Lurkaf 12
12
Yawmuiq Janrgeuf-eu Jeq-anr Yanr-awq
Mt 10:26-27
1Khoerngae, tsawrhaq tiqghaq tirghaq nawqtaeq tsarni, maq guijircoer paq-aer uiqlar taq-euq mae. Yeqsur danqbae-awr, aqyawf-euq zaqlanr deuq-anr heulof-aer aernaeq-euq mae: “Paqliqsaer deuq-euq daeqtseq-anr yanr-awq. Daeqtseq laer aer-eu-aq, yawmuiq janrgeuf-eu jeq-anr aermawf-eu mae. 2Daeqkaq taq-euq yawqjeq navluf panmaeq naeqlaf taef-a. Zaftaq-euq yawqjeq navluf khawf, aqcawq-anr maq siqler-aer maqjav nya-ar. 3Khoermirnae, nawmaf nae yawzanr-euq lafkhoer ngaeq-euq dawq, yawshaef bya-eu gar aqcawq yagaq-awr, nawmaf nae kuvlawv-euq lafkhoer naqbawr-anr khoeqsav-euq dawq, nymrmq-anr dav-awr gurgaq taef-a.
Aqsur Ghaq-anr Guv-eu Tsaq-eu La
Mt 10:28-31
4“Ngaq-euq cawqdeuq-or! Ngar, nawmaf-anr aernaeq nyar, mawrdo-anr lavsaef nya-eu khawf, khoertaf-aer tiqjeq-iq maq janrnya-eu deuq-anr taqguv. 5Nawmaf, aqsur ghaq-anr guv paq-aer ghae-eu la laer ngar, nawmaf-anr panmaeqnaeq nyar. Lavsaef-awr shiqbuir lanma-anr biqanr nya-eu aryaq jav-eu ghaq-anr guv-awq. Ngar, nawmaf-anr aernaeq nyar, aqyawf-anr guv-awq!
6“Jartseuv ngaq mawr paevsaq nyiq paev-anr nae anq-eu maqngeur-a lor? Aerkhawf, Miqyaer-aq, khoerdeuq tiqmawr-anr-iq maqngaer-a. 7Nawmaf-euq uqduq tsaerkanr yawqkanr navluf-anr khawf guijir taq-euq mae. Khoermirnae, taqguv. Nawmaf-aq, jartseuv ghawqmya mawr navmaqtser poeq-eu mae.
Yeqsur-euq Zaqlanr Ma Laer Aerdov-eu
Mt 10:32-33; 12:32; 10:19-20
8“Ngar, nawmaf-anr aernaeq nyar, Ngaq-euq zaqlanr ma laer tsawrhaq-euq maeqshi aerdov-eu aqgeu ghaq-anr maqkaq, Tsawrhaq-euq Zaqyo khawf, Miqyaer-euq mqtav ghaqkhaer deuq-euq maeqshi ngaq-euq zaqlanr ma laer aerdov taef-a. 9Aerkhawf, tsawrhaq-euq maeqshi Ngaq-euq zaqlanr maqngeur laer aerdov-eu aqgeu ghaq-anr maqkaq, Tsawrhaq-euq Zaqyo khawf, Miqyaer-euq mqtav ghaqkhaer deuq-euq maeqshi ngaq-euq zaqlanr maqngeur laer aerdov taef-a.
10“Tsawrhaq-euq Zaqyo-anr ngaeqbanq tmrlaeq-euq aqgeu ghaq-euq iqbax-anr maqkaq, pyaeqnaeq nya-a siq. Aerkhawf, Yawshawr Saflar-anr yaeqbawq-aer aer-eu tsawrhaq-euq iqbax-anr-aq, maq pyaeqnaeq nya-a.
