Matyù 9
9
Yěsû a parə̀ a ŋònə̀ nɨ taʼà pàa mbɨ̀ŋmə̀ e à kwɨghə̀nə
(Mrk 2.1-12; Luk 5.17-26)
1Yěsû à lə̀ kwuunə̀ amwuə àkànwuʼə ntwuumə̀ ndèrə̀ a àlaʼà pobə, 2pɨ ləŋə̀ a ŋònə̀ nɨ taʼà pàa mbɨ̀ŋmə̀ e à lə̀ kwɨghə̀nə aŋunə àpàʼà ntô ambo ze. Nkwùə̀ nɨ Yěsû à lə̀ zəənə̀nə àpyiimə̀ ntɨŋmə̀ àzobə, à lə̀ shwəŋə̀ ambo ŋònə̀ nɨ taʼà pàa mbɨ̀ŋmə̀ e à lə̀ kwɨghə̀nə la lo, “Ẅìimə̀ ntɨŋmə̀ o mbǎ moonə̀ mə̀; pɨ lə̀ənə̀ mə ɨ̀nwùə̀ tɨ̀pòŋə̀ ɨ̀pô.”
3Pɨ̀nèrə̀ mbòomə pɨ̀tse lə̀ zuʼù, ntyiʼə̀ nshwəŋnə̀ pobə nɨ pobə lo, “Ŋònə̀ wə̀ à wə̀ ndzòomə̀ a Nẅùə̀!”
4La Yěsû à lə̀ zhyə̂ ɨ̀kwàŋə̀ ɨ̀pobə ntyiʼə̀ nshwəŋə̀ lo, “Nɨ̀ tyiʼə̀ mbə nɨ àkwàŋə̀ tɨ̀pòŋə̀ amwuə mɨ̀ntɨŋmə̀ ɨ̀mɨghə lə mbə̀ʼə àkə? 5À zàŋə̀ zèrə a nɨ shwəŋə̀, ‘Pɨ lə̀ənə̀ mə ɨ̀fàntə̀ ɨ̀nwùə̀ ɨ̀pô’ kə̀ nɨ̀shwəŋə̀ lo, ‘lòo a ɨ̀shyə̂ ngyìinə̀’? 6La mbɨ nèrə̀ a wɨghə lo Moonə̀ Ŋwùə̀ à wa nɨ ɨ̀tɨ̀ŋnə̀ àtwuə̀ ɨ̀shyə̂ ghə a nɨ lə̀ənə̀ a tɨ̀pòŋə̀.” A tyiʼə̀ nshwəŋə̀ ambo ŋònə̀ nɨ taʼà pàa mbɨ̀ŋmə̀ e à lə̀ kwɨghə̀nə la lo, lòo a ɨ̀shyə̂ mbìʼì àpàʼà o ndèrə̀ o a ɨmwuə alyiʼə ghò. 7Lenəla, à lə̀ lòo a ɨ̀shyə̂ ndèrə̀ e a ɨmwuə alyiʼə ze. 8Nkwùə̀ nɨ àpùŋə̀ pànə̀ za a lə̀ zəənə̀nə a lenə, pobə lə̀ pô, ntyiʼə̀ mmə ngyetə̀ a Nẅùə̀ ntiinə à ŋânə mbuurə̀ ɨ̀tɨ̀ŋnə̀ zə ambo pə̀ənə̀.
Yěsû a fuŋə̀ a Matyù
(Mrk 2.13-17; Luk 5.27-32)
9Yěsû à lə̀ myàʼtə̀ alyiʼə za mmə ndàŋə̀ ndzəənə̀ a taʼà ɨ̀nkẅiirə̀ pɨ̀taghə̀ nɨ nɨ̀linə̀ ɨ̀tse lə̀ pənə Matyù, a nwuunə̀ amwuə ndâ ɨ̀nkẅiirə̀ pɨ̀taghə̀. À lə̀ shwəŋə̀ ambo ze lo, “Tô ndzùŋə̀ mə̀.”
Matyù à lə̀ lòo a ɨ̀shyə̂ ndzùŋə̀ e.
