Марк 9
9
ЯБГЪОНЭРЭШЪХЬ
1– Шъыпкъэр шъосэӀо, – ариӀуагъ Исус ахэмэ, – Тхьэм и Тетыгъошхо лъэкӀышхокӀэ къэкӀуагъэу алъэгъуфэ, мыщ дэжьым щыт цӀыфхэм ащыщхэу заулэм лӀэныгъэр алъэгъущтэп.
Исус итеплъэ зэрэзэрихъокӀыгъэр
(Маттэ 17:1-13; Лука 9:28-36)
2Мэфих зытешӀэм, Исус Петри, Якъуби, Иуани зэригъэгъусэхи, Ӏошъхьэ лъагэ горэм язакъоу дищэягъэх. Джащыгъум ахэмэ апашъхьэ Исус итеплъэ щызэрихъокӀыгъ. 3Дунаим тет гыкӀакӀо горэм щыгъынхэр фыжьэу зэригыкӀышъущтхэм нахьи, Исус ищыгъынхэр нахь фыжьыбзэу, къэлыдэу хъугъэх. 4Ащ дэжьым пегъымбархэу Илясрэ Мусэрэ ахэмэ къафэлъэгъуагъэх, ахэри Исус къыдэгущыӀэщтыгъэх.
5– Рабби, дэгъу тэ мыщ тыщыӀэныр – риӀуагъ Петрэ Исус. – Чэлищ щыдгъэӀэн, ощ пае зы, Мусэ паий зы, Иляс паий зы.
6Петрэ ыӀони ышӀэщтыгъэп; сыда пӀомэ, ахэр щтагъэхэти ары.
7Джащыгъум ошъуапщэ къашъхьэщыхьагъ. Ошъуапщэм макъэ горэ къыхэӀукӀыгъ:
– Мары сэ шӀу слъэгъурэ с Къо кӀасэр. Ащ ыӀорэм шъуедэӀу.#9:7 Мары сэ шӀу слъэгъурэ с Къо кӀасэр. Ащ ыӀорэм шъуедэӀу! – яплъ Орэд ЛъапӀэхэм 2:7; Мусэ апэрэ тхылъэу ытхыгъэм (УблапӀэм) 22:2 ыкӀи Мусэ ятфэнэрэ тхылъэу ытхыгъэм 18:15.
8ОшӀэ-дэмышӀэу зызаплъыхьэм, ахэмэ ягъусэу Исус нэмыкӀ зи алъэгъужьыгъэп.
9Ахэр Ӏуашъхьэм къехыжьхэзэ, ежь ЦӀыф Лъэпкъым ы Къо лӀагъэхэм къахэтэджыкӀыжьыфэ, алъэгъугъэр зыми рамыӀотэжьынэу Исус унашъо афишӀыгъ. 10А гущыӀэхэр агу раубытагъэх, «ЛӀагъэхэм къахэтэджыкӀыжьынэу Исус зэриӀуагъэм къыригъэкӀыгъэр сыда?» аӀозэ, зэупчӀыжьыгъэх.
11Ахэр Исус къеупчӀыгъэх:
– Тэурат егъэджэкӀо пащэхэм ыпэ рапшӀэу пегъымбар Иляс къэкӀон фаеу сыда зыкӀаӀорэр?
12– Шъыпкъэ, ыпэ рапшӀэу Иляс къэкӀонышъ, Ӏоф пстэури тэрэзэу зэтыригъэуцожьын фае, – ариӀожьыгъ Исус, – ау Тхьэм игущыӀэ тхыгъэхэм зэрарытым фэдэу, ЦӀыф Лъэпкъым ы Къо къиныбэ ыщэчын фаеу къыпыщылъ, цӀыфхэми зэрамыпэсын фае. 13Ау сэ шъосэӀо, Иляс къэкӀогъах#9:13 Иляс къэкӀогъах – Исус зыфиӀуагъэр умэхъакӀоу Иуан ары. Иуан Христос игъогу ыгъэпсынэу Тхьэм къызэригъэгугъэгъэ пегъымбар Иляс ары. Еплъ Маттэ 16:14., Ӏоф бзэджагъэу рашӀэнхэу зыфэягъэхэри рашӀагъэх, ащ ехьылӀагъэу Тхьэм игущыӀэ тхыгъэхэм зэрарытым фэдэу.
Исус джынапцӀэ зыхэс кӀалэ горэ зэригъэхъужьыгъэр
(Маттэ 17:14-20; Лука 9:37-43)
14Исусрэ игъусищрэ адрэ нэбгырэхэу игъогу рыкӀохэрэм адэжь къызагъэзэжьым, цӀыф купышхом ахэр къауцухьагъэхэу, Тэурат егъэджэкӀо пэщэ куп къянэкъокъоу алъэгъугъ. 15Исус къызалъэгъум, зэкӀэ цӀыф купышхом агъэшӀагъуи, къыбгъодэлъадэхи, шӀуфэс къырахыгъ.
