.

Исус къуаджэу Бет-Сайдэ щыщэу лӀы нэшъу зэригъэхъужьыгъэр

22ЕтӀанэ Исусрэ игъогу рыкӀохэрэмрэ къуаджэу Бет-Сайдэ#8:22 къуаджэу Бет-Сайдэ – къуаджэу Бет-Сайдэ Иулиас зыцӀэ къуаджэу Галилей псыхъураем итемыр тыгъэ къокӀыпӀэ Ӏушъом Ӏутыгъэр арыщтын. къэкӀуагъэх. ЦӀыфхэм лӀы нэшъу горэ Исус къыфащи, ыӀэхэр тырилъхьэнхэу къелъэӀугъэх. 23Исус нэшъум ыӀэ ыубыти, къуаджэм дищыгъ. ЕтӀанэ нэшъум ынэхэм акӀэужъунтхи, ыӀэхэр нэшъум тырилъхьи, еупчӀыгъ:

– Зыгорэ олъэгъуа?

24Нэшъум ышъхьэ къыӀэти, къыӀуагъ:

– ЦӀыфхэм къакӀухьэу сэлъэгъу. Ахэр чъыгхэм афэдэх.

25ЕтӀани Исус ыӀэхэр джыри зэ нэшъум ынитӀумэ атырилъхьагъ. Ащ дэжьым лӀым тэрэзэу ылъэгъоу хъугъэ. Пстэури нафэу ылъэгъоу, ар хъужьыгъэ. 26Ащ нэужым Исус а лӀым риӀуагъ:

– Къуаджэм удэмыхь, зыми зи емыӀу. ЕтӀанэ ядэжь ыгъэкӀожьыгъ.

«Оры Христосыр» Петрэ Исус зэрэриӀуагъэр

(Маттэ 16:13-20; Лука 9:18-21)

27Исусрэ игъогу рыкӀохэрэмрэ къалэу Кайсарфилипие#8:27 къалэу Кайсарфилипие – еплъ Маттэ 16:13. иӀэгъо-благъо ит къуаджэхэм адэхьанхэу ежьагъэх. КӀохэзэ, Исус игъогу рыкӀохэрэм яупчӀыгъ:

– ЦӀыфхэм сэ хэт сыщыщэу аӀора?

28– Зы купым о уумэхъэкӀо Иуанэу аӀо, – къыраӀожьыгъ ахэмэ. – НэмыкӀхэми о упегъымбар Илясэу #8:28 пегъымбар Иляс – еплъ Маттэ 16:14. аӀо. ЕтӀанэ адрэхэми о пегъымбархэм уащыщ горэу аӀо.

29– Адэ шъо, сэ хэт сыщыщэу шъуӀора? – яупчӀыгъ Исус ахэмэ.

– Оры Христосыр, – къыриӀожьыгъ Петрэ Исус.

30Джащыгъум ар зыми рамыӀотэжьынэу Исус ахэмэ афигъэпытагъ.

Ежь зэраукӀыщтри лӀагъэхэм къызэрахэтэджыкӀыжьыщтри Исус къызэриӀуагъэр

(Маттэ 16:21-28; Лука 9:22-27)

31Джащыгъум Исус игъогу рыкӀохэрэм мыхэр аригъашӀэу ыублагъ:

– ЦӀыф Лъэпкъым ы Къо къиныбэ ыщэчын фаеу къыпыщылъ. Нахьыжъхэми,#8:31 нахьыжъхэр – еплъ Маттэ 16:21. дин пэщэшхохэми, Тэурат егъэджэкӀо пащэхэми ежь зэрамыпэсэу аукӀын фае, мэфищ нэужми лӀагъэхэм къахэтэджыкӀыжьын фае.

32Исус мы Ӏофхэр шъхьаихыгъэу къыӀуагъ. Джащыгъум Петрэ Исус лъэныкъокӀэ Ӏуищи, фимыдэу фежьагъ.

33Ау Исус зыкъызэригъэзэкӀи, игъогу рыкӀохэрэм яплъи, Петрэ егыигъ:

– Сауж икӀ, шэйтан! О уигупшысакӀэ Тхьэм игупшысакӀэп, цӀыфым игупшысакӀ нахь.

34ЕтӀанэ Исус цӀыф купышхомрэ игъогу рыкӀохэрэмрэ къяджи, ариӀуагъ:

– Зыгорэ сэ сауж къырыкӀонэу фаемэ, ежь зыфэе Ӏофхэр къерэгъанэхи, лӀэныгъэм икъащ къерэшти, сауж къырэрэкӀу; 35сыда пӀомэ, хэти зыпсэ мыкӀодэу къэзгъэнэжьынэу фаем ыпсэ шӀокӀодыщт, ау хэти сэщ паерэ къэбарышӀум паерэ зыпсэ зышӀокӀодрэм ыпсэ мыкӀодэу къыгъэнэжьыщт. 36Дунаир зэкӀэ цӀыфым ие хъоу, ежь кӀодмэ, а цӀыфым ишӀуагъэу къекӀыщтыр сыда? 37ЦӀыфым ыпсэ пае уасэу сыда ытышъущтыр? 38Джырэ цӀыфхэу Тхьэр зымышӀэхэу, псэкӀод зышӀэхэрэм ащыщэу хэти сэррэ сэ сигущыӀэхэмрэ къыттеукӀытыхьэрэм, сэ, ЦӀыф Лъэпкъым ы Къуи, а цӀыфым сытеукӀытыхьажьыщт, мэлэӀич лъапӀэхэр сигъусэхэу ся Тэ ищытхъушхо фэдэ щытхъушхо сиӀэу сыкъызыкӀожьыкӀэ.

Currently Selected:

Марк 8: AdgNT14

Highlight

Copy