10Tsaʼnə Yěsû à lə̀ ghə̀nə mmə ndzɨghə̀ a ndâ Matyù, pɨ̀nkẅiirə̀ pɨ̀taghə̀ pɨ̀noʼnə nɨ ngàŋə ngɨ̀rə̀ ɨ̀nwùə̀ tɨ̀pòŋə̀ lə̀ tô nnwuunə̀ pobə pɨ Yěsû nɨ ɨ̀zùŋə̀ ndzùmə̀ ɨ̀pe aŋunə tepèrə̀. 11Nkwùə̀ nɨ pɨ̀Farìsî pɨ̀tse lə̀ zəənə̀nə a lenə, pobə lə̀ tyiʼə̀ mbyiitə̀ ɨ̀zùŋə̀ ndzùmə̀ ɨ̀pe lo, “A ghɨ̀rə̀ àkə ɨ̀nèrə̀ ɨ̀nwùə̀ ɨwɨghə a zɨghə̀ pobə pɨ̀nkẅiirə̀ pɨ̀taghə̀ nɨ ngàŋə ngɨ̀rə̀ ɨ̀nwùə̀ tɨ̀pòŋə̀?” 12La Yěsû a zuʼù, nshwəŋə̀ ambo pobə lo, “Pànə̀ nɨ ka pɨ̀ mə ngòonə̀ a ghobə ka pobə̂ tàʼà a ghobə a ŋònə̀ nɨ à wa mbarə̀ pə̀ənə̀, la à tàʼà e pɨghoonə. 13La nɨ̀ ghə̀ ntàʼà ɨ̀sùmə àshwəŋnə̀ Nẅùə̀ nɨ a za nshwəŋə̀ lo, ‘Ngwa ntàʼà pə pànə̀ nɨ pobə pa nkoorə̀ mɨ̀lɨŋə̀, ka pə e pə ɨ̀pwuumə̀ a nɨ màʼà Nẅùə̀.’ Ntiinə ka ndə̀ tô mə̀ pə a nɨ fuŋə̀ pànə̀ nɨ mɨ̀nwùə̀ ɨ̀mobə təəmə̀nə, ndə̀ tô pə mbə̀ʼə ngàŋə ngɨ̀rə̀ ɨ̀nwùə̀ tɨ̀pòŋə̀.”
Àpyiitə̀ mbə̀ʼə nɨ̀nwuunə̀ tɨ zɨghə̀ amwuə àchàʼtə̀ Nẅùə̀
(Mrk 12.18-22; Luk 5.33-39)
14Ɨ̀zùŋə̀ ndzùmə̀ Jònə lə̀ tô mbyiitə̀ ambo Yěsû lo, “À ghɨ̀rə̀ àkə pəə pɨ pɨ̀Farìsî pə ndzwuə̀ tɨ zɨghə̀, la ka ɨ̀zùŋə̀ ɨ̀pô pə ndzwuə̀ a ghobə tɨ zɨghə̀?”
15Yěsû a tyiʼə̀ nkẅùə̀ ambo pobə lo, “Mbə̀ʼə pànə̀ nɨ pɨ wuunə̀nə ghobə a alyiʼə nɨ̀zoʼò pə nɨ àsòmnə̀ nkwùə̀ nɨ ndwuumə̀ ngɨ̀ɨnə̀ a pənə pobə pɨ pobə? Ngaŋə! La nkwùə̀ ɨ̀ zə ntô nɨ pɨ̌ kẅiirə̀ a ndwuumə̀ ngɨ̀ɨnə̀ wa ambo pobə, pobə̂ tyiʼə̀ ndzwuə̀ tɨ zɨghə̀.
16“Ka ŋwùə̀ â lòo e a àpàa atsəʼə yè shwuə̀ nnàanə̀ nɨ̀fə̀ŋə nɨ atsəʼə aŋunə atsəʼə yè lwùnə̀; à tə ngɨ̀rə̀ a lenə yi àpàa atsəʼə yè shwuə̀ za ǎ sùŋə̀ atsəʼə yè lwùnə̀ za sìitə̀ kẅìʼnə̀ nɨ̀fə̀ŋə tsa. 17Ka pɨ̀ lòo e mɨ̀lùʼù mɨ shwuə̀ nchyâ amwuə kaʼrə ghù ndwùnə̀. Pɨ tə chyâ yi kaʼrə wa ǎ saanə̀, mɨ̀lùʼù ma kẅìnə̀, pɨ kɨ mbî a kaʼrə. La pɨ chyâ mɨ̀lùʼù mɨ shwuə̀ pə amwuə kaʼrə ghù shwuə̀ mbə̀ʼə mɨ̀lùʼù pobə kaʼrə pə ɨ̀shìʼnə̀.”