16– Сыдым ехьылӀагъэу мыхэмэ шъуянэкъокъура? – яупчӀыгъ Исус игъогу рыкӀохэрэм.
17ЦӀыф купышхом хэт горэм къыриӀуагъ:
– Дин гъэсакӀу, сикӀалэ джынапцӀэу бзако зышӀырэр хэсти, къыпфэсщагъ. 18ДжынапцӀэм кӀалэр зэкӀиубытэ къэс, чӀыгум къытыредзэ, Ӏупс тхъурбэр къыӀуифэу, ыцэхэр зэригъэшхыхэу зэтекъэ. О уигъогу рыкӀохэрэм джынапцӀэр хафынэу сялъэӀугъ, ау ахэмэ хафын алъэкӀыгъэп.
19– Е-о-ой, шъо, джырэ цӀыфхэу шӀошъхъуныгъэ зимыӀэхэр, – ариӀожьыгъ Исус, – сыд фэдизрэ сышъухэтын фая? Сыд фэдизрэ шъусщыӀэн фая? Къысфашъущ а кӀалэр.
20Ахэмэ кӀалэр Исус къыфащагъ. Ау джынапцӀэм Исус зэрилъэгъоу, кӀалэр къыгъэкӀэзэзыгъ. Ар чӀыгум къытефи, Ӏупс тхъурбэр къыӀуифэу, зигъэукӀорэеу ыублагъ.
21– Сыд фэдиз хъугъа мыщ фэдэу зыщытыр? – еупчӀыгъ Исус кӀалэм ятэ.
– ИцӀыкӀугъэ къыщегъэжьагъэу аущтэу мэхъу, – къыӀожьыгъ тым. 22– ДжынапцӀэм ар ыгъэкӀодыным пае, машӀоми псыми бэрэ ахидзэщтыгъ. Зыгорэ пшӀэн плъэкӀыщтмэ, гукӀэгъу къытфэшӀи, къыддэӀэпыӀ.
23– «Зыгорэ пшӀэн плъэкӀыщтмэ» оӀо, – риӀуагъ Исус а лӀым. – ШӀошъхъуныгъэ зиӀэм сыдрэ Ӏофи ышӀэн елъэкӀы.
24Ардэдэм кӀалэм ятэ къэкууагъ:
– Сэ сшӀошъ мэхъу, сишӀошъхъуныгъэ хэзгъэхъонэу къыздэӀэпыӀ, тхьэматэ.
25Исус цӀыф купышхо къэзэрэугъоигъэу зелъэгъум, джынэпцӀэ Ӏаем егыий, риӀуагъ:
– О, цӀыфхэр бзакоу, дэгоу зышӀырэ джынапцӀ, унашъо къыпфэсэшӀы, мы кӀалэм хэкӀыжьи, ныбжьи укъыхэмыхьажь.
26ДжынэпцӀэ Ӏаер къыхэкуукӀи, кӀалэр лъэшэу къыгъэкӀэзэзи, хэкӀыжьыгъ. КӀалэр хьадэм фэдэ хъугъэ. Арыти, а цӀыфхэм ащыщыбэхэм «ар лӀагъэ» аӀуагъ. 27Ау Исус кӀалэм ыӀэ къыубыти, ылъакъохэм атыригъэуцуагъ, кӀалэри къэтэджыжьыгъ.
28Ащ ыуж Исус унэ горэм ихьагъ. Игъогу рыкӀохэрэр язакъоу къызынэжьхэм, къеупчӀыгъэх:
– А джынапцӀэр тэ хэтфын зыкӀэтымылъэкӀыгъэр сыда?
29– Мыщ фэдэ лъэпкъыр тхьэлъэӀумрэ нэкӀымрэ афэшъхьафкӀэ цӀыфым хэпфышъущтэп, – ариӀожьыгъ Исус.
Ежь зэраукӀыщтри лӀагъэхэм къызэрахэтэджыкӀыжьыщтри ятӀонэрэу Исус къызэриӀуагъэр
(Маттэ 17:22-23; Лука 9:43-45)
30Исусрэ игъогу рыкӀохэрэмрэ а чӀыпӀэм икӀыхи, Галилей хэкум пхырыкӀыщтыгъэх. Ахэр зыдэщыӀэхэр Исус зыми къышӀэнэу фэягъэп, 31сыда пӀомэ, игъогу рыкӀохэрэм Тхьэм игущыӀэхэр аригъашӀэщтыгъ. Ахэмэ моущтэу ариӀуагъ:
– ЦӀыф Лъэпкъым ы Къо цӀыфхэм аубытынышъ, ахэмэ ар аукӀыщт, ау заукӀ ужым мэфищ тешӀагъэу лӀагъэхэм къахэтэджыкӀыжьыщт.
32Ау игъогу рыкӀохэрэм а гущыӀэхэм къарыкӀырэр къагурыӀуагъэп, Исус къеупчӀынхэкӀи щынэщтыгъэх.
Хэта анахь ин дэдэр?
