Jon 11

Lasalòs kpû

1Wùt lè ndùku yafalò yet yi wuni mô Lasalòs, wu chyə yi tèk yi Betanì, a mô kəbi tèk ye Mèli ghê wâ nè wûn ndùku chyə atɨ̂n. 2Lasalòs wuna a wù ndùku yafa ni, à ndùku mô wâ nè Mèli, Mèli wuna ndùku mô kəbi Mèli we wù tì sùha yûhì ye a Jisòs wu wù yah nì nyuŋsu wunsu tusu yâ. 3Jâmtì sîn ki tuma tum ha Jisòs jîsà na, “Bâba wùt we wò kòŋà yâ, yafalò.”

4Jisòs yu tum àtɨ̂n jis na, “Wù yafa kəbi ni, bu hi kpû. Yaf yi tɨni ben shyəma Yènfù chwuti jyak a wuna. Wâ Fùyèn nè chwûtèlò jyak ghe ghɨ fo ha wun tohne a yi yaf afân.”

5Jisòs ndùku kôŋàlò Matà ghê wâ nè wûn Mèli nì Lasalòs, 6biyani yu na Lasalòs yafalò faŋ kə wu lùk afa wù ndùku mô, tuk mù bà chyâ, 7wù ki jîs ha jùmtìbàmsu wunsu na, “Ghàhnà kahà yen a Jùdiyà.”

8Jùmtìbàmsu wunsu toŋti wun jis na, “Chichà, à ndùku mô kə yi bàm yi mu tuklâ ni ghɨt a Jûs hì khɨŋa hi tumle wò nì te, wò wu hì fê khɨŋa hi yè nè ghə afû agha?”

9Jisòs buf ha ghɨna na, “Ba tuku kəta mbɨŋlu njwòsù bà agha? Wùt wi hi damta gbì nchwì beka wu gbè yena ban yi mbyi. 10Wù mò kə hi damta a wu yu afa wù gbè ntuksu beka wù kəta wijə bani, yena wi.” 11Jisòs jis ni ki jîs na, “Sô ghàhnà Lasalòs ti bwunî biyani mu kəta hi yè yèmhè wûn.”

12Jùmtìbàmsu wunsu toŋti wûn jis na, “Bâ, à shìki mô ma wù ti bwunî ma à hi mô na wù nè yemàlò.”

13Jisòs ndùku jîsà ni, jîsà na Lasalòs ti kpû, jùmtìbàmsu wunsu yu ni hì khə na wù jìsà kə kàntè sù bwuni. 14Jisòs fôktì mihì ha ghɨna na, “Lasalòs ti kpû, 15kum ghàn. Mu saŋlê beka mu yê hì wijə afû. Ghàn ti yimèlò hi bimi chîn. Ghàhnà yê yen wûn.”

16Kə wu yu Tomòs we ghɨ ndùku toŋte kəbi na Didimùs jis ha jùmtìbàmsu Jisòs sulesu na, “Ghàhnà boŋà yen kə a chichà yi bàm, wù hì mô hi kpû ma ghàhnà boŋà kputè yen.”

Jisòs yen kukti Jâmtìsù Lasalòs su

17Jisòs yen tan a Betanì yen ma Lasalòs ti chyə a yi sì a mu tuk mù kìk. 18À ndùku mô hi lò a Betanì hi yèn a Jèlusalèm yaka wi mâl sù bà, 19ghɨt a Jûs mô afû dô kə ni te ghɨna bèna hi kukte Matà ghê Mèli a wâ nè ghɨna yi kpû. 20Matà yu na Jisòs wu hì bênà, fwu yen hi yè fye wûn, Mèli faŋ kə a ndâ. 21À hì mô te Matà ye yena Jisòs jis na, “Bâ, wò chehì mô afân ma wâ nôm tà che kpu jə̂. 22Nâbi yani, mu khəlò na wò buf nâbi ghə ha Yènfù chin ma fu nê kə ha wò.”

23Jisòs jis ha wun na, “Wâ nâ nè kaha lôtèlò ma wù hi chyə̂.”

24Matà jis ha wun na, “Mu khəlò na ghɨ bè shihi kaha lòtì a yi kpû wù tuk wu gokhenu ma wù boŋà loti.”

25Jisòs jis ha wun na, “À mò mu we mu lòhè ghɨta a yi kpû fo a jyak na ghɨna hi chyə̂. À bimi nâbi nde ha mu kpu kəbi yi kpû ma wù bê kaha loti ma wù hi chyə̂. 26À hì chyə nâbi nde bimi ha mu ma wù bê tè kpû nâ hakoh.” Jisòs jis ni buf ha Matà na, “Wò ti bimi yina agha?”

27Matà bimî jis na, “Mu ti bimî a Bâ, na wò mò we ghɨ chwoka lema, Wâ Fùyèn we wù ndùku mô hi bèn a mbyî.”

Jisòs jî

28Matà jis ni kaha yen nyamti jis ha wâ nè wûn Mèli na, “Chichà ti ben hì bufa wò.” 29Mèli yu ni nyâŋhì fwu hi yè yen a Jisòs. 30À ndùku mô ni Jisòs baha yè mò kə wu lùk afa Matà tì kwòna ghê wûn wu lum yâ teka wù lyi atɨ̂n à yì tèk. 31Mèli shihi fwo yèn, ghɨt ghe ghɨ tì bèna hi kukte wûn a ndâ fwu hì yênà kə wun a yi bàm kwâktè na wù yè a yi sì hi tè jyè wâ nè wûn afû.

32Wù yen tan wu lùk afa Jisòs ndùku mô, te wù yena ye nì Jisòs ni, fen a wun ashyə̂ jis na, “Bâ, wò chehì mô afân ma wâ nôm tà che kpu jə̂.”