11“Aqcawq, nawmaf-anr zanrdawq khawqnymr-anr maqaer, sanqpaq deuq hawr-eu aryaq jav-eu deuq-euq maeqshi sheuqghaelef ngae, aqjox-aer ya ngaeqkhof naeq-awr, aqjox-aer ya’ngaeq yatmr-eu laer khanq taqlanr. 12Aqjeq mirnae aernar-aq, nawmaf khoerngae yamq-anr ya’ngaeq yatmr-eu dawq, Yawshawr Saflar, nawmaf-anr maeqnaeqlaf taef-a.”
Smrmuiq Muiq-eu Aqdzawq Argan
13Khoerngae, tsawrhaq armaf mafma-euq lafkhoer tiq ghaq, Yeqsur-anr aernaeq-eu, “Saqlaq-or! Ngaq-euq maernmr-anr ngaq-anr jeqbir birnaeq-awq laer aqyawf-anr tiq pov aernaeq sher-eq.”
14Yeqsur, aqyawf-anr aernaeq-eu, “Cawq-or! Nawq-anr darnaeq-eu ghaq hawr-eu jeqbir birnaeq-eu ghaq geufni, aqsur ghaq nae ngaq-anr khaertaq-euq la?” 15Khoerngae, Yeqsur, aqyawf maf-anr par aernaeq-eu, “Nawmaf maerjuir maqjuirni, yawqhar yawqha yawmuiq-aer yanr-awq. Aqjeq mirnae aernar-aq, pyurshuir myawqganq ghawqmya’ni jav-eu mirnae, tsawrhaq yawdaef daefnya-eu maqngeur-a.”
16Khoernar-aq, Yeqsur, aqyawf maf-anr yawjeq majeq dawq-anr nae heulof-aer aernaeq-euq mae: “Smrmuiq smrbaw tiq ghaq daeyar daecaer ghawqmya’ni za-euq mae. 17Aqyawf sharnoeq-awr yawqhar yawqha aer-eu, ‘Ngaq-euq caer pi’anr khar maqza-eu mirnae, ngar aqjox-aer janr-eu paq nga?’
18Khoernar-aq, aqyawf heulof-aer aer-eu mae, ‘Ngar heulof-aer janr ma. Ngaq-euq caerjir deuq pyavdzae-awr tsovhuiq ma. Khoer-euq lafkhoer ngaq-euq sanqlanq ghawqdar deuq hawr-eu myawqganq dawqtawvluf dawvanrtaq ma. 19Khoernar-aq, ngar, ngaq-euq saflar-anr heulof-aer aernaeq ma, “Ngaq-euq nuima-or! Nawr-aq, ghawqmya khof-euq gharduq myawqganq ghawqmya’ni povuiq taq-euq mae. Sarlaevni daef-awr, tiqdaev dzaq, tiqdaev dawrdawr-aer laqkhaq caertavni daef-awq.” ’
20Aerkhawf, Miqyaer, aqyawf-anr aernaeq-eu, ‘Aqdzawq argan-or! Nymrcif nae ngar, nawq-euq saflar yurkhof ma. Tox-aer mar-iq, nawq nae povuiq taq-euq deuq, aqsur ghaq-euq pyeuf-ir-eu jeq la?’
21“Yawqha-euq gharduq pyurshuir myawqganq povuiq taq-euq khawf, Miqyaer-euq maeqshi smrmuiq maqmuiq-eu tsawrhaq lof-aer dur-eu mae.”
Khanq Taqlanr
Mt 6:25-34
22Yeqsur, aqyawf-euq zaqlanr deuq-anr heulof-aer par aernaeq-eu mae: “Khoermirnae, ngar, nawmaf-anr aernaeq nyar, nawmaf yawdaef daef-eu gharduq, aqjeq dzaq-awr, mawrdo-euq gharduq, aqjeq dm-awr ghaq-eu laer khawf khanq taqlanr. 23Aqjeq mirnae aernar-aq, daefzir-aq, dzaqdzaq dawrdawr navmaqtser poeq-awr, mawrdo khawf, dmghaq dmlmr navmaqtser poeq-eu mae. 24Nawr, awf-af-anr sharnoeqhaw sher-eq. Aqyawfmaf, caer maqka, caer maqyaeq-a. Caerjir maqjav-aer, myawq taqnymr khawf maqbaw-a. Aerkhawf, Miqyaer, awf-af-anr bidzaq bidawr-eu mae. Nawmaf, arjir navmaqtser arnavni poeqdzaeq-eu nga. 25Nawmaf khanqlanr-eu mirnae, yawqha-euq zir tiq cav manrdzaeq larni aqsur ghaq janrnya-eu le? 26Nawmaf nyir duidui-eu jeq-anr khawf maq janrnya-eu gar nae, aqjeq mirnae nuideuq-anr khanqlanr-eu le?