Yěsû a parə̀ mə̀ngyə̌ nɨ à lə̀ pètə̀nə àtsəŋə̀ atsəʼə e nkɨ mbə̀ʼkə̀ a moonə̀ ŋònə̀ ngẅùunə ɨ̀tse
(Mrk 5.21-43; Luk 8.40-56)
18Tsaʼnə Yěsû à lə̀ mənə nshwəŋə̀ ànwùə̀ za la, ŋònə̀ ngẅùunə ɨ̀tse a tô ambo ze nkẅiʼtə̀ a mbyə̀ ze nshwəŋə̀ lo, “Moonə̀ mə̀ yɨ̀ mə̀ngyə̌ à pirə̀ nkwɨghə̀; la tô nnùŋə̀ àpô o aŋunə ze mbə̀ʼə â pə̀ʼkə̀.”
19Yěsû à lə̀ lòo a ɨ̀shyə̂ pobə ɨ̀zùŋə̀ ndzùmə̀ ɨ̀pe ndèrə̀ pobə pɨ pobə. 20Tyìʼə̀ nkwùə̀ ghu, mə̀ngyə̌ ɨ̀tse nɨ à lə̀ pənə aŋunə nkwùə̀ e aŋunə nguʼu ntsòbə̀ ɨpaa, a zùŋə̀ mbètə̀ àtsəŋə̀ atsəʼə e. 21Ntiinə à lə̀ shwəŋə̀nə amwuə ntɨŋmə̀ e lo, “Ǹtə mbètə̀ àtsəŋə̀ atsəʼə e yi mbɨ fiitə̀.”
22Yěsû a pə̀ŋə̀ ndzəənə̀ e nshwəŋə̀ lo, “Pə tyìʼə̀ nɨ àwìimə̀ ntɨŋmə̀ o zə mbǎ mə̀ngyə̌; ntiinə àpyiimə̀ ntɨŋmə̀ o a ghɨ̀rə̀ wə̀ fiitə̀.” Mə̀ngyə̌ wa à lə̀ zùŋə̀ nfiitə̀ tyìʼə̀ nkwùə̀ ghu. 23Lenəla Yěsû à lə̀ ghə̀ nkwuunə̀ a ndâ ŋònə̀ ngẅùunə wa, ndzəənə̀ pɨ̀ntoŋə̀ mɨ̀ndoŋə̀ pobə àpùŋə̀ pə̀ənə̀ nɨ a lə̀ mənə ngyìi nɨ̀wɨghə̀, 24ntyiʼə̀ nshwəŋə̀ ambo pobə lo, “Nɨ̀ futə̀! Ka mômə̀ngyə̌ wə̀ â kwɨghə̀ e; à wə̀ ndyə̂ lyə̂nə.” La pànə̀ pɨ̀ghu pìʼnə̀ a nɨ ẅìi a Yěsû. 25Tsaʼnə pɨ lə̀ ghɨ̀rə̀nə pànə̀ pa futə̀ la, Yěsû a kwuunə̀ a ndâ ngẅìimə̀ àpô moonə̀ wa, a lòo a ɨ̀shyə̂. 26Àlyàʼtə̀ a lə̀ sìimə̀ amwuə àlaʼà za àtsùmə̀.
Yěsû a parə̀ pɨ̀fə̀ pɨpaa
27Yěsû a myàʼtə̀ mə alyiʼə za mmə ndèrə̀, pɨ̀fə̀ pɨpaa pə ndzùŋə̀ e, mmə nkyiinə̀ nshwəŋə̀ lo, “Moonə̀ Dàfirə̀, koorə̀ a mɨ̀lɨŋə̀ ɨwəə.”
28Nkwùə̀ nɨ Yěsû à lə̀ kwuunə̀nə amwuə ndâ, pɨ̀fə̀ pa pɨpaa lə̀ tô ntsirə̀ e, a tyiʼə̀ mbyiitə̀ ambo pobə lo, “Nɨ̀ pyiimə̀ lo mbə̀ʼə m̀barə̀ wɨghə?” Pobə kẅùə̀ lo, “Ee, mbǎ Ndòʼnə̀mbyə̂.”
