Fêt 9

Sôl kahi hì mô wùt bimena

(Fêt 22.6; 26.12-18)

1Sôl hì faha kə ha jyak na yi nè ywitelò jùmtìbàmsù Bâba, lo yen a ngàŋ à ndâ Fùyèn yì ngaŋtena 2jis ha wun na, wù fo ŋwàklù sù ha yi su chwûtè wùt we yi mò wunù, nì jyak ghe yi kəta shyəma yi yen a ndasu chintesu ghɨt a Jûs a Dàmaskùs ma yi kwoti jùmtìbàmsù Jisòs sù nâ sù jɨ̀m ma yi kahà ben nì sinsu a Jèlusalèm, makə a mò a lɨmà makə a mò à ywên.

3Ghɨ fô, wù fwu gbî hì bakhe yênà a Dàmaskùs, ban yile bûŋhì mwan fwu a wu lùk afa wù ndùku mô atɨ̂n. 4Wù fen a chyə̂, yu te wùt jîsà ha wun na, “Sôl, Sôl wò chɨma wulu mu ni njwô ghə?”

5Wù buf na, “À mò wò nde a Bâba?”

Wùt àtɨ̂n fîsì na, “À mò mu Jisòs we wò fo ngə̂k ha wun yâ. 6Biyani, lòti lyi ndù atɨ̂n à yì tèk ma wùt nê fôkti gha ye wò kəta hi nì.”

7Ghɨt ghe ghɨ ndùku gbê ghê Sôl timi china kə ni moŋ beka ghɨna tì ywo jyə̀ àtɨ̂n biyani tê yen a wût. 8Sôl lôtì a chyə̂ yâhè a se wuna biyani tê yena jə̀ luktu. Ghɨ ki khɨte wun a wu kpên hì gubtè hi lye yèn nì wûn a Dàmaskùs. 9Wù chyə tuk mù tât yena wi luktu, teka wù yə nâ shyə ale nâbi hi nyu kàntè mòlû.

10À ndùku mô ni jùmtìbàm yì Jisòs yìlè mô a Dàmaskùs, yet yi wuni mô Ànàniyàs. Bâba fwu a wun a yì kə̀k te wù fwu a jem toŋti wun na, “Ànàniyàs!” Wù bimî jis na, “Mu wûn a Bâba.”

11Bâba jis ha Ànàniyàs na, “Lòti ndù wu lum afa ghɨ toŋte na Lum wu Nananu ma wò buf ndâ wùt lè afû ghɨ toŋte wun na Judàs. Wò ki lye yèn a nda afû, wò buf wùt à Tasùs wùlè ghɨ toŋte na Sôl. Nâ chîn mò wu jə̂mà kə yi jə̂m. 12Mu ti chwûtì gha ha wûn ghɨ ti fwu a wun yi kə̀k te à chyə jem. Te wò lèma wo wa a wun a tû wù ti kahi yen luktu.”

13Ànàniyàs fîsì jis na, “Bâba, ghɨt a dona ti fôktì gha ha mu kum wùt mu wuna nì gha be ghɨ dona ghe wù ne ha ghɨt gha a Jèlusalèm nâ haŋaŋ. 14Nâ chîn te wù bèna a Dàmaskùs mò ma ngàŋsu ndâ Fùyènsu chiksu ti fo jyaka ha wûn na wù kwoti nâ ghɨt à jɨ̀m ghe ghɨna jə̀mà toŋte yet ya.”

15Biyani, Bâba jis ha Ànàniyàs na, “Ndù kolô beka mu ti chwok wûn na wù fet ha mu hi nì na tumu nì fə̂ntù ghɨna tu, nâ kəbi nì ghɨt a Isalì khɨli mu, 16nâ mu a mu ngɨŋ nè chwûtè lò ha wûn nki ngə̂k ye wù kəta hi yen hi nì na ghɨta khɨli mu.”

17Ànàniyàs lo yen lye a ndâ afû lem a wo wunu a Sôl a tû jis na, “Wâ nôm Sôl, Bâba a mô Jisòs we wò ye yena wu lum yâ te wò yê hì bênà afân ti tum mu na mu bê nì ma se gha kahà yen luktu hi fè nì na Yohnà Yulena ben ha wò.” 18Kə te wù jìsa mihe kə ni shyə fwu a Sôl a se te wuba yìlu chəmli a chyə̂ se wuna yâhì, wù kaha yen tu luk. Wù lôtì fyi mòlû te wut wù bimena. 19Yi bàm yi tɨ̂n wù yə a shyə, jyaka kaha ben a wun wù wùn.

Sôl fôktì tum yì jùŋ a Dàmaskùs

Sôl fî chyəti kwok yen a tuk mù sek ni a Dàmaskùs ghê jùmtìbàmsù Jisòs su lesu, 20lo chem yen kə ndasu chintesu wu lùk mefû yîmì hì tè fòktè tum yì jùŋ kum Jisòs jîsà na, “Wù mò Wâ Fùyèn.”

21Nâ ghɨt à jɨ̀m ghe ghɨ ndùku ywo Sôl jîsà hì mô nì kani hì jîsà na, “Wùna mò wut we wù chehì ywite ghɨta a Jèlusalèm beka ghɨna kokhe Jisòs. Ba wù che ben afân kəbi a tô yi gha afân hi kwote ghɨt a bimena hi kaha yê fo ha ngàŋsu ndâ Fùyènsu chiksu.”

22Biyani, Sôl hì fôktè yênà kə yi yên nì tum yì jùŋ. Wu fôktè chwûtì mihì na Jisòs mò wut we Yènfù chwoka lema. Nâ wùt à Jûs wù mòk ndùku wi a Dàmaskùs hi tunhe gha ye wù ndùku jîsà.

