Lûk 10

Jisòs tum ghɨt a tuma wuna msàmba njwòsù bà

1À hì mô yi bàm yi gha afân, Bâba chwokti ghɨt ale msàmba njwòsù bà tum ghɨna, à bà, à bà na ghɨna yen ashyə̂ a tèk tù jɨ̀m nì luk te wù ndùku kəta hi yèn atɨ̂n, 2fî jis ha ghɨna na, “Mwə̀ mù yə̂mù hi kpì dô kə ni, biyani ghɨt a kpene tobte kə ni. Ghàn jəm lê ha Yèn fe fu mô bè fùk, ma wù tum à kpenhi ghɨt a fetana ma ghɨ shik à kpê kolo nì ghɨna. 3Ghàn yen. Ghàn shihi yèn, ghàn hi khə na mu tuma ghàn te wana sù njyə̀ atɨ̂n à nyamsu basu. 4Kə ghàn lyi ka nâbi nì bàlì wafana. Kə ghàn lyi kpenhi gwusu wùsu lesu. Kə ghàn lyi yu hi toŋte ha wùt wu lûm. 5Ghàn yen lyi nâbi ghɨ̀ni bɨna, ghàn yitì toŋti ghɨt atɨna jis na, ‘Yènfù fo yutìnì ha ghàn a bɨn a afân.’ 6Wùt shìki tê mò a bɨn afû kpenâ hi tè kəta yutìnì, ma yutìnì yen ha wûn. Wùt shìki bu ma yutìnì tɨni kahà ben ha ghàn. 7Ghàn lyi, ghàn faŋ kə bɨn a afû, yə, nyo nâbi ghə ghe ghɨ fo ha ghàn, beka ghɨ kəta hi tè làk a wùt fètana. Kə ghàn hi dâŋtè bɨnû. 8Ghàn lyi nâbi yini tèki, ghɨ fyi ghàn lem nâbi afa ghàn, ghàn yə nâbi ghə ghe ghɨ fo ha ghàn. 9Ghàn lyi yi tèk afû, ghàn chwuk ghɨt a yablena ghe ghɨ mô afû, fòktè ha ghɨna na fə̂n wù Fùyènù ti bakha ha ghɨna. 10Biyani ghàn ki lyi yi tèk, ghɨ tê fye ghàn, ghàn fwu yen a lumtu tatu jis ha ghɨt atɨna na, 11‘Ghàh bukte châkhè but wanu tèku a ghàh wu wù ni, hi chwùtè chwena na ngə̂k ti fâŋ ha ghàn.’ 12Mu jìsà ha ghàn hamok na, à bè hì mô a wu tuk wu saku Fùyènù, ma ngə̂k bê hi mô ha ghɨta a yi tèk afû chyâ te yì ndùku mô ha ghɨt a Sodòm.”

(Mat 11.20-24)

13“Ngə̂k yì chìk bè hì mô ha ghàn ghɨt a Kolasîn kəbi nì ha ghàn ghɨt a Bèsadà! À ndùku mô na ghɨ ni gha kanana ghɨ̂n ha ghɨt a Tayà nì ghɨt a Sidòn, ma ghɨna tî ndokò a wu bùt fuk wu bwû a ghɨna wùn mâk njusu finasu kahi təm a ghɨna a sùbe. 14À bè hì mô wu tuk wu saku Fùyènù, ma ngə̂k bê hi mô ha ghàn chyâ te yì ndùku mô ha ghɨt a Tayà nì Sidòn. 15Ghàn ghɨt a Kàbanùm, ghàn kwàktè na Yènfù bè kokhe ghàn na ghàn kwok à tan a nyə̂ ma?” Yi wijə yâ. Ghɨ bè bɨlà tumhe ghàn a yi be afa yi lye kokhè wi yâ.

16Wù jis ni, kaha jis ha ghɨt a tuma ghe na, “Nâbi nde we wù ywo ha ghàn, wù ti yû ha mu. Nâbi nde we wù tunhe hi yu ha ghàn, wù ti tunhi hi yu ha mu, we wù tunhe mu, wù ti tunhi we wù tuma mu.”

Ghɨt ghe msàmba njwòsù bà kaha kolô

17Ghɨt ghɨ̂n msàmba njwòsù bà tî gbi kaha kolo nì saŋlînì jîs ha Jisòs na, “Bâba nâbi yohnù wu be tì yu ha ghàh a wu yu afa ghàh kàntè gha a wo yi yet!”#10.17 Msàmba njwòsù bà: À mò a ŋwàklù su mwu su lesu ma ghɨ kə na 70.

18Jisòs jis ha ghɨna na, “Mu tê yên te Satàn lô a nyə̂ fen te wuli mwanani. 19Ghàn hi khə na mu ti fô jyaka ha ghàn na ghàn jeli yosu besu nì nyak mù chyə̂, fî fô a jyak na ghàn ta chya bànà sanisu, kə tu lum tù jɨ̀m. Nâ shyə ale bè fo wi ngə̂k ha ghàn. 20Biyani kə ghàn hi saŋle na yohnù wu be ywo ha ghàn, ghàn hi bɨlà saŋle na ghɨ ti nyak yet ghana a ŋwàklù a nyə̂.”

(Mat 11.25-27; 13.16-17)

21À hì mô kə yu afû, yohnà yulena ni Jisòs hì saŋle nâ haŋaŋ ki jə̂m na, “Bâ mù, Bâba we wù saka nyə nì chyə, mu fô àyòŋnà ha wò beka wò ti let gha ghɨ̂n ha ghɨt ghe ghɨna kwàktè na ghɨna tofalò. Chwûtì ha ngwònu hamok a Bâ, à kòŋà kə wò hi nì ni.”