27Kapaf aryaev aqjox-aer huiqlar-euq nga laer nawr sharnoeqhaw sher-eq. Aqyawf maf-aq, myawq maqmr, saqlaq khawf maqghawr-a. Aerkhawf, ngar, nawmaf-anr aernaeq nyar, Sorlaqmoq nae yadm yaghaq-euq yawshaef khanqsaer huiq duidui-eu maeqtsoeq-aq, aryaev heu tiq yaev navni khawf maqtawq-a. 28Jan-eu ghaq baq-eu tsawrhaq deuq-or! Iqnan daefluf-eu khawf, nishawq tsawqbym-anr bi jaevpuiv-eu yarmof-anr, Miqyaer heunavni bidm bighaq-eu nar-aq, nawmaf-anr ngeurdzaeq arnavni bidm bighaq naeqlaf nmr-mq.
29“Nawmaf aqjeq yadzaq yadawr-eu nga laer taqpov. Khanq khawf taqlanr. 30Mirtsaq-euq tsawrjeuq tsawrca deuq-aq, heudeuq dawqtawv luf-anr povluf-eu mae. Nawmaf heudeuq-anr mawf-eu mae laer nawmaf-euq Aqda siqnya luf-eu mae. 31Aerkhawf, nawmaf-aq, Miqyaer uvlanr-eu jeq-anr pov-awq, khoerdeuq dawqtawvluf nawmaf-anr biflanq naeqlaf taef-a.
Mq-euq Khoertav Povuiq Taq-awq
Mt 6:19-21
32“Yawr yawrmaf mafzaq-or! Taqguv. Aqjeq mirnae aernar-aq, nawmaf-euq Aqda-aq, aqyawf-euq mirkhanq, nawmaf-anr nuikhanr tiqshir bifmawf-eu mae. 33Nawmaf-euq myawqganq anqdzae-awr, aqcawq-anr gamfnaeq-awq. Yawqha-euq gharduq maqpeuq-ir nya-eu pyur pawqbaev guftaq-awr, maq zmqjir nya-eu pyurshuir myawqganq, mq-euq khoertav povuiq taq-awq. Khoergar-aq, smrkhoeq maq lepae nya-aer, boeq khawf maq dzaqler nya-a. 34Aqjeq mirnae aernar-aq, nawmaf-euq pyurshuir myawqganq aqgeugar jav-eu nar-aq, nawmaf-euq nuima khawf khoergar jav-eu mae.