29Yěsû à lə̀ tyiʼə̀ mbètə̀ ɨ̀myə̂ ɨ̀mobə, nshwəŋə̀ lo, “Ànwùə̀ za nɨ nɨ̀ pyiimə̀nə la ǎ ghɨ̀rə̀ a wɨghə.” Ɨ̀myə̂ ɨ̀mobə lə̀ nyaʼkə̀ pobə zəənə̀ ɨlyiʼə. 30Yěsû a tsùŋə̀ nkwàtə̀ ghobə lo, “Kò nɨ̀ shwəŋə̀ a wɨghə ànwùə̀ zə ambo ŋònə̀ ɨ̀tse.” 31La pobə furə̀ ntyiʼə̀ nsìimə̀ ànwùə̀ mbə̀ʼə Yěsû amwuə àlaʼà àtsùmə̀.
Yěsû a parə̀ a ŋònə̀ nɨ ka à lə̀ mə nshwəŋnə̀ e
32Nkwùə̀ nɨ pɨ̀fə̀ pa lə̀ furə̀nə mmə ndèrə̀, pànə̀ pɨ̀tse lə̀ tô nɨ ŋònə̀ ɨ̀tse nɨ àzhyə̂ a lə̀ ghɨ̀rə̀nə ka à mə nshwəŋnə̀ e ambo Yěsû. 33Nkwùə̀ nɨ Yěsû à lə̀ fuukə̀nə àzhyə̂ za, ŋònə̀ wa nɨ ka à lə̀ mə nshwəŋnə̀ e la à lə̀ pìʼnə̀ a nɨ shwəŋnə̀. Àpùŋə̀ pə̀ənə̀ za a lə̀ yerə̀, ntyiʼə̀ nshwəŋə̀ lo, “Pəə laʼa mə ndzəənə̀ a wəə mbuurə̀ ànwùə̀ zə a àlaʼà Israel apə̀.”
34La pɨ̀Farìsî lə̀ shwəŋə̀ àzobə pə lo, “À wa nfuukə̀ ɨ̀zhyə̂ la nɨ mɨ̀tɨ̀ŋnə̀ mɨ ɨ̀fò pɨ ɨ̀zhyə̂ nɨ à pənə amwuə ze.”
Yěsû a koorə̀ mɨ̀lɨŋə̀ mɨ ɨ̀pùŋə̀ pànə̀ pa
35Yěsû à lə̀ tyiʼə̀ mmə nkarə̀ amwuə mɨ̀mbòmpə mɨ ɨ̀laʼà nɨ mɨ̀kwurə̀ mmə nnèrə̀ mɨ̀nwùə̀ amwuə mɨ̀ndâ mɨ àshwatə̀ pɨ̀Jew, mmə nchwìitə̀ ntwuumə̀ ghù ɨ̀shìʼnə̀ mbə̀ʼə ànwùə̀ Nɨ̀fò nɨ̀pwuurə̀, nkɨ mmə mbarə̀ mɨghoonə nɨ ɨ̀lòʼo ɨ̀tsùmə̀ nɨ lə̀ pənə aŋunə pə̀ənə̀. 36Nkwùə̀ nɨ à lə̀ zəənə̀nə pə̀ənə̀, à lə̀ koorə̀ mɨ̀lɨŋə̀ ɨ̀mobə, ntiinə pobə lə̀ mənə nkarə̀ nɨ ngəʼə̀, ka pə ghobə nɨ àyèmpə̀ tsaʼa mɨ̀mbyə̂ mɨ ndzìrə̀ tɨ ɨ̀ndzə̂. 37Yěsû à lə̀ tyiʼə̀ nshwəŋə̀ ambo ɨ̀zùŋə̀ ndzùmə̀ ɨ̀pe lo, “Mɨ̀zɨghə̀ mɨ̀noʼnə tɨ̀ŋnə̀ amwuə ɨ̀swùumə la pɨ̀fùʼù tyiʼə̀ nkɨ̂. 38Nɨ̀ pə nchàʼtə̀ a Nẅùə̀ lo Ndòʼnə̀mbyə̂ ngàŋə̀ ɨ̀swùumə â tsàa ngàŋə àfàʼà pobə̂ fùʼù mɨ̀zɨghə̀ ɨ̀me.”
Currently Selected:
Matyù 9: pny
Highlight
Share
Copy
Want to have your highlights saved across all your devices? Sign up or sign in
© 2017, Cameroon Association for Bible Translation and Literacy