22Te wù tì jìsa ni, kaha jis ha jùmtìbàmsu wunsu na, “Bom ti fô mwə̀ mù jɨ̀m ha mu. Wùt fate khə wi wùt we Wan wùna mò wunù, a bu kə Bì. Wùt fate khə wi wùt we Bì mò wunù a bu kə Wan nì ghɨt ghe Wan chwoka hi chwùtè Bì ha ghɨna.”

23Wù jis ni, kahi wu wun nyamti jis ha jùmtìbàmsu wunsu lesu na, “Jùŋ mò ha ghɨt ghe ghɨna yena gha ghe ghàn yena! 24Mu jìsà ha ghàn na, fòktìsù chiksu dosu nì fə̂ntù ndùku kôŋàlò hi yen a gha ghe ghàn yena, fê kôŋà hi ywo gha ghe ghàn ywo, biyani yi faŋ hi gàn.”

Ngàn à wùt à Sàmaliyà wù jùŋ

25Chichà yì sak wùlè timi a nyə̂ hi mòmhè Jisòs buf na, “Chichà, mu mò hi nè nâ ghə hi bè khɨti chyəna ghe ghɨ bè mê wi agha?”

26Jisòs kaha buf ha wun na, “Ghɨ nyak na ghə a Musìs ŋwàklù làŋ agha? Wò taŋa ywo na ghə atɨ̂n?”

27Wùt àtɨ̂n fîsì na, “Wò kəta hi tè kòŋà Bâba Yènfù nì təm gha à jɨ̀m nì yohnà gha à jɨ̀m nì jyak gha à jɨ̀m nì kwâktì ya yì jɨ̀m fê kôŋà wâ nâ te wò kòŋà ngɨŋ yâ.”

28Jisòs jis ha wun na, “Wò ti fîsì kə nâ jûŋ. Ndù ma hi nê yâ ma wò bê khɨti chyəna ghe ghɨ bè mê wi.”

29Chichà yi sak wuna mômhì hi chwùtì na gha ye yi ye hì bufa yi yê mò yi ghəl, fî kaha buf ha Jisòs na, “Wâ nôm mò nde agha?”

30Jisòs fîsì ki jîs na, “Wùt tì lo a Jèlusalèm hì chwo yênà a Jèlikù. Ghɨt a chwoŋana khɨti wûn chwokti njusu wunsu, sam wûn, wù faŋ kə fùjiti hi kpû. 31Yi gan na ngàŋ à ndâ Fùyèn yìlè ndùku chwo yênà kəbi wu lum afû, wù yen te wùt àtɨ̂n nìŋe, wù mbâmtì chyâ. 32Wùlè hi fê chyâ kəbi wu lum afû, a mô wut yì fèt a ndâ Fùyèn, ma wù fwo a Lefì sah yi nda yen te wù nìŋe a chyə̂ boŋ chyâ kə yâ. 33Biyani wùt yi lak yi Sàmaliyà wùlè hì yênà yi gbî chya kəbi wu lum afû, boŋ yen wûn, seni kwo wûn 34Wù su lemtu wun tê, yok nì fo, kwut nì bâh à sùnju, lyi wûn kokhi a wun a tô nyàm, yen nì wûn a ndâ ghɨt a benana, chyə tôknà nì wûn afû. 35Tuku yû, wù fihi ka a wun a bàlì fo ha bè à ndâ àtɨ̂n jis na, ‘Wò tokna nì wùt wunâ. Wò faŋ kpenhi nâbi ghə a tô wu ka afân, ma mu nê bu hi kaha bèn, ma mu lak ha wò.’”

36Jisòs jis mihì ki buf ha chichà yì sak wuna na, “A wo yi kwàktì à mò wùni atɨ̂n à ghɨt ghɨ̂n à tât a wù tì chwute na yi mò wâ nè wùt mu we ghɨt a chwoŋana tì khɨte?”

37Wù fîsì na, “À mò we wù tì chwùte seni kwolani ha wûn.”

Jisòs ki jîs ha wun na, “Wù yen, ma wù hi nê kə yâ.”

Jisòs jikti Matà ghê Mèli

38Jisòs ghê jùmtìbàmsù wunsu hì gbê yênà, lyi a yi tèk yile, wùt ywên wùlè mô atɨ̂n ghɨ toŋte na Matà. Jisòs lye a wun a ndâ, wù fyi wûn nâ jûŋ. 39À ndùku mô Matà kəta wâ nè wun wùlè yet yi wuni mô Mèli. Mèli ben ndokò a Bâba ashyə̂ hì yute yikî wuni. 40Matà hi fuma nì fêt yì doni, ben ha Jisòs jis na, “Bâba, wò yena wi na wâ nôm ti de mu na mu hi fuma nì fêtì kə mu nɨ̂ŋ agha? Jìs ha wun na wù bê gamti mu.”

41Bâba toŋti Matà jis ha wun na, “Matà, Matà, wò nè gha fo ngə̂k ha wò dô kə ni. 42Biyani à mò kə yi gha yì mòk ye wùt kəta hi kwàktì. Mèli ti lyi gha jûŋì tɨni, ghɨ bu hi fê fyi ha wûn.”

Currently Selected:

Lûk 10: bmv

Highlight

Copy

Want to have your highlights saved across all your devices? Sign up or sign in

Learn More About Ŋwàklù Fùyèn Kàn Mù Fê (Cameron)