Yawmuiq-aer Lofluf-eu Kuirlaf Zaqkhav Deuq
35“Nawmaf jofpaf deurkeuvni paf-awr, tsirkhmq khawf doftaq-awq. 36Yawqha-euq yawsanr ghaq oermr bar-eu gar ir-euq ghoflar-awr, larghov-anr khov ngae, yawkawr-aer pannaeq-ir nya’ni lofluf-eu tsawrhaq lof-aer yawdaef daef-awq. 37Yawsanr ghaq ghoflar ngae, yawbeur beur-aer lofluf-eu kuirlaf zaqkhav deuq-aq, guiqlanqhuiq taef-a. Ngar, nawmaf-anr aqdirma-aer aernaeq nyar, yawsanr ghaq jofpaf paf-awr, kuirlaf zaqkhav deuq-anr hawqjawq bijawq-awr, aqyawf hawqbyawr lavdawvnaeq taef-a. 38Uqcif saerghanr ghoflar ngae maqaer, uqshawq yawnaf-aer ghoflar ngae maqaer, ghaqzaq ghaqkhaer deuq khoerlof-aer lofluf-eu gar ya’mawr nar-aq, ghaqzaq ghaqkhaer khoerdeuq guiqlanqhuiq taef-a. 39Nawmaf heu-anr siqnya-awq. Nymrsanr ghaq, smrkhoeq khoeqlar-eu aryamq-anr siqnya lawnmr-aq, smrkhoeq khoerghaq, aqyawf-euq irkanr maqbi urlar-aer, aqyawf-euq nymr maqbi daepyavni lofpir taef-a. 40Nawmaf khawf yawmuiq-aer laeqhmq taq-awq. Aqjeq mirnae aernar-aq, nawmaf maqnoeq maqdur-aer jawr-eu aryamq-anr, Tsawrhaq-euq Zaqyo zafkale taef-a.”
Sarjax Zif-eu Hawr-eu Maqzif-eu Kuirlaf Zaqkhav
Mt 24:45-51
41Khoerngae, Beqtuvluv narhaq-eu, “Sanqpaq-or! Yawjeq majeq teudawq, nga’maf-anr taef-aer aernaeq laf-eu le lor? Maqngeur nar-aq, yawqghaq navluf-anr khawf aernaeq luf-eu le laq?”
42Sanqpaq Yeqsur heulof-aer aernaeq-euq mae, “Zaqsiq tsawrganr anr-awr sarjax zif-eu lafkhoer, myawqganq-anr hawpir nya-eu aqgeu ghaq la? Aqyawf-aq, nymrkhanqzaq-anr hawpir-awr, aryamq tsaq ngae, kuirlaf zaqkhav nuideuq-anr dzaqdzaq dawrdawr shaqbymr tsaqni birnaeq nya-eu, yawsanr ghaq nae khaertaq-euq khoerghaq maqngeur-a lor? 43Yawsanr ghaq ghofle ngae, aqyawf khoerlof-aer mrluf-eu gar ya’mawr nar-aq, kuirlaf zaqkhav khoerghaq guiqlanqhuiq taef-a. 44Ngar, nawmaf-anr aqdirma-aer aernaeq nyar, yawsanr ghaq, kuirlaf zaqkhav khoerghaq-anr aqyawf kharjav-eu myawqganq dawqtawv luf-anr uvlanr-eu ghaq bigeuf taef-a. 45Aerkhawf, ‘Ngaq-euq yawsanr ghaq yawkawr-aer maq ghofle-ar’ laer kuirlaf zaqkhav khoerghaq nuima-euq lafkhoer sharnoeq-awr, kuirlaf zaqkhav aqli deuq hawr-eu kuirlaf zaqkhav aqbur deuq-anr diqdiq-aer, dzaqyaef dawryaefluf nar-aq, 46kuirlaf zaqkhav khoerghaq maqnoeq maqdur-aer jawr ngae, maqsiq-eu aryamq-euq lafkhoer, aqyawf-euq yawsanr ghaq ghofkeuvle taef-a. Khoernar-aq, aqyawf-anr nyiq tsaev coertsaev-awr, maqjan-eu tsawrhaq deuq lof-aer shaqbymr bi’of taef-a.
47Yawqha-euq yawsanr ghaq-euq nuima siqnya luf-eu khawf, maq laeqhmq taq-aer, yawsanr ghaq-euq nuikhanr maqmr-euq kuirlaf zaqkhav-aq, ghawqmya laf diq-eu gar yadaq taef-a. 48Aerkhawf, ghawqmya laf bidiq paq-aer geux-eu, maq siqnya-aer mrbanq-euq kuirlaf zaqkhav-aq, ghawqmya laf maqya bidiq-ar. Aqjeq mirnae aernar-aq, ghawqmya’ni za-euq tsawrhaq yawqghaq navluf, ghawqmya’ni ya bifkhof-awr, ghawqmya’ni hageuf-euq tsawrhaq-aq, aqcawq myavmaqtser yabi sharkhof taef-a.