33Jisòs yen te wù jyè ghê ghɨt ghê ghɨna yê hì mô, gha tɨni hì fo ngə̂k ha wûn yafa wûn nâ haŋaŋ. 34Wù buf ha ghɨna na, “Ghàn che guma afa wûn.”

Ghɨna jis na, “Bî ma wò yê yen a Bâ.” 35Jisòs jî. 36Ghɨta yen te wù jyè jis na, “Wù chehì kôŋà wûn nâ haŋaŋ!”

37Biyani ghɨt ale hì jîsà na, “À wi wun we wù jìmè se ghɨt a fefana, wù che faŋ hi nì na kə Lasalòs kpu njwô ghə?”

Jisòs lôhì Lasalòs a yi kpû

38Jisòs lo yen tan a Lasalòs yi sì gha tɨni baha yê fo ngə̂k ha wûn. Sî tɨni ndùku mô wu tə̂n ma ghɨ chuf a yi wo. 39Jisòs jis na, “Ghàn chyàkhi ti tɨni.”

Biyani Matà a mô wâ nè wùt wù kpona, Lasalòs jis na, “Tuk mù ti chyâ chîn mù kìk a Bâ, te ghɨ guma wûn, ma yuk yi be làhi fwu atɨ̂n bəmâ.”

40Jisòs jis ha wun na, “Ba mu ye jis ha wò na wò bimi ma wò yen jyak a Fùyènà agha?” 41Wù jis ni, ghɨ jîhì ti tɨni. Wù ki kokhi a nyə̂ jis na, “Mu fo àyòŋnà gha a Bâ, beka wò yè yusa yute ki yi yutî ha mu, 42mu khə kə nâ na mu yè jîsà wo ywô. Biyani mu jìsà chîn kum jùŋ à ghɨt ghe ghɨ mô afân shyəma ghɨna ywô bimi na à tum wò mu!” 43Wù jis ni, toŋa jis a jyə̂ yi tâ na, “Lasalòs, fwu bî!” 44Wù fwu bên, ma ghɨ ti kwut wo nì wulu wunu nì bâh wù sùnju fî kwut kə̂k yi wuni nì njusu lesu. Jisòs jis na, “Ghàn yenti gûm wûn a wun wu wùn ma wù lo.”

Ghɨ bakti hi ywe Jisòs

(Mat 26.1-5; Mâk 14.1-2; Lûk 22.1-2)

45Ghɨt a Jûs a dona ghe ghɨ tì bèna hi yena Mèli tì yen gha ye Jisòs tì ne bimi ha wûn. 46Biyani ghɨta kahi yen fôktì gha ye Jisòs ne ha ghɨt a Falàsî. 47Ghɨna khɨti yi yûŋtì ghê ngàŋsu ndâ Fùyènsu chiksu nì ghɨt a sakana buf na, “Ghàhnà gbè yàni, yen gha kanana ghe wùt wuna mòmà. 48Ghàhnà ki dê wûn ma ghɨt à jɨ̀m nê ghaŋ gha ma bimi ha wûn. Yi bàm àtɨ̂n ma ghɨt a Lûmà nê bè bobhi ndâ Fùyèn yì ghàhnà yi chìk ma fê bobhi nâ ghɨt a ghàhnà ghɨ laka.”

49Wùt lè a ghɨna fùtɨ̂n ghɨ toŋte na Kàyafàs, a mô ngàŋ à ndâ Fùyèn yì ngaŋtena a lɨ̀m afû jis na, “Ghàn khə wi gha nâ hakoh! 50Ba yi mô na ghàn yena wi na yi bɨlà jwôfà na wùt wù mòk kpu a ghɨt à jɨ̀m a tû chyâ shyəma ghɨ bobhi lak yì jɨ̀m agha?” 51Wù ndùku jîsà ni bu a wun wu tof biyani fôktè tum à Fùyèn te ngàŋ à ndâ Fùyèn yì ngaŋtena a lɨ̂m afû na Jisòs kpu a ghɨt a Jûs a tû. 52Wù tà tì kpu jə kə ha ghɨna. Wù tì kpu kəbi a wana Fùyènà a tû ghe ghɨ jyahe mbyî, shyəma ghɨna kahà yûŋtè ben ma ghɨ hi mô ha shyə̀ à mòk.

53Hi yìmì wu tuk afû ghɨna hì bakte hi ywe Jisòs. 54Jisòs yen ni, hì fê lye wijə wu lùk afa ghɨt a Jûs mò hi yen a wûn. Wù bɨlì tet yen yi tèk yile ghɨ toŋte na Efèlèm, a bàh a lak ale ghɨ bakhe yênà yi lak yi sùsi hì chyə afû ghê jùmtìbàmsù wunsu.

55Tuk mù Dàŋa chyalamù ghɨt a Jûs hì bakhe bênà, ghɨta kolo kwoka a Jèlusalèm dô kə ni, hi yè sò ngɨŋsu ghɨnasu a ghɨna chyənà yì lak shyəma tuk wu Daŋa chyalanu ben. 56Ghɨna yen ya faŋ hì bufa kə Jisòs, yen timi a bɨn a ndâ Fùyènà bufa kə ghɨna sù ngɨŋ na, “Wò yena yàni? A wù nè bènàlò wu lùk wu yi yə afân agha?” 57À ndùku mô ni ma ngàŋsu ndâ Fùyènsu chiksu nì ghɨt a Falàsî ma ghɨ ti chyâhì saki na, à khə nâbi nde luk we Jisòs mò atɨ̂n wu fôktì ma kwo wûn.

Currently Selected:

Jon 11: bmv

Highlight

Copy