(Маттэ 18:1-5; Лука 9:46-48)
33Къалэу Капернаум къэкӀожьыгъэх. Унэм зехьэхэм, Исус игъогу рыкӀохэрэм яупчӀыгъ:
– Гъогум шъузытетым, сыда шъузытегущыӀагъэр?
34Ау ахэмэ заушъэфыгъ, сыда пӀомэ, ахэр гъогум зытетхэм, «Тэ тщыщэу хэта анахь ин дэдэр» аӀоти, зэнэкъокъущтыгъэх.
35Исус тӀыси, игъогу рыкӀорэ нэбгырэ пшӀыкӀутӀум къяджи, ариӀуагъ:
– Зыгорэ апэ итынэу фаемэ, ар ауж дэдэ хъун фае, пстэуми Ӏофтабгэуи афэхъун фае.
36Сабый горэм ыӀэ къыубыти, агузэгу ригъэуцуи, ӀаплӀ рищэкӀи, ариӀуагъ:
37– Хэти мыщ фэдэ сабыир сэ сцӀэкӀэ къезгъэблагъэрэм сэ сыригъэблэгъагъэу мэхъу; хэти сэ сезгъэблагъэрэми сэ сизакъоу арэп ригъэблагъэрэр, сэ сыкъэзгъэкӀуагъэри ары.
Къытпэмыуцурэр тигъус
(Лука 9:49-50)
38– Дин гъэсакӀу, лӀы горэм о пцӀэкӀэ джынапцӀэхэр цӀыфхэм ахифхэу тлъэгъугъэ, – къыриӀуагъ Иуан Исус. – Ар тэ зэрэтщымыщым пае зэтетӀэжьэнэу тыпылъыгъ.
39– ЗэтешъумыӀажь ар, – къыӀуагъ Исус, – сыда пӀомэ, сэ сцӀэкӀэ Ӏофышхо гъэшӀэгъон зышӀэрэр, ащ лъыпытэу ӀаекӀэ къыстегущыӀэн ылъэкӀыщтэп. 40Сыда пӀомэ, тэ къытпэмыуцурэр тигъусэшъ ары. 41Шъыпкъэр шъосэӀо, Христос игъогу шъузэрэрыкӀорэм пае, псы шъуалъэ шъуезгъашъорэм ифэшъошэ ӀахьышӀу шӀокӀодыщтэп.
ЦӀыфхэм псэкӀод ашӀэнэу дэзыхьыхырэ Ӏофхэр
(Маттэ 18:6-9; Лука 17:1-2)
42– Мы цӀыкӀухэм ащыщэу сэркӀэ шӀошъхъуныгъэ зиӀэм псэкӀод ышӀэнэу хэти дэзыхьыхырэм ыпшъэ мыжъошъхьал рашӀэу, хым хадзагъэмэ, ежьыркӀэ нахьышӀущтыгъ. 43,44О пӀэ псэкӀод пшӀэнэу удихьыхмэ, пыупкӀыжь. ПӀитӀу псаоу джэхьнэмэу цӀыфылыр зышхыщтэу, хьамлыухэр зыщымылӀэжьыщтэу, зимашӀуи мыкӀосэжьыщтым#9:43 хьамлыухэр зыщымылӀэжьыщтэу, зимашӀуи мыкӀосэжьыщтыр – еплъ Пегъымбар Ешайа тхылъэу ытхыгъэм 66:24. укӀоным нахьи, уӀащэу мыкӀодыжьын щыӀэныгъэ бгъотыныр оркӀэ нахьышӀу. 45,46О плъакъуи псэкӀод пшӀэнэу удихьыхмэ, пыупкӀыжь. ПлъэкъуитӀу псаоу джэхьнэмэу цӀыфылыр зышхыщтэу, хьамлыухэр зыщымылӀэжьыщтэу, зимашӀуи мыкӀосэжьыщтым упадзэным нахьи, улъащэу мыкӀодыжьын щыӀэныгъэ бгъотыныр оркӀэ нахьышӀу. 47,48Ащ фэдэуи, о унэ псэкӀод пшӀэнэу удихьыхмэ, къитхъыжь. УнитӀу псаоу джэхьнэмэу цӀыфылыр зышхыщтэу, хьамлыухэр зыщымылӀэжьыщтэу, зимашӀуи мыкӀосэжьыщтым упадзэным нахьи, зы нэ нахь уимыӀэми, Тхьэм и Тетыгъошхо ыӀэчӀэгъ учӀэхьаныр оркӀэ нахьышӀу. 49Тхьэм хэтрэ цӀыфи машӀокӀэ ыщыущт, сыдрэ къурмэныпхъэри щыгъукӀэ ащыущт.
50– Щыгъур дэгъу. Ау щыгъум ищыугъэ хэкӀымэ, сыдэущтэу ар шъущыущта? Щыугъэ зыхэжъугъэлъ, шъузэгурыӀоуи шъузэдэпсэу.
Currently Selected:
Марк 9: AdgNT14
Highlight
Share
Copy
Want to have your highlights saved across all your devices? Sign up or sign in
© Институт перевода Библии, 1991, 1992, 2014. Стокгольм