Bitsaq Bi Dzoerler-eu Laer Oe-euq Maqngeur
Mt 10:34-36
49“Ngar, mirtsaq-euq khoertav miqdzaq bi doflar-eu laer oe-euq ma. Dzeurlaf ngae nae ngar miqdzaq khoer bi doflar mawf-eu ma. 50Ngar ya hageuf-eu bartirsaq tiqjeq jav-a siq, maq hageuf-euq khoerkeuvni, ngaq-euq gharduq shaqzanq pyeuf duidui nya. 51Ngar, mirtsaq-euq khoertav bitsaq bi dzoerle-euq nga laer nawmaf noeq-eu le lor? Ngar, nawmaf-anr aernaeq nyar, maqngeur de-eq, bighawq bighaer-ir-eu laer oe-euq ma. 52Nymq-mr nae, tiq nymrkhanq-euq lafkhoer jawr-eu tsawrhaq ngaq ghaq ghawq-ir ghaer-ir-awr, smr ghaq tiq mur, nyiq ghaq tiq mur mur-awr, tiqmur tirmur cae taef-a.
53Aqda hawr-eu zaqyo, zaqyo hawr-eu aqda, aqma hawr-eu zaqmiq, zaqmiq hawr-eu aqma, boermiq aqma hawr-eu keuqma, keuqma hawr-eu boermiq aqma, tiqghaq tirghaq maqtsaq maq dzoerlerni caedzaq taef-a.”
Aryamq Arlaw Tof-eu
Mt 16:2-3
54Yeqsur, tsawrhaq armaf mafma deuq-anr khawf heulof-aer aernaeq-euq mae: “Nanrma gakhaeq paw mqdmr dovlar-eu gar nawmaf ya’mawr ngae, ‘Uqyaer yaerle-eu jeq ngar-a’ laer aer-eu mae. Nawmaf aer-euq lof-aer yaerle-eu mae. 55Lafov paw-euq jaqlaer bawlaf-eu gar nawmaf ya’mawr ngae, ‘Yawlanr lanr duidui lar-eu jeq ngar-a’ laer aer-eu mae. Nawmaf aer-euq lof-aer pyeuflar-eu mae. 56Yawmuiq janrgeuf-eu tsawrhaq deuq-or! Nawmaf, mirtsaq hawr-eu mq-anr haw-awr aqjeq pyeuflar-eu nga laer aernya-eu gar nae, aqjeq mirnae aryamq arlaw heu-anr maq tserpav nya-eu nya?
Yarkhaq Ja-eu Ghaq Naeq-aer Lavtsaq Geuf-awq
Mt 5:25-26
57“Aqjeq mirnae nawmaf, yawqha yawqha tsaq-eu jeq-anr maq tserpav nya-eu nya? 58Nawq-anr yarkhaq jaluf-eu ghaq naeq-aer yarkhaq dar-eu nymr-anr leluf ngae, nawnyaf yawkaq laejae-awr lavtsaq geuf-awq. Maqngeur nar-aq, aqyawf, nawq-anr yarkhaq dar-eu ghaq jawr-eu gar gheughae-awr, yarkhaq dar-eu ghaq khawf, nawq-anr kuv-anr haw-eu aqyuif ghaq-anr a’naeq taef-a. Kuv-anr haw-eu aqyuif ghaq khawf nawq-anr kuv-anr nyaefur taef-a. 59Ngar, nawq-anr aernaeq nyar, maq tsoeqtsaev-euq pyur tiq paev khardzer-eu khoer-aq, nawr, kuv-anr nae aqdir maqya dovle-ar.”
Currently Selected:
Lurkaf 12: AKA
Highlight
Share
Copy
Want to have your highlights saved across all your devices? Sign up or sign in
2018 ©
Bibles International ®
The Bible Society of Baptist Mid-Missions