23Tuk mù chya dô kə ni, ghɨt a Jûs yûŋtì hì bakte hi ywe Sôl. 24Biyani, ghɨta bên fôktì gha ye ghɨna bakte hi nì ha wûn. À hì mò nâbi nchwì nâbi ntuksu ghɨna yute kə wûn yi jwo mbàn yi tèk afû hi ywî. 25À hì mô ntuksu tuk wule jùmtìbàmsù Sôl sù lyi wûn lem a kà fihi wun a bùk wu wùn wu mbàn, chwohi tom a yi bàm yi mbàn, wù tet lô.

Sôl kaha yen a Jèlusalèm

26À hì mô te Sôl kwoka tana a Jèlusalèm, mômhì hi chìntì a nôn à jùmtìbàmsù Jisòs sù, biyani ghɨna tunhî na wu wijə jùmtìbàm à Jisòs. Nâ ghɨna à jɨ̀m hì fânà wûn. 27Bànabâs ben gâmtì lyi yen nì wûn ha ghɨt a tuma Jisòs fôktì banhi ha ghɨna na Sôl che yen Bâba wu lûm te wù yènà a Dàmaskùs, wù jis ha wun. Bànabâs fî jis na Sôl ti fôktì tum yì jùŋ a Dàmaskùs kum Jisòs kə nâ nì təm a ta. 28Sôl faŋ hì chyə kwoka yê kə nì ghɨt a tuma Jisòs hì gbê kata kə Jèlusalèm yì jɨ̀m fôktè tum yì jùŋ kum Bâba nì təm a ta. 29Wù hì jîsà fê gûfnà a ghâ nì ghɨt a Jûs ghe ghɨ ndùku jîsà jìs yì Gɨlìs. Ghɨna yîmì hì khɨŋa hi ywe wûn. 30Ghɨt a bimena tì khɨli gha tɨni kə wu yu tesi chwo nì wûn a Sìsiliyà chinhi na wù kahà yen a Tasùs.

31Nâ ghɨt a bimena à jɨ̀m a Jùdiyà nì Galìlî nì Sàmaliyà hì fê fânà wi. Ghɨt a bimena hì dô bênà kə yi bên bimînì ghɨna hì ləma kwoka kə yi kwôk, Yohnà Yulena gâmtè ghɨna chyə kəta Bâba khɨŋa.

Bità nì gha kanani a Lidà

32Yu wule tî ben kpên, Bità gbi tu luk tu dô kə ni chwo yen hi jikte ghɨt a bimena ghe ghɨna ndùku mô a yi tèk yi Lidà. 33Te wù chwo ni, yen wùt lè afû yet yi wuni mô Àniyàs, ma wù ti kə̂blì nîŋì faŋ kə wu khɨ̀ a wu lɨ̀m fama. 34Bità jis ha wun na, “Àniyàs, Jisòs Klistù nè nêlò ma wò tâ kə chîn. Lòti fati khɨ̂ wa.” Àniyàs lôtì kə wu yu mòk. 35Nâ ghɨt à jɨ̀m ghe ghɨna ndùku chyə a Lidà nì ghe ghɨ ndùku chyə yi bat yile ghɨ toŋte na Shalòn, yen te wù gbè ghane kata, kahi təm a ghɨna bimi ha Bâba.

Bità ni Dokàs lôtì a yi kpû

36À ndùku mô a Jobà, wùt ywên wù bimena wùlè mô afû yet yi wuni mô Tàbità ghɨ toŋte a jìs yì Gɨlìs na Dokàs ma ya mò na fuchwi. Wù ndùku nê kə gha jûŋà yu mù jɨ̀m fê fo yi gâmtì ha ghɨt a fufana. 37À hì mô kə mu tuk afû guta kwo wûn wù kpû. Ghɨta su yi gun yi wuni kwok nîŋhì atɨ̂n à ndâ a nyə̂. 38À ndùku mô ni yi dâfà wi hi lò yi tèk yi Jobà hi yèn a Lidà. À hì mô te jùmtìbàmsu Jisòs sù a se su ndùku mô a Jobà yu na Bità mò a Lidà, ghɨna tum à ghɨ̂t à bà na yê jis ha wun na ghɨna chyate wun na wù nyiŋ à chwo bê yen ghɨna. 39Bità lôtì ghê ghɨna lo yen tan afû ghɨ kwok nì wûn a ndâ afâ a nyə̂. Ywena nkwô nâ à jɨ̀m a yi tèk afû yûŋtì a Dokàs a ngwùŋ hì jyê chwûtè njusu makasu nì waf we ghɨ chehì chyə kwoka yênà wu taha ha ghɨna. 40Bità jis ha ghɨna à jɨ̀m na ghɨ fwo yen a bɨn. Ghɨna fwû, wù tum a lwî a wuna a chyə̂ jəm ha Yènfù, fî kaha jìs ha gun yi tɨni na, “Tàbità, lòtî.” Wù yâhì a se wuna yen ben nì Bità ni kə wu yu lôtì ndokò a nyə̂. 41Bità gâmtì lôhì wùn toŋa ghɨt a bimena nì ywena nkwô ghê chwûtì ha ghɨna na wù mò kə nâ wu tâ. 42Gha kum wûn gbi kə tèk yi Jobà yì jɨ̀m, ghɨt a dona bimî ha Bâba. 43Yi bàm atɨ̂n Bità chyəti kwok a Jobà ghê Samùn wùlè wu tôknè nì gwusu nyâmsù.

Currently Selected:

Fêt 9: bmv

Highlight

